Maaro Mootichisiwiinni Rosino

1. Pheexiroosi heeshshosi giddo roore dadillinohu mamoote ikkara dandaanno?

PHEEXIROOSI, Yesuusi ledo illenna ille xaaddeennasi ikke masino gara horo dihawanno. Hakkawote Yesuusi isira hanqinota woy koffi yiinota leellishannori albisi aana nookka? Tenne gunde coyiꞌra didandiineemmo; mayira yiniro, Qullaawu Maxaafi “Hatte yannara Mootichu caaqqi yee Pheexiroosi lai” calla yaanno. (Luq. 22:61) Ikkollana, Pheexiroosi Yesuusi ledo illenna ille xaaddusi woyite jawa soꞌro loosinoti leeltinosi. Pheexiroosi assinori Yesuusi balaxe masaalinoreetinna isi kayinni horo diasseemmo yiinoreeti; isi baxanno Mootichasi kaadino. Pheexiroosi heeshshosi giddo hakko barri gede ikke dadille diegennino yaa dandiineemmo.

2. Pheexiroosi mayi daafira rosa hasiissinosi? Isi xagge ninkera kaaꞌlitannonkehu hiittoonniiti?

² Kayi Pheexiroosiri xaate kaino yaa diꞌꞌikkino. Isi lowo ammana noosiha ikkino daafira, xaano ikkiro loosino soꞌro taashshiꞌranna Yesuusi rosiisinohu kaajju rosi giddo mitto yaano maarote daafira rosa dandaanno faro noosi. Ninkeno togoo roso rosa hasiissannonke daafira, hanni Pheexiroosi maarote daafira rosanno gede assinosiri maatiro laꞌno.

Rosannori Lowori Gate Noosi

3, 4. (a) Pheexiroosi Yesuusa mayyee xaꞌmino? Pheexiroosi mayyee hedinoha ikkara dandaanno? (b) Yesuusi, Pheexiroosirano hakkawaro noo manni akati sainosita leellishinohu hiittoonniiti?

³ Kuni ikkara mitu lewu aganira albaanni Pheexiroosi ilaminohu Qifirinahoomi katamira heedheenna, isi Yesuusiwa shiqqi yee togo yee xaꞌmi: “Mooticha, rodiiꞌya ane aana sao assiro meꞌꞌe hige agurosi? Lamala hige agurosini?” Pheexiroosi hatto yii woyite ‘Ani shaqqadoho’ yee hedinoha ikkara dandaanno. Mayira yiniro, hakkawaro noori ammaꞌnote murrooti mitto mancho sase hinge calla gatona yaa hasiissanno yite rosiissanno! Yesuusi kayinni togo yee qolisi: “Lamala higge [lamalawo] ikkinnina lamala higge calla aguri diyeemmohe.”—Mat. 18:21, 22.

⁴ Yesuusi hatto yiinohu, Pheexiroosi mitte mittenta soꞌro kiidha hasiissannosi yaateeti? Deeꞌni; Pheexiroosi ‘7 hige gatona yooni?’ yeenna Yesuusi kayi ‘Lamala higge lamalawo’ yiinohu, baxillu noosi manchi kiirikkinni woy gawalo nookkiha gatona yaannota rosiisateeti. (1 Qor. 13:4, 5) Hakkawaro noohu godowa kaajjadunna maarannokki manni akati Pheexiroosirano sainosita Yesuusi qummi assino. Maganu kayinni kiirrummokkinni marro marro gatona yinammora hasiꞌranno.—1 Yohaannisi 1:7-9 nabbawi.

5. Maaro roore ronseemmohu mamoote ikkara dandaanno?

⁵ Pheexiroosi tennera Yesuusi ledo diheewisamino. Kayi Yesuusi rosiisinosiri wodanisira coino ikka? Mito woyite maaro roore ronseemmohu, ninke uminkera maaro hasiissannonke woyiteeti. Tenne huwatate, hanni Yesuusi reyara albaanni ikkinore wirro laꞌno. Hattenne qarru yannara, Pheexiroosi lowo soꞌro loosino daafira Mootichisi maaro hasiissinosi.

Yesuusi Duucha Hige Gatona Yiinosi

6. Yesuusi soqqamaasinesira umo heeshshi assate daafira rosiisi woyite, Pheexiroosi ma assino? Yesuusi ma assiyya?

⁶ Yanna Yesuusi uullate aana heeꞌrinoho jeefote hashshaati. Hakkawote Yesuusi soqqamaasinesira rosiisannori lowori gate no; konni giddo mittu umo heeshshi assate. Yesuusi insara lawishsha ikkara yee umosi heeshshi asse lekkansa hayishshino; hakkawaro lekka hayishshitannori borojjootu giddo woriidireeti. Pheexiroosi umo, Yesuusa ‘Lekkaꞌya hayishshattoraati?’ yee xaꞌmino. Hakkiinni, ‘Lekkaꞌya dihayishshattoe’ yiino. Tenne, lekkaꞌya calla ikkikkinni angaꞌyano umoꞌyano hayishshie yiino! Ikkirono, Yesuusi lekkansa hayishsha hasiissinohu mayiraatironna tini mayi tiro afidhinoro cince shaqqillunni kulinonsa.—Yoh. 13:1-17.

7, 8. (a) Pheexiroosi xaano wole hiittenne soꞌro loosino? (b) Yesuusi Pheexiroosi shaqqillunni maarinosita leellishinohu hiittoonniiti?

⁷ Shiima yanna gedensaanni, Pheexiroosi xaano wole soꞌro loosino. Soqqamaasine ‘Ninke giddo rooru ayeti?’ yitanni mimmitu ledo nyerri yaa hanaffu; Pheexiroosino hakkawote nyerri yiinoti egennantinote. Ikkirono, Yesuusi shaqqillunni seejjinonsa, hattono danchu akatinsara galatinonsa; insa Mootichinsara ammanantinore ikkitinota leellishshino. Ikkollana, Yesuusi baalunku iso hunte xooqqannota balaxe coyiꞌri. Pheexiroosi hatte farora, reya hasiissuro nafa, Yesuusiwiinni horo baxxannokkita coyiꞌrino. Yesuusi kayinni, hakko hashsha lukkichu lame hige gana geeshsha Pheexiroosi Mootichasi sase hige kaadannota masaalino. Pheexiroosi kayi xaano tenne diammanino; qoleno wole baalante soqqamaasinenni roore isi ammanaminoha ikkannota coyiꞌrino!—Mat. 26:31-35; Maq. 14:27-31; Luq. 22:24-28; Yoh. 13:36-38.

⁸ Yesuusi xa Pheexiroosira hanqe caaccaawino ikka? Yesuusi hattee qarru yannara nafa, guuntete xeꞌne noonsa soqqamaasinesita dancha akatta illachishino. Isi Pheexiroosi kaadannosita afinoha ikkirono, togo yiino: “Ammanakki baꞌannokki gede ate daafira [huuccoommo]. Galagalte daatto woyite roduuwakki kaajjishi!” (Luq. 22:32) Konni garinni Yesuusi, Pheexiroosi soꞌrosi taashshiꞌre higannotanna albinte gede Maganoho ammaname soqqamannota ammanannota coyiꞌrino. Addanko Yesuusi Pheexiroosi shaqqillunni maarinosi!

9, 10. (a) Pheexiroosi Geetesemaane yinanni bayicho loosino soꞌro maati? (b) Pheexiroosi xagge maa qaangeemmo gede assitannonke?

⁹ Gedensoonni, Geetesemaane yinanni bayicho Pheexiroosi xaano duucha hige soꞌro loosino daafira seejjo hasiissinosi. Yesuusi huuccatto assiꞌranno woyite, Pheexiroosi, Yaiqoobinna Yohaannisi baqqi yite agartara kulinonsa. Hakkawote Yesuusi lowo yaaddonna dadilli amadeenna noo daafira, kaaꞌlo hasiisse noosi; Pheexiroosinna wole soqqamaasine kayinni wirro wirro muggino. Ikkirono Yesuusira qarrinsa leellinosi daafira gatona yiinonsa; isi “Ayyaanu qixxaawaho; maalu kayinni daafuraamoho” yiinohu iseraati.—Maq. 14:32-41.

¹⁰ Mulenni, caabbiyye, bisenna dulluwa adhino manni Yesuusa amadara dayi. Hatti yanna, assinannire gura qiniite layiꞌne assinannite. Pheexiroosi kayinni muddame bise fushshe, kakkalaanote biili borojjichira Malkoosira macca gane tayisino. Yesuusi wodanaaꞌme Pheexiroosi seejjihunna manchoho macca hursihu gedensaanni, harunsaanosi baalanti finqilletewiinni xeertiꞌra hasiissannonsahu mayiraatiro kulanno biddishsha uyino. (Mat. 26:47-55; Luq. 22:47-51; Yoh. 18:10, 11) Pheexiroosi kageeshsha lowo soꞌro loosino daafira, Mootichisi maaro hasiissinosi. Pheexiroosi xagge, ninke baalunku duucha woyite soꞌneemmore ikkinoommota qaagiissitannonke. (Yaiqoobi 3:2 nabbawi.) Ninke giddo barru baala Maganu maaro hasiissannokkihu ayi no? Ikkollana Pheexiroosi hakko hashsha loosino soꞌro kageeshsha calla diꞌꞌikkitino. Isi hakkii saꞌe qaaffino soꞌrono loosino.

Pheexiroosi Loosinota Rooriidi Soꞌro

11, 12. (a) Pheexiroosi, Yesuusa amandihu gedensaanni mito geeshshano ikkiro worba ikkinota leellishinohu hiittoonniiti? (b) Pheexiroosi coyiꞌrino qaale wonshikki gatinohu hiittoonniiti?

¹¹ Yesuusi amadasira dayino mannira, ‘Ane hasidhinanni heedhinoonni ikkiro soqqamaasineꞌya hadhona agurre’ yii. Mannu Yesuusa amade usuri woyite, Pheexiroosi assannore hooge uurre laꞌꞌanni no. Hakkiinni, wole soqqamaasine gede isino agure xooqi.

¹² Pheexiroosinna Yohaannisi xooqqanni marte uurritinohu Kakkalaasinete Biili Haanna miniwa ikkara dandaanno; umo Yesuusa qorrara massinoonnihuno hakkiiraati. Yesuusa hakkiinni fushshine haaꞌne haꞌni woyite, Pheexiroosinna Yohaannisi ‘isiwiinni xeertidhe badheenni hadhanni’ no. (Mat. 26:58; Yoh. 18:12, 13) Pheexiroosi lubbiqaleessa diꞌꞌikkino. Isi Yesuusa amande heeꞌneenna hoodesi haꞌrasi, mito geeshshano ikkiro worba ikkinota leellishshanno. Hakku manni olu uduunne qodhe nooho; qoleno Pheexiroosi wonanni insa giddo mitto madiisse kaino. Ikkollana, Pheexiroosi umo reya hasiissuro nafa Mootichisira ammanamannota coyiꞌrinoha ikkirono, qaalesi diwonshino.—Maq. 14:31.

13. Kiristoosi hoode haꞌnanniti gara ikkitino doogo hiittee callaati?

¹³ Yannankerano batinyu manni Pheexiroosi gede, Kiristoosi “xeertiꞌre badheenni” hige yaano mannu afinsakkinni harunsa hasiꞌranno. Ikkollana, gedensoonni Pheexiroosi umisi borreessinonte gede, baxiri dayirono Kiristoosiwa gamba yine duuchante doogonni ‘haꞌrumasi seekkine harunsa’ (NW) hasiissannonke; Yesuusi hoode haꞌnanniti gara ikkitino doogo tenne callaati.—1 Pheexiroosi 2:21 nabbawi.

14. Yesuusi hajo laꞌni hashsha Pheexiroosi mama no?

¹⁴ Pheexiroosi sunuutunni ikke Yesuusa amadino mannira badheenni haꞌranni, Yerusaalamete noote jajjabba minna giddo mittunniwa iilli. Hakku mini Qeyaafa yinannihu kakkalaanote biiliho; kuni manchi dureessahonna mannu ayirrisannoho. Togoo minira roore anga jawa waalcho afidhinoti halaꞌlado hoowe heedhanno. Pheexiroosi waalchunniwa iillita giddora ea hoollisi. Yohaannisi kakkalaanote biilo egenninoha ikkino daafira, hakkawote balaxe eꞌꞌe kaino; hakko daafira isi waalcho agarte noo beetto coyishiishe Pheexiroosi hoowete giddora eanno gede assi. Hakkuyi gedensaanni kayi Pheexiroosi Yohaannisi ledo dikeeshshino; qoleno Mootichisira halamate minira eate diwoꞌnaalino. Hatteentenni isi, hoowete giddo mitu borojjootinna soqqamaasine giira giwaadhanni noowa uurre no; hakkawote kaphu naqaashshe Yesuusa shinanni gede kaphunni farcidhara minira eꞌanninna fultanni no.—Maq. 14:54-57; Yoh. 18:15, 16, 18.

15, 16. Yesuusi Pheexiroosi sase higge kaadattoe yee coyiꞌrino masaalo woꞌmitino gara xawisi.

¹⁵ Pheexiroosi hoowete giddora eessitu beetto, isi giiranniwa shiqqi yiita xunsite laꞌusi. Hakkiinni ise ewelummasi badde affe, mannu albaanni “Atino Naaziretete Yesuusi ledoho” yitusi. Pheexiroosi lowo geeshsha mase, Yesuusa diegennoommo yii; isinni ‘Mayitanni noottaro dileellinoe’ yiise. Hakkiinni isi mannu afannosikki gede, hoowete waalchiwa hige haꞌri; kayi xaano wole beetto affe, mannaho kultanni “Kuni manchi Naaziretete Yesuusi ledoho” yitu. Hakkiinni Pheexiroosi “Konne ati yaattaha diegennoommo” yee xaari. (Mat. 26:69-72; Maq. 14:66-68) Isi lukkichu gananna macciishshinohu, konni garinni Yesuusa layinkimeeshsho kaadihu gedensaanni ikkara dandaanno; kayinni Pheexiroosi hakkawote mase jajjare noo daafira, Yesuusi shiima saatera albaanni coyiꞌrino masaalo diqaagino.

¹⁶ Shiima yanna gedensaanni, Pheexiroosi xaano mannu ewelummasi afannokki gede ikkate woꞌnaalanni no. Ikkollana, hoowete giddo noohu hojjichu manni isiwa hige dayi. Insa giddo mittu, Pheexiroosi macca gane tayisihura Malkoosira fiixaho. Isi Pheexiroosi, “Kaansoonni haqqe giddo isi ledo noottoha diafoommohe?” yiisi. Pheexiroosi insa sodhinota ammansiisate woꞌnaali. Hakko daafira, coyiꞌroommori adda ikka hoogiro rumo amaddoe yaanni xaaro naqa hanafi. Pheexiroosi Yesuusa kaadanna tini sayikkite. Pheexiroosi hatto yee afiinnino hooꞌlikkinni, hakko hashsha lukkichu layinkimeeshsho gananna macciishshi.—Yoh. 18:26, 27; Maq. 14:71, 72.

17, 18. (a) Pheexiroosi Mootichasi lowo geeshsha dadillisinota afi woyite hiitto ikkino? (b) Pheexiroosi mayyee hedinoha ikkara dandaanno?

¹⁷ Hatte farora Yesuusi mininni fule barandaho uurri; isi iimaanni barandaho heeꞌre, woroonni hoowete giddo noo manna laꞌꞌa dandaanno. Tenne fooliishshora bitimaho kullinte gede, hakkawote Yesuusira Pheexiroosi ledo illenna ille xaaddusi. Hakko lipheessi giddo, Pheexiroosira Mootichasi mageeshshi geeshsha dadillisinoro leellisi. Hakkiinni loosino soꞌrora lowo geeshsha xissiisiꞌrinohu mitu hoowetenni fule haꞌri. Aganu eara kae gobba banqa asse heeꞌreenna, Pheexiroosi katamu doogo amade haꞌri. Iso hindiiddo qalxitusi; haꞌranno doogono leella gibbusi. Hakkiinni hururame wiꞌli.—Maq. 14:72; Luq. 22:61, 62.

¹⁸ Mittu manchi togooha jawa cubbo loosiro, cubbiꞌya maarranni gedeeha diꞌꞌikkino yee heda rakkasira dandiitanno. Pheexiroosino hatto yee hedinoha ikkara dandaanno. Kayi cubbisi maarranniha diꞌꞌikkino?

Pheexiroosi Cubbi Maarranniha Diꞌꞌikkino?

19. Pheexiroosi loosino soꞌro hedi woyite hiitto ikkinoha ikkara dandaanno? Isi hexxo mudhe baalankare facci asse agurinokkita mayinni anfeemmo?

¹⁹ Pheexiroosi, soodeenna hakko barra ikkinore lai woyite mageeshshi geeshsha dadillinoro hanni hedi. Yesuusi hakko barra lowo saate qarrame kae reyi woyite, Pheexiroosi lowo geeshsha gaabbinoti egennantinote! Isi Mootichisi uullate aana heeꞌrinohu hakkuyi jeefote barra, isira qarru aana qarra ledinota hedanno woyite xissiisiꞌre giddo goofanno. Pheexiroosi baasa dadillinoha ikkirono, hexxo mudhe baalankare facci asse diagurino. Tenne mayinni anfeemmo yinummoro, mulenni isi ammanate roduuwisi ledo gamba yiinota kulloonni. (Luq. 24:33) Soqqamaasine baalanti hakko barra assitinorira lowo geeshsha gaabbitinoti egennantinote; ikkirono, mittowa gamba yaansa mito geeshshano ikkiro sheshifachishshinonsa.

20. Pheexiroosi doodhinohu danchu coyinni maa ronseemmo?

²⁰ Pheexiroosi assinohu danchu coyi giddo mittu, hattee yannara doodhinoreeti. Mittu Maganu soqqamaanchi cubbo loosiro, cubbisi jawa ikkiro nafa soꞌrosi taashshiꞌrate dandiire baala assiro, Maganu maarannosi. (Isayaasi 1:18 nabbawi.) Pheexiroosi lowo geeshsha dadille heeꞌre nafa ammanate roduuwisi ledo gamba yaasi, jawaata ammana noosita leellishshanno. Mittu manchi baasa dadillannonna yaadanno woyite, calla heeꞌra doodhara dandaanno; hatti kayinni lowo geeshsha gawajjitanno. (Law. 18:1) Hatteentenni, ammanate roduuwinkewa aananna wirro ayyaanaamittete jawaante afiꞌrate sharrama woyyitanno.—Ibi. 10:24, 25.

21. Pheexiroosi ammanate roduuwisi ledo noo daafira, mayi duduwo macciishshino?

²¹ Pheexiroosi ammanate roduuwisi ledo gamba yee noo daafira, Yesuusi reeshshi waammate giddo dino yinanna macciishshi; kuni insara masisanno duduwooti. Hakkiinni Pheexiroosinna Yohaannisi, Yesuusi waammawa doddanni martu. Balaxe iillinohu Yohaannisiiti; isi Pheexiroosira maaꞌne ikkikki digatino. Isi mare laꞌꞌanno woyite, waammate afiira tuꞌnoonni kinchi hoꞌle noo daafira ea waajji. Pheexiroosi kayinni diwaajjino. Isi dodanni marino daafira sheengaranni nooha ikkirono, marino gedeenni waammate giddora ei. Laꞌꞌanno woyite giddo noori dino!—Yoh. 20:3-9.

22. Pheexiroosi dadillinna huluullo baala baꞌanno gede assinori maati?

²² Pheexiroosi Yesuusi reyotenni kainota ammanino ikka? Mitu ammanamino meenti sokkaasine leelte Yesuusi reyotenni kainota kultinonke yiirono, Pheexiroosi umi qara diammanino. (Luq. 23:55–24:11) Ikkirono, hakko barra hawarro Pheexiroosi wodanira noo dadillinna huluullo baala baꞌanno gede assannori ikki. Yesuusi hakkawote wolqaataamo ayyaanu kalaqo ikke reyotenni kae no! Isi soqqamaasinesi baalantera leellino. Ikkollana, isi balaxe Pheexiroosira addinni leellino. Soqqamaasine hakko barra, “Halaalintanni Mootichu Yesuusi kaino! Simioonirano leellino!” yitino. (Luq. 24:34) Gedensoonni soqqamaasinchu Phaawuloosino hakko barra ikkinore borreessanni, Yesuusi “Pheexiroosira leellihu gedensaanni, tonaa lame rosaanosirano leellino” yiino. (1 Qor. 15:5) Simiooni, Pheexiroosira wole suꞌmaati. Yesuusi hakko barra Pheexiroosira leellinohu callisi heeꞌreenna ikkikki digatino.

23. Xaa yannara cubbo loosino Kiristaani Pheexiroosi xagge qaaga hasiissannonsahu mayiraati?

²³ Pheexiroosinna Yesuusi wirro xaaddu woyite ikkinoha mitto mittonka coye Qullaawu Maxaafi giddo dikulloonni. Tenne affinori Yesuusanna Pheexiroositi. Pheexiroosi, baxanno Mootichisi reyotenni kae nooha lai woyitenna soꞌrosira dadillinotanna gaabbinota kuꞌlanno faro afiꞌri woyite mageeshshi geeshsha hagiidhinoro hanni hedi. Pheexiroosi hakkawote wolu baalunkurinni roore maaro afiꞌra hasiꞌrino. Yesuusino woꞌmunni woꞌma gatona yiinosita dihuluullammeemmo. Xaa yannara cubbo loosino Kiristaani Pheexiroosi xagge qaaga hasiissannonsa. Maganu dimaarannoe yine horonta heda dihasiissannonke. Yesuusi “maarosi batiꞌra ikkitino” Annisi lawishsha woꞌmunni woꞌma harunsino.—Isa. 55:7.

Maarinosita Leellishshannota Wole Taje

24, 25. (a) Pheexiroosi Galiilu Baarira qulxuꞌme woshshaaxxanni gali hashsha ikkinore xawisi. (b) Pheexiroosi, layinki soodo Yesuusi loosino maalale lai woyite hiitto ikkino?

²⁴ Yesuusi soqqamaasinesi isi ledo wirro xaaddanno gede, Galiila saꞌe yiinsa. Hakka iillituta, Pheexiroosi Galiilu Baarira qulxuꞌme woshshaaxxammora haꞌreemmo yiinsa. Wole soqqamaasineno ledosi hadhu. Pheexiroosi xa mare noo garbi, alba lowo diro qulxuꞌme woshshaaxxanni keeshshinoho. Yowolo hadhanno woyite qaqaqaꞌa yitanno gari, dambalu yowolote gaꞌne shooshshanno garinna qulxuꞌme woshshaaxxinanni woshshaado amandanni woyite kafarattitanno gari Pheexiroosira haaro diꞌꞌikkino. Pheexiroosinna miillasi hakko hashsha mitte qulxuꞌmeno diamaddino.—Mat. 26:32; Yoh. 21:1-3.

²⁵ Soodimaroho, baaru qaccera noohu mittu manchi insa woshshe, woshshaado yowolote qiniiteenni tugge yiinsa. Insano maahoyye yite woshshaadonsa baaru giddora tuggu; hakkiinni, 153 qulxuꞌme amaddu! Hakkiinni Pheexiroosi hakku manchi ayetiro afi. Isi yowolote aaninni kubbe dirre, daahanni baaru qacce fuli. Yesuusi baaru qaccera, ammanantino jaallasira kashilu aana durinshoonni qulxuꞌme uyinsa. Isi wolunkunni roore Pheexiroosi illachishino.—Yoh. 21:4-14.

26, 27. (a) Yesuusi Pheexiroosira sase hige maa assanno gede faro faninosi? (b) Yesuusi Pheexiroosi woꞌmunni woꞌma gatona yiinosita leellishinohu hiittoonniiti?

²⁶ Yesuusi Pheexiroosi “Kurinni roorsite baxattoe?” [NW] yee xaꞌmisi; Yesuusi “kuri” yiiri, albansaanni noo qulxuꞌme ikkitukki digattino. Pheexiroosi qulxuꞌme woshshaadate looso Yesuusinni roorse baxa ikka? Pheexiroosi Mootichasi sase hige kaadinte gede, Yesuusino isira jaallasi albaanni sase hige baxannosita kulanno faro faninosi. Pheexiroosi Yesuusa baxeemmohe yii kiiro, Yesuusi baxille leellishanno gara kulinosi. Yesuusi Pheexiroosira wolu baalunku coyinni roorse Yihowa fajjo balaxisiisanno gede yaano Kiristoosi geꞌreewo itisanno gede, jawaachishanno gedenna allaalanno gede kulinosi.—Luq. 22:32; Yoh. 21:15-17.

²⁷ Yesuusi konni garinni, Pheexiroosira isinna Annisi albaanni xaano waagu noosita buuxisinosi. Pheexiroosi, Kiristoosi aanno biddishshi garinni songote lowore kaaꞌlannoha ikkanno. Tini Yesuusi Pheexiroosi woꞌmunni woꞌma gatona yiinosita leellishshannote kaajja tajeeti! Pheexiroosi Yesuusi maarinosi daafira lowo geeshsha hagiidhinotinna soꞌrosi taashshiꞌrate kainoti dihuluullissannote.

28. Pheexiroosi suꞌmisi garinni heeꞌrinohu hiittoonniiti?

²⁸ Pheexiroosi uyinoonnisi looso lowo diro ammaname loosino. Yesuusi reyara albaanni noo hashsha hajajinosi garinni, Pheexiroosi roduuwasi jawaachishino. Isi Kiristoosi harunsaano shaqqillunninna cincatenni allaalino, hattono itisino. Simiooni yinannihu kuni manchi, shashshafamannokkiha, jawaatanna ammaꞌninanniha ikke songo lowo geeshsha kaaꞌlino; konni garinni, Yesuusi Pheexiroosi woy Kincho yee fushshinosi suꞌmi garinni heeꞌrino. Pheexiroosi baxillunninna shaqqillunni borreessinoti lame sokka tenne leellishshanno; tini kaajja roso amaddinoti lamenti sokka gedensoonni Qullaawu Maxaafi maxaaffa wido ikkitino. Qoleno lamenti sokka Pheexiroosi Yesuusiwiinni maarote daafira rosino roso horo hawinokkita leellishshanno.—1 Pheexiroosi 3:8, 9; 4:8 nabbawi.

29. Ammanatenni Pheexiroosi faale haꞌranna Mootichisi lawishsha harunsa dandiineemmohu hiittoonniiti?

²⁹ Ninkeno konne Pheexiroosi rosino roso ronso. Loonseemmote batinye soꞌrora barru barrunku Magano maarinke yineemmo? Maganu maarannonketanna cubbinkenni keereensannonketa ammanneemmo? Ninkeno woloota maarreemmo? Hatto ikkiro, ammanatenni Pheexiroosi faale haꞌnanni heeꞌnoommo; qoleno Mootichisi gede maarreemmore ikkinoommota leellinsheemmo.