Hagiirrinke Baꞌꞌannota Agadha Dandiineemmo Gara

1. Hagiidhineemmo gede assannonkeha Yihowa uyinonke atoote kuli.

YIHOWA ninke hagiidhinanni heeꞌnammora hasiꞌranno; hakko daafira hagiidhineemmo gede assannonkeha lowo atoote dirrisannonke. Umihunni, heeshsho uyinonke. Maganu halaalu magansiꞌrawa woshshinonke daafira tenne uyinonke heeshshonni iso guwisiꞌra dandiineemmo. (Far. 144:15; Yoh. 6:44) Yihowa baxannonketa coyiꞌrino; qoleno isira soqqammanni heeꞌneemmo gede kaaꞌlannonke. (Erm. 31:3; 2 Qor. 4:16) Yihowa ayyaanaame gannate uyinonke; tenne gannate giddo falakkinoti ayyaanaamittete sagalenna baxillu noohu roduuwu maamari noonke. Hakkiinni saeno, albillitte hagiirsiissanno hexxo noonke.

2. Mite ammanantinota Maganu soqqamaano hiitti simmeete macciishshantanni qarrissannonsa?

² Ikkollana mite ammanantinota Maganu soqqamaano, ‘Ani dixaqqameemmoho’ yitanno simmeete qarrissannonsa. Kuri roduuwira insano soqqanshonsano Yihowa albaanni waaga afidhinokkihu gede ikke macciishshamansara dandaanno. Seeda yanna togoo simmeete macciishshantannansa heedhinorira, “lowo diro” hagiirrunni heeꞌra haaqete hagiirre labbansara dandiitanno. Insara heeshsho tunsicho labbe leeltansara dandiitanno.—Mek. 11:8.

3. ‘Ani dixaqqameemmoho’ yitanno hedo macciishshantanno gede assannohu maa ikkara dandaanno?

³ Togoo roduuwira ‘Ani dixaqqameemmoho’ yitanno simmeete macciishshantannonsahu hexxitino coyi ikkikki gatanno wote, xiwantanno wote woy diru akkallenni dhukinsa baꞌꞌanno wote ikkara dandaanno. (Far. 71:9; Law. 13:12; Mek. 7:7) Qoleno, wodaninke xagaraamo ikkinotanna Magano hagiirsiinsanni heeꞌneenna nafa woqasankera dandaannota huwata hasiissannonke. (Erm. 17:9; 1 Yoh. 3:20) Daawuloosi Maganu soqqamaano beebba kassasanno. Ammana noosikkihu Elfaazi assinonte gede, Sheexaanunnite gedee hedo noonsa mannootino Maganu albaanni waagu dinonke yine hendeemmo gede assitankera dandiitanno. Togoo hedo Iyyoobi waro kapho ikkitinonte gede yannankerano kaphoholla.—Iyo. 4:18, 19.

4. Konni birxichira maa ronseemmo?

⁴ Yihowa iillannonsa qarrinni kainohunni “xiꞌmino booni giddo hadhanni” noohu gede ikke macciishshamannonsarira ledonsa ikkannota Qullaawa Borro giddo xawise coyiꞌrino. (Far. 23:4) Isi ninke ledo ikkanno doogga giddo mitte Qaalisi widoonniiti. Qullaawu Maxaafi “mishshige diigate kaaꞌlitannoti Maganu wolqa noosiho”; soꞌro ikkitino hedonna meessaneeto ajishe laꞌꞌano koye yini mishshige widooti. (2 Qor. 10:4, 5) Hanni hagiirrinke baꞌꞌannota agadhate Qullaawa Maxaafa horoonsiꞌra dandiineemmo gara laꞌno. Tenne assanke uminkera kaaꞌlitanno assaawe afiꞌratenna woloota jawaachisha dandiineemmo gara huwatate kaaꞌlitannonke.

HAGIIRRIKKI BAꞌꞌANNOTA HOOꞌLATE QULLAAWA MAXAAFA HOROONSIꞌRI

5. Phaawuloosi hagiirrinke baꞌꞌannota gargadhate kaaꞌlannonkere mayyee xawisino?

⁵ Hawaariya Phaawuloosi hagiirrinke baꞌꞌannota gargadhate kaaꞌlannonkere coyiꞌrino. Isi Qorontoosi songo, “Ammanate giddo heedhinoonnitanna teꞌee afate kiꞌneneeto ganyitine fatantine laꞌe” yiino. (2 Qor. 13:5) Koye yini “ammana” Qullaawu Maxaafi giddo kulloonnita Kiristaanu ammananno coyibba woꞌmanta riqibbannote. Coyiꞌneemmo coyinna assootinke tenne coyibba ledo sumuu yaannoha ikkiro, aleenni yini fatana saꞌnoommo, hattono “ammanate giddo” heeꞌnoommo yaate. Kayinni Qullaawu Maxaafi giddo noohu Kiristaanu rosi baalunkura hajajama hasiissannonke ikkinnina, mito agurre mito calla harunsineemmo yaa diꞌꞌikkino.—Yaq. 2:10, 11.

6. ‘Ammanate giddo heeꞌnoommotanna teꞌee afate’ ninkeneeto fatane laꞌꞌa hasiissannonkehu mayiraati? (Umi misile lai)

⁶ Konni garinni ateneeto fatante laꞌꞌa hakko iso saꞌꞌattokkiha lawihero waajjishshahera dandiitanno. Ikkirono, ninke umonke laꞌneemmo garinni Yihowa laꞌꞌannonke gari woyyanno; korkaatuno isi hedo ninketenni lowo geeshsha roortanno. (Isa. 55:8, 9) Isi soqqamaasinesi marammarannohu mishansara woy woqasansara ikkikkinni dancha akatansa afaraatinna kaaꞌlansara yeeti. ‘Ammanate giddo noottotanna teꞌee afate’ ateneeto fatanatto wote Qullaawa Maxaafa horoonsiꞌrattoha ikkiro, albinni roore ateneeto Maganu laꞌꞌannohe garinni laꞌꞌatto. Tini qolte Maganu albaanni waagu dinoe yitanno hedo heedhuhero hattee qeeꞌlatto gedenna Yihowa kaffi asse laꞌꞌannoheta qaagatto gede kaaꞌlitannohe. Tenne qaagakki tunsino minira gobbanni xawaabbu eanno gede maskoote fanoottohu gedeeti.

7. Qullaawu Maxaafi giddo kulloonnihu ammanamino manni lawishshi maaho kaaꞌlannonke?

⁷ Ninkeneeto fatanne laꞌꞌa dandiineemmoti mitte doogo, Qullaawu Maxaafi giddo kulloonnihu ammanamino manni lawishsha hiincate. Kuni manni dandee saino coyenna simmeetensa atete ledo heewisiisi; qoleno insara iillinori atera iilloommero ma assattoro hedi. Hanni “ammanate giddo” noottota buuxate Qullaawa Maxaafa horoonsiꞌra dandaatto gara leellishannoha sase lawishsha laꞌno. Tini ateneetira dancha lao heedhannohe gedeno kaaꞌlitannohe.

BUXICHO GUNNITTE

8, 9. (a) Buxicho gunnitte dandiitino coyibba hiikkuriiti? (b) Tenne gunnittera hiittoo hedo macciishshantinoseha ikkara dandaanno?

⁸ Yesuusi Yerusaalamete beetemeqidesete giddo mitte buxicho gunnitte laino. Tenne mancho xagge, hendoommo gede ikka hoolannonkeri heeꞌriro nafa hagiirrinke baꞌꞌannota gargadhate kaaꞌlitannonke. (Luqaasi 21:2 nabbawi.a) Hanni tini gunnitte dandiitino coyibba hedi. Umihunni, minaannase shiidhino daafira xissiisidhe no. Qoleno ammaꞌnote marooti ise gedee gunnoota kaaꞌla agurte ‘minensa mulqitannoreeti.’ (Luq. 20:47) Tini mancho buxima gantinose daafira, mittu kira loosanno manchi 15 daqiiqi giddo calla loose afiꞌranno woxi geeshshire uyitino.

⁹ Hanni tini gunnitte hattee lame shiimaadda saante adhite beetemeqidesete hoowe eꞌu wote mayi macciishshaminosero hedi. Minaannise lubbote noo waro fushshitanno woxi ledo heewisiinsiro xa uyitanni noo saante mageeshshi geeshsha ajjinoro heddinokka? Isera albaanni noo manni tugannoha lowo woxe laꞌanno wote ise massidhino saante ajjino gara hedde saalfattinokka? Togoo hedo macciishshantinoseha ikkiro nafa, halaalu magansiꞌra kaaꞌlate angase assitu geeshsha uyitino.

10. Yesuusi gunnitte mancho Maganu albaanni waaga afidhinota xawisinohu hiittoonniiti?

¹⁰ Yesuusi, gunnitte manchono tuggino saanteno Yihowa albaanni waaga afidhinota coyiꞌrino. Isi ‘dureeyye baalanti uyitinohunni roore tuggino’ yiino. Ise tuggino saante wolootu uyitino woxi ledo mitteennilla worranni; Yesuusi bade kulinohu kayinni ise assitinoreeti. Gedensaanni woxe kiirtannori, tini lame saantenna tenne saante tuggino mancho Yihowa albaanni lowo waaga afidhinota afa didandiitanno. Ikkirono, wolu manni hedonni woy wole agurina hatti gunnitte iseneeto laꞌanno garinni, Maganu lao roortanno. Ammanate giddo noottotanna teꞌee afate tenne xagge horoonsiꞌra dandaatto?

11. Gunnitte mancho xaggenni maa ronseemmo?

¹¹ Heeshshokki gari Yihowara lowore woy boodere aatto gede assahera dandaanno. Mitu roduuwi geedhimmatenni woy wolqate anjenni kainohunni dancha duduwo sabbakkanno yanna boodete. Kuri roduuwi, soqqamoommo saate rippoorte qollanni geeshshita diꞌꞌikkitino yituro gara ikkanno? Wedellicha woy danchu ordu keeri nooheha ikkittoro nafa, Maganu manni diru giddo iso magansiꞌranni sayisannote lowo saate ledo heewisiinsiro ani assoommori garire diꞌꞌikkino yite hedattoha ikkara dandaanno. Ikkollana gunnittete xagge, Yihowa isira assineemmoha mitto mittonka coye, hakko iso qarru giddo heeꞌne assineemmore laꞌꞌannota hattono lowo geeshsha naadannota rosiissannonke. Hanni sai diro Yihowara soqqamootto soqqansho hedi. Soqqamootto saate giddo lowo geeshsha mitiiꞌmite heedhe soqqamoottoti no? Hatto ikkiro, Yihowa hatte saatera isira assoottore kaffi asse laꞌꞌannota deꞌooti. Buxicho gunnitte gede atino Yihowara soqqamate dandaamannohere baala assitanni heeꞌritto geeshsha “ammanate giddo” noottota huluullantooti.

“HEESHSHOꞌYA HAADHE HOOLI”

12-14. (a) Eeliyaasira hiittoo hedo macciishshantinosi? (b) Eeliyaasira hattoo hedo macciishshantinosihu mayira ikkara dandaanno?

¹² Masaalaanchu Eeliyaasi Yihowara ammanaminoho; qoleno lowo ammana noosiho. Ikkollana mitte yannara lowo geeshsha hexxo mudhino daafira reya hasiꞌre Yihowa togo yee huucciꞌrino: “Xaate ikkinoe! Yihowa, heeshshoꞌya haadhe hooli.” (1 Neg. 19:4) Hakkeeshshi geeshsha hexxo mudhe egenninokki manni Eeliyaasi ‘garri-garimmo laikki coyiꞌrino’ yaara dandaanno. (Iyo. 6:3) Isi hatto yiinohu kayinni addankaati. Yihowa kayinni Eeliyaasi reyo halchinotera hanqa agure kaaꞌlinosi.

¹³ Eeliyaasira togoo hedo macciishshantinosihu mayiraati? Isi hakkuyira shiima yanna albaanni, Yihowa halaalaancho Magano ikkinota leellishshanno maalale loosino; hakkiinnino 450 ikkitannota Baꞌꞌaali masaalaano shinoonni. (1 Neg. 18:37-40) Eeliyaasi hakkawote Maganu daga xaate halaalu magansiꞌrawa higganno yee hedikki digatino; kuni kayinni diꞌꞌikkino. Busha mootitte Elzaabeeli Eeliyaasi shitara kaꞌinota sokka sokke kultusi. Eeliyaasi lubbosi gatisiꞌrate yee, Yihudu gobba tayise mannu nookkiwa halallira xooqino.—1 Neg. 19:2-4.

¹⁴ Eeliyaasi hakko callisi heeꞌre, masaalaancho ikke loosino loosi waagiweelo ikkinohu gede asse heda jammari. Isi Yihowa togo yiino: “Ani annuwaꞌya rooroommori dino.” Isi hatto yiinohu, reyitinori albi annuwasi bisi woy miqqa gede xaqqameemmori dino yee hedino daafiraati. Isi isonooto marammarinohu umisi seeri garinniiti yaa dandiinanni; hakko daafira beebba daafure gatinohu gedenna Yihowa albaannino ikko wolu manni albaanni waagu noosikkihu gede asse hedino.

15. Maganu Eeliyaasi isi albaanni waaga afiꞌrinota huwatanno gede assinohu hiittoonniiti?

¹⁵ Duuchanka Dandaanno Magani kayinni Eeliyaasi laꞌꞌannohu baxxino garinniiti. Eeliyaasi Maganu albaanni lowo waaga afiꞌrino; Yihowa qole Eeliyaasi tenne huwatanno gede assannore assino. Maganu sokkaancho soye jawaachishinosi. Qoleno 40 barra woꞌma Korebi Ilaala haꞌranno wote hudiꞌrannokki gede sagalenna waa uyinosi. Hakkiinni saeno, Eeliyaasi Isiraeelete mereero Yihowara ammanaminohu wolu dino yii wote soꞌrinota Yihowa shaqqillunni kulinosi. Qoleno Maganu Eeliyaasira wole looso uyinosi; isino maahoyye yee adhino. Eeliyaasi Yihowa kaaꞌlonni wolqasi haarooꞌmiteenna galagale masaalaancho ikke soqqama jammarino.—1 Neg. 19:5-8, 15-19.

16. Maganu jawaachishinohehu hiittee doogganniiti?

¹⁶ Eeliyaasi xagge ammanate giddo noottotanna teꞌee afatto gedenna hagiirrikki baꞌꞌannota agadhatto gede kaaꞌlitahera dandiitanno. Umihunni, Yihowa jawaachishinohe doogga hedi. Maganu soqqamaano giddo mittu lawishshaho cimeessu woy wolu ayyaanaamittetenni gikki yiino Kiristaanchi kaaꞌlo lowo geeshsha hasiisse heedheennahe kaaꞌlinohe woti no? (Gal. 6:2) Qullaawu Maxaafi, borronke, hattono songote gambooshshinke Yihowa atera assaawannota hedatto gede assinohe yanna no? Albillitte tenne doogganni kaaꞌlo afiꞌratto wote, hakko garinni kaaꞌlinohehu ayetiro hedi, hattono huuccattotenni Yihowa galati.—Far. 121:1, 2.

17. Yihowa maanke kaffi asse laꞌꞌanno?

¹⁷ Layinkihunni, ninkeneeto ajinshe laꞌnummoro dogammammora dandiineemmota huwati. Maganu laꞌꞌannonke gari rooreho. (Roomu Sokka 14:4 nabbawi.b) Yihowa isira noonke baxillenna ammanamanke kaffi asse laꞌꞌanno; isi bikkannonkehu isira assinoommo coyi jilbinni diꞌꞌikkino. Qoleno Eeliyaasinte gede, Yihowara assoottori ati hedoottohunni roorinoha ikkara dandaanno. Ati huwata hoogittorono, songote giddo kaaꞌlootto roduuwi nooha ikkara dandaanno; hattono qooxeessiꞌnera ate widoonni halaale macciishshino manni heeꞌrara dandaanno.

18. Yihowa aannohe loosi maa leellishanno?

¹⁸ Sayikkihunni, Yihowa aannoheha mitto mittonka looso isi ledokki noota leellishshanno taje gede assite lai. (Erm. 20:11) Eeliyaasi gede atino miteekkite, soqqanshokki gumiweelo labbeennahe woy mite ayyaanaamittete mixo wolqakkira aleenni ikkitinoha laweennahe hexxo mudhattora dandaatto. Ikkirono, wole baalantenni roortanno qoosso yaano dancha duduwo sabbakatenna Maganu suꞌminni woshshamate qoosso noohe; tini ninke baalunku afiꞌra dandiineemmo qoossooti. Ammanante heeꞌri. Hatto ikkiro, “Amo, mootichikki ledo hagiidhi” yee Yesuusi coyiꞌrino qaali aterano woꞌmannohe.—Mat. 25:23.

“HAWAAXAMINO MANCHI HUUCCATTO”

19. Faarso 102 borreessi manchira mayi macciishshaminosi?

¹⁹ Faarso 102 borreessi manchi lowo geeshsha dadillino. Isi “hawaaxamino” yaano bisisino surresino rakkaabbino woy cannaqantino; qoleno qarrasi dandee heeꞌranno dhuki ajinosi. (Far. 102, sammote noo assaawe) Surresi xissiisinosi coye, callimmasi, hattono gillete hedosi calla assaabbanno. (Far. 102:3, 4, 6, 11) Qoleno Yihowa tuge agurinosiha lawinosi.—Far. 102:10.

20. Huuccatto isonooto ajishe laꞌꞌanno mancho kaaꞌlitara dandiitannohu ma garinniiti?

²⁰ Ikkollana, kuni faarsaanchi heeshshosinni Yihowa guwisiꞌra dandiino. (Far. 102:19-21) Ammanate giddo noorira nafa xissiisanno coyi iillansara dandaannotanna wolu coyi aana illachisha kabbaade ikkitansara dandiitannota Faarso 102 leellishshanno. Faarsaanchu ledosi noohu qarra calla ikkinohu gede asse hedino daafira, “minu aana callase ofoltino ceicho gede” callimma macciishshantinosi. (Far. 102:7) Aterano hattoo hedo macciishshantuhero, faarsaanchu assinonte gede, hedokki xawisse Yihowara kuꞌli. Huuccatto assiꞌrakki ateneeto ajishe laꞌꞌate hedokki qeeꞌlate kaaꞌlitannohe. Yihowa ‘qarraataammu huuccatto macciishsheemmo, hattono huuccattonsa dimisheemmo’ yee qaale eino. (Far. 102:17) Konne qaalesi addaxxi.

21. Isonooto ajishe laꞌꞌanno manchi hagiirrisi lexxanno gede assiꞌrate maa assa dandaanno?

²¹ Faarso 102 hagiirrinke albinni roore lexxanno gede assiꞌra dandiineemmo gara afateno kaaꞌlitannonke. Faarsaanchu qarrasi agure Yihowa ledo noosi fiixooma hedasi tennera kaaꞌlitinosi. (Far. 102:12, 27) Isi Yihowa ayewoteno mannisira qarru iillanno wote ledonsa ikke jawaachishannota afasi sheshifachishshinosi. Atino waagu dinoe yitanno hedo Maganoho hedootto geeshsha soqqamattokki gede guficho ikkituhero, huuccatto assiꞌri. Qarrunni fooliishshiꞌratto gede calla ikkikkinni ‘Yihowa suꞌmi duduwamara’ huucciꞌratto huuccatto macciishshanno gede Magano xaꞌmiꞌri.—Far. 102:20, 21.

22.  Ninke baalunku Yihowa hagiirsiisa dandiineemmohu hiittoonniiti?

²² Addaho, Qullaawa Maxaafa horoonsiꞌne ammanate giddo heeꞌnoommotanna Yihowa albaanni lowo waagi noonketa buuxa dandiineemmo. Tini alame noo geeshsha meessaneeto ajishe laꞌꞌate hedo baalanta woy hexxo mudhate simmeete gudinse qeeꞌla dandiineemmokkiti dikaandannite. Ikkirono, ninke baalunku Yihowara ammanamme soqqamanni heeꞌneemmoha ikkiro, iso hagiirsiisanna gato afiꞌra dandiineemmo.—Mat. 24:13.