Wolapho Aanno Maganira Yihowara Soqqammo
“Mootichu [“Yihowa,” NW] Ayyaani noowa wolapho no.”—2 QOR. 3:17.
1, 2. (a) Phaawuloosi waro heeꞌrino manni borojjimmatenna wolaphote daafira hedannohu mayiraati? (b) Phaawuloosi addu wolapho Buicho aye ikkinota coyiꞌrino?
ROOMU Gashshooti giddo heeꞌrino manni seerinsanni, afiꞌrino taashshonninna wolaphonni naaxxanno. Ikkollana wolqaataamo ikkinohu Roomu Gashshooti xintaminohu borojju wolqanniiti. Isinni mitte yannara Roomaho noo manni giddo xibbunni 30 anga meddi yaannohu borojjeho. Konni daafira hatte yannara Kiristaanuno ikko wolu batinyu manni borojjimmatenna wolaphote daafira hasaawansa digattanno.
2 Soqqamaasinchu Phaawuloosi wolaphote daafira lowore borreessino. Ikkollana isi hatte yannara noo gashshoote woyyeessate diwoꞌnaalino; hakka waro batinyu manni tenne assate sharramanno. Phaawuloosinna ammanate roduuwisi uullate gashshooti wolapho aannonke yite diheddino; hatteentenni insa mannu Maganu Mangisteha dancha duduwo macciishshannonna Kiristoosita wodote kakkalo naadanno gede kaaꞌlate sharrantino. Phaawuloosi ammanate roduuwisira addu wolapho Buicho ayetiro kulinonsa. Lawishshaho isi Qorontoosi heeꞌranno Kiristaanira borreessinote layinki sokkara togo yiino: “Mootichu [“Yihowa,” NW] Ayyaanaho. Mootichu Ayyaani noowa wolapho no.”—2 Qor. 3:17.
3, 4. (a) Phaawuloosi 2 Qorontoosi 3:17 te noo hedo borreessanno gede assinosiri maati? (b) Yihowa aanno wolapho afiꞌrate maa assa hasiissannonke?
3 Phaawuloosi Layinki Qorontoosi 3:17 te aana noo hedo borreessara albaanni, Muse Siina Ilaalira Maganu Yihowa sokkaasinchi ledo hasaawe dirri gedensaanni mayi ikkinoro qummi assino. Muse ilaalunni dirri woyite albisi xawanni no! Mannu Muse lai yannara lowo geeshsha waajjino; konnira Muse alba diphino. (Ful. 34:29, 30, 33; 2 Qor. 3:7, 13) Phaawuloosi “Mannu Mootichu widira higanno woyite kayinni hakku gugguꞌlaasinchi hoꞌlanno” yee xawisino. (2 Qor. 3:16) Phaawuloosi togo yaasi mayyaate?
4 Sai birxichira ronsummonte gede, dannu nookki wolapho noosihu baalankare kalaqino Magano Yihowa callaati. Konnira Yihowa “ayyaani noowa wolapho no” yaa garankolla. Ikkollana tenne wolapho afiꞌrate, Yihowawa “higa” yaano, isi ledo jaalooma kalaqira hasiissannonke. Israeele halalla noo yannara coye Yihowa laꞌꞌanno garinni laꞌꞌa agurte mannu laꞌꞌanno garinni laꞌino. Insara wodaninsa dillaawinohuranna surrensa diwantinohura Gibitsete gobbanni fulte afidhino wolapho maalu hasattonsa wonshiꞌrate horoonsidhino.—Ibi. 3:8-10.
5. (a) Yihowa ayyaani mayinni wolaphineemmo gede kaaꞌlannonke? (b) Mittu manchi usuru mine woy borojjicho ikke heeꞌrirono Yihowa aanno wolapho afiꞌra dandaanno yineemmohu mayiraati? (c) Ninkeneeto mayine xaꞌma hasiissannonke?
5 Yihowa ayyaani aanno wolapho borojjimmatenni wolaphatenni roortanno. Yihowa ayyaani cubbohonna reyote, hattono kaphu magannaranna kaphu ammaꞌno rosichira borojje ikkineemmokki gede kaaꞌlannonke; mannu ooso qolte tenne assite diaffanno. (Rom. 6:23; 8:2) Tini taalle nookki wolaphooti! Mittu manchi usuru mine heeꞌre woy borojjicho ikke noowa nafa togoo wolapho afiꞌra dandaanno. (Kal. 39:20-23) Rodoo Nansii Yuwoninna Roduu Heerooldi Kingi lawishshi tenne leellishanno; lamunku ammanansara yee lowo diro usuramino. Insa woꞌnaalsha JW Birodikaastera macciishsha dandaatto. Konnira ninkeneeto togo yine xaꞌma hasiissannonke: ‘Afiꞌroommo wolapho naadeemmota leellisha dandeemmohu hiittoonniiti? Tenne wolapho hayyotenni horoonsiꞌrate maa assa dandeemmo?’
MAGANU UYINONKE WOLAPHO NAADA
6. Israeele Yihowa uyinonsa wolapho naaddinokkita leellishshinohu hiittoonniiti?
6 Mittu manchi muxxe aamamooshshe uyinkero galanteemmositi egennantinote. Israeele Yihowa Gibitsete gobbanni fushshe uyinonsa wolapho dinaaddino. Insa Gibitsetenni fultuhunni boodu agani gedensaanni, alba Gibitsete ittannonna aggannorira wojji yaa hanaffino; hattono Yihowa uyinonsare mishshe galagalte Gibitse higa hasidhino. Insa ‘qulxuꞌme, baaqulu, daraamu shunkurti, duumo shunkurtinna tumu’ Maganu Yihowa uyinonsa wolapho roorannohu gede assite heddino. Tennera Yihowa lowo geeshsha hanqasi dhagge ikkitannonkeni? (Kir. 11:5, 6, 10; 14:3, 4) Insa xaggenni ninke lowore ronseemmo!
7. Phaawuloosi 2 Qorontoosi 6:1 aana amaalinori ledo sumuu yaannore assinohu hiittoonniiti? Ninke isi lawishsha harunsa dandiineemmohu ma garinniiti?
7 Soqqamaasinchu Phaawuloosi baalanka Kiristaana Yihowa Beettisi Yesuusi Kiristoosi widoonni shaqqillunni uyinonke wolapho mulluri gede assine laꞌneemmokki gede amaalinonke. (2 Qorontoosi 6:1 nabbawi.) Phaawuloosi cubbohonna reyote borojjicho ikkino daafira, tiiꞌꞌisi qarrisinosi. Ikkirono isi “Mootichinke Yesuusi Kiristoosi widoonni Maganoho galatu iillosi!” yee coyiꞌrino. Isi hatto yiinohu mayiraati? Isi ammanate roduuwisira togo yee xawisinonsa: “Kiristoosi Yesuusinni afiꞌnanni heeshsho aanno Ayyaani Seeri, cubbunna reyote seerinni keere fushshinoe.” (Rom. 7:24, 25; 8:2) Ninkeno Phaawuloosi gede Yihowa cubbunna reyote borojjimmanni keere fushshinonke daafira Iso galaxxa hasiissannonke. Wodote kakkalo Maganinkera keeraanchu tiiꞌꞌinni hagiirrunni soqqama dandiineemmo faro fantinonke.—Far. 40:8.
Afiꞌrootto wolapho horoonsiꞌrattohu Maganu Mangiste looso loosateetinso, umikkiraati? (Gufo 8-10 lai)
8, 9. Soqqamaasinchu Pheexiroosi wolaphonke horoonsiꞌrate daafira mayyee qorowisiisino? (b) Xaa yannara hiittoo fonqoli iillannonke?
8 Yihowa galaxxano agurranna, isi uyinonke wolapho garimale horoonsiꞌneemmokki gedeno qoropha hasiissannonke. Soqqamaasinchu Pheexiroosi afiꞌnoommo wolapho maalaamittete hasattonke wonshiꞌrate horoonsiꞌra hasiissannonkekkita kule qorowisiisino. (1 Pheexiroosi 2:16 nabbawi.) Pheexiroosi coyiꞌrinori Israeele halalla heedheenna iillinonsare qaangeemmo gede assannonke. Kuni qorowishshi xaa yannara noo Kiristaanirano kaaꞌlanno; korkaatuno hakkawarinni roore fonqolu batiꞌrinohu yannankeraati. Sheexaanunna alamesi uddiꞌnannirinna seensannirinni, intannirinna angannirinni, hattono boohaarrannirinni doggankera woꞌnaaltanno. Egensiishsha qixxeessitannori duucha yannara xuma manna horoonsidhe lowoha hasiisannonkekki coye hasiisannonkeri gede assite shiqishshanno. Qoropha hoongummoro kuri coyibba doggankeranna wolaphonke garimale horoonsiꞌneemmo gede assitankera dandiitanno!
9 Pheexiroosi amaalino amaale heeshshonke giddo shota ikkinokki doorsha doodhineemmo wote, lawishshaho, rosonna looso doodhineemmo woteno kaaꞌlitannonke. Lawishshaho, yannankera wedella ooso rosu mine yuniversite eate sharrantanno gede baasa xixxiimbanninsa. Batinyu manni insa kaffi yiino roso russiniro lowo damooza baantanni looso afidhinanni yaannonsa; qoleno mannu yuniversitetenni maassante fultinoriranna yuniversite eꞌinokkirira baantanni damoozi babbaxxinoha ikkinota kule ammansiisate woꞌnaalanno. Kuni shota doorsha ikkinokki daafira, wedellu kaffi yiino roso rosa dancha labbansara dandiitanno. Wedelluno ikko annuwinsanna amuuwinsa maa heda hasiissannonsa?
10. Wolaphonke horoonsiꞌne uminke doorsha dhoodhineemmo woyite maa heda hasiissannonke?
10 Mitootu kuni annu annu doorsha ikkino daafira, tiiꞌꞌinsa hoola hooginsa geeshsha hasidhure doodha dandiitannoha lawannonsa. Mittu mittunku manchi rosonna looso lainohunni umisi doorsha doodha dandaannoha ikkirono, wolaphonkera dannu nootanna doodhineemmo doorshi baalu gawajjankera woy kaaꞌlankera dandaannota dea dihasiissannonke. Phaawuloosi “Baalankare fajjinoonni; baalunkuri kayinni kaaꞌlannoha diꞌꞌikkino. Baalankare fajjinoonni; baalunkuri kayinni dhaawannoha diꞌꞌikkino” yee coyiꞌrinohu iseraati. (1 Qor. 10:23) Kuni qummeeshshi wolaphonke horoonsiꞌne uminke doorsha doodhineemmo woyite ninke injonni roore balaxisiisa hasiissannonke coyi noota hendeemmo gede kaaꞌlannonke.
MAGANOHO SOQQAMME WOLAPHONKE HAYYOTENNI HOROONSIꞌNO
11. Yihowa borojjimmatenni fushshinonkehu mayiraati?
11 Pheexiroosi wolaphonke garimale horoonsiꞌneemmokki gede qorowisiisi woyite, wolaphonke horoonsira hasiissannonke gara kulinonke. Isi wolaphonke ‘Maganoho soqqamate’ horoonsiꞌneemmo gede jawaachishinonke. Konni daafira Yihowa Beettisi Yesuusi widoonni cubbunna reyote borojjimmanni fushshinonkehu heeshshonke woꞌmantenni isira ‘soqqammeemmo’ gedeeti.
12. Nohinna maatesi dancha lawishsha ikkitinonkehu hiittoonniiti?
12 Maganu uyinonke wolapho garimale horoonsiꞌneemmokkinna galagalle alamete yortora borojje ikkineemmokki gede kaaꞌlannonkehu qaru coyi ayyaanaamittete coye illachishate. (Gal. 5:16) Hanni Nohinna maatesi lawishsha hendo. Insa bushanna maaeela alamera heedhino. Ikkirono qooxeessinsara heeꞌranno manni assannore diassitino. Tennera kaaꞌlinonsari maati? Insa Yihowa uyinonsa looso diinaggaabbe loossino, yaano markaawe seekkitino, uminsaranna saadate sagale gamba assitino, hattono manna qorowisiissino. ‘Nohi Maganu hajajinore baala assino.’ (Kal. 6:22) Togo assansa kaaꞌlitinonsayya? Ee, hatti alame baꞌu yannara Nohinna maatesi gatte saꞌino.—Ibi. 11:7.
13. Maganu Yesuusi maa assanno gede hajajinosi? Yesuusi rosaanosi mayyee hajajinonsa?
13 Xaa yannara Yihowa ninke ma assineemmo gede hajajinonke? Maganu Yesuusi sabbakara hajajinositanna Yesuusi qole rosaanosino sabbakkanno gede hajajinota anfoommo. (Luqaasi 4:18, 19 nabbawi.) Yannankera batinyu manni tenne alame magani wodanansa beeshshino daafira, ammaꞌnote, jirotenna poletikaho borojje ikke no. (2 Qor. 4:4) Konni daafira Yesuusi gede ninkeno mannu wolapho aanno Magano Yihowa afe Iso magansiꞌranno gede kaaꞌlate qoosso afiꞌnoommo. (Mat. 28:19, 20) Kuni shota looso diꞌꞌikkino; konne looso loonseemmo woyite batinyu fonqolo ikkannori iillannonke. Mite gobbara mannu Maganu daafira rosa dihasiꞌranno, mitootu isinni farciꞌneemmonsa woyite hanqitanno. Ikkirono Yihowa sabbankeemmo gede hajajinonke daafira, ninkeneeto togo yine xaꞌma hasiissannonke: ‘Afiꞌroommo wolapho Maganu Mangiste looso loosate horoonsiꞌra dandeemmo?’
14, 15. Batinye Yihowa soqqamaano sabbakate looso lainohunni maa assitino? (Hanafote noo misile lai.)
14 Yannankera batinye Yihowa soqqamaano goofimarchu gambisinota huwatte, woꞌma yanna soqqansho hanafansa lowo geeshsha hagiirsiissannote; insa woꞌma yanna soqqansho hanafate heeshshonsa bikkunnita assidhino. (1 Qor. 9:19, 23) Insa giddo mitu qooxeessinsara noo qoqqowira suwisaano ikkite soqqantanno; wolootu qolte sabbakkannori roore hasiissannowa hadhe soqqantanno. Saihu ontu diri giddo 250, 000 saꞌanno roduuwi woꞌma yanna soqqansho hanaffino; konnira woꞌma yanna suwisaano kiiro mereerimunni 1,100,000 saꞌino. Lowo roduuwi afidhino wolapho Yihowara soqqante hayyotenni horoonsiꞌransa tashshi assitannote!—Far. 110:3.
15 Kuri roduuwi wolaphonsa hayyotenni horoonsidhanno gede kaaꞌlinonsari maati? Hanni Jooninna Juudiiti lawishsha laꞌno. Insa 30 diro woꞌma addi addi gobba haꞌre soqqamino. Insa Suwisaanote Soqqansho Rosi Mini 1977nni hanafi yannara, rosaano sabbakkannori roore hasiissannowa hadhe farcidhanno gede jawaachinshoonninsata coyiꞌrino. Kuri minaanninna minaama tenne mixo wonshiꞌrate heeshshonsa bikkunnita assiꞌrino; konninni kainohunni Jooni duucha hige looso soorririnota coyiꞌrino. Yannate gedensaanni insa wole gobba haꞌrino; hatte yannara, Yihowa huucciꞌransanna iso addaxxansa martino gobbara coyiꞌnanni qaale, haaro budenna ayyare rosanno gede kaaꞌlitinonsa. Insa konni garinni Yihowara soqqamansanni mayi macciishshaminonsa? Jooni togo yiino: “Kuni heeshshoꞌya giddo loosoommo looso baala rooreho. Baxillaancho Anna Yihowa albinni roore egennoommo. ‘Maganunniwa shiqqi yiiyye; isino kiꞌnewa shiqqi yaanno’ yitannoti Yaiqoobi 4:8 te noo hedo xa roore xabbe leeltinoe. Hasiꞌranni keeshshoommota hagiirsiissanno heeshsho afiꞌroommo.”
16. Lowo kume ikkanno roduuwi wolaphonsa hayyotenni horoonsiꞌrinohu hiittoonniiti?
16 Jooninna Juudiiti gede mitootu seeda yanna suwisaano ikkite soqqama dandiitanno; wolootu qolte shiima yanna calla soqqantanno. Ikkirono insa giddo batinyu alamete doyichora loonsanniha gimbaatu looso kaaꞌlitanno. Lawishshaho, Niyu Yorkete Wooriwiki yinanniwa Yihowa Farciꞌraasineta qara biiro minni yannara, 27,000 meddi yaanno roduuwi mitu lame lamala, wolu qole mitto dironna hakkiinni saꞌanno yanna gimbaatu looso kaaꞌlino. Insa giddo batinyu hakko soqqamate uminsa horo facci assite agurtino. Kuri roduuwi Maganu uyinonsa wolapho horoonsidhe wolapho aanno Magano Yihowa guwisidhino!
17. Xaa yannara Maganu uyinonsa wolapho hayyotenni horoonsidhannori albillitte mayi atoote afidhanno?
17 Yihowa daafira rosankenninna halaalu magansiꞌranni afiꞌnanni wolapho afiꞌrankenni tashshi yaannonke. Doodhineemmo doorshi afiꞌnoommo wolapho naandeemmota leellishannoha ikka hasiissannosi. Wolaphonke garimale horoonsiꞌra agurre, Yihowara woꞌma lubbonkenni soqqamate horoonsiꞌno. Hatto assinummoro, aante noo masaalo woꞌmitanno woyite Yihowa qaale einonke atoote afiꞌneemmo: “Kalaqamu baote borojjimmanni gate, Maganu oosota ayirrinyu wolapho gutamanno.”—Rom. 8:21.