Yihowa Calla Magansidhe

1. Yihowa calla magansiꞌra hasiissannonkehu mayiraati?

YIHOWA Kalaqaanchonkenna heeshsho uyinonkeha ikkino daafira iso calla magansiꞌra hasiissannonke. (Aju. 4:11) Kayinni hatto assa qarra ikkitankera dandiitanno. Yihowa banxeemmohanna ayirrinseemmoha ikkirono, iso calla magansiꞌneemmokki gede guficho ikkannori iillankera dandaanno. Togoo coyi iillannonkehu hiittoonniitiro afa hasiissannonke. Hanni balanxe, Yihowa calla magansiꞌrate yaa mayyaatero laꞌno.

2. Fulo 34:14 kultanno garinni Yihowa calla magansiꞌra hasiꞌnummoro maa assa dihasiissannonke?

² Qullaawu Maxaafi Yihowa calla magansiꞌrate yaa iso lowo geeshsha baxa ikkitinota kulanno. Ayino woy aye coyino Yihowanni roorankera diwodhineemmo.—Fulo 34:14 nabbawi.

3. Yihowa calla magansiꞌneemmohu isi daafira mittoreno anfummokkinni diꞌꞌikkino yineemmohu mayiraati?

³ Yihowa calla magansiꞌneemmohu isi daafira mittoreno anfummokkinni diꞌꞌikkino. Hatto yineemmohu mayiraati? Korkaatuno Yihowa banxeemmohu isi daafira halaale ikkinore ronsoommohuraati. Yihowata dancha akatta naandeemmo. Qoleno, isi baxannorenna giwannore anfoommo; hattono kuri coyibbara isite gedee lao noonke. Isi mannu oosora hedinore anfoommo; qoleno biddishshisi garinni heeꞌne tenne hedosi harunsineemmo. Yihowa jaallasi ikkineemmo faro faninonke daafira hagiidhineemmo. (Far. 25:14) Kalaqaanchinke daafira ronseemmori baalu isiwa shinqeemmo gede assannonke.—Yai. 4:8.

4. (a) Daawuloosi Yihowara noonke baxille ajishate sharramannohu hiittoonniiti? (b) Konni birxichira maa ronseemmo?

⁴ Tenne alame gashshaanchi Daawuloosiiti; isi alamete noo coyibba horoonsiꞌre kalaqamu hasattonkeranna maalu yortonkera qeelammeemmo gede assate woꞌnaalanno. (Efe. 2: 1-3; 1 Yoh. 5:19) Daawuloosi mixo wole coyibba quwa saꞌne banxe Yihowa calla magansiꞌneemmokki gede assate. Hanni Daawuloosi hatto assara dandaannota lame doogga laꞌno. Umihunni isi jiro shorrineemmo gede assate woꞌnaalanno; layinkihunni busha boohaarsha doodhineemmo gede assate sharramanno.

WOXU BAXILLE QOROPHE

5. Woxu baxille qoropha hasiissannonkehu mayiraati?

⁵ Ninke baalunku gari sagale, dancha uddanonna danchu mini heeꞌrankera hasiꞌranke bunshe diafidhino. Ikkirono woxu baxille qoropha hasiissannonke. Sheexaanu alame wido ikkinohu batinyu manni ‘woxenna’ woxunni hidhinanni coye baxannoho. (2 Xim. 3:2) Yesuusi harunsaanosira woxu baxilli fonqolo ikkansara dandaannota afino. Isi togo yino: “Mittu manchi lamu Mootichira soqqama didandaanno, woy mitto giwe mitto baxanno; woy mitto ayirrise mitto mishanno. Hattonni mittu manchi Maganohonna woxeho borojjicho ikka didandaanno.” (Mat. 6:24) Mittu manchi Yihowa magansiꞌranni heeꞌrenni alamete jiro duuꞌnate sharramanni yannasinna wolqasi gudannoha ikkiro, lamu mootichira soqqamate woꞌnaalanni noohu gedeeti. Kuni manchi Yihowa calla magansiꞌranni no yaa didandiinanni.

6. Yesuusi Lodooqiyu songora coyiꞌrinorinni maa ronseemmo?

⁶ Umi xibbi diri jeefora Lodooqiyu katamira noo songo miilla giddo mitu “Ani dureessaho; lowo jiro nooe; xeinoeri mitturino dino” yite naaxxitino. Kayinni insa Yihowanna Yesuusi albaanni ‘gadadaammaho, hawaaxaammaho, buxante, illiweelootahonna mullootaho.’ Yesuusi insa amaalinohu dureeyye ikkitinohura ikkikkinni, woxu baxilli Yihowa ledo noonsa jaalooma hunanni noonsa daafiraati. (Aju. 3:14-17) Woxu baxilli wodaninke giddo mura hanafinota wodanchinummoro, ranke hedonke biddi assiꞌra hasiissannonke. (1 Xim. 6:7, 8) Hatto assiꞌra hoongummoro, wodaninke bebbeehamanno; hatto ikkiro Yihowa magansiꞌranke diadhanno. Isi ‘woꞌmu wodaninni’ banxasira hasiꞌranno. (Maq. 12:30) Woxu baxilli guficho ikkankera dandaannohu hiittoonniiti?

7-9. Deevidi yinanni cimeessi lawishshinni maa ronseemmo?

⁷ Hanni Deevidi yinannihu Ameerikaho heeꞌrannohu mittu diinaggaawe loosanno cimeessi lawishsha laꞌno. Isi alba qaxarame loosanno woyite loosisira laalaatannota coyiꞌrino. Isi loosanno dirijjite giddo lowo deerra iillino, hattono hattee gobbara loosanno loosinni egennaminoha ikkino. Deevidi togo yiino: “Hatte yannara qiniinoehu Yihowa masirinoe daafiraati yee hedoommo.” Ikkina hatto yee hedasi garahoni?

⁸ Deevidi loosanno loosi Yihowa ledo noosi jaalooma hunanni noosita gale hose huwatino. Isi togo yiino: “Songote gambooshshiwanna soqqanshonniwa nafa hedeemmohu loosu basera noo qarri daafiraati. Lowo woxe afiꞌranni noommoha ikkiro nafa yaadaameessa ikkoommo hattono maateꞌya giddo qarru kalaqamino.”

⁹ Deevidi balaxisiisanni noo coye layiꞌra hasiissinosita huwatino. Isi “heeshshoꞌya gara biddi assiꞌrate murciꞌroommo” yee coyiꞌrino. Gedensoonni isi loosisi pirogiraame biddi assiꞌre kae tenne loosiisaanchisira kulino. Hakkiinni mayi ikkiyya? Deevidi loosunni shorrinoonnisi. Isi maa assiyya? Togo yiino: “Layinki barra kaaꞌlaancho suwisaancho ikke soqqamammora forme wonshoommo. Deevidinna minaamasi hasiisannonsare wonshiꞌrate mitto jawa hintsa fiitanno. Hakkiinni isi woꞌma yanna suwisaancho ikke soqqama hanafino; gedensoonni iseno suwisaancho ikkite soqqama hanaffino. Insa lowo manni mishanno looso loosa doodhino, ikkirono, heeshshonsa giddo lowo geeshsha hasiisanno coyi loosanno looso diꞌꞌikkino. Alba afiꞌranno woxe hendiro xa afiꞌrannohu lowo geeshsha shiima ikkirono, hasiisannonsare hidhate ikkanno woxe afiꞌranno. Insa Yihowa balaxisiisino, hattono Maganu Mangistesi balaxisiissannore towaatannota uminsa heeshshonni laino.—Mat. 6:31-33.

10. Wodananke agadha dandiineemmohu hiittoonniiti?

¹⁰ Noonke jiro lowotano ikkito shiima wodananke agadha hasiissannonke. Hiittoonni? Jirote baxilli rumuxxoonkeꞌne. Loossinanni loosi Yihowa soqqanshonni rooraꞌnera wodhitinoonte. Loosonke balaxisiinsanni heeꞌnoommota afa dandiineemmohu hiittoonniiti? Hanni ninkeneeto togo yine xaꞌmino: ‘Duucha woyite gambooshshunniwanna soqqanshonniwa hedeemmohu loosu daafiraati? Woꞌmanka woyite albillitte woxe afiꞌrate daafira yaadeemmo? Woxunna maalaamittete jiro anenna galteꞌya mereero qarra kalaqqanni no ikka? Wolootu mishshanno looso ikkirono, Yihowara soqqameemmota lowo yanna afiꞌreemmo gede assannoe looso doodheemmo?’ (1 Xim. 6:9-12) Kuri xaꞌmuwa hiincineemmo woyite Yihowa baxannonketanna isi baxxannosirira “horo diagureemmohe; dicallachisheemmohe” yee qaale einota qaango. Soqqamaasinchu Phaawuloosi “woxu baxille qorophe” yee borreessinohu iseraati.—Ibi. 13:5, 6.

BOOHAARSHA QOROPHITINE DOODHE

11. Mitto mancho doodhanno boohaarshi massasira dandaanno?

¹¹ Yihowa hagiirraamma ikkinammora hasiꞌranno; boohaarshu qole hagiirre afiꞌneemmo gede kaaꞌlankera dandaanno. Qullaawu Maxaafi togo yaanno: “Mannaho daafure loosiꞌrinohunni hagiidhanni itatenna agate kaꞌaanni woliri kaaꞌlannosiri dino.” (Ros. 2:24) Kayinni alamete noohu roore boohaarshi gawajjankera dandaannoho. Kuni boohaarshi mannu amanyootu seera agadhannokki gedenna lashshi assanno gede jawaachishanno; wole agurina Maganu Qaali hoolannore nafa banxanni gede assanno.

12. Umi Qorontoosi 10:21, 22 kultanno garinni boohaarsha qorophine doodha hasiissannonkehu mayiraati?

¹² Yihowa calla magansiꞌra hasiꞌneemmo daafira ‘Mootichu sagalenna durriisu sagale ita didandiineemmo.’ (1 Qorontoosi 10:21, 22 nabbawi.) Mittu manchi ledo sagale ita duucha woyite jaalooma leellishshanno. Finqille, agaanintete loosonna foorre woy wole maalu yortonna akatta jawaachishanno boohaarsha doodhineemmoha ikkiro, Maganu diinna shiqishshanno sagale intanni heeꞌnoommohu gedeeti. Tini ninkeneeto calla ikkikkinni Yihowa ledo noonke jaaloomano gawajjitanno.

13-14. Yaiqoobi 1:14, 15 kultanno garinni boohaarsha qorophine doodha hasiissannonkehu mayiraati? Lawishsha kuli.

¹³ Hanni boohaarshu intanni sagale gedeeti yineemmohu mayiraatiro laꞌno. Inteemmo sagale doodha dandiineemmo. Kayinni egemminummohu gedensaanni sagale bisinke giddo eꞌe ikkitannore hoolle dianfeemmo. Dancha sagale fayyimmankera kaaꞌlitannonke; busha sagale kayinni fayyimmanke gawajjitanno. Intoommo sagale assitannori bayichonko leella hoogankera dandaanno; gale hose kayinni leellasi digattanno.

¹⁴ Hatteente gede boohaarsha doodhineemmo woyite surrenke giddora eanno coye doodha dandiineemmo. Doodhinummohu gedensaanni kayinni boohaarshu, surrenkenna wodaninke giddo assannore hooꞌla didandiineemmo. Danchu boohaarshi wolqanke haaronsanno; bushu boohaarshi kayinni gawajjannonke. (Yaiqoobi 1:14, 15 nabbawi.) Bushu boohaarshi abbanno qarri bayichonko leella hoogankera dandaanno; gale hose kayinni leellasi digattanno. Qullaawu Maxaafi togo yee qorowisiisannohu iseraati: “Umoꞌne dogginoonte. Mannu wixiꞌrinoha mixxanno daafira, Magano arrassa didandiinanni. Maalasi hagiirsiisate wixiꞌrannohu, maalisinni reyo mixxanno.” (Gal. 6:7, 8) Addanko, Yihowa giwanno coye assineemmo gede jawaachishanno boohaarsha baala giwa hasiissannonke.—Far. 97:10.

15. Yihowa hiittee baxissanno elto uyinonke?

¹⁵ Batinye Yihowa Farciꞌraasine interneete widoonni saꞌannota televizhiinete pirogiraamera shiqqannota JW Biroodikaaste laꞌꞌa baxxanno. Merliyiini yinanni rodoo togo yitino: “JW Biroodikaaste dancha lao heedhannoe gede kaaꞌlitinoe; qoleno shiqqanno pirogiraame baalanti dancha ikkitino daafira doodhanni diqarrameemma. Callimma amaddannoe woyitenna hexxo mudheemma woyite jawaachishanno lallawonna soodo magansiꞌrara shiqqanno pirogiraame macciishsheemma. JW Biroodikaastete qixxaawo heeshshoꞌya lowo geeshsha woyyeessitinoe.” Atina tenne Yihowa eltonni horo afidhanni nootto? Aganu kiiro shiqqannota haaro pirogiraameno aguranna JW Biroodikaastera qoonqotenni calla qaddaꞌnoonnitinna viidiyote qixxaabbino pirogiraame hattono jawaachishshanno faarsuwa fultanno.

16-17. Mageeshshi yanna boohaarreemmoro qorophine heda hasiissannonkehu mayiraati? Hatto assa dandiineemmohu hiittoonniiti?

¹⁶ Hiittoo boohaarsha boohaarreemmoro calla ikkikkinni boohaarranni mageeshshi yanna keeshshineemmorono heda hasiissannonke. Hatto assa hoongummoro, Yihowara soqqammeemmotenni roortino yanna boohaarshaho gundammora dandiineemmo. Lowo mannira boohaartanni sayissanno yanna ajisha qarra ikkitinonsa. Abigayeeli yinanniti 18 diri rodoo togo yitino: “Daafure hosoommati daye Televizhiine laeemma woyite hisateemma. Kayinni laꞌꞌanni lowo yanna gudeemma.” Saamueeli yinannihu wedellichu rodii togo yiino: “Interneetete batinye shiimmaadda viidiyubba laeemmo. Mitte viidiyo calla laeemmo yee hanafe, afummokkinni sase woy shoole saate keeshsheemmo.”

¹⁷ Boohaartanni sayisatto yanna ajisha dandaattohu hiittoonniiti? Balaxxe boohaartanni mageeshshi yanna sayisattoro afa hasiissannohe. Mitte lamala giddo boohaarshaho mageeshshi yanna sayisoottoro mayira borreessite diamaxxatto? Televizhiine laꞌanni, Interneetete mitore laꞌanni, woy mobayilekkinni geeme godoꞌlitanni keeshshatto yanna borreessite amaxxi. Boohaarshaho lowo yanna guddanni noottoti leeltuhero, pirogiraamekki biddi assiꞌrate woꞌnaali. Balaxxe lowo geeshsha hasiisanno looso loosate pirogiraame fushshiꞌri, gattino yanna boohaarshaho horoonsiꞌra dandaatto. Hakkiinni fushshiꞌrootto pirogiraame harunsa dandaatto gede kaaꞌlahera Yihowa huucciꞌri. Hatto assittoro, Qullaawa Maxaafa xiinxallate, maatete magansiꞌrara, songote gambooshshira, hattono sabbakatenna rosiisate loosinni Yihowara soqqamatto yanna afiꞌratto. Qoleno boohaarshaho lowo yanna gudanni noommo yite digaabbatto.

WOꞌMANKA WOYITE YIHOWA CALLA MAGANSIDHE

18-19. Yihowa calla magansiꞌneemmota leellisha dandiineemmohu hiittoonniiti?

¹⁸ Soqqamaasinchu Pheexiroosi Sheexaanu alame jeefo daafiranna haaro alame daggannota borreessihu gedensaanni togo yiino: “Jaallaꞌya! Kuni baalu ikkanno barra galaalchitinanni heedhiniro, Mootichu saalunna minshanniri nookkire ikkitine keere heedhineenna afiꞌrannoꞌne gede feeffattine heedhe.” (2 Phe. 3:14) Tenne amaale macciishshine woꞌmanka woyite amanyootunninna ayyaanaamittete xuro nookkire ikkine heeꞌnummoro, Yihowa calla magansiꞌneemmota leellinsheemmo.

¹⁹ Sheexaanunna alamesi Yihowa agurre wole coye balaxisiinseemmo gede assate sharrama diagurtanno. (Luq. 4:13) Aye qarri iillinkerono, ayino woy aye coyino Yihowawiinni roorankera diwodhineemmo. Yihowara hasiisannore isira calla aate yaano iso calla magansiꞌrate murciꞌnoommo!