Lawishshu Huuccatto Ledo Sumuu Yaannore Asse Gafa 2

1-3. Mitte rodoo Yihowa mayi hasiisannonkero afinota addaxxitanno gede assinoseri maati?

LAANARA 2012⁠nni Jarmanete gobbara horo habbannokki coyi tuncu yiinose. Hatte yannara ise lame addi addi huuccattosera dawaro afidhino. Umi huuccattose assidhinohu horophillu dirrannowa iillate baaburunni seeda doogo hadhanni heedheeti. Ise farciꞌrate faro afidhara Yihowa kaaꞌlannose gede huuccidhino. Layinki huuccattose assidhinohu horophillu dirrannowa iillitu gedensaanni, ise gidditanno horophilli tari layinki barrira sainota kullise yannaraati. Ise roore woxese guxxitino daafiranna galtannowi nookki daafira Yihowa kaaꞌlasera huuccidhino.

² Laana huuccidhe kaꞌanni heedheenna, mittu beetti “Laana, koye ma assitanni nootta?” yiise. Kuni aju beetti alba rosu mine ledose rosinoho. Hakkawote iso amasinna ahaahesi Wodiidi Afirika horophillunni haꞌranna geegiissitanni noosi. Amasi Elke, Laana ikkito macciishshituti isewa galtanno gede faasiiqqe koyissuse. Elkenna amase, Laana dancha gede asse wosinsise; qoleno ammanasenna woꞌma yanna soqqanshose daafira addi addi xaꞌmo xaꞌmise.

³ Layinki soodo Laana dancha gede shooꞌmitu gedensaanni, wole Qullaawu Maxaafi xaꞌmonsara dawaro qoltunsa; qoleno, galagalte coyishiishshannonsa gede insa teesso borreessite adhitu. Hakkiinni Laana qaese keerunni iillitino; ise xaano woꞌma yanna suwisaanchooti. Ise togo coye qineessinosehu ‘huuccatto macciishshanno Magano’ ikkinota huwattino.—Far. 65:2.

4. Aanchine ronseemmohu hiittee hasattonke daafiraati?

⁴ Hedeweelcho mitiinsannori tuncu yaannonke wote, kaaꞌlo afiꞌrate huuccatto assiꞌra dandiineemmo; Yihowa ammanantino soqqamaanosi assidhannota togoo huuccatto macciishsha baxanno. (Far. 34:15; Law. 15:8) Ikkollana, lawishshu huuccatto hiincineemmo wote roore hasiisannonke coyi noota huwanteemmo. Lawishshaho, Yesuusi rosiisino huuccattora jeefote nooti sase hedo ayyaanaamittete hasattonke qummi assitanno gara hanni laꞌno. Qoleno, shoolki hedo yaano barru sagalenke daafira huucciꞌneemmo huuccatto ledo sumuu yaannore assa dandiineemmo gara laꞌneemmo.—Maatewoosi 6:11-13 nabbawi.a

“BARRU SAGALENKE TECHO UYINKE”

5, 6. Maalaamittete hasiisannori gariri noonkeha ikkiro nafa, barru sagalenke daafira huucciꞌra hasiissannonkehu mayiraati?

⁵ Yesuusi barru “sagaleꞌya” yine ikkikkinni barru “sagalenke” yine huucciꞌnammora rosiisinonke. Afirikaho woradu aliidi laꞌꞌaancho ikkinohu Vikitoori togo yiino: “Aninna minaamaꞌya inteemmo sagale hiikkiinni afiꞌneemmokka woy minu kira ayi baatankekka yine lowo geeshsha yaada hasiissannonkekki daafira Yihowa duucha hige galaxxeemmo. Roduuwinke barru baala shaqqillunni towaattannonke. Ikkirono, ninke kaaꞌlitanno roduuwi iillannonsaha miinju qarra dandiitanno gede Yihowa huucceemmo.”

⁶ Duuchu wotira ikkitanno sagale noonkeha ikkiro, anga ajjino roduuwira woy kalaqamu danonni gawajjantinori daafira heda dandiineemmo. Insa daafira huuccatto assa calla ikkikkinni huuccattonke ledo sumuu yaannore assa hasiissannonke. Lawishshaho, noonkere qarrantino roduuwinke ledo beeqqa dandiineemmo. Qoleno, alamete doyicho loosira fushshineemmo woxe garunni horoonsiꞌnannita huwante, ganyine togoo fushsho fushsha dandiineemmo.—1 Yoh. 3:17.

7. Yesuusi ‘gaꞌa daafira horonta yaada’ hasiissannonkekkita lawishshunni rosiisinohu hiittoonniiti?

⁷ Yesuusi barru sagalenke yaasi, xa hasiise noonkere yaasi ikkitukki digattino. Hakko daafira isi hakkiinni aanche Maganu xawu awawa uddisiisanno gara coyiꞌrino; hakkiinnino togo yiino: “Kiꞌne ammana xeꞌinoꞌneri, Maganu kiꞌne roore diuddisiisannoꞌne? Konni daafira, yaaddinoonte hattono, . . . Maa uddiꞌneemmo?’ yitinoonte.” Isi aante noota hasiissanno amaale lede coyiꞌre jeefisino: “Gaꞌa daafira horonta yaaddinoonte.” (Mat. 6:30-34) Hatto yaasi maalaamittete coyira quwa saꞌꞌa agurre, barru barrunku afiꞌneemmohu qaru coyinni kassi yaa hasiissannonketa leellishshanno. Kuri coyibba giddo mitu injiino mine, maatenkera hasiisannore shiqishate kaaꞌlannonke looso, hattono fayyimmanke towaaxxate hasiissannonke hayyo ikkitara dandiitanno. Huuccatto assiꞌneemmohu togoohu maalaamittete coyi daafira calla ikkiro kayinni, woluri gatinonkeri no. Roore hasiissannota ayyaanaamittete hasattonke dea dihasiissannonke.

8. Yesuusi barru sagalenke daafira coyiꞌrinori hiittee hasiissanno hasattonke qaagiissannonke? (Umi misile lai.)

⁸ Yesuusi barru sagalenke yaasi ayyaanaamittete sagaleno hasiissannonketa qaagiissitannonkete. Mootichinke togo yiino: “Manchu Yihowa afiinni fulanno qaali baalunkunni ikkinnina sagaletenni calla diheeꞌranno.” (Mat. 4:4) Konni daafira, Yihowa hasiissannonketa ayyaanaamittete sagale ayewoteno yannasera aannonke gede huucciꞌra agurroonke.

“ASALENKE GATONA YIINKE”

9. Cubbu “asale” ikkinohu ma garinniiti?

⁹ Yesuusi togo yiino: “Asalenke gatona yiinke.” (Mat. 6:12) Wole bayicho kayinni, “Cubbonke gatona yiinke” yiino. (Luq. 11:4) Tini metseete 60 diri albaanni tenne hedo togo yite danchu garinni xawissino: “Maganu higge diinge cubbo loosanke isira asalu heeꞌrannonke gede assitannonke. . . . Maganu cubbinke daafira heeshshoꞌne baaxxe yee xaꞌma dandaanno. . . . Ninke ledo noosi fiixooma gudise facci asse agure, salaamesi ninkewiinni haare hoola dandaanno. . . . Isira hajajamme banxeemmosita leellisha hasiissannonke; cubbo loosa Maganoho hasiisanno baxille xeisa ikkitino daafira, cubbo loonseemmo wote baxillu asali heeꞌrannonke yaate.”—1 Yoh. 5:3.

10. Yihowa cubbonke gatona yaannohu hiitti qixxaawo noo daafiraati? Tenne qixxaawo ma garinni laꞌꞌa hasiissannonke?

¹⁰ Barru barrunku Yihowa maaro hasiissannonke; isi cubbonke maarannoti mitticho qixxaawo yaano Yesuusiti wodote kakkalo lowo geeshsha hasiissannonke! Tini kakkalo shiqqinohu mitu 2,000 diri albaanni ikkirono, techo afiꞌnoommo elto gede assine laꞌꞌa hasiissannonke. Heeshshonkera baantannihu “wodote waagi lowoha” ikkino daafira, guuntete xeꞌne noosihu aye manchino konne waaga baate horo diafanno. (Faarso 49:7, 8 nabbawi;b Far. 49:9; 1 Pheexiroosi 1:18, 19 nabbawi.c) Ee, tenne taalle nookki eltora ayewoteno Yihowa galata hasiissannonke. Qoleno, Yesuusi “cubboꞌya” yaa agure “cubbonke” yee rosiisasi, ammanate roduuwinke baalunkura tini maarote qixxaawo hasiissannonsata qaagiissitannonke. Addaho, Yihowa uminke ayyaanaamittera calla ikkikkinni wolootu daafirano hendammora hasiꞌranno; hatto yaa, baddaltinonkeri daafirano yaate. Togoo baddalo duucha wote shotate; qoleno roduuwanke addinta banxeemmotanna, Maganu ninke shaqqillunni gatona yiinonkente gede gatona yineemmore ikkinoommota leellishate faro fantannonke.—Qol. 3:13.

11. Gatona yineemmore ikka hasiissannonkehu mayiraati?

¹¹ Guuntete xeꞌne noonkere ikkinoommo daafira, mito wote koma amandammora dandiineemmo; tini dadillissannote. (Zel. 19:18) Tenne hajo woleho kullummoro, hakku manchi ninkera kaaꞌlara dandaanno; tini qolte songote giddo babbadooshshe kalaqqanno. Kuni coyi tenne gedee heeꞌrara sammi yineemmoha ikkiro, tini Maganu maaroranna wodote kakkalora diniqo noonkekkita leellishshanno. Gatona yineemmokkire ikkinummoro, Anninke Beettisi kakkalo widoonni ninke gatona yaa aguranno. (Mat. 18:35) Yesuusi lawishshu huuccatto rosiise kaꞌꞌanni heeꞌrenni tenne lede xawisino. (Maatewoosi 6:14, 15 nabbawi.d) Hakkiinni saeno, Maganu gatona yaankera hasiꞌneemmoha ikkiro, kabbaade cubbo loosa rosicho assiꞌra dihasiissannonke. Tini hedo lawishshu huuccattora noote aante noo hedowa massitannonke.—1 Yoh. 3:4, 6.

“FONQOLU GIDDORA EESSITOOTINKE”

12, 13. (a) Yesuusi cuuamihu gedensaanni mayi tuncu yiinosi? (b) Fonqoloho qeelammummoro xaꞌmammeemmori ninkeeti yineemmohu mayiraati? (c) Yesuusi reyote geeshsha ammanaminoha ikke maa buuxisino?

¹² “Fonqolu giddora eessitootinke” yitanno huuccatto, Yesuusi cuuamihu gedensaanni tuncu yiinosire qaagiissitannonke. Hatte yannara Maganu ayyaani Yesuusa halallira haꞌranno gede assino. Mayira? “Daawuloosi fonqolannosi gede.” (Mat. 4:1; 6:13) Tenne dhagge assiꞌra hasiissannonkeni? Maganu Beettosi uullara soyinohu qaru korkaati maatiro huwanteemmoha ikkiro, tini dhagge diꞌꞌikkitannonke. Iso uullara sonkoonnihu qaru korkaati, Addaaminna Heewani finqilte Maganu aliidimma adha gibbu yannara kaꞌino xaꞌmora dawaro qolaraati. Hakkawote dawaro qolate yanna hasiissanno xaꞌmuwa kaꞌino. Lawishshaho, Maganu mancho kalaqino gari xeꞌne afiꞌrinokka? Guutu manchi “bushu” Daawuloosi addi addi fonqolo abbisirono, Maganu aliidimma irkisa dandaanno? Sheexaanu yii gede manchu beetti Maganu gashshootiwiinni baxxe fuliro woyyitino heeshsho heeꞌranno? (Kal. 3:4, 5) Tenne xaꞌmuwara dawaro afiꞌrate yanna hasiissanno; ikkirono, tini xaꞌmuwa duushshitanno dawaro afidhanno wote Yihowa silxaanesi horoonsiꞌrannohu horoomanno garinni ikkinota hedate dandoo noonsa kalaqami baalunku huwatanno.

¹³ Yihowa qullaawa ikkino daafira aye manchono bunshe assara difonqolanno. “Fonqolaanchu” Daawuloosiiti. (Mat. 4:3) Daawuloosi addi addi doogganni fonqolankera woꞌnaalanno. Ikkirono, fonqolu giddora eate woy ea hoogate mittu mittunku manchi doodha dandaanno. (Yaq. 1:13, 15; Yaaqoobi 1:14 nabbawi.e) Yesuusi Maganu Qaali giddonni hasiisanno qummeeshsha horoonsiꞌre mittu mittunku fonqolira bayichonko dawaro qolino. Konni garinni isi Maganu aliidimma irkisannota leellishino. Sheexaanu kayinni hexxo mudhe diagurino. Isi “wole injiitanno yanna” agadhino. (Luq. 4:13) Yesuusi, Maganoho ammanamannokki gede assate Sheexaanu abbinosi fonqolo baalanka qeelino. Kiristoosi Yihowa aliidimma keeraancho ikkitinota, hattono guutu manchi baxi geeshshi fonqoli tuncu yiisirono ammanaminoha ikka dandaannota buuxisino. Ikkollana, Sheexaanu Yesuusi harunsaano ateno mitteenni woshshaade karate woꞌnaalanno.

14. Fonqoloho qeelammeemmokki gede ma assa hasiissannonke?

¹⁴ Maganu aliidimma daafira kaꞌino xaꞌmuwa xaano dawaro afiꞌra hasiissannonsahura, Yihowa Fonqolaanchu tenne alame horoonsiꞌre fonqolankera fajjanno. Fonqolu giddora eessannonkehu Magano diꞌꞌikkino. Isi ammanammoommore ikkineemmota dihuluullamanno; qoleno kaaꞌlankera hasiꞌranno. Ikkollana, Yihowa doodhate dandoonke ayirrisanno daafira, ammanammoommore ikka woy ikka hooga ninke doodhinammora aguranno. Ammanammoommore ikkate lamere assa hasiissannonke: ayyaanaamittetenni baqqi yine heeꞌranna ganyine huuccatto assiꞌra hasiissannonke. Yihowa huuccattonkera dawaro qolannohu hiittoonniiti?

15, 16. (a) Xeertiꞌra hasiissannonkehu mitu fonqoli hiikkoyeti? (b) Iillinonke fonqolinni qeelammummoro, bushiinshannihu ayeti?

¹⁵ Yihowa jawaante ikkannonkeha hattono fonqolo qeelate kaaꞌlannonkeha wolqaataamo qullaawa ayyaanasi aannonke. Qoleno, Maganu Qaalesinna songo horoonsiꞌre xeertiꞌra hasiissannonke coye lawishshaho, gari geeshsha hasiisannokkihu maalaamittete coyira lowo yanna, woxenna wolqa guda qorophineemmo gede amaalannonke. Ispeninna Yaani yinanni minaanninna minaama Awuroppaho mitte dureette gobbara heeꞌranno. Insa gobbansara sabbakkannori roore hasiissanno qooxeessira woꞌma yanna suwisaano ikke lowo diro soqqamino. Umi qaaqqonsa iliti kayinni suwisaanchimmansa uurrisino; xa insa layinki qaaqqo ilino. Ispeni togo yiino: “Xa albi gede ayyaanaamittete loosira lowo yanna sayinseemmokki daafira fonqolu giddora eꞌneemmokki gede ganyine Yihowa huucciꞌneemmo. Yihowa ayyaanaamittenke agadhineemmo gedenna soqqanshote diinaggaawa agurreemmokki gede kaaꞌlankera huucciꞌneemmo.”

¹⁶ Yannankera lowo fonqolo ikkinohu wolu coyi teeda baꞌino misilla laꞌꞌate. Togoo coyibba laꞌꞌate fonqolammeemmoha ikkiro, Sheexaane bushiisha didandiineemmo. Mayira? Korkaatuno Sheexaanunna alamesi bushare assinammora giddeessite diaffannonke. Mitootu konni fonqoli giddora eꞌinohu surrensa bushare hiincitanno gede assidhino daafiraati. Ikkirono, lowo kume ikkitanno roduuwinke assitinonte gede ninkeno togoo coyiwiinni xeertiꞌra dandiineemmo.—1 Qor. 10:12, 13.

“BUSHUWIINNI GATISINKE”

17. (a) Bushuwiinni gatate huucciꞌneemmo huuccatto ledo sumuu yine heeꞌra dandiineemmohu hiittoonniiti? (b) Muli yanna giddo afiꞌneemmo fooliishsho hiitteeti?

¹⁷ “Bushuwiinni gatisinke” yitanno huuccatto ledo sumuu yine heeꞌrate, ‘Sheexaanu alame wido ikkineemmokki’ gede sharrama hasiissannonke. “[Sheexaanu] alame woy alamete noo coyibba” baxa dihasiissannonke. (Yoh. 15:19; 1 Yoh. 2:15-17) Kuni duuchanka wote sharrama hasiissannonke coyeeti. Yihowa Sheexaanenna busha alamesi hune tenne huuccattonkera dawaro qolanno wote lowo fooliishsho afiꞌneemmo! Ikkollana, Sheexaanu iiminni tugami wote shiima yanna calla gattinosita afinota qaaga hasiissannonke. Baasa hanqino daafira, Maganoho ammanammoommokkire ikkineemmo gede assate dandaamisire baala assanno. Konni daafira, isiwiinni gatate Yihowa ganyine huucciꞌra hasiissannonke.—Aju. 12:12, 17.

18. Sheexaanu alame baꞌanno wote gatate, maa assanke agura dihasiissannonke?

¹⁸ Sheexaanu nookki alamera heeꞌra hasiꞌratto? Hatto ikkiro, Maganu Mangiste Maganu suꞌma qullaawa assitanno gedenna fajjosi uullate aana woꞌmitanno gede assitara huucciꞌra agurtooti. Qoleno, Yihowa ayyaanaamittetenna maalaamittete hasiissannohere aannohe gede huucciꞌri. Ee, lawishshu huuccatto ledo sumuu yaanno garinni heeꞌrate murcidhe kai.