Yesuusi Rosaanosira Galagale Leelli

Yesuusi soqqamaasinesira leellihu gedensaanni, Pheexiroosi qulxuꞌme woshshaaxxara Galiilu Baara haꞌri. Toomaasi, Yaiqoobi, Yohaannisinna wole rosaanono ledosi hadhino. Insa hashsha woꞌma mitte qulxuꞌme nafa diamaxxitino.

Hakkiinni soodo guto baaru gamira uurre nooha mitto mancho laꞌu. Isi ‘Qulxuꞌme nooꞌneni?’ yee xaꞌminsa. Insano ‘Dinonke’ yitu. Manchuno “Woshshaadoꞌne yowolote qiniiteenni tugge” yiinsa. Woshshaado tuggu gedensaanni, giddo qulxuꞌme woꞌmiteenna goshooshshe fushsha hooggu. Hakkiinni Yohaannisi manchu Yesuusa ikkinota afe “Mootichahowe!” yii. Pheexiroosi hakkawoyitenni wayi giddora kubbe eꞌꞌe daahanni baaru qacce haꞌri. Wole rosaanono yowolotenni isira hoode hadhino.

Baaru qacce iillitanno woyite, giirate aana raꞌanni noo daabbonna qulxuꞌme laꞌu. Yesuusi gama qulxuꞌmensa abbite giirate aanaho wortanno gede kulinsa. Hakkiinni ‘Amme afoo seekkidhe’ yiinsa.

Itte kaꞌuhu gedensaanni Yesuusi Pheexiroosi togo yee xaꞌmisi: ‘Qulxuꞌme woshshaadatenni roorsite baxattoe?’ Pheexiroosi ‘Ee, Mootichaꞌya, baxeemmoheta atinni afootto’ yii. Yesuusi qole, ‘Baxattoeha ikkiro, wiliiꞌleꞌya itisi’ yiisi. Yesuusi xaano ‘Pheexiroosi, baxattoe?’ yee xaꞌmisi. Pheexiroosino “Mootichaꞌya, baxeemmoheta atinni afootto” yii. Yesuusino, ‘Goodannaꞌya allaali’ yiisi. Yesuusi hatte xaꞌmo sayikkimeeshsho xaꞌmisita Pheexiroosi lowo geeshsha dadilli. Isi togo yiino: ‘Mooticha, ati woꞌmankare afootto. Baxeemmohetano afootto.’ Yesuusi ‘Wiliiꞌleꞌya itisi’ yiisi. Hakkiinni Yesuusi Pheexiroosi ‘Ane harunsi’ yiisi.