Nabbawaano Xaꞌmitanno Xaꞌmo
Yesuusi “Keere abbammora dayommoha lawoonkeꞌne” yiinohu mayyaateeti?
Yesuusi duduwinoti keeru sokkaati. Ikkirono isi rosaanosira mitte yannara togo yiino: “Ani baattote aanira keere abbammora dayommoha lawoonkeꞌne. Ani ola ikkinnina keere abbammora didayommo. Ani labbaa beetto annu aana, meyaa beetto amate aana, beettu beetto ballote aana kayisammora dayommo.” (Mat. 10:34, 35) Yesuusi hatto yiinohu mayyaateeti?
Yesuusi maatete miilla mimmituwiinni babbada dihasiꞌranno. Ikkollana isi rosiisanno rosi mite maate mereero babbadooshshu heeꞌranno gede assannota afino. Hakko daafira Kiristoosi rosaano ikkanna cuuama hasidhannori doorshinsa abbanno guma huwata hasiissannonsa. Insa Yihowa Farciꞌraasine ikkitinokki galtensa woy wolu mininsa manni giwannonsa woyite Kiristoosi rosiisino rosira ammanante heeꞌra qarra ikkitansara dandiitanno.
Qullaawu Maxaafi Kiristaanu mannu baalunku ledo ‘keere heeꞌranno’ gede jawaachishanno. (Rom. 12:18) Kayinni Yesuusi rosiisinori mite maatera ‘olu’ gede ikkara dandaanno. Mittu maatete miili Yesuusi rosiisino roso harunsanna wolootu gibburo togoori kalaqamara dandaanno. Togoo woyite halaale rosanni noohura minisi manni “diina” ikkannosi.—Mat. 10:36.
Ammaꞌnotenni bebbeehantino maate giddo heedhannori Yesuusi rosaanora, mito woyite Yihowanna Yesuusa woy fiixansa hagiirsiissannoro doodhitanno gede assannori tuncu yaannonsa. Lawishshaho Yihowa Farciꞌraasine ikkinokki fiixinsa Magano hagiirsiissannokki ayyaanna ayirrissanno gede xixxiiwansara dandaanno. Togoo woyite insa aye hagiirsiissannoro doodha hasiissannonsa. Yesuusi togo yiino: “Anenni roorse annasinna amasi baxannohu aneha ikka didandaanno.” (Mat. 10:37) Hige Yesuusi isi rosaano ikka hasidhannori annansanna amansa albi geeshsha baxa agura hasiissannonsa yaanni nooha diꞌꞌikkino. Hatteentenni isi heeshshonsa giddo balaxisiisa hasiissannonsa coye rosiisanni noonsa. Yihowa Farciꞌraasine ikkitinokkiri maatenke miilla Yihowa magansiꞌrate assineemmore gibburono insa baxa diagurreemmo. Kayinni baalunkunni roorsine Magano baxa hasiissannonketa dideꞌneemmo.
Maatenke gibbannonke woyite lowo geeshsha xissiisiꞌneemmoti dihuluullissannote. Ikkirono rosaanosi Yesuusi yiinore qaaga hasiissannonsa. Isi togo yiino: “Umisi masiqala duqqe hoodeꞌya daannokkihu aneha ikka didandaanno.” (Mat. 10:38) Wole yaattonni Kiristaanu maatensa gibbannonsata Kiristoosi rosaano ikkitino daafira iillannonsa qarri gede assite laꞌꞌa hasiissannonsa. Kayinni insa Yihowa Farciꞌraasine ikkitinokkiti maatensa miilla dancha akatansa laꞌe hedonsa biddi assidhannotanna Qullaawa Maxaafa xiinxallitannota hexxitanno.—1 Phe. 3:1, 2.