Jooga Ikka Hayyote
Antooniya yinanniti geerra towaattannoti loosoho martino mini waalchi dowwola gantuta mitte 50 diri balla ikkannose mancho waalcho fantu. Tini mancho geedhitinota amase towaatate Antooniya balaxxe dagginokkihura xontuse, hattono hanqite coyidhuse. Antooniya kayinni loosoho dibarrisidhino. Ikkollana Antooniya kalaqamino qarrira shaqqillunni mancho maaro xaꞌmidhu.
WOLE yannara Antooniya hatte mancho minira martuta xaano mancho boroortuse. Antooniya maa assituyya? Ise togo yitino: “Kuni fonqolanno coyeeti. Ise beebballa xontinoe.” Ikkollana tenne yannarano Antooniya manchote iillinose qarra affinota kulte ise maaro xaꞌmidhino.
Ati Antooniya ikkoottoro maa assatto? Manchote joongillunni dawarate woꞌnaalattonso, hanqo eemadha qarra ikkitannohe? Aleenni kulli gedee coye iillannonke yannara gaꞌlabbi yaa shota ikka hooggara dandiitanno. Daafurre heeꞌneemmo wote woy gara ikkinokkire coyiꞌnanninke yannara manna shaqqillunni hasaawisa shota ikka hooggankera dandiitanno.
Qullaawu Maxaafi Kiristaanu jooguulle ikkanno gede jawaachishanno. Maganu Qaali joongillu hayyote ledo xaado afiꞌrinota kulanno. Yaiqoobi 3:13 togo yitanno: “Kiꞌne giddo hayyichunna egennaamu ayeti? Hayyotenninna joongillunni loosinoha dancha looso heeshshosinni leellisho.” Joongillu iimi hayyooti yineemmohu mayiraati? Kuni Magano hagiirsiisanno akati heeꞌrannonke gede kaaꞌlannonkeri maati?
JOOGA IKKA HAYYOTE
Joongillu gibbo qiissanno. “Shaqqadu arrawi hanqo qiissanno; kaajjadu qaali kayinni hanqo kakkayisanno.—Law. 15:1.
Mittu manchira hanqine qola, giirate aana laamba dunate gede ikkitinohura, coyi roore bushanno gede assitanno. (Law. 26: 21) Shaqqadu qaalinni coyira kayinni duucha wote coyi qiidanno gede assitanno. Tini hanqe aaraawino manchi nafa gaꞌlabbi yaanno gede assitara dandiitanno.
Antooniya tini adda ikkinota huwattino. Mancho Antooniya awu afiinni hasaawissuseta wiꞌlitino. Mancho iseranna maatesera iillino qarrinni kainohunni baasa yaaddinota kultinose. Antooniya tenne manchora dancha gede farcidhino; hattono Qullaawa Maxaafa xiinxallisa hanaffino; kuni ikkinohu Antooniya jooganna salaame hasidhannota ikkitinohuraati.
Joongillu hagiirsiisanno akataati. “Jooguullu baꞌraadhinoreeti; baattono ragidhannona.”—Mat. 5:5.
Jooguullu hagiidhitannohu mayiraati? Alba hanqaaleeyye ikkinohu batinyu manni joogoota ikki gedensaanni hagiirraamma ikkino. Heeshshonsa woyyaabbino, hattono albillittete dhaggete hexxo noonsata huwatino. (Qol. 3:12) Ispeenete gobbara woradu aliidi laꞌꞌaancho ikke soqqamannohu Adolfo halaale macciishshara albaanni heeshshosi hiittootero qaage coyiꞌrino.
Adolfo togo yiino: “Alba heeshshoꞌya alaamu nookkite. Hanqu duucha wote naaxxaleessa ikkeemmo gede assinoe; hanqe coyiꞌreemmohura jaallaꞌya nafa waajjitannoe. Gedensaanni kayinni heeshshoꞌya soorrannori ikki. Mitte hige gibbo kaꞌeenna lee base saanjunni qanse madiissineennae reye hooge gatoommo.”
Xa Adolfo coyiꞌrannorinninna lawishshunni wolootu jooguulle ikkitanno gede rosiisanni no. Batinyu manni isiwa ruxxi yiikkinninna hagiidhanni shiqanno. Adolfo heeshshosi woyyaabbino daafira hagiirraamo ikkinota coyiꞌrino. Qoleno jooga ikkanno gede kaaꞌlinosihura Yihowa galatanno.
Joogoota ikka Yihowa hagiirsiissanno. “Beettoꞌya, xontannoerira dawaro qola dandeemmo gede, egennaamo ikki; aneno hagiirsiisie.”—Law. 27:11.
Yihowa diina ikkinohu Daawuloosi Iso xonino. Maganu tennera hanqa dandaannoha ikkirono, Qullaawu Maxaafi Yihowa ‘hanqoho muddamannokkiha’ ikkinota kulanno. (Ful. 34:6) Ninkeno hanqoho muddammeemmokkirenna joogoota ikkine Maganu faale haꞌrate sharrammeemmoha ikkiro, Yihowa hagiirsiissanno hayyo noonketa leellinsheemmo.—Efe. 5:1.
Heeꞌnoommo alame gibbo woy gaance woꞌmitinote. ‘Naaxxaleeyye, booꞌnaleeyye, xonamaano, hemaano, umonsa qeeꞌlannokkinna mararro afiꞌrinokki’ manninni xaandammora dandiineemmo. (2 Xim. 3:2, 3) Ikkirono tini Kiristaanu joogoota ikkannokki gede diassitannonsa. Maganu Qaali iimi hayyo ‘keere baxxannotanna gaꞌlabbitte’ ikkitinota kulanno. (Yai. 3:17) Keere banxeemmorenna gaꞌlabboota ikkinummoro, iimi hayyo noonketa leellinsheemmo. Togoo hayyo, mannu hanqisannore coyiꞌrannonke yannara shaqqillunni dawarreemmonna gawalo nookki hayyo Buicho ikkinohu Yihowawa albinni roore shinqeemmo gede assitannonke!