Yesuusi Gatisannonkehu Hiittoonniiti?
Qullaawu Maxaafi mayyaanno?
Yesuusi ammanamino manna gatisate heeshshosi wodo asse uyino. (Maatewoosi 20:28) Konni daafira Qullaawu Maxaafi Yesuusa, “alamete Gatisaancho” yaanno. (1 Yohaannisi 4:14, Haaro Gondooro) Qoleno togo yaanno: “Gato wolewa ayewano dino. Gatote hasiisannonkehu mannaho uyinoonni suꞌmi gordoho woroonni wolu dino.”—Soqqamaasinete Looso 4:12.
Yesuusi iso ammananno manni “baalunku daafira reyino.” (Ibiraawoota 2:9; Yohaannisi 3:16) Hakkunni gedensaanni ‘Maganu iso reyotenni kayisinosi’; hakkiinni Yesuusi ayyaanu biso uddiꞌre iimira haꞌrino. (Soqqamaasinete Looso 3:15) Yesuusi iima, “insara Magano huuccara hegereha ikke heeꞌranno daafira, isi widoonni Maganunniwa daggannore baala horontanni gatisansara dandaanno.”—Ibiraawoota 7:25.
Yesuusi ninke daafira Magano huuccannohu mayiraati?
Ninke baalunku cubbaataammaho. (Roomu Sokka 3:23) Cubbu ninkenna Maganu mereero boono kalaqino; qoleno reyote widira qole massanno. (Roomu Sokka 6:23) Yesuusi kayinni wodote kakkalo ammantannori daafira ‘Maganu albaanni sae coyiꞌramannoho.’ (1 Yohaannisi 2:1) Yesuusi, Maganu huuccattonsa macciishshanno gedenna wodote kakkalo widoonni cubbonsa aguranno gede insa daafira huuccanno. (Maatewoosi 1:21; Roomu Sokka 8:34) Insa Maganu fajjo ledo sumuu yite heedhanno daafira, Yesuusi insa daafira huuccanno huuccatto Maganu macciishshanno. Maganu Yesuusa soyinohu alame isi widoonni ‘gatisate yeeti.’—Yohaannisi 3:17.
Gatate Yesuusa ammana calla ikkitanno?
Diꞌꞌikkitanno. Gato afiꞌrate Yesuusa ammana hasiissannota ikkiturono, hakkiinni sainore assa hasiissanno. (Soqqamaasinete Looso 16:30, 31) Qullaawu Maxaafi, “Loosu ledo nookki [ammana] reyitinote” yaanno. (Yaiqoobi 2:17) Gatate kawiinni aane noore assa hasiissannonke:
Yesuusinna Annisi Yihowa daafira rosa.—Yohaannisi 17:3.
Yesuusinna Yihowara noonke ammana kaajjishiꞌra.—Yohaannisi 12:44; 14:1.
Ammana noonketa leellishate hajajonsa ayirrisa. (Luqaasi 6:46; 1 Yohaannisi 2:17) Yesuusi, gato afiꞌrannohu iso “Mootichaꞌya” yaannoha baala ikkikkinni Annisi ‘yiinore wonshannoha’ ikkinota rosiisino.—Maatewoosi 7:21.
Qarru heeꞌrirono ammananke cuꞌmiꞌne heeꞌra. Yesuusi tenne kulanni togo yiino: “Goofimarchu geeshsha cince kaajjannohu kayinni gatanno.”—Maatewoosi 24:13.