Maganu Uyinoꞌne Heeshsho Lowori Gede Assitine Laꞌe

1. Yihowa heeshshonke mageeshshi geya naadanno?

HANNI mittu jaalikki akkala makeena uyinohe yine hendo. Kuni makeeni shiimawa qalame luqqaino hattono mitowa xenfeꞌe yiino. Ikkirono kuni makeeni lowo kume woxe hirannoho. Konne makeena lowori gede assite laꞌꞌattotinna dancha gede assite amaxxattoti dihuluullissannote. Hatteente gede Yihowa lowo waaga afiꞌrinore yaano heeshsho uyinonke. Isinni Yihowa Beettosi wodote kakkalo asse oyenke heeshshonke mageeshshi geeshsha naadannoro leellishino.—Yoh. 3:16.

2. Layinki Qorontoosi 7:1 kultanno garinni Yihowa ma assinammora hasiꞌranno?

² Yihowa heeshshote Buichooti. (Far. 36:9) Soqqamaasinchu Phaawuloosi, “Lubbotenni heeꞌnoommohunna milli yineemmohu isinniiti; heeꞌneemmohuno isinniiti” yee konne halaale ammanannota leellishino. (Soq. 17:25, 28) Hakko daafira heeshsho Maganu uyinonke eltooti yaa dandiineemmo. Isi shaqqillunni heeshshotenni heeꞌrate hasiisannoreno uyinonke. (Soq. 14:15-17) Ikkollana Yihowa ninke heeshsho agarate maalale diloosanno. Hatteentenni isi maalaamittetenna ayyaanaamittete fayyimmanke agadhate dandiinummore baala assinammora hasiꞌranno. (2 Qorontoosi 7:1 nabbawi.) Fayyimmankenna heeshshonke agadha hasiissannonkehu mayiraati? Tenne assa dandiineemmohu hiittoonniiti?

HEESHSHO LOWORI GEDE ASSITINE LAꞌE

3. Fayyimmanke agadhate sharrammeemmohu mittu korkaati maati?

³ Fayyimmanke agadhineemmohu mittu korkaati, Yihowara soqqamate dandiinummore baala assa hasiꞌneemmo daafiraati. (Maq. 12:30) ‘Mannimmanke lubbotenni noo kakkalo gede, Magano hagiirsiissannotanna qullaawa assine shiqisha’ hasiꞌneemmo; hakko daafira fayyimmanke gawajjannota anfoommo coye dikisiꞌneemmo. (Rom. 12:1) Fayyimmanke agadhate lowore assinummorono mito woyite kayinni dhiwamanke digattanno. Kayinni iimi Anninke uyinonke heeshsho naandeemmota leellisha hasiꞌneemmo daafira, fayyimmanke agadhate dandiinummore baala assiꞌneemmo.

4. Moote Daawiti maa assa hasiꞌrino?

⁴ Moote Daawiti Maganu uyinosi heeshsho naadannohu mayiraatiro coyiꞌrino; isi togo yee borreessino: “Ani ree waamamummoro ma kaaꞌleemmohe? Bushsha ikkummoro galateemmoheni? Halaalaanchimmakki kule afeemmoni?” (Far. 30:9) Daawiti tenne hedo coyiꞌrinohu heeshshosi jeefora ikkara dandaanno. Ikkirono isi heeshshotenni heeꞌre dandii geeshsha Yihowa guwisiꞌrate murciꞌrino. Ninke baalunku hasattono tenne ikkitinoti dihuluullissannote.

5. Aye geeshsha dhiwammummoro woy geedhinummorono maa assa dandiineemmo?

⁵ Dhiwammoommoha woy geedhinoommoha ikkiro alba assineemmoha batinye coye assa dandiineemmokkiha ikkara dandaanno. Tini caaccaambeemmo woy dadillineemmo gede assitankera dandiitanno. Ikkirono fayyimmanke agadhate dandiinummore baala assa hasiissaanke. Mayira? Korkaatuno aye geeshsha dhiwammummoro woy geedhinummorono Moote Daawiti gede Yihowa guwisiꞌra dandiineemmo. Dhiwammummoro woy geedhinummorono Maganinke naadannonketa afanke lowo geeshsha sheshifachishshannonke! (Mat. 10:29-31) Reyinummoro nafa isi ninke kayisate quqquxamanno. (Iyo. 14:14, 15) Lubbotenni heeꞌnoommo geeshsha fayyimmanke agadhatenna heeshshonke gatisiꞌrate dandiinummore baala assa hasiꞌneemmo.

GAWAJJANNOꞌNERE QOROPHE

6. Inteemmorinna angeemmori daafira Yihowa ma assinammora hasiꞌranno?

⁶ Qullaawu Maxaafi fayyimma agadhinanni gara woy intanni sagale daafira kulanno maxaafa ikka hoogirono, tenne hajo daafira Yihowa hedo anfeemmo gede kaaꞌlannonke. Lawishshaho mannimmanke gawajjanno ‘qarra abbannore’ hooꞌlineemmo gede jawaachishannonke. (Ros. 11:10) Qullaawu Maxaafi quwa saꞌne itanna aga hasiissannonkekkita kulannonke; quwa saꞌne ita woy aga fayyimmanke gawajjitaranna shitankera nafa dandiitanno. (Law. 23:20) Yihowa maa inteemmoronna angeemmoro hattono mageeshshire inteemmoronna angeemmoro doodhineemmo woyite, ninkeneeto qeeꞌlineemmore ikkinammora hasiꞌranno.—1 Qor. 6:12; 9:25.

7. Lawishsha 2:11 noo amaale fayyimmanke agadhate dancha doorsha doodhineemmo gede kaaꞌlitannonkehu hiittoonniiti?

⁷ Mitto coye seekkine buunxe Maganu uyinonke heeshsho lowo geeshsha naandeemmota leellishanno doorsha doodha dandiineemmo. (Far. 119:99, 100; Lawishsha 2:11 nabbawi.) Lawishshaho inteemmore qorophine doodha dandiineemmo. Mitte banxeemmo sagale inteenna dhiwannonkeha ikkiro hattee sagale ita dihasiissannonke. Dancha gede gonxe, ganyine ispoorte loonse, woꞌmanka woyite hayishshiꞌnenna qaenke ishinu nookkita assiꞌne hayyoota ikkinoommota leellisha dandiineemmo.

DANO ABBANNORE HOOꞌLE

8. Qullaawu Maxaafi Yihowa gawajjannore qorophinammora hasiꞌrannota kulannonkehu hiittoonniiti?

⁸ Yihowa Israeelete uyino Seeri, mini giddonna loosu bayicho dano abbannore qorophitanno gede kulanno biddishshano amadino. (Ful. 21:28, 29; Mar. 22:8) Mittu manchi hedikki nafa wole mancho shiiro tini isira lowo qarra abbitanno. (Mar. 19:4, 5) Muse Seeri mittu manchi afikkinni godowa noo qaaqqo gawajjiro nafa qorichishamannota kulanno. (Ful. 21:22, 23) Qullaawa Borro, Yihowa gawajjo abbannore qorophinammora hasiꞌrannota xawisse kultanno.

9. Dano abbannore qorophate maa assa dandiineemmo? (Misillano lai.)

⁹ Mini giddonna loosu bayicho gawajjo abbannore qorophine Maganu uyinonke heeshsho naandeemmota leellisha dandiineemmo. Murannore woy qasanno gedeere, hadho afidhino kemikaale woy xagga hunneemmo woyite mullawa ditungeemmo; hattono togoo coyibba qaaqquullu iillitannowa diworreemmo. Giira, iibbino waa woy korreentetenni loosanno uduunne mullawa worre agure haꞌra dihasiissannonke. Garunni hendeemmokki gede assannore lawishshaho, xagicho egemmine heeꞌne, ago ange heeꞌne woy goxicho geleelle heeꞌne makeena dioonfeemmo hattono oonfanni heeꞌne silke dihoroonsiꞌneemmo.

DANO KALAQANTANNO WOYITE

10. Dano kalaqantara albaanninna kalaqantanno woyite ma assa dandiineemmo?

¹⁰ Mito woyite gawajjannonke coye hooꞌla didandiineemmo. Lawishshaho kalaqamu dano, taraabbanno fayyanna dagate gaance kaꞌannota hoola didandiineemmo. Togoori kalaqamanno woyite gashshaano qooxeessa agurre fulleemmo gede woy wolere assineemmo gede kultannonke woyite hajajamme, iillitannonke gawajjo ajisha woy danotenni gata dandiineemmo. (Rom. 13:1, 5-7) Mite kalaqamu dano balanxe afa dandiinannite; togoo woyite qooxeessu gashshaano balanxe qixxaambeemmo gede kultannonke biddishsha baala harunsa hasiissannonke. Lawishshaho waa, rakke baꞌannokki sagalenna xagisiꞌrate kaaꞌlannore shiimaaddare qixxeessiꞌra dandiineemmo.

11. Taraabbanno fayya ubbanno woyite maa assa hasiissaanke?

¹¹ Heeꞌneemmo qooxeessira taraabbanno fayya ubbanno woyite ma assa hasiissannonke? Togoo woyite gashshaano ganyine anga hayishshiꞌneemmo gede, mannunniwa gamba yineemmokki gede, maaske wodhineemmo gedenna mannunni xaandeemmokki gede kultannonke woyite hajajama hasiissaanke. Kuri coyibba diinaggaambe assanke Maganu uyinonke heeshsho lowo geeshsha naandeemmota leellishshanno.

12. Lawishsha 14:15 noohu xintu seeri dano kalaqantanno woyite gara ikkitino mashalaqqe calla macciishshate kaaꞌlannonkehu hiittoonniiti?

¹² Dano kalaqantanno woyite jaallanke, qachinke manninna tuqu xaadooshshi widoonni gara ikkitinokki mashalaqqe macciishshinammora dandiineemmo. “Yinire baala” adda assiꞌratenni tenne hajo daafira gashshootu woy hakimootu kultannota addaxxinanni taje macciishsha hasiissannonke. (Lawishsha 14:15 nabbawi.) Togoo woyite Aliidi Bisinna sinu biiro, songote gambooshshinna sabbakate daafira biddishsha uyitara albaanni gara ikkitino mashalaqqe afiꞌrate sharrantanno. (Ibi. 13:17) Konne biddishsha harunsine ninkeneetono ikko woloota gawajjannorinni agara dandiineemmo. Qoleno mannu Yihowa Farciꞌraasine daafira danchare hedanno gede assa dandiineemmo.—1 Phe. 2:12.

MUNDEE ADHA QOROPHE

13. Mundee adhe yinanninke woyite Maganu uyinonke heeshsho lowori gede assine laꞌneemmota leellisha dandiineemmohu hiittoonniiti?

¹³ Lowo manni ninke Yihowa Farciꞌraasine mundee adhineemmokkita afino; adhineemmokkihu mundee qullaawa ikkitino daafiraati. Hedeweelcho xagisiꞌra hasiissannonke woyite nafa mundee adha qorophine, Yihowa mundeete daafira uyino seerira hajajammeemmo. (Soq. 15:28, 29) Ikkirono togo yaa kayinni reya hasiꞌneemmo yaa diꞌꞌikkitino. Isinni Maganu uyinonke heeshsho lowori gede assine laꞌneemmo. Mundee nookkiha dancha gede xagissanno akimoota hasiꞌneemmo.

14. Darre xaginsanninke gede assannore ajisha dandiineemmohu hiittoonniiti?

¹⁴ Konni birxichira fayyimmanke agadhate daafira ronsummore loosu aana hosiinse, darre akkammanninke gede assannore ajisha dandiineemmo. Fayyimmanke agadhineemmore ikkinummoro darre xaginsinkero nafa mulenni hura dandiineemmo. Mini giddonna loosu bayicho dano abbannore qorophine; hattono makeena oonfeemmo woyite tiraafikete higgera hajajamme darre xaginsanninke gede assannore ajisha dandiineemmo.

15. (a) Muli barrita hikkiminnu biddishsha amaddino kaarde haꞌneemmowa baalawa adhine haꞌra hasiissannonkehu mayiraati? (Misileno lai.) (b) Viidiyo leellishshannonte gede, mundee horoonsiꞌne xagisiꞌrate daafira coye seekkine buunxe dancha doorsha doodha dandiineemmohu hiittoonniiti?

¹⁵ Maganu uyinonke heeshsho lowori gede assine laꞌneemmo daafira, hikkiminnu biddishsha amaddino kaarde wonshine wodhineemmo hattono haꞌneemmowa baala adhine haꞌneemmo.b Tenne kaarde widoonni mundee adhate daafira noonke laonna xagisiꞌra hasiꞌneemmo doogga kula dandiineemmo. Muli barriti hikkiminnu biddishsha amaddino kaarde noohe? Tenne kaarde wonsha woy haaroonsiꞌra hasiissinoheha ikkiro teyo gaꞌa yitooti. Tenne kaardera hedonke leellanno garinni borreessine wodhanke dhiwammeemmo woyite mulenni xagisiꞌneemmo gede kaaꞌlitannonke. Tini qolte akimootu gurchaabbannokki gedenna ninke gawajjannore assitannokki gede kaaꞌlitannonsa.c

16. Hikkiminnu biddishsha amaddino kaarde wonshinanni gara afa hoongummoro maa assa dandiineemmo?

¹⁶ Wedelloota woy dancha ordu fayyimma noonkereno ikkinummoro, dano iillitankeranna dhiwammammora dandiineemmo. (Ros. 9:11) Hakko daafira hikkiminnu biddishsha amaddino kaarde wonshe wodha hayyote. Tenne kaarde wonshinanni gara afa hoogittoro kaaꞌlitannohe gede songokki cimeeyye xaꞌmiꞌra dandaatto. Insa tenne kaarde wonshinanni gara afate sharrantanno daafira kaaꞌlitannohe; kayinni konne doodhi yitannoheri insa diꞌꞌikkitino. Doodhattohu ate umokkiiti. (Gal. 6:4, 5) Ikkirono insa doodhattore huwatatto gedenna doodhoottore borreessite wodhatto gede kaaꞌlitannohe.

QUWA SAꞌINANNIKKIRE IKKE

17. Fayyimmanke daafira quwa saꞌneemmokkire ikkanke leellisha dandiineemmohu hiittoonniiti?

¹⁷ Fayyimmanke agadhineemmohunna xagisiꞌneemmo gara doodhineemmohu Qullaawu Maxaafinni qajeelino tiianke horoonsiꞌneeti. (Soq. 24:16; 1 Xim. 3:9) Mitto coye doodhineemmo woyitenna doodhinoommori daafira wolootu ledo hasaambeemmo woyite Filiphisiyusi Sokka 4:5 (NW) nooha xintu seera harunsineemmo; qummeeshshu “Quwa saꞌinannikkire ikkitinoonniti manna baalaho leeltona.” yaanno. Quwa saꞌneemmokkire ikkinummoro fayyimmanke daafira deerra saꞌne diyaandeemmo; tenne daafira wolootahono ninkete gedee lao heedhansara dixixxiimbeemmo. Ammante roduuwinke doodhitino doorshi ninke doodhinoommohu gedeeha ikka hoogiro nafa insa banxeemmonsa hattono ayirrinseemmonsa.—Rom. 14:10-12.

18. Maganu uyinonke heeshsho naandeemmota leellisha dandiineemmohu hiittoonniiti?

¹⁸ Heeshshonke gawajjannore qorophinenna Yihowara soqqamate dandiinummore baala assine heeshshote Buicho ikkinoha Yihowa galanteemmota leellisha dandiineemmo. (Aju. 4:11) Xaa yannara dhiwammeemmo hattono dano iillitannonke. Ikkollana Kalaqaanchinke hedinohu togoo heeshsho heeꞌnammora diꞌꞌikkino. Muli yannara isi xissonna reyo nookkita hegere heeshsho aannonke. (Aju. 21:4) Hakka geeshsha kayinni lubbotenni heeꞌne baxillaanchu iimi Anninke Yihowara soqqama lowo qoossooti!