Baqqi Yine Agadha Hasiissannonkehu Mayiraati?

1. Heeꞌnoommo yanna hiittooteronna, yannankera ikkanni noore huwata hasiissannonkehu mayiraatiro lawishshunni kuli. (Hanafote noo misile lai.)

QOQQOWU gambooshshi pirogiraame hanaffaraati. Madirakete liqambartichi madirake fule, boode yanna giddo gambooshshu hanafannota kulanno. Tini yanna gambooshshe dayino manni ofolle, Agarooshshu Shaeti muuziiqu gaamo miilla qixxeessitino muuziiqa macciishsha hanafanno yannaati; tini aane shiqanno rosi daafira hedate kaaꞌlitannonsa. Mitu manni kayinni kawa kaꞌa haꞌramanninna jaallansa ledo hasaawanni noo daafira, pirogiraame hanaffara rakkinota dihuwatino. Insa tini maa assinanni yannaatiro, hattono gambooshshu basera ikkanni noore, yaano liqambartichu madirake fule noota, muuziiqa fanne heeꞌnoonnitanna macciishshaano ofolte macciishshitanni noota diwodanchino. Tini ikkito, rosiissannonkeri no; korkaatuno muli barra ikkannohu baqqi yine agadha hasiissannonkehu mittu coyi no. Hakku coyi maati?

2. Yesuusi rosaanosi baqqi yite agadhitara kulinonsahu mayiraati?

² Yesuusi ‘goofimarchu’ diri daafira coyiꞌri yannara rosaanosi, “Yanna mamooteetiro diaffinoonnina feeffattine agadhe” yiinonsa. Hakkiinnino Isi marro marro hige, “Jaatte” yiinonsa. (Mat. 24:3; Maarqoosi 13:32-37 nabbawi.) Yesuusi Maatewoosi maxaafirano rosaanosi baqqi yite agadhitara kulinonsa; togo yiinonsa: “Konnira Mootichu ma barra daannoro affinoonnikki daafira, feeffattine agadhe; . . . Manchi Beettino heddinoonnikki saatera daanno daafira qixxaabbine heedhe.” Isi lede togo yiinonsa: “Kunnira barranna saate diaffinoonnina jaattine agadhe!”—Mat. 24:42-44; 25:13.

3. Yesuusi uyino qorowishsha illachinsheemmohu mayiraati?

³ Yihowa Farciꞌraasine ikkinoommo daafira Yesuusi qorowisiisino qorowishsha lashshi diassineemmo. Heeꞌnoommohu “kalqete goofimarchi” daate mereersiꞌre noo yanna giddooti; qoleno “lowo qarri” woy bayiru qarri hanafara gattino yanna shiimate! (Dan. 12:4; Mat. 24:21) Yannankera olu batiꞌrinota, amanyootu maaeelle lexxitanni hadhanni noota, higgete hajajamannokki manni woꞌminota, hattono hude, dhibbunna baattote huxano noota laꞌnanni heeꞌnoommo; qoleno batinye ammaꞌnora kadde amaddannori bainonsa. Anfummonte gede gobba gosate heeꞌrannohu Yihowa manni Mangistesiha sabbakate looso dhagge ikkanno garinni loosanni no. (Mat. 24:7, 11, 12, 14; Luq. 21:11) Konni daafira Mootichu daanno yannanna, isi Maganu fajjo woꞌmitanno gede assanno yanna quqquxamme agadhineemmo.—Maq. 13:26, 27.

GOOFIMARCHU GAMBISINO

4. (a) Yesuusi Armagedooni oli hanafanno yanna xa afino yineemmohu mayiraati? (b) Bayiru qarri hanafanno yanna anfoommokkiha ikkirono huluullammeemmokki coyi maati?

⁴ Baalanti qoqqowu gambooshshi pirogiraame hanaffanno yanna anfoommo. Kayinni bayiru qarri hanafanno yanna afate aye geeshsha woꞌnaallummorono, kuni qarri hanafanno barranna saate afa agurina, diro nafa horo afa didandiineemmo. Yesuusi uullate aana noo waro togo yiino: “Hakkonne barranna hattenne saate Maganu Annu kaꞌa, gordu sokkaasineno ikkito, Beettono ikko, afinohu dino.” (Mat. 24:36) Ikkirono, Kiristoosi Sheexaanu alame ledo olamanno gede, iimira haꞌrihu gedensaanni silxaane uyinoonnisi. (Aju. 19:11-16) Konni daafira, Yesuusi Armagedooni oli hanafanno yanna xa afino yine heda gara labbanno. Ninke kayinni kuni oli hanafanno yanna dianfoommo. Hakko daafira bayiru qarri hanafanno yanna iillita geeshsha baqqi yine heeꞌra hasiissannonke. Yihowa kayinni bayiru qarri hanafanno yanna bade afino. Isi goofimarchu barri daanno yanna murino. Konni daafira bayiru qarri hanafanno yanna gambissino; qoleno ‘kuni barri dayikkinni digatanno.’ (Imbaaqoomi 2:1-3 nabbawi.) Tenne afa dandiineemmohu hiittoonniiti?

5. Yihowa coyiꞌrino masaalo yannasera woꞌmitannota leellishanno lawishsha kuli.

⁵ Yihowa coyiꞌrino masaalo aye woteno yannasera woꞌmitanno! Hanni Isi Israeele Gibitse borojjimmanni fultanno yanna daafira coyiꞌrino masaalo woꞌmitino gara hedi. Muse, Niisaani 14, 1513 K.A. ikkinore kulanni togo yiino: “Shoolu xibbinna sajjuu diri woꞌmita [“woꞌmi barranni,” NW], Kaaliiqi manni gaꞌre baala Gibitsete gobbanni agurte fultino.” (Ful. 12:40-42) Kuni “430 diri” woꞌma hanafinohu Yihowa 1943 K.A. Abirihaamira gondooro ei yannaraati. (Gal. 3:17, 18) Yihowa Abirihaamira togo yiino: “Sirchikki allaggu gobbara wosiꞌne heeꞌrannota seekkite afi; hakkiichono borojjimmatenninna kadammetenni 400 diro heeꞌranno.” (Kal. 15:13; Soq. 7:6) Taje leellishshanno garinni, kuni “400 diri” hanafinohu 1913 K.A. Yisaaqi unuuna qanannota hoolli yannara Ismaeeli mishanni qarrisisi yannaraati; kuni diri goofinohu kayinni Israeele 1513 K.A. Gibitsete gobbanni fultu yannaraati. (Kal. 21:8-10, NW; Gal. 4:22-29) Ee, shoolu sani albaanni Yihowa mannisi borojjimmate giddonni fulanno yanna balaxe murino!

6. Yihowa mannasi gatisannota huluullammeemmokkihu mayiraati?

⁶ Gibitsetenni fuli manni giddo mittu Iyyaasuuti; isi Israeelete mannira togo yiino: “Kuneeti ani mannu aalo ikkeemmo yanna iillitinoe. Maganiꞌne Kaaliiqi uyinoꞌne hexxo garinni assinoꞌneha dancha coye baalanka kiꞌne mittu mittunku godowiꞌnenni seekkite egentinoonni; Isi uyinoꞌne hexxo giddonni mitteno gattukkinni baalanti [woꞌmitino].” (Iya. 23:2, 14) Yihowa ninke bayiru qarrinni gatise sayisate eino qaalino woꞌmannota ammanneemmo. Ikkirono, tini alame baꞌanno yannara gate saꞌꞌa hasiꞌnummoro, baqqi yine agadha hasiissannonke.

GATE SAꞌꞌATE BAQQI YINE AGADHA HASIISSANNO

7, 8. Hundi yannara agaraasinete loosi maati? Ninke tennenni maa ronseemmo? (b) Hundi yannara agaraasine goxxe baꞌuro mayi ikkara dandaannoro lawishshunni kuli.

⁷ Hundi yannara katama agartanno agaraasine lawishshi baqqi yine agadha hasiissannota rosiisannonke. Biꞌre Yerusaalamenna wole jajjabba katamma jawa gimbenni huxxinanni. Tini gimbe, diinu katama horrannokki gede assitanno; hattono agaraasine tenne gimbe aana ofolte qooxeessa towaattanno. Agaraasine barrano hashshano shaetenna waalchoho ofolte agartanno. Insa katamu giddo heeꞌranno manna gawajjannori daanna laꞌuro mannu qorophanno gede kultanno. (Isa. 62:6) Hakka waro agaraasine qooxeessinsara ikkannore baqqi yite agaransa woy agara hoogansa, lubbo baꞌanno gede assitara woy gatissara dandiitanno.—Hiz. 33:6.

⁸ Yihudunnihu xagge borreessanno manchi Joosefesi, Roomu olanto Yerusaalamete huxxi ledo xaadinse minnoonniha Antooniya Gimbe 70 M.D. eꞌe amaddinohu, waalchoho worroonni agaraasine goxxe baꞌeenna ikkinota borreessino! Hakkiinnino Roomu olanto Qullaawu Minira eꞌe mineho giira qassu; qoleno Yerusaalamete katama huntu; tini hakkuyira albaanni ikke egenninokki garinni Yihudu mannira iillannohu bayiru qarri gumulamanno gede assitino.

9. Yannankera lowo manni huwatinokki coyi maati?

⁹ Yannankera batinye gobbuwa “agaraasine” woy olanto wodhite, woy tekinoolojete uduunnicho horoonsidhe gobbansa danna agadhitanno. Tini “agaraasine” mannu maaxame gobbansa eannokki gede woy diinu gobbansa eꞌꞌe gawajjannokki gede agartanno. Ikkollana, insa agara dandiitannohu mannu woy mannu gashshooti iillishanno gawajjo callate. Insa Maganunnihu iimi Gashshooti nootanna kuni Gashshooti assanni noore diaffino; qoleno, Kiristoosi Moote ikkinohu kuni gashshooti muli barra daga baalate yoo yaannota dihuwattino. (Isa. 9:6, 7; 56:10; Dan. 2:44) Ninke kayinni ayyaanaamittetenni baqqi yine agadhineemmoha ikkiro, hakku yoote barri daanno yanna qixxaambe agadhineemmo.—Far. 130:6.

BAQQI YITINANNIKKI GEDE ASSE HEDOꞌNE BEBBEEHANNO COYE QOROPHE

10, 11. (a) Qoropha hasiissannonke coyi maati? Mayira? (b) Daawuloosi mannu Qullaawu Maxaafi masaalo lashshi asse aguranno gede assinota buuxisannori maati?

¹⁰ Hanni mittu agaraasinchi hashsha woꞌma agare galinohu gede assine hendo. Isi soodara rahanno wote geleelo amaddannosi daafira goxe baꞌꞌara dandaanno. Hatteente gede, tini alame baꞌanno yanna gambissanni dagganno wote, baqqi yine heeꞌneemmokki gede assannori tuncu yaannonke. Tenne yannara baqqi yine agadha hooga lowo geeshsha dadillissannote! Hanni kawiinni aanchine, qoropha hoongummoro baqqi yine heeꞌneemmokki gede guficho ikkankera dandaannoha sase coye laꞌno.

¹¹ Daawuloosi mannu ayyaanaamittete coye lashshi asse aguranno gede assanni no. Yesuusi reyara boode yanna gatte heedheenna rosaanosira, Daawuloosi “tenne gobba gashshaancho” ikkinota sase hige qaagiissinonsa. (Yoh. 12:31; 14:30; 16:11) Yesuusi, Daawuloosi mannu Maganu albillittete yanna daafira coyiꞌrino masaalo woꞌma rakkinota huwatannokki gede assannota afino. (Sof. 1:14) Sheexaanu, alame woꞌmate noote kaphu ammaꞌno widoonni mannu wodana beeshshino. Ati soqqanshonniwa manna hasaawisatto wote tenne dihuwatootto? ‘Ammanannokki’ manni, tini alame baꞌannotanna Kiristoosi Maganu Mangiste Moote ikke gashsha hanafinota huwatannokki gede Daawuloosi wodanansa ‘beeshshinota’ diwodanchootto? (2 Qor. 4:3-6) Soqqanshonniwa hasaawinseemmo wote, “Ani dihasiꞌreemmo” yaanno manni batiꞌrinoha dilawannohe? Ninke, tini alame baꞌanno yanna gambissinota kulleemmonsa wote, rooru manni tenne dunqulli asse aguranno.

12. Daawuloosi dogankera wodha hasiissannonkekkihu mayiraati?

¹² Mannu ayyaanaamittete coye lashshi asse agurinota laꞌe, baqqi yite agadha agurattokki gede qoropha hasiissannohe. Ati insa afinorinni sainore afootto. Phaawuloosi ayyaanaamittete roduuwisira togo yee borreessino: “Mootichu barri, hashshi mooraanchi gede ikke daannota kiꞌnenni seekkitine egentinoonni.” (1 Teselonqe 5:1-6 nabbawi.) Yesuusi togo yee qorowisiisinonke: “Manchi Beetti heddinoonnikki yannara hedeweelcho daannona, kiꞌneno qixxaabbine agadhe.” (Luq. 12:39, 40) Muli barri giddo Sheexaanu lowo manni, “Keereho; qarru dino” yaannoha kaphu awaajje ammananno gede asse doganno. Sheexaanu mannu alame woyyaabbanni hadhanno yee hedanno gede asse dogannonsa. Ninke dogama hasiissannonkeyyani? Yoote ‘barri hedeweelcho mooraanchimma daannonkekki’ gede ‘baqqi yine jilbunni heeꞌra’ hasiissannonke. Maganu Qaale barru baala nabbawanna Yihowa kulannonke coye hiinca hasiissannonkehu iseraati.

13. Alame mannu maa assanno gede xixxiibbanno? Ninke tenne qoropha dandiineemmohu hiittoonniiti?

¹³ Alame mannu ayyaanaamittetenni muganno gede assitanni no. Lowo manni dilgonsanni sakaalamino daafira ayyaanaamittete coyira hasatto dinonsa. (Mat. 5:3) Insa, tini alame shiqishshannoha maalaamittete coye afiꞌrate kabbi facci yaanno; tini ‘maalu yortonna illete halcho’ lexxitanno gede assitanno. (1 Yoh. 2:16) Qoleno, boohaarshu uurrinshuwa mannu “qiniite” afiꞌrate dirmanno gede assitanno; togoo fonqoli diru dirunkunni lexxanni dayino. (2 Xim. 3:4) Phaawuloosi Kiristaanu “maalu yorto” wonshiꞌrate mixo fushshiꞌrannokki gede kulinohu iseraati; tini ayyaanaamittetenni munganni gede assitanno.—Rom. 13:11-14.

14. Luqaasi 21:34, 35 aana qoropha hasiissannonkere maa kulloonni?

¹⁴ Ninke alamete faale haꞌrantenni, Maganu ayyaani heeshshonke giddo loosanno gede assiꞌneemmo; Yihowa konni ayyaani widoonni albillittete ikkannore huwanteemmo gede assinonke.^[1] (1 Qor. 2:12) Mitto mancho ayyaanaamittete goxichi amadannohu baxxinore asseenna calla diꞌꞌikkino; shiimmaaddu coyi nafa ayyaanaamittete coye assineemmo yanna adhara wodhinummoro guficho ikkankera dandaanno. (Luqaasi 21:34, 35 nabbawi.) Mannu ninke baqqi yine agadhineemmotera mishannonkeha ikkara dandaanno; ikkirono tini goofimarchu barri keeshshanno yine hendeemmo gede assitankera wodha dihasiissannonke. (2 Phe. 3:3-7) Hatteentenni, Maganu ayyaani heeꞌrannowa songote gambooshshiwa ayyaanaamittete roduuwinke ledo ganyine gamba yaa hasiissannonke.

15. Pheexiroosira, Yaiqoobiranna Yohaannisira tuncu yiinonsa coyi maati? Ninkerano hiikku coyi tuncu yaankera dandaanno?

¹⁵ Laanfe baqqi yine agadhineemmokki gede guficho ikkitankera dandiitanno. Yesuusi guuntete xeꞌne noonsa mannira laanfe noonsata afino. Hanni Yesuusa shini hashshira albiidi hashsha ikkinore hedi. Isi ammaname heeꞌrate iimi Annisi jawaante aannosi gede huuccatto assiꞌra hasiissinosi. Yesuusi huuccatto assiꞌrara haꞌri yannara Pheexiroosi, Yaiqoobinna Yohaannisi ‘jaatte huuccidhanno’ gede kulinonsa. Insa kayinni hakkuyi gedensaanni iillannonsari shota coye ikkinokkita dihuwattino. Insa Mootichansa baqqi yite agara agurte, daafurtino daafira muggino. Yesuusino daafurinoha ikkirono, isi ganye Annasi huucciꞌre baqqi yiinota leellishino. Miillasino woleteemmero hatto assa hasiissinonsa.—Maq. 14:32-41.

16. Luqaasi 21:36 giddo qummi assinoonni garinni, Yesuusi baqqi yine agadhineemmo gede hajajinonkehu hiittoonniiti?

¹⁶ Ayyaanaamittetenni ‘jaante’ woy baqqi yine heeꞌra ayyaanaamittete coye baxatenni saꞌinote. Geetesemaanete kaashshu basera ikkino coyi ikkara boodu barri albaanni, Yesuusi hatti rosaanosi Yihowa eeggifatte huuccidhanno gede rosiisino. (Luqaasi 21:36 nabbawi.) Ninkeno Ayyaanaamittetenni baqqi yine agadhate ganyine huuccatto assiꞌra hasiissannonke.—1 Phe. 4:7.

AYE WOTENO BAQQI YITINE HEEDHE

17. Muli barra daanno coyira qixxaawa dandiineemmohu hiittoonniiti?

¹⁷ Yesuusi goofimarchu barri “heddinoonnikki saatera daanno” yiino daafira, tini yanna ayyaanaamittetenni siikki assineemmota diꞌꞌikkitino; qoleno Sheexaanunna isi moohino alame shiqishshannonkeha haafa coye harunsineemmotanna maalinke yorto wonshiꞌrate kabbi facci yineemmota diꞌꞌikkitino. (Mat. 24:44) Maganunna Kiristoosi Qullaawu Maxaafi widoonni muli barri giddo ikkannore, hattono baqqi yine heeꞌra dandiineemmo gara kultinonke. Konni daafira, ayyaanaamittenke shoshshoggitannokki gede assiꞌra, Yihowa ledo noonke jaalooma jawaachishiꞌranna Maganu Mangiste balaxisiisa hasiissannonke. Albillitte daanno coyira qixxaawa dandiineemmo gede, heeꞌnoommo yannanna, yannankera ikkanni noore baqqi yine harunsa hasiissannonke. (Aju. 22:20) Heeshshote gante saꞌneemmohu tenne assinummoro callaati!