Maganu Uyinonketa Muxxe Elto Naadattota Leellishi

MITTE baxxitino elto uyininkero galata hasiissannonketi egennantinote. Yesuusi hatte yannara hurannokki dhibbi amadinonsare tonne manna hursi gedensaanni coyiꞌrinori, elto uyinonkeha galata hasiissannota leellishanno. Dhibbunni hurturi tonnu manni giddo mittu “Magano galatate agure higino.” Yesuusi “Keeraabburi tonne manna diꞌꞌikkitino? Honsu hiikkituyya?” yiino. (Luqaasi 17:12-17) Kuni lawishshi wolu manni assinonkeha dancha coye mulenni hambammora dandiineemmota leellishanno.

Wodo wole baalante eltonni roortannote. Kageeshsha mannu oosora togoo elto uyine diegenninoonni. Ikkina, Maganu assinohere naadattota leellisha dandaattohu hiittoonniiti?

• Elto Uyinoheha afate woꞌnaali. Mannu ooso baalanti wodote kakkalo widoonni hegere heeshsho afiꞌrate assa hasiissannonsari no. Yesuusi Magano huucciꞌranni togo yiino: “Hegere heeshshono, ati callu halaalaancho Magano ikkoottotanna soottoha Yesuusi Kiristoosa afate.” (Yohaannisi 17:3) Lawishshaho qaaqqu heedheenna mittu manchi reyotenni gatisinoheta kullihero, hakkonni manchi daafiranna isi gatisinohehu mayiraatiro afa dihasiꞌratto? Heeshsho gatissanno elto uyinonkehu yaano wodote kakkalo qixxeessinonkehu Maganu Yihowa, Iso afattora calla ikkikkinni isiwa shiqqi yaattora hasiꞌranno. Qullaawu Maxaafi togo yaanno: “Maganunniwa shiqqi yiiyye; isino kiꞌnewa shiqqi yaanno.”—Yaiqoobi 4:8.

• 

  Wodote kakkalo ammanattota loosunni leellishi. “Beettosi ammaꞌninohura hegere heeshsho noosi.” (Yohaannisi 3:36) Wodote kakkalo ammanattota leellisha dandaattohu hiittoonniiti? Tenne assa dandaattohu loosunniiti. (Yaiqoobi 2:17) Hiittoo loosinni? Mitte elto ateta ikkitannohu hattenne elto adhittoro callaati. Konni daafira wodote kakkalono adha hasiissannohe. Hiittoonni? Maganu maa assattora hasiꞌrannoro rosi; hattono rosoottori ledo sumuu yaannore assi.a Maganu maarannohe gedenna keeraancho tiia afiꞌrate huucciꞌri. Wodote kakkalo ammantannota loosunni leellishshannori baalu salaame, harshammonna atoote afidhannota addaxxite Maganunniwa shiqi!—Ibiraawoota 11:1.

• 

  Yesuusi Reyo Qaagooshshi Ayyaana ayirrisi. Yesuusi wodote qixxaawo qaangeemmo gede, dirunni mitte hinge ayirrinseemmo ayyaana xintino. Isi konni ayyaani daafira coyiꞌranni, “Konne ane qaaggora assidhe” yiino. (Luqaasi 22:19) Yihowa Farciꞌraasine tayixe Yesuusi Reyo Qaagooshshi Ayyaana Dotteessa 3, 2009 (Dotteessa 11, 2017) Maakisanyote barra arrishsho eꞌu gedensaanni ayirrissanno. Mitte saate ikkitannote tenne pirogiraamewa Yesuusi reya mayira hasiissinoronna isi reyo xaa yannaranna albillitte ma garinni kaaꞌlitannonkero kultanno lallawo shiqqanno. Niro Qaagooshshu Ayyaana ayirrisate alamete deerrinni 20 miliyoone meddi yaanno manni gamba yiino. Atino Maganu uyinonketa muxxe elto naadattota leellishate, ledonke konne ayyaana ayirrisattora ayirrinyunni koyinsoommohe.