“Konne Coye Affinoonni; Affinoonniha Assitiniro Maassantinanni”

1. Alamete aana noo manni ikkito ninkeneeto heeshshi assa qarra ikkitannonke gede assitannohu hiittoonniiti?

MAGANU Qaalinni ronsoommore harunsa shota ikkitinokkihu mayiraati? Gara ikkinore assate, ninkeneeto heeshshi assa hasiissanno daafiraati. Heeꞌnoommohu “goofimarchu barra” ikkino daafira ninkeneeto heeshshi assa shota ikka hooggankera dandiitanno; korkaatuno batinyu manni ‘umonsa baxannoho, woxe baxannoho, naaxxaleessaho, booꞌnaleessaho, hattono umonsa qeeꞌlannokkiho.’ (2 Xim. 3:1-3) Maganu soqqamaano ikkinoommo daafira, togoo akatta busha ikkitinota anfoommo; ikkirono mito woyite togoo akatta noonsa mannira qiniinonsaha lawankera dandaanno. (Far. 37:1; 73:3) Mittu manchi togo yee hedara dandaanno: ‘Umiꞌya hasatto agure wolootunnita balaxisiisa hasiissannoe? Aneneeto “woꞌmunkura woriidihu” gede asse laummoro ayirrinye hoogammo ikka?’ (Luq. 9:48) Alamete aana noo manni gede umonke calla banxeemmoha ikkiro, songote giddo roduuwinke ledo noonke aante baꞌaranna Kiristaana ikkinoommoti wolootaho leella hooggara dandiitanno. Qullaawu Maxaafi giddo noohu dancha lawishsha ikkanno manni xagge xiinxallankenna insa faale haꞌranke kiissannonke.

2. Hundite Maganu soqqamaasinewiinni maa ronseemmo?

² Qullaawu Maxaafi giddo kulloonnihu dancha lawishsha ikkanno manni faale haꞌrate, insa Maganu jaalla ikkitanno gede assinonsari maatiro xiinxalla hasiissannonke. Insa Magano hagiirsiissinohu hiittoonniiti? Gara ikkinore assate jawaante afidhinohu ma garinniiti? Konni garinni insa lawishsha xiinxallanke ammananke kaajjishshanno.

AMMANANKE KAAJJISHANNORE

3, 4. (a) Yihowa rosiisannonkehu ma garinniiti? (b) Ammananke kaajjishiꞌrate egenno afiꞌratenni sainore assa hasiissannonke yineemmohu mayiraati?

³ Yihowa Qaalisi, Qullaawu Maxaafi aana xintantino borruwa, webisayitenke, JW Birodikaaste, hattono songotenna jajjabba gambooshshuwa widoonni kaajja amaalenna qajeelsha aannonke. Ikkollana Yesuusi egenno afiꞌratenni sainore assa hasiissannonketa xawisino. Isi togo yiino: “Ane sagale soyinoehu haja wonshatenna loososi guutate.”—Yoh. 4:34.

⁴ Yesuusira, Maganu fajjo wonsha sagalete gedeeti. Hiittoonni? Unto ikkitanno sagale sagaꞌla hagiirsiissannonke, hattono maqee lexxineemmo gede assitara dandiitanno; hatteente gede, Maganu fajjo wonshanke jawaanteemmonna ammananke kaajjitanno gede assitanno. Lawishshaho, soqqansho daafurse heeꞌreennahe fulte qaera hagiidhitanninna jawaante afidhe higootto yanna qaagatto?

5. Hayyo kaaꞌlitannonkehu hiittoonniiti?

⁵ Yihowa biddishsha harunsa hayyote. (Yai. 3:13) Hayyo afiꞌrate sharrama kiissanno. Hayyote “ledo taashshinanniri mitturi nafa dino.” Hayyo “heeshsho uyitanno; ise cuꞌmirinohu baꞌraaꞌrinoho.” (Law. 3:13-18) Yesuusi togo yiino: “Konne coye affinoonni; affinoonniha assitiniro maassantinanni.” (Yoh. 13:17) Yesuusi rosaano, isi rosiisinonsare harunsa agura hooggu geeshsha hagiirrinsa geedonniha ikkanno. Insa Yesuusi rosonna lawishsha mitte higge calla ikkikkinni heeshshonsa diro woꞌma harunsa hasiissannonsa.

6. Woꞌmanka woyite ronsoommo rosi garinni heeꞌra hasiissannonkehu mayiraati?

⁶ Xaa yannarano, heeshshonke woꞌmantenni ronsoommore harunsa hasiissannonke. Hanni konne lawishsha laꞌno. Makeena biddi assanno manchira babbaxxino uduunnichi, hattono egenno heedhasira dandiitanno. Ikkollana, kuni uduunnichi kaaꞌlannosihu horoonsiꞌrannoha ikkiro callaati. Isi konne looso lowo diro loosanni fushshiꞌre agurinoha ikkara dandaanno; ikkirono ogimmasi hawannokki gede rosinore ganye loosa hasiissannosi. Hatteente gede, umo Qullaawu Maxaafi halaale ronsummo woyite, ronsoommo rosi garinni heeꞌnoommo daafira hagiirraamma ikkinoommo. Ikkollana hagiirrinke geedonniha ikkanno gede, umonke heeshshi assine barru baala Yihowa rosiisinonke rosi garinni heeꞌra hasiissannonke.

7. Qullaawu Maxaafi giddo noo xaggenni maa ronseemmo?

⁷ Konninni aanchine woꞌmanka woyite ninkeneeto heeshshi assa qarra ikkitannonke gede assannoha shoole coye laꞌneemmo; hattono hunda heedhinoti ammanantino soqqamaano konne fonqolo qeeltino gara ronseemmo. Ammananke kaajjitanno gede egenno afiꞌratenni sainore assa hasiissannonke. Konni daafira, ronseemmore harunsa dandiineemmo gara hedanna keeshshinummokkinni loosu aana hosiisa hasiissannonke.

MANNA BAALA TAASHSHINE LAꞌNO

8, 9. Soqqamaasinete Looso 14:8-15te noo xagge Phaawuloosi umosi heeshshi assannoha ikkinota leellishshannohu hiittoonniiti? (Hanafote noo misile lai.)

⁸ Maganu, “mannu baalunku gatannonna halaale afanno gede” hasiꞌranno. (1 Xim. 2:4) Halaale rosinokki manna ma garinni laꞌꞌatto? Soqqamaasinchu Phaawuloosi Yihowa daafira mitore afinohu Yihudu mannira sabbakinoha ikkirono, isi kaphu maganna magansidhannorirano sabbakino. Kaphu maganna magansiꞌranno manni Phaawuloosira assinori, isi umosi heeshshi assa qarra ikkitannosi gede assannoreeti. Hiittoonni?

⁹ Phaawuloosi umo misiyoone ikke haꞌri woyite, Barnabaasi ledo Lisxiru katama haꞌrino. Hakkiicho heeꞌrannohu Liqooniyu manni Phaawuloosinna Barnabaasi maganu gede asse laino; hattono magannansa suꞌminni Diyanna Hermesi yite woshshitinonsa. Phaawuloosinna Barnabaasi hakkonne guwishsha adhituyya? Insa tenne ikkito hakkuyira albaanni hadhinohu lamu katamira iillinonsa dartinni fooliishshidhanno tunceenyi gede assite laꞌinoni? Kuni guwishshi batinyu manni dancha duduwo macciishshanno gede assanno yite heddinoni? Diheddino! Insa bayichonko uddanonsa darte raartanni mannu widira higge doddanni martino. Hakkiinni togo yitino: “Manna, togo mayira assitinanni? Ninkeno kiꞌne gedee mannaati.”—Soq. 14:8-15.

10. Phaawuloosinna Barnabaasi Liqooniyu manna roortannohu gede assite heddinokkihu mayiraati?

¹⁰ Phaawuloosinna Barnabaasi guuntete xeꞌne noonsare ikkitinota coyiꞌransa, insa Magano magansidhano gari kaphu maganna magansiꞌranno manni garinniiti yaa diꞌꞌikkino. Phaawuloosinna Barnabaasi Maganu misiyoone ikkite soqqantanno gede shoominonsareeti. (Soq. 13:2) Qoleno insa qullaawu ayyaaninni buurantinoreetinna kaajja hexxo noonsareeti. Ikkollana Phaawuloosinna Barnabaasi Liqooniyu mannino dancha duduwo macciishshe adhiro, insa afidhino gedee qoosso afiꞌra dandaannota huwattino.

11. Sabbankeemmo woyite Phaawuloosi gede umonke heeshshi assa dandiineemmohu hiittoonniiti?

¹¹ Ninkeno Phaawuloosi gede umonke heeshshi assa dandiineemmohu hiittoonniiti? Umihunni, Yihowa wolqanni loonsoommo loosira mannu jajankera dihasiꞌneemmo. Layinkihunni ninkeneeto togo yine xaꞌma hasiissannonke: ‘Sabbakeemmo manna ma garinni laeemmo? Qooxeessiꞌyara wolootu woffi assite laꞌanno manna anino hatto asse laeemmo?’ Alamete doyichora nooti Yihowa Farciꞌraasine qoqqowinsara dancha duduwo macciishshanno manna hassanni keeshshitino. Mitootu isinni wolootu woffi assite laꞌanno manni coyiꞌranno afoo woy bude rosate sharrantanno. Ikkirono Yihowa Farciꞌraasine konne manna roortannohu gede assite horo diheddanno. Hatteentenni insa kuni manni Maganu Mangiste sokka macciishshe adhanno gede kaaꞌlate woꞌnaaltanno.

WOLOOTAHO SUꞌMANSA GANNE HUUCCINO

12. Ephafira umisi horo agure wolootaho baxille leellishinohu hiittoonniiti?

¹² Umonke heeshshi assine Maganu biddishsha harunsa dandiineemmoti wole doogo ‘ninkete gedee ammana’ noonsarira huuccatto assate. (2 Phe. 1:1) Ephafira yinanni rosaanchi hatto assino. Qullaawu Maxaafi giddo suꞌmisi noohu sase bayicho callaati; hakkuno Phaawuloosi borreessino sokkaraati. Phaawuloosi Roomaho usurame heeꞌre, Qolasiyaasi heeꞌranno Kiristaanira Ephafira, “woꞌmanka woyite, kiꞌne daafira huuccatto assanno” yee borreessino. (Qol. 4:12) Ephafira roduuwasi seekke afino; hattono insa daafira hedanno. Isi Phaawuloosi ‘ledo usuramasi’ wolootu ayyaanaamitte daafira hedannokki gede diassitinosi. (Film. 23) Qoleno insa kaaꞌlate huuccatto assino. Ephafira hatto assasi, umosi calla baxannokkiha ikkinota dileellishshanno? Ammanantinote Yihowa soqqamaasinera roorenkanni mittu mttunku suꞌma ganne huuccanke lowo wolqa afidhino.—2 Qor. 1:11; Yai. 5:16.

13. Huuccattokkinni Ephafira lawishsha harunsa dandaattohu hiittoonniiti?

¹³ Hanni ayeoora huucca dandaattoro hedi. Ephafira gede, batinyu roduuwi maatetenna songote giddo loosu batiꞌrinonsa roduuwira woy fonqolu tuncu yiinonsa roduuwira huuccitanno. Wolootu qolte jw.org yinanni webisayitenke aana suꞌmansa kulloonnirira huuccitanno.a Qoleno shiidhinorira, olunninna danotenni gattinorira, hattono angate anje amaddinonsarira huucca dandiineemmo. Ee, huuccattonkenni horo afidhannori lowo roduuwi no. Insara huuccineemmoha ikkiro, ninke hasatto ikkikkinni wolootu hasatto balaxisiinseemmota leellinsheemmo. (Fil. 2:4) Yihowa togoo huuccatto macciishshanno.

‘MACCIISHSHATE RANKOOMMORE’ IKKINO

14. Yihowa dancha gede macciishshannoha ikkinota leellishinohu hiittoonniiti?

¹⁴ Ninkeneeto heeshshi assineemmore ikkinoommota leellisha dandiineemmoti wole doogo dancha gede macciishshate. Yaiqoobi 1:19 ‘macciishshate rankoommore’ ikka hasiissannonketa kultannonke. Tennera baalunkunni roore dancha lawishsha ikkannonkehu Yihowaati. (Kal. 18:32; Iya. 10:14) Hanni Fulo 32:11-14te kulloonni hasaawinni maa ronseemmoro laꞌno. (Qummeeshsha nabbawi.) Yihowara Muse kaaꞌlo hasiissannosikkiha ikkirono, Muse hedosi coyiꞌranno gede fajjinosi. Duucha woyite soꞌro loosanno manchi coyiꞌrannore cincite macciishshanna isi yiinore assa dandaatto? Yihowa kayinni mannu ooso ammanatenni woshshidhannosi woyite cincatenni macciishshanno.

15. Yihowa gede woloota ayirrisa dandiineemmohu hiittoonniiti?

¹⁵ Mitti mittinke ninkeneeto togo yine xaꞌma hasiissannonke: ‘Yihowa umosi heeshshi asse Abirihaami, Raaheeli, Muse, Iyyaasu, Maanuhe, Eeliyaasinna Hiziqiyaasi gedee manna macciishshannoha ikkina, anino baalanka roduuwaꞌya ayirrisa, insa coyidhannore macciishshanna yitinore assate woꞌnaala dihasiisannoe? Xaa yannara songoꞌya woy maateꞌya giddo albinni roore illachisha hasiissannoehu no? Insa kaaꞌlate maa assa dandeemmo?’—Kal. 30:6; Eje. 13:9; 1 Mot. 17:22; 2 Dud. 30:20.

YIHOWA ‘SHETTOꞌYA LAꞌꞌANNOHA IKKANNONA’

16. Shimiꞌꞌi hanqisannore assisi yannara, Moote Daawiti maa assino?

¹⁶ Umonke heeshshi assineemmore ikkanke, mannu hanqisannore assannonke woyite ninkeneeto qeeꞌlate kaaꞌlitannonke. (Efe. 4:2) Layinki Saamueeli 16:5-13te noo xagge tennera dancha lawishsha ikkitannonke. (Qummeeshsha nabbawi.) Moote Saaooli fiixa ikkinohu Shimiꞌꞌi, Daawitinna soqqamaanosi xonino, hattono waajjishiishino. Daawiti Shimiꞌꞌi hooꞌla dandaannoha ikkirono, cincino. Daawiti togoo cinca afiꞌranno gede kaaꞌlinosiri maati? Sayikki Faarso xiinxallineemmo woyite tenne huwanteemmo.

17. Daawiti isonooto qeeꞌlanno gede kaaꞌlinosiri maati? Ninke isi lawishsha harunsa dandiineemmohu hiittoonniiti?

¹⁷ Faarso sasete nooti hanafote hedo, tenne faarso borreessinoonnihu “Daawiti beettosi Abeseloomi xooqanni” noo yannara ikkinota leellishshanno. Kiiro 1 nna 2, Layinki Saamueeli fooliishsho 16te noo xagge ledo sumuu yitanno. Faarso 3:4te aana nooti “Kaaliiqa woshshiꞌreemmo; isino qullaawu ilaalisi iima heeꞌre macciishshannoe” yitanno hedo, Daawiti Yihowa addaxxannota leellishshanno. Ninkeno wolootu gara ikkinokki coye assitannonke woyite huuccatto assiꞌra dandiineemmo. Yihowa qole cincate kaaꞌlannonkeha qullaawa ayyaanasi aannonke. Atino wolootu gara ikkinokkire assitannohe woyite, ateneeto qeeꞌla, woy mulla gatona yaa dandaatto? Yihowa qarrakki laꞌꞌannotanna kaaꞌlannoheta addaxxatto?

HAYYO ‘WOꞌMUNKU COYIRA ALIIDITE’

18. Woꞌmante yannara Yihowa roso harunsate murciꞌroottohu mayiraati?

¹⁸ Gara ikkinore assineemmoha ikkiro, lowo atoote afiꞌneemmo. Lawishsha 4:7 hayyo “woꞌmunku coyira [aliidite]” yitannohu iseraati. Hayyo xintantinohu egennote aana ikkirono, egennotenni roore hayyoota ikkinommota leellishannohu doodhineemmo doorshaati. Gooxaamu nafa hayyootaho. Gooxaamu hawadira sagale qixxeessiransa, hayyoota ikkinota leellishshanno. (Law. 30:24, 25) ‘Maganu hayyo’ ikkinohu Kiristoosi, woꞌmante yannara Annasi hagiirsiisannore assanno. (1 Qor. 1:24; Yoh. 8:29) Maganu dancha coye doodhatenna hakkoye coye assate mereero badooshshu noota afino. Isi woꞌmante yannara insaneeto heeshshi assite gara ikkino coye assitannore maassiꞌranno. (Maatewoosi 7:21-23 nabbawi.) Konni daafira songo, baalunku manni umonsa heeshshi asse Yihowara soqqamanno bayicho ikkitanno gede assate sharrami. Gara ikkinota anfoommo coye assate yannanna cinca hasiissanno. Ikkirono, hatto assanke, umonke heeshshi assineemmore ikkinoommota leellishshanno; umonke heeshshi assanke qolte xaano ikko hegere geeshsha hagiirraamma ikkineemmo gede assitannonke.