Ayyaanaamittete Maatekkiwa Gamba Yite Heeꞌri

1. Ammanamino manni Yihowa mayyee woshsha dandaanno?

‘KALAQAMU baalunkura umiidiha’ ikkinohu Yesuusinna kiirre tunqannikki sokkaasine Yihowa maate widooti. (Qol. 1:15; Far. 103:20) Yesuusi uullate aana noo waro, ammanamino manni Yihowa Annankeeti yaa dandaannota rosiisino. Yesuusi rosaanosira coyiꞌranni, Yihowa ‘Anniꞌyanna Anniꞌne’ yiino. (Yoh. 20:17) Heeshshonke Yihowara sayinse uyine cuuammeemmo woyite, mimmito baxxanno roduuwi noo maate wido ikkineemmo.—Maq. 10:29, 30.

2. Konni birxichira maa ronseemmo?

² Mitootaho Yihowa baxillaancho Annaati yee heda qarra ikkitannonsa. Wolootu kayinni roduuwinsara baxille leellishshanno gara afa hooggara dandiitanno. Konni birxichira Yesuusi, Yihowa baxannonkehanna isiwa shinqammora hasiꞌrannoha shaqqado Anna ikkinota huwanteemmo gede kaaꞌlannonkehu hiittoonniitiro ronseemmo. Qoleno Yihowa lawishsha harunsine roduuwinkera baxille leellisha dandiineemmohu ma garinniitiro laꞌneemmo.

YIHOWA ISIWA SHIQATTORA HASIꞌRANNO

3. Yesuusi rosiisino huuccatto Yihowawa shinqeemmo gede kaaꞌlitannonkehu hiittoonniiti?

³ Yihowa baxillaancho Annaati. Yesuusi Yihowa hajaja calla egenninohu kaajjadu gashshaanchi gede ikkikkinni shaqqadu Anni gede asse laꞌꞌanno; qoleno, ninkeno iso hakko garinni laꞌnammora hasiꞌranno. Yesuusi rosaanosira rosiisino huuccatto tenne leellishshanno. Isi huuccatto hanafi woyite, “Annanke” yiino. (Mat. 6:9) Yesuusi Yihowa ‘Woꞌmanka Dandaatto Magano,’ “Kalaqaancho” woy “hegere Moote” yitine huuccidhe yee rosiisoommerono soꞌro diꞌꞌikkanno; mayira yiniro, Qullaawu Maxaafi Yihowa hatto yaanno. (Kal. 49:25; Isa. 51:13; 1 Xim. 1:17) Isi kayinni Yihowa “Annanke” yitine huuccidhe yiino.

4. Yihowa isiwa shinqammora hasiꞌrannota mayinni anfeemmo?

⁴ Yihowa shaqqadu Anni gede assite heda qarrissannohe? Ninke giddo mitootaho tini qarrissannonke. Ilinonke anni baxille leellishikki lossinonkeha ikkiro, baxillaancho anna yinanniri leella giwankera dandaanno. Yihowara kayinni qarrinke leellannosita afanke lowo geeshsha sheshifachishshannonke! Yihowa, isiwa shinqammora hasiꞌranno. Qaalisi “Maganunniwa shiqqi yiiyye; isino kiꞌnewa shiqqi yaanno” yee jawaachishannonkehu iseraati. (Yai. 4:8) Yihowa lubbora baxannonke; qoleno taalle nookki Anna ikkannonketa coyiꞌrino.

5. Luqaasi 10:22 kultanno garinni, Yesuusi Yihowawa shinqeemmo gede kaaꞌlannonkehu hiittoonniiti?

⁵ Yesuusi, Yihowawa albinni roore shinqeemmo gede kaaꞌlannonke. Yesuusi Yihowa seekke egennino; qoleno akattasi woꞌmunni woꞌma leellishino. Hakko daafira, “Ane afinohu annaꞌyano afino” yiino. (Yoh. 14:9) Yesuusi bayiru rodii gede ikke, Annanke ayirrisanna isira hajajama dandiineemmo gara, Annanke dadillisanno coyiwiinni xeertiꞌra dandiineemmo gara, hattono Iso hagiirsiisa dandiineemmo gara rosiisannonke. Roorenkanni kayinni, Yesuusi uullate aana heeꞌrino heeshsho Yihowa mageeshshi geeshsha shaqqadohoronna baxillaanchohoro leellishshanno. (Luqaasi 10:22 nabbawi.) Hanni mito lawishsha laꞌno.

6. Yihowa, Yesuusi huuccatto macciishshinota leellishanno lawishsha kuli.

⁶ Yihowa oososi hasaawissannosi woyite macciishshanno. Hanni Yihowa bayiru Beettisi assiꞌrino huuccatto macciishshino gara laꞌno. Yihowa, Beettisi uullate aana noo waro huucciꞌrinota batinye huuccatto macciishshinoti dihuluullissannote. (Luq. 5:16) Yesuusi jajjabba coye assara kae heeꞌre assiꞌrino huuccatto, lawishshaho 12 soqqamaasinesi doori woyite huucciꞌrino huuccatto Yihowa macciishshino. (Luq. 6:12, 13) Yesuusi lowo geeshsha dadille heeꞌre huucciꞌrino huuccattono Yihowa macciishshino. Yesuusi, Yihudi sayise hirasira albaanni, albasiinni noo fonqolo qeele saꞌꞌanno gede kaaꞌlasira Annasi eeggifate huucciꞌrino. Yihowa muxxe Beettisi huuccatto macciishshinoha calla ikkikkinni, jawaachishannosi gede sokkaasincho soyino.—Luq. 22:41-44.

7. Yihowa huuccattonke macciishshannota hendeemmo woyite mayi macciishshamannonke?

⁷ Yannankerano Yihowa soqqamaasinesi assidhanno huuccatto macciishshanno; qoleno maltino yannara woyyitino doogonni huuccattonkera dawaro qolanno. (Far. 116:1, 2) Hanni Hindete gobbara heedhannoti mitte rodoo tenne heeshshosenni laꞌino gara laꞌno. Ise quwa saꞌino yaaddo waaddannose; hakko daafira Yihowa kaaꞌlasera eeggifatte huuccidhino. Ise togo yite borreessitino: “Onkoleessa 2019 Biroodikaastera fulinohu yaaddo gargadha dandiinanni gara kulanno rosi, hasiise nooe yannara fulinoho. Kuni rosi Yihowa huuccattoꞌyara qolino dawarooti.”

8. Yihowa Yesuusa baxannota leellishinohu hiittee doogganniiti?

⁸ Yihowa, Yesuusi uullate aana noo yanna baalantera baxillesi leellishinosinna towaatinosinte gede, ninkeno baxannonke hattono towaatannonke. (Yoh. 5:20) Yihowa Yesuusira ammanasi kaajjitanno gede kaaꞌlinosi, yaaddo amaddusi woyite jawaachishinosi, hattono maalaamittete hasiisannosire uyinosi. Yihowa Beettosi baxannotanna isinni hagiidhannota xawise coyiꞌrino. (Mat. 3:16, 17) Yesuusi baxillaanchu iimi Annisi woꞌmanka woyite ledosi nootanna kaaꞌlannosita afino daafira, horo dicallatino.—Yoh. 8:16.

9. Yihowa baxannonketa leellishannori maati?

⁹ Yesuusi gede ninkeno Yihowa baxille duucha doogonni qamansoommo. Hanni hedi: Yihowa jaallasi ikkineemmo gede assinonke; qoleno baxxannonketanna jawaachishshannonketa ayyaanaamittete maate uyinonke. (Yoh. 6:44) Hakkiinni saeno, Yihowa kiꞌannota ayyaanaamittete sagale woꞌmanka woyite aannonke. Heeshshote hasiissannota maalaamittete sagaleno aannonke. (Mat. 6:31, 32) Yihowa baxannonke gara hiincineemmoha ikkiro, isira noonke baxilli lexxanno.

AYYAANAAMITTETE MAATEKKI YIHOWA BAXANNO GARINNI BAXI

10. Yihowa roduuwinkera baxille leellishanno doogonni maa ronseemmo?

¹⁰ Yihowa roduuwanke lowo geeshsha baxanno. Ninkera kayinni ayyaanaamittete maatenke baxanna insara baxille leellisha mito woyite qarra ikkitannonke. Budinkenna lophinoommo gari mitto diꞌꞌikkino. Qoleno ninke baalunku woloota koffi assineemmonna hanqinseemmo woyiti no. Ikkirono, ayyaanaamittete maatenke mereero noo baxilli lexxanno gede kaaꞌla dandiineemmo. Hiittoonni? Iimi Anninke baxille leellishanno garinni ninkeno roduuwinkera baxille leellinshe konne assa dandiineemmo. (Efe. 5:1, 2; 1 Yoh. 4:19) Hanni Yihowa lawishshinni maa ronseemmoro laꞌno.

11. Yesuusi Yihowa ‘mararro’ leellishinohu hiittoonniiti?

¹¹ Yihowa “mararaanchoho.” (Far. 145:8) Mararanno manchi qarramino manna laꞌꞌanno woyite dadillanno; qoleno togoo manchi qarraminoha kaaꞌlannonna sheshifachishanno doogo hasiꞌranno. Yesuusi mannaho baxille leellishino gari, Yihowa mararro leellishannoho. (Yoh. 5:19) Yesuusi mitte hige gamba yee noo manna lai woyite, mannu “allaalaanchu nookki geꞌreewi gede ikke qarramenna gara hawe noo” daafira ‘mararinonsa.’ (Mat. 9:36) Yesuusi mararannoha ikkinota loosunnino leellishino. Isi dhiwantinore hursino, hattono ‘daafurtinorenna duhu ayirrinonsare’ fooliishshiishino.—Mat. 11:28-30; 14:14.

12. Roduuwanke mararreemmota leellisha dandiineemmohu hiittoonniiti?

¹² Roduuwanke mararreemmota leellishate, balanxe insara mayi qarri iillanni noonsaro heda hasiissannonke. Lawishshaho, mitte rodoo dhiwanni waadannoseha ikkara dandaanno. Ise qarrase hasaawa baxxannokkiha ikkirono, mitore assine kaaꞌlinisero kayinni hagiidhitara dandiitanno. Miteekkite isera maatese towaaxxa qarra ikkitinoseha ikkara dandaanno. Sagale worre woy mine fiine kaaꞌla dandiinammosekka? Woy mittu rodii loososi hooginoha ikkara dandaanno. Kuni rodii wole looso afiꞌra geeshsha, ninke uyinoommosita kullummokkinni shiima woxe uyine kaaꞌla dandiinammo ikka?

13-14. Yihowa gede shaqqille leellisha dandiineemmohu hiittoonniiti?

¹³ Yihowa shaqqado Maganooti. (Mat. 5:45) Roduuwanke mararreemmota leellishate, insa kaaꞌlenke yita geeshsha agara dihasiissannonke. Yihowa gede ninkeno kuꞌlininkekkinni danchare assa dandiineemmo. Isi xeena ninke kuꞌlinummokkinni aannonke! Qoleno xeenu galatanno mannira calla ikkikkinni baalunkura kaaꞌlanno. Yihowa hasiisannonkere aasi baxannonketa leellishshannota diꞌꞌikkitino? Yihowa shaqqadonna elannoha ikkino daafira lowo geeshsha banxeemmosi!

¹⁴ Batinyu roduuwinke iimi Anninke lawishsha harunsite, uminsanni shaqqille leellishshanno. Lawishshaho, 2013nni Heyani yinanni hambabalatte Filippiinsi gobbara lowore gawajjitino. Batinyu roduuwinke minensanna jajjansa hooggino. Ikkollana, alamete doyichora nooti ayyaanaamittete maatensa rakke kaaꞌlitinonsa. Lowo roduuwi woxe fushshite kaaꞌlitino, hattono roduuwaho mine minanna gatamara kaaꞌlitino; konni garinni mitto diro woꞌmitinokki yanna giddo 750 meddi yaanno mine galagalle minnoonni! Koroonu fayya ubbu yannara, Yihowa Farciꞌraasine roduuwansa kaaꞌlate diinaggaabbe loossino. Ayyaanaamittete maatenke kaaꞌlate jawaanteemmoha ikkiro, banxeemmonsata leellisheemmo.

15-16. Luqaasi 6:36 kultanno garinni, iimi Anninke faale haꞌra dandiineemmoti mitte doogo hiitteeti?

¹⁵ Yihowa maarannohonna gatona yaannoho. (Luqaasi 6:36 nabbawi.) Iimi Anninke barru baala gatona yaannonke. (Far. 103:10-14) Yesuusi rosaano guuntete xeꞌne noonsareeti; ikkirono isi maarinonsa hattono gatona yiinonsa. Isi cubbinkera maaro afiꞌneemmo gede heeshshosi nafa sayise uyino. (1 Yoh. 2:1, 2) Yihowanna Yesuusi maartannorenna gatona yitannore ikkansa, albinni roore insawa shinqeemmo gede diassitannonke?

¹⁶ ‘Mimmitinke sao agurreemmoha’ ikkiro, ayyaanaamittete maatenke mereero noo baxilli lexxanno gede assineemmo. (Efe. 4:32) Hige wolootu sao agura qarra ikkitannonke woyiti no; hakko daafira, maarreemmore ikkate sharrama hasiissannonke. Mitte rodoo Agarooshshu Shaera fulinohu “Mimmito Mulla Gatona Yiiyye” yaanno birxichi tenne assate kaaꞌlinoseta coyidhino.b Ise togo yite borreessitino: “Konne birxicho xiinxallaꞌya, woloota gatona yuummaro afiꞌreemma horo wodancheemma gede kaaꞌlitinoe. Kuni birxichi kulanno garinni, woloota gatona yineemmo yaa busha assootensa danchuri gede assine laꞌneemmo yaa woy assootinsa gawajjinonkekkihu gede ikkineemmo yaa diꞌꞌikkitino. Ikkollana gatona yaa, koffi yaa aguratenna keerinke baꞌꞌannokki gede assiꞌrate.” Roduuwinke sao mulla gatona yineemmoha ikkiro, roduuwanke banxeemmorenna iimi Anninke Yihowa faale haꞌneemmore ikkinoommota leellinsheemmo.

YIHOWA MAATE WIDO IKKAꞌNE NAADDE

17. Maatewoosi 5:16 kultanno garinni, iimi Anninke ayirranno gede assa dandiineemmohu hiittoonniiti?

¹⁷ Mimmito baxxanno roduuwi noote alamete doyicho maate miila ikka ninkera lowo ayirrinyeeti. Dandaami deerrinni batinyu manni daye ninke ledo Maganonke magansiꞌrara hasiꞌneemmo. Konni daafira, mannu Yihowanna mannisi daafira gara ikkinokkire hedanno gede assannore mittoreno assa dihasiissannonke. Amanyootinke mannu dancha duduwo macciishshe adhanno gede assannoha ikkanno gede sharrammeemmo.—Maatewoosi 5:16 nabbawi.

18. Waajjinummokkinni farciꞌneemmo gede kaaꞌlannonkeri maati?

¹⁸ Iimi Anninkera hajajammeemmo daafira mito woyite mannu qacifatankera woy xiiwankera dandaanno. Ammananke daafira farciꞌneemmo woyite waajjineemmoha ikkirona? Yihowanna Beettisi kaaꞌlitannonketa addaxxa dandiineemmo. Yesuusi rosaanosi mayite coyidhannoronna ma garinni coyidhannoro yaada hasiissannonsakkita kulinonsa. Mayira? Yesuusi togo yiino: “Hatte yannara coyidhinanniri kiꞌne ikkitinikkinni, giddoꞌne heeꞌre coyiꞌrannohu gordu Anniꞌnehu Qullaawa Ayyaanaati.”—Mat. 10:19, 20.

19. Waajjikkinni farciꞌrino rodii woꞌnaalsha kuli.

¹⁹ Hanni Roduu Rooberti lawishsha laꞌno. Isi alba haarote Qullaawa Maxaafa xiinxallanni noo yannara, Wodiidi Afirikira yoote minira massinoonnisi. Isi ammanate roduuwasi baxanno daafira poletiku coyira eannokkita yoote minira waajjikki kulino. Isi Yihowa maate wido ikkasi lowo geeshsha baxino! Hakkiinni daanyu hedeweelcho, “Roduuwikki ayeooti?” yee xaꞌmisi. Rooberti hatto yine xaꞌminannie yee dihedino; kayinni bayichonko hakko barri qummeeshsha qaagino. Hakko barri qummeeshshi Maatewoosi 12:50te; qummeeshshu togo yaanno: “Gordoho heeꞌrannohu Anniꞌya hedinore wonshannohu baalu [anera] labbaa rodooꞌyaati, meyaa rodooꞌyaatinna amaꞌyaati.” Rooberti hakkawote gariti Qullaawu Maxaafi egenno noosikkiha haaro rosaancho ikkirono, Yihowa ayyaani hattee xaꞌmonna hedeweelcho xaꞌminoonnisita wole haammata xaꞌmo qolanno gede kaaꞌlinosi. Yihowa Rooberti assinore lae lowo geeshsha hagiidhinoti egennantinote! Ninkeno qarra ikkannori heeꞌrirono, waajjinummokkinni farciꞌrate Yihowa addaxxineemmoha ikkiro, iso hagiirsiisa dandiineemmo.

20. Maa assate murciꞌra hasiissannonke? (Yoh. 17:11, 15)

²⁰ Baxillu woꞌminoti togooti ayyaanaamittete maate noonke daafira baꞌraaꞌnoommoreeti. Taalle nookki Anninna baxxannonke roduuwi noonke! Konne atoote mulluri gede assine laꞌꞌa dihasiissannonke. Sheexaanunna miillasi iimi Anninke baxannonketa huluullammeemmo gede assatenna mereeronke noo mittimma hunate sharrantanno. Ikkirono Yesuusi, mittimmanke baꞌannokki gede Anninke agarankera ninke daafira huuccatto assino. (Yohaannisi 17:11, 15 nabbawi.) Yihowa hattee huuccattora dawaro qolanni no. Yesuusi gede ninkeno iimi Anninke baxannonketanna irkisannonketa addaxxino. Qoleno ayyaanaamittete maatenkewa albinni roore gamba yine heeꞌrate murciꞌno.