KIRISTAANU HEESHSHORA

Kiristaanu Heeshshonna Soqqansho Gambooshshiha Haaro Gafa

Arfaasa 2018nni kayise, Kiristaanu Heeshshonna Soqqansho Gambooshshira haaru gafi shiqanno; kuni gafi interneetete aana noote xiinxallote kaaꞌlitannote Qullaawa Borrote Haaro Alame Tiro (nwtsty) aana noote xiinxallote kaaꞌlitanno mashalaqqe, viidiyonna misilla aana xintaminoho; xiinxallote kaaꞌlitannoti Haaro Alame Tiro nookki songorano tini kifile shiqqanno. Kuni gafi gambooshsheho qixxaawatto wote lowo geeshsha kaaꞌlannoheti dihuluullissannote. Baalunkunni roore, kuni gafi baxillaanchu Anninke Yihowawa albinni roore shiqatto gede kaaꞌlannohe!

XIINXALLOTE KAAꞌLITANNO MASHALAQQE

Xiinxallote kaaꞌlitanno mashalaqqe, Qullaawu Maxaafi giddo kulloonni ikkito woꞌmitino bayichi, budinna afii ledo xaado afidhino taje kultanno.

Maatewoosi 12:20

Baꞌꞌara rahino caabbicho: Hunda mannu mini giddo bushshunni loonsoonni kurraazera ejersu zayite wore xawisiꞌranno. Heqichu, kurraazete giddo noo zayite xuuxe caabbichu xoannokki gede assanno. “Baꞌꞌara rahino caabbicho” yaannohu Giriikete handaari zayite giddonni goofeenna xoꞌara kae wiliilanni no heqicha leellishanno. Isayaasi 42:3 aana Yesuusi manna mararannota masaalloonni; isi hawaaxantenna hexxo mudhite xoara rahino caabbichi gede ikkitinore mararannonsa.

Maatewoosi 26:13

Halaale yeemmoꞌne: Amiini yaannohu Giriikete Afii qaali “ikkona” woy “halaaleho” yitanno tiro afiꞌrinohu ameeni yaannohu Ibiraawootu Afii qaalinni haaꞌnoonniho. Yesuusi coyirino coyi, eino qaalinna masaalino masaalo adda ikkitinotanna addaxxinannita ikkitinota buuxisate tenne yaatto duucha hige horoonsiꞌrino. Qullaawu Maxaafi woy wole ammaꞌnote borro giddo, Yesuusa agurranna “halaale yeemmoꞌne” woy amiini yitanno yaatto konni garinni horoonsiꞌrinohu wolu dino. Yesuusi Yohaannisi wongeelera coyiꞌrino coyi ammannanniha ikkinota leellishate amiini yaanno qaale lame lame hige (amiini, amiini) horoonsiꞌrino.—Yoh 1:51.

VIIDIYONNA MISILLA

Qullaawu Maxaafi giddo noo xagge xawissanno fotta, misillanna qoonqo nookki viidiyo amadino.

Beetefaage, Ejedhete Ilaalanna Yerusaalame

Tini harancho viidiyo Yerusaalamete soojjaati widoonni noote xaa yannara eti-Turi yinannite hundi Beetefaagenni kayisse Yerusaalame massitanno doogga leellishshanno; roorenkanni viidiyo Beetefaagenni kayise Ejedhete Ilaali geeshsha massitanno doogo leellishshanno. Biitaaniyu noohu Beetefaagera sojjaatoonni yaano Ejedhete Ilaalite soojjaati gooddo aanaati. Yesuusinna rosaanosi Yerusaalamete keeshshitanno wote galtannohu Biitaaniyaho ikkikki digatino; Biitaaniyu xaa yannara Eliazariya (Eli-izariya) yinanni qachaati; kuni suꞌmu Arawete Afiiho; konni suꞌmi tiro “Aliaazaari Heeꞌrannowa” yaate. Yesuusi Maarta, Maariyaaminna Aliaazaari mine galinoti dihuluullissannote. (Mt 21:17; Marq 11:11; Lu 21:37; Yoh 11:1) Yesuusi insa mininni Yerusaalame haꞌranno wote, tenne viidiyora laꞌnummo dogoo widoonni hige haꞌrinoha ikkara dandaanno. Yesuusi Niisaani 9, 33 M.D. harrichote ilmaticho gulufe Ejedhete ilaali widoonni Yerusaalame haꞌrinohu, Beetefaagenni kayisse Yerusaalame massitanno doogo amade ikkara dandaanno.

Biitaaniyunni Beetefaage massitanno doogo
Beetefaage
Ejedhete Ilaala
Qedirooni Laga
Qullaawu Mini Noowa

Misimaare Gannoonniha Lekkate Miqicho

Tini, 11.5 saanti meetire ikkitanno misimaare gannoonniha mannu lekka miqicho lawinse loonsoonni fotooti. Aliyye Yerusaalamera 1968nni addu miqicho umme fushshinoonni; lekkasi misimaaretenni gannoonnihu kuni manchi Roomu yannara heeꞌrinoho. Kuni miqichi hunda reyote yoo yinoonni mancho misimaaretenni haqqaho qolle gannannita leellishanno. Roomu olanto Yesuusa haqqaho sutate horoonsidhinoti togoo misimaare ikkitukki digattino. Konne miqicho anfoonnihu mitte osurii yinannite kinchu saaxine giddooti; hatte yannara suntoonni manchi reeshshi sholi gedensaanni miqqa gamba assine togoote kinchu saaxinera worranni. Tini qolte sunte shinoonni mancho madaarrannita leellishshanno.—Mt 27:35.