“Hagiirraamu Maganira” Soqqantannori Hagiirraammaho

1. Yihowa soqqamaasine hagiirraamma ikkitinohu mayiraati? (Hanafote noo misile lai.)

YIHOWA FARCIꞌRAASINE hagiirraamma mannaati. Insa songotenna jajjabba gambooshshuwawa, hattono wole bayicho xaaddanno woyite, mimmitu ledo hagiirrunni osoꞌlitanni hasaabbanno. Insa hagiirraamma ikkitinohu mayiraati? Qaru korkaati insa “hagiirraamo Magano” Yihowa affino daafiraatinna isi lawishsha harunsate sharrantanno daafiraati. (1 Xim. 1:11, NW; Far. 16:11) Maganu hagiirru Buicho ikkino daafira, ninkeno hagiirraamma ikkinammora hasiꞌranno; qoleno hagiirraamma ikkineemo gede assannoha lowo coye uyinonke.—Mar. 12:7; Ros. 3:12, 13.

2, 3. (a) Hagiirru maati? (b) Hagiirre afiꞌra shota ikkitinokkihu mayiraati?

² Ati hagiirraamoho? Albinni roore hagiirraamo ikka dandaatto? Hagiirreho yaa, dancha hedootinna heeshshonkenni harshammo afiꞌrate. Qullaawu Maxaafi addu hagiirre afidhannori Yihowa ledo danchu jaaloomi noonsare ikkitinota kulanno. Ikkollana heeꞌnoommo alamera hagiirraamo ikka qarrissara dandiitanno. Mayira?

³ Shiiꞌneemmo woyite, banxeemmo manchi bohamanno yannara, adhamanke diigantannonna looso hoongeemmo woyite, woy wolu yaachishanno coyi tuncu yaannonke yannara hagiirrinke baꞌꞌara dandaanno. Mini giddo keeru hooganno woyiteno hagiirraamma ikka qarrissankera dandiitanno. Ledonke rossannori woy loossannori mishshannonkeha, dartu iillinonkeha, woy Yihowa magansiꞌneemmo daafira usurroonninkeha ikkiro, hagiirrinke baꞌꞌara dandaanno. Fayyimmate qarri, darga assiꞌrino dhibbi, woy quwa saꞌino yaaddono hagiirre hoongeemmo gede assitankera dandiitanno. Ikkirono “hagiirraamunna taalle noosikki Gashshaanchi” Yesuusi Kiristoosi, manna sheshifachishanna hagiirsiisa baxannota qaagi. (1 Xim. 6:15, NW; Mat. 11:28-30) Yesuusi Ilaalu Sibikatesi yannara, Sheexaanu alame aana babbaxxino fonqoli iillinkerono, hagiirraamma ikkineemmo gede kaaꞌlitannonke akatta qummi assino.

HAGIIRRAAMMA IKKATE YIHOWA LEDO MULI JAALOOMA KALAQIRA HASIISSANNONKE

4, 5. Hagiirre afiꞌranna hagiirrinke baikki heeꞌra dandiineemmohu hiittoonniiti?

⁴ Yesuusi hagiirraamma ikkate kaaꞌlannonkeha qara coye qummi assino. Togo yiino: “Ayyaanaamittete coye goodhinori hagiirraammaho; iimi Mangiste insatena.” (Mat. 5:3, NW) Ayyaanaamittete coye gooꞌnoommota leellisha dandiineemmohu hiittoonniiti? Ayyaanaamittete sagale sagaꞌlineemmoha, ayyaanaamittete coye banxeemmohanna hagiirraamo Magano balaxisiinseemmoha ikkiro, hagiirraamma ikka dandiineemmo. Hatto assinummoro, hagiirrinke lexxanno. Hattono Maganu eino qaale wonshannota albinni roore addaxxineemmo. Maganu Qaali giddo nooti hagiirsiissanno “hexxonke” jawaachishshannonke.—Tit. 2:13.

⁵ Geedanno hagiirre afiꞌrate kaaꞌlannonkehu qaru coyi Yihowa ledo noonke jaalooma kaajjishiꞌrate. Soqqamaasinchu Phaawuloosi ayyaanunni togo yee borreessino: “Woꞌmanka woyite Mootichunni [Yihowanni] hagiidhe! Lede yeemmoꞌnena, hagiidhe!” (Fil. 4:4) Yihowa ledo muli jaalla ikkine heeꞌrate, hayyosi afiꞌra hasiissannonke. Maganu Qaali togo yaanno: “Egenno [hayyo] afiꞌrannohunna buuxa lexxannohu baꞌraaꞌrinoho [hagiirraamoho]. Egenno heeshsho uyitanno; ise cuꞌmirinohu baꞌraaꞌrinoho.”—Law. 3:13, 18.

6. Hagiirrinke geedano gede maa assa hasiissannonke?

⁶ Ikkollana hagiirrinke geedonniha ikkanno gede, Maganu Qaale nabbawa calla ikkikkinni harunsa hasiissannonke. Yesuusi ronsoommore harunsa hasiissanota xawisanni togo yiino: “Konne coye affinoonni; affinoonniha assitiniro maassantinanni.” (Yoh. 13:17; Yaiqoobi 1:25 nabbawi.) Ayyaanaamittete hasattonke wonshiꞌratenna geedanno hagiirre afiꞌrate, ronsoommo garinni heeꞌra hasiissannonke. Ikkollana hagiirrenke hunanno coyi batiꞌrirono hagiirraamma ikka dandiineemmohu hiittoonniiti? Hanni Yesuusi ilaalaho sabbaki yannara kulinoha aane noo coye laꞌno.

HAGIIRRAAMMA IKKATE KAAꞌLITANNONKE AKATTA

7. Dadillitannori hagiirraamma ikka dandiitannohu hiittoonniiti?

⁷ “Yaaddannori baꞌraadhinoreeti [hagiirraammaho]; jawaante afidhannona.” (Mat. 5:4) ‘Yaadanno manchi hagiirraamo hiitto ikke ikkanno?’ yine hendeemmoha ikkara dandaanno. Yesuusi coyiꞌranni noohu yaadanno manni baalu daafira diꞌꞌikkino. Bushu manni nafa tenne “qarrissanno yannara” iillannonsa qarrinni kainohunni dadillitara dandiitanno. (2 Xim. 3:1) Ikkollana insa heddannohu uminsa daafira calla ikkinnina Yihowa daafira diꞌꞌikkino; konnira isi jaalla diꞌꞌikkitino; hattono hagiirraamma ikka didandiitanno. Yesuusi coyiꞌranni noohu ayyaanaamittetenni goodhinori daafiraati; insa batinyu manni Magano hagiirsiisannokkire assanno daafira dadillitanno. Insa cubbaataamma ikkitinota affino; hattono mannu ooso loossino cubbinni kainohunni dayinoha dadillisanno coye huwattino. Yihowa konni garinni dadillanno manna laꞌꞌanno; isi qaalisi widoonni sheshifachishannonsa, hattono maassirannonsa; qoleno heeshshonsanni hagiirraamma ikkitanno gede assannonsa.—Hiziqeeli 5:11; 9:4 nabbawi.

8. Joongillu hagiirraamma ikkinanni gede assannohu hiittoonniiti? Xawisi.

⁸ ‘Jooguullu hagiirraammaho; baattono ragidhannona.’ (Mat. 5:5) Jooga ikka hagiirraamo ikkate kaaꞌlitannohu hiittoonniiti? Mannu halaale rosanno woyite, heeshshonsa biddi assiꞌranno. Konni albaanni insa qarrissannore, giwantannorenna hanqaaleeyye ikkitara dandiitanno. Ikkollana xa insa “haaro mannimma” uddidhe “mararro, joongille, shaqqille, shooshanqenna cinca” leellishshanno. (Qol. 3:9-12) Konninni kainohunni xa insa salaame, baxillunna hagiirru noo heeshsho heedhanno. Qoleno Maganu Qaali togoo mannooti “baato ragidhano” yaanno.—Far. 37:8-10, 29.

9. (a) ‘Keeraano baatto ragidhannohu’ ma garinniiti? (b) ‘Keeraanchimmate daafira hudidhannorinna goodhannori’ hagiirraamma ikka dandiitannohu mayiraati?

⁹ Yesuusi, jooguullu “baatto ragidhanno” yaasi mayyaate? Ayyaanunni buurantinori Yesuusi harunsaano mootoollanna kakkalaasine ikkite gashshitanno woyite uulla ragidhanno. (Aju. 20:6) Iimira haꞌrate hexxo noonsakkihu lowo miliyoone ikkanno manni kayinni, guuta ikke salaametenninna hagiirrunni uullate aana hegerera heeꞌranno. Kuni manni ‘keeraanchimmate daafira hudiꞌrannohanna gooꞌrannoha’ ikkino daafira hagiirraammaho. (Mat. 5:6) Ayyaanaamittetenna keeraanchimmate gooꞌronsa haaro alamera woꞌmunni woꞌma fultanno. (2 Phe. 3:13) Maganu bushuulle baala hunanno woyite, keeraano hagiirraamma ikkitanno; hakkuyi gedensaanni qole bunshetenni kainohunni didadillitanno.—Far. 37:17.

10. Maaro leellishate yaa mayyaate?

¹⁰ “Maartannori hagiirraammaho; insarano maarranninsana.” (Mat. 5:7, NW) “Maara” yine tirroonnihu Ibiraawootu Afii qaali qarrantinorira “shaqqille, danchummanna mararro leellisha” yitanno tiro afiꞌrino. “Maaro” yine tirroonnihu Giriikete Afii qaalino wolootaho mararro leellisha yitanno tiro afiꞌrino. Ikkollana maaro leellisha qarrantinore marara calla diꞌꞌikkitino. Qullaawu Maxaafi qarrantinorira mitore assine kaaꞌla maaro ikkitinota kulanno.

11. Yesuusi shaqqadu Samaarichi daafira coyiꞌrino lawishshinni maaro leellishate daafira maa ronseemmo?

¹¹ Luqaasi 10:30-37 nabbawi. Yesuusi shaqqadu Samaarichi daafira coyiꞌrino lawishshi maaro leellishate yaa mayyaatero dancha gede asse xawisanno. Samaarichu manchi mararrotenninna maarotenni kae, qarramino mancho kaaꞌlate mitore assino. Yesuusi lawishsha coyiꞌri gedensaanni, “Atino hadhe hatto assi!” yiino. Konni daafira ninkeneeto togo yine xaꞌma hasiissannonke: ‘Anino shaqqadu Samaarichi assire assanni noommo? Qarru iillinonsarira albinni roore mararronna danchumma leellisha dandeemmo? Lawishshaho, jajjabbu roduuwira, gunnoottahonna buxoho mitore asse kaaꞌla dandeemmo? Umiꞌyanni kae “wolqiweeloota jawaachisha” dandeemmo?’—1 Tes. 5:14; Yai. 1:27.

12. Maaro leellisha hagiirraamma ikkineemmo gede kaaꞌlitannonkehu hiittoonniiti?

¹² Ikkina shaqqille woy maaro leellisha hagiirraamma ikkineemmo gede assitannonkehu hiittoonniiti? Wolootaho shaqqille leellinsheemmo woyite, wolootaho uyine afiꞌnanni hagiirre afiꞌneemmo. Qoleno, hatto assineemmo woyite Yihowa hagiirsiinsanni heeꞌnoommota anfoommo. (Soq. 20:35; Ibiraawoota 13:16 nabbawi.) Moote Daawiti wolootaho shaqqille leellishanno manchi daafira coyiꞌranni togo yino: “Kaaliiqi agare lubbotenni worannosi; baattote aanano maassaminoho [hagiirraamoho] yinanna heeꞌranno.” (Far. 41:1, 2) Wolootaho maaronna shaqqille leellinsheemmoha ikkiro, Yihowano ninkera maaro leellishannonke; tini qolte hegere geeshsha hagiirraamma ikkate kaaꞌlitannonke.—Yai. 2:13.

“XALALU WODANIRI” HAGIIRRAAMMA IKKITINOHU MAYIRAATI?

13, 14. Xalalu wodaninna hagiirru mereero mayi xaadooshshi no?

¹³ Yesuusi ‘Xalalu wondaniri hagiirraammaho; Magano laꞌannona’ yiino. (Mat. 5:8) Wodaninke woꞌmante yannara xalala ikkanno gede, hedonkenna hasattonke xalala ikkitanno gede assiꞌra hasiissannonke. Yihowa shiqishiꞌneemmo magansiꞌra adhara hasiꞌnummoro, wodaninke xalala ikkanno gede assiꞌra hasiissannonke.—2 Qorontoosi 4:2 nabbawi; 1 Xim. 1:5.

¹⁴ Xalalu wodani noonsarira, Yihowa ledo danchu jaaloomi noonsa; Isi ‘uddanonsa hayishshidhannori hagiirraammaho’ yiino. (Aju. 22:14) Insa ‘uddanonsa hayishshidhannohu’ ma garinniiti? Buuramino Kiristaani Yihowa albaanni xalaloota ikke ‘uddanonsa hayishshiꞌra’ dandaanno; hatto assiro Yihowa baꞌannokki heeshsho aannonsa; hattono insa iima hegerera hagiidhitanni heedhanno. Uullate aana heeꞌrate hexxo noonsati lowo daga Maganu jaalla ikkite keeraano ikka dandiitanno. Insa xa nafa ‘uddanonsa geꞌrechu mundeenni hayishshidhe waajjo assidhino.’—Aju. 7:9, 13, 14.

15, 16. Xalalu wodani noonsari “Magano laꞌꞌa” dandiitannohu hiittoonniiti?

¹⁵ Qullaawu Maxaafi ‘Mannu Magano lae gata didandaanno’ yaanno; ikkina xalalu wodani noonsari “Magano laꞌꞌa” dandiitannohu hiittoonniiti? (Ful. 33:20) “Laꞌꞌa” yine tirroonnihu Giriikete Afii qaali, “surretenni laꞌꞌa, wodanchanna afa” yitanno tiro afiꞌrino. ‘Wodanu illenni’ Magano laꞌannori, iso seekkite affinoreetinna akattasi wodanchitinooreeti. (Efe. 1:18) Yesuusi annisi akatta leellishino daafira “Ane afinohu annaꞌyano afino” yiino.—Yoh. 14:7-9.

¹⁶ Yihowa soqqamaasine “Magano laꞌꞌa” dandiitannoti wole doogo isi kaaꞌlannonsa gara wodanchate. (Iyo. 42:5) Insa ‘wodanu illenni’ Maganu keeraanotenna isira ammanante soqqantannorira qixxeessino atoote laꞌanno. Buuramino Kiristaani reyotenni kae iimira haꞌranno woyite illensanni Yihowa laꞌꞌa dandaanno.—1 Yoh. 3:2.

QARRU HEEꞌRIRONO HAGIIRRAAMMA IKKA

17. Keeru hagiirraamma ikkate kaaꞌlannonkehu hiittoonniiti?

¹⁷ Yesuusi “Keere kalaqqannori hagiirraammaho” yiino. (Mat. 5:9, NW) Keere kalaqate uminsanni kaꞌe sharrantannori hagiirraamma ikka dandiitanno. Rosaanchu Yaiqoobi togo yee borreessino: “Keere baxxannori, keere wixidhe keeraanchimmate guma gamba assidhanno.” (Yai. 3:18) Songote giddono ikko maatete giddo sumuu yinoommokkihu heeꞌriro, keere kalaqa dandiineemmo gede kaaꞌlankera Magano huucciꞌra dandiineemmo. Hakkiinni Yihowa qullaawa ayyaanasi aannonke; kuni ayyaani qole Magano hagiirsiissanno akatta heedhannonkenna hagiirramma ikkineemmo gede kaaꞌlannonke. Yesuusi keere kalaqa hasiissannota ikkitinota xawisanni togo yiino: “Fushshaatekki Maganoho shiqishiꞌratto yannara giwamoottoha rodookki qaagittoro, fushshaatekki hakko worte agurte hadhe balaxxe giwamootto rodiikki ledo araarami. Hatto assittohu gedensaanni dagge fushshaatekki Maganoho shiqishiꞌri.”—Mat. 5:23, 24.

18, 19. Kiristaanu dartu iillinsarono hagiirraamma ikkannohu mayiraati?

¹⁸ “Ane daafira mannu xoniꞌneꞌro, xiiwiꞌneronna kaphunni suꞌma huniꞌnero tashshi yooꞌne.” Yesuusi hatto yaasi mayyaate? Isi lede togo yiino: “Gordu gashshootira lowo waaga afidhinanni daafira tashshi yooꞌne; hagiidhe. Kiꞌnera albiidi himanaanono hatto xiiwamanna qarra iillishshinonsa.” (Mat. 5:11, 12) Soqqamaasine ganninsanna sabbaka agurtanno gede hajanjinsa yannara, “tashshi yaannansa songote albinni fulte” hadhino. Insa hagiidhitinohu gannoonninsa daafira diꞌꞌikkino. Hatteentenni insa hagiidhitinohu “Yesuusi suꞌmira yite shollinye adha hasiissannonsata egentino” daafiraati.—Soq. 5:41.

¹⁹ Yannankerano Yihowa manni Yesuusi suꞌmira yiteenna qarru iillannonsa woyite woy buutote fonqoli tuncu yaannonsa yannara hagiirrunni cincitanno. (Yaiqoobi 1:2-4 nabbawi.) Yesuusi soqqamaasinente gede ninkeno qarru iillannonketa dibanxeemmo. Ikkollana, qarru yannara Yihowara ammanammeemmoha ikkiro, waajjinummokki cincineemmo gede kaaꞌlannonke. Lawishshaho Woxawaajje 1944nni kadote gashshooti Henriyiiki Dornikinna rodoosi usuranyu kaampe eessino. Usurtinonsari insa togo yitino: “Reyo hagiirsiissannonsare ikkitino daafira, insa ammansiisa qarraho.” Hakkiinni roduu Dorniki togo yee xawisino: “Ani reya hasiꞌreemmoha ikka hoogirono, Yihowara ammanamate yee waajjummokki qarra adha hagiirsissannoe. . . . Giddoꞌyani kae huucciꞌreemmo huuccatto Yihowawa shiqeemmo gede assitinoe; Isi qole Kaaꞌlaanchoꞌya ikkinoe.”

20. ‘Hagiirraamu Maganira’ soqqamanke hagiirsiissannonkehu mayiraati?

²⁰ “Hagiirraamo Magano” Yihowa tashshi assineemmoha ikkiro dartu iillinkerono, maatenke gibbunkerono, dhiwammummorono woy geedhinummorono hagiirraamma ikka dandiineemmo. (1 Xim. 1:11 NW) “Kaphannokki Magani” eino qaalino hagiidhineemmo gede assannonke. (Tit. 1:2) Yihowa eino qaale wonshanno woyite, xaa yannara iillannonke qarra hambeemmo. Uulla Gannate ikkitanno yannara, Yihowawiinni bae atoote afiꞌneemmo. Qoleno taalle nookki hagiirre afiꞌneemmo. Ee, hatte yannara ‘atootenna keere afiꞌne hagiidhineemmo.’—Far. 37:11.