Qullaawu ayyaaninni cuuama. Cuuaanchu Yohaannisino Yesuusi Kiristoosino qullaawu ayyaaninni cuuamate daafira coyidhino. (Maatewoosi 3:11; Luqaasi 3:16; Soqqamaasinete Looso 1:1-5) Hatti cuuama qullaawu ayyaani suꞌminni cuuamate ledo mitte diꞌꞌikkitino. (Maatewoosi 28:19) Hatto yineemmohu mayiraati?

Yesuusi rosaano giddo qullaawu ayyaaninni cuuantannori kiiro bande kulloonni. Insa gordoho Kiristoosi ledo mootoollanna kakkalaano ikkite baatto gashshitara qullaawu ayyaaninni buurantinoreeti.f (1 Pheexiroosi 1:3, 4; Yohaannisi Ajuuja 5:9, 10) Insa baattote aana Gannatete heeꞌrate hexxo noonsare lowo miliyoone ikkitannore Yesuusi rosaano gashshitanno.—Maatewoosi 5:5; Luqaasi 23:43.

Giiratenni cuuama. Cuuaanchu Yohaannisi macciishshanni noo mannira togo yiino: “Ane gedensaanni daannohu kayinni [Yesuusi] Qullaawu Ayyaaninninna giiratenni cuuannoꞌne. . . . Isi woowansinanni woowancho anga haaꞌre no. Hatte woowanchonni ayiddummesi coꞌo asse fee, qamade gamba asse qaldaho woranno. Kura kayinni xoꞌannokki giirara tuganno.” (Maatewoosi 3:11, 12) Giiratenni cuuamatenna qullaawu ayyaaninni cuuamate mereero badooshshu noota wodanchi. Yohaannisi konne lawishsha coyiꞌrinohu maa kulateeti?

Qamade Yesuusi yaannore macciishshe hajajamanno mannira lawishshaho. Kuni manni qullaawu ayyaaninni cuuamate qoosso afiꞌranno. Kuru kayinni Yesuusi rosiisannore macciishsha giwanno mannira lawishshaho. Insati geedonsa giiratenni cuuama ikkitanno; hatto yaa insa hegerera baꞌanno yaate.—Maatewoosi 3:7-12; Luqaasi 3:16, 17.