Mannu Laanfe Laꞌinannihu Yihowa Laꞌꞌanno Garinniiti?

1, 2. Phaawuloosi laafa ikkino manna mararanna noo gara huwata dandiinohu mayiraati?

NINKE baalunku saꞌne saꞌne wolqa baꞌneemmo woti no. Ganshu woy shiima xisso nafa mitore assiꞌra dandiineemmokki deerra massitankera dandiitanno. Kayinni hanni wolqa baꞌne mitte woy lame lamala calla ikkikkinni seeda yanna keeshshinoommohu gede assine hendo. Hattoo wote mannu misha agure qarranke huwate mararinkero dibaxisannonke?

² Hawaariya Phaawuloosi songote gobbayidinnino ikko songote giddonni fatanu iilleennasi daafuru woy laanfe macciishshantinosi woti no. Isi iillinosi coyi wolqasira aleenni ikkinota coyiꞌrino yanna no. (2 Qor. 1:8; 7:5) Phaawuloosi heeshshosi garanna ammanamino Kiristaancho ikkasinni iillinosire hede togo yiino: “Laafu ayeti? Anera laanfe dinoeni?” (2 Qor. 11:29) Isi Kiristaanu songo miilla mannu bisi kifilla ledo lawise coyiꞌri wote, “laafa labbannori bisu kifilla . . . lowo geeshsha hasiissannoreeti” yiino. (1 Qor. 12:22) Hatto yaasi mayyaate? Laafa labbannore Yihowa laꞌꞌanno garinni laꞌꞌa hasiissannonkehu mayiraati? Tini ninkera kaaꞌlitannonkehu hiittoonniiti?

YIHOWA LAANFE NOONSARE LAꞌꞌANNO GARA

3. Songote giddo kaaꞌlo hasiissannonsare gariweelo laꞌneemmo gede assannonkeri maa ikkara dandaanno?

³ Heeꞌnoommo alame jawaatanna wedelloota manna calla gotti gotti assitannote. Batinyu mannooti uminsara xiqime afiꞌrate yite laafu mannira aanaho hadhanno. Togoo amanyooti gara ikkinokkita anfoommo. Ikkollana, songote giddo duucha wote kaaꞌlo hasiissannonsare hendummokki gariweelo laꞌꞌa jammarrammora dandiineemmo. Kayinni Maganunnite gedeeti gara ikkitino lao hasiissannonke.

4, 5. (a) Umi Qorontoosi 12:21-23 noo lawishshi, Yihowa mannu laanfe laꞌꞌanno gara huwatate kaaꞌlannonkehu hiittoonniiti? (b) Laaffinore kaaꞌlanke mayi horo uyitannonke?

⁴ Phaawuloosi Qorontoosi Kiristaanira borreessinote umi sokkara horoonsiꞌrino lawishshi Yihowa mannu laanfe ma garinni laꞌꞌannoro huwatate kaaꞌlannonke. Phaawuloosi foolishsho 12 aana, laꞌꞌate hakkeeshshi geeshsha baxissannokkiti woy laafa bisu kifilla nafa kaaꞌlo uyitannota xawisino. (1 Qorontoosi 12:21, 22 nabbawi.a) Suutu soorro ammanannohu mitu manni, togooti mannu bisi kifilla kaaꞌlo diafidhino yee heewisamanni keeshshino. Ikkollana, mannu bisi daafira assinoonni xiinxallo konni albaanni kaaꞌlitannori dino yine hendanniti bisu kifilla lowonta hasiisanno looso loossannota buuxissino.b Lawishshaho, mitootu shiimiidihu lekkate qubbichi kaaꞌlo diafiꞌrino yitanni keeshshitino; ikkollana, gaggambikki hossi yine uurrate kaaꞌlannota xaa yannara buunxoonni.

⁵ Phaawuloosi horoonsiꞌrino lawishshi, Kiristaanu songo giddo noori baalunku kaaꞌlo afidhinore ikkitinota leellishanno. Yihowa, mannaho ayirrinye hunannohu Sheexaanu gede ikkikkinni, soqqamaanosi baalanta laafa labbannorino gattukki “hasiissannore” ikkitinohu gede asse laꞌꞌanno. (Iyo. 4:18, 19) Tini hedo, heeꞌnoommo songo giddo noonke bayichonna alame woꞌmate noohu Maganu manni miila ikkanke kaffi assine laꞌneemmo gede assitannonke. Lawishshaho, hanni kaaꞌlo hasiissinoha mitto geercho irkisse amadde haꞌranno gede kaaꞌlootto yanna hedi. Isi ledo taalo haꞌrate sununni qaafa hasiissinoheha ikkara dandaanno. Tini iso kaaꞌlitinoti egennantinote; kayinni konni garinni kaaꞌlakki hagiidhatto gede assitinohe daafira ateno kaaꞌlitinohe. Ee woloota kaaꞌlanke hagiirre afiꞌneemmo gede, cincanna baxillu noonkerenna gikki yinoommore ikkineemmo gede assitannonke. (Efe. 4:15, 16) Baxillaanchu Anninke baalanka roduuwa, laanfensa baxxutano ikkituro kaffi assine laꞌnammora hasiꞌranno; hatto assanke, baxillu noonkerenna mannuwiinni quwa saꞌne agadhineemmokkire ikkinoommota leellishshanno.

6. Phaawuloosi “laafa” hattono “jawaata” yitanno qaalla horoonsiꞌrinohu maa kulateeti?

⁶ Phaawuloosi Qorontoosi Kiristaanira sokka borreessi wote, songote giddo noori daafiranna umisi daafira kulate “laafa” hattono “laanfe” yaanno qaale horoonsiꞌrino; hatto yiinohu hakkawaro ammaninokki manni Kiristaana hakko garinni laꞌꞌanno daafiraati. (1 Qor. 1:26, 27; 2:3) Ikkollana, Phaawuloosi mito Kiristaana “jawaatoota” yiinohu wolootaho aliidire ikkitino daafira diꞌꞌikkino. (Rom. 15:1) Hatteentenni, roore temokkiro afiꞌrino Kiristaani halaalu giddo gari geeshsha rumuxxitinokkire cinca hasiissannonsata xawisateeti.

LAONKE BIDDI ASSIꞌRA HASIISSANKEKKA?

7. Kaaꞌlo hasiissannore kaaꞌlineemmota hoolannonkeri maa ikkara dandaanno?

⁷ “Qarraataamma” kaaꞌlinummoro Yihowa lawishsha harunsinoommo yaate; hakkiino saꞌne iso hagiirsiinseemmo. (Far. 41:1; Efe. 5:1) Ikkollana, kaaꞌlo hasiissannonsa roduuwira gara ikkitinokki lao heedhunkero kaaꞌlineemmonsata hooltankera dandiitanno. Woy mayineemmoro leella hooginkero, qarramino roduuwiwa gamba yaa waajjinammora dandiineemmo. Minaannise hune haꞌrinoti Sintac yinanni rodoo togo yitino: “Roduuwu gambo gibbanno wote woy muli jaali ikkanno gede ikka hoogganno wote, hatti xissiissanno. Qarru iillannonke wote, mannu mulenke heeꞌrara hasiꞌneemmo.” Biꞌree yannara heeꞌrinohu Daawitino mannu xeertiꞌranno wote hiittoo simmeete macciishshantannoro afino.—Far. 31:12.

8. Roduuwanke albinni roore mararreemmo gede kaaꞌlannonkeri maati?

⁸ Mitu roduuwinke buutote qarri giddo noota assaawanke insa albinni roore mararreemmo gedenna noo gara huwanteemmo gede kaaꞌlitannonke. Batinyu roduuwinke dhiwanni waadannonsareeti, ammantinokki maate mereero heedhannoreeti woy dadillaammaho. Ninkerano barrunni mitto barra togoori iillankera dandaanno. Gibitsete gobbara buxanenna borojje ikkite heedhinoti Isiraeelete daga Hexxote Gobba eꞌara kaꞌuta, hawaaxantino roduuwinsara ‘[godowa] kaajjitannokki gede’ kulloonninsa. Yihowa insa buxanenna laafoota roduuwansa kaaꞌla hasiissannonsata huwattara hasiꞌrino.—Marro 15:7, 11; Zel. 25:35-38.

9. Qarru giddo noore kaaꞌlineemmo wote balanxe heda hasiissannonkeri maati? Lawishshunni kuli.

⁹ Laanfe noonsa roduuwanke huluullama woy farada agurre, ayyaanaamittetenni kaaꞌla hasiissannonke. (Iyo. 33:6, 7; Mat. 7:1) Lawishshaho, mittu manchi dhoqidhoqqetenni haꞌranni heeꞌre wolu ledo gaaccaꞌꞌameenna dano iillitusironna akimete minira massinisiro, akimootu dano iillitanno gede assinohu isootironna teꞌee buuxate kaꞌannoni? Deeꞌni; insa bayichonko iso xagisate kaꞌanno. Hatteente gede, mittu rodiinke addi addi qarrinni laafiro balanxe heda hasiissannonkehu iso ayyaanaamittetenni kaaꞌlineemmo garaati.—1 Tes. 5:14.

10. Laafa labbanno roduuwi “ammanatenni dureeyye” ikkitinohu hiittoonniiti?

¹⁰ Roduuwinke noo gara seekkine assaambummoro, laafootaho yine hendoommori laafoota ikkitinokkita huwantammora dandiineemmo. Hanni mini manni taqaawwamanni heeꞌreennansa lowo diro kaajje uurrinore meya roduuwanke hedi. Kuri giddo mitootu hawaaxaminorenna dhuka bainore lawirono, kaajjado ammananna giddoyidi jawaante noonsare diꞌꞌikkino? Ooso annu nookkiha lossidhanno ama oosose ledo gambooshshe hossukki ganyite daggannota laꞌꞌatto wote ammanasenna murcidhe kaꞌino gari dhagge diꞌꞌikkannohe? Qoleno rosu mine bunshete widira qole xixxiiwannori heeꞌreennanni halaale seekkite cuꞌmidhino wedelloota heda dandaatto. Tenne baala hendeemmo wote, laafoota labbannori togoo roduuwi injeennansa heedhanno roduuwinte gede “ammanatenni dureeyye” ikkitinota huwanteemmo.—Yaq. 2:5.

YIHOWATE GEDEE LAO HEEDHOꞌNE

11, 12. (a) Mannu laanfe Yihowa laꞌꞌanno garinni laꞌneemmo gede kaaꞌlannonkeri maati? (b) Yihowa Aarooni amadino garinni maa ronseemmo?

¹¹ Yihowa hundi soqqamaanosi amadino gara xiinxallanke mannu laanfe isi laꞌꞌanno garinni laꞌꞌate kaaꞌlitannonke. (Far. 130:3) Lawishshaho, Aarooni worqete siito seekke kae ikkannokki korkaata kuli yannara Muse ledo heedhe macciishshoottoro mayyaatto? (Wol. 32:21-24) Woy Aarooni Muse wolewiinni galte adhino daafira rodoosi Maariyaami ledo kaaꞌlame qacifatinotera iso ma garinni laꞌꞌatto? (Zeh. 12:1, 2) Yihowa Meriiba yinanni basera maalaletenni waa fushshi yannara Musenna Aarooni isira ayirrinye uyitukki gattinotera mayi macciishshamannohe?—Zeh. 20:10-13.

¹² Tenne baalante yannara Yihowa Aarooni bayichonko qaxxaasa dandaanno. Isi kayinni Aarooni busha mancho ikkinokkita huwatino. Aarooni soꞌro loosinohu qarrisanno coyi giddora eino daafiraatinna wolootu xixxiibbinosihuraati. Ikkollana soꞌrosi ammanino, hattono Yihowa firde maahoyye yee adhino. (Wol. 32:26; Zeh. 12:11; 20:23-27) Yihowa illachishinohu Aarooni ammananna maaro easi aanaati. Lowo diri sai gedensaannino, Aarooninna gaꞌresi qaangoonnihu Yihowara ammanantino soqqamaano ikkitino gede assineeti.—Far. 115:10-12; 135:19, 20.

13. Mannu laanfe laꞌneemmo gara biddi assiꞌra dandiineemmohu hiittoonniiti?

¹³ Hedonke Yihowate gedeeta assiꞌrate, laafa lawanno manna laꞌneemmo gara seekkine heda hasiissannonke. (1 Sam. 16:7) Lawishshaho, shiimu beetti gara ikkinokki boohaarsha doodhiro woy mitto coye qorophikki baxi gede assiro ma assatto? Quwa saꞌne iso misha agurre, ayyaanaamittetenni gikki yaanno gede kaaꞌlineemmosi gara hendummoro diwoyyanno? Kaaꞌlo hasiissannore kullanke geeshsha agarrummokki kaaꞌla dandiineemmo; tini qolte wodanchankenna baxillinke lexxanno gede assitanno.

14, 15. (a) Yihowa Eeliyaasi yannate geeshsha waajje wolqa bainotera mayi macciishshaminosi? (b) Eeliyaasi xaggenni maa ronseemmo?

¹⁴ Hedonke Yihowa hexxo mudhitino soqqamaanosi amadino gari ledo heewisiisankeno laonke halashshiꞌrate kaaꞌlitannonke. Togoo soqqamaanosi giddo mittu Eeliyaasiiti. Eeliyaasi 450 ikkitannote Baali masaalaano ledo bashshi assikki yekkeeraminoha ikkirono, Mootitte Elzaabeeli shitasira hasidhinota afiti ise noowiinni xooqino. Isi 150 kiilomeetire meddi yitanno doogo haꞌre Bersaabe iilli gedensaanni, halalli gobba xeertiꞌre haꞌrino. Iibbite giirtanno arrishshora haꞌranni hose daafurino daafira, mitte haqqichora woroonni ofolle “reyanno gede huucciꞌri.”—1 Neg. 18:19; 19:1-4.

¹⁵ Yihowa iima heeꞌre ammanamino masaalaanchisi togo hexxo mudhe heeꞌreenna lai wote mayi macciishshaminosi? Yannate geeshsha waajje wolqa bainotera iso facci asse agurinokka? Diagurinosi! Yihowa Eeliyaasi dhuki mageeshshihoro assaawe sokkaancho soyinosi. Sokkaanchu lame hige Eeliyaasi sagale itanno gede jawaachishinosi. Hakko daafira, hakkiinni kae haꞌranno ‘doogo dibatidhannosi.’ (1 Neg. 19:5-8) Ee, Yihowa masaalaanchisira biddishsha aara albaanni balaxe yaannore macciishshino; qoleno hasiissannosi kaaꞌlo uyinosi.

16, 17. Yihowa lawishsha harunsine roduuwanke kaaꞌla dandiineemmohu hiittoonniiti?

¹⁶ Shaqqadu Maganinke lawishsha harunsa dandiineemmohu hiittoonniiti? Amaale aate muddama dihasiissannonke. (Law. 18:13) Insaneeto ‘ayirrinyu woy waagu noonsakkiri’ gede assite heddanno roduuwa, balanxe yanna uyine macciishshanna mararreemmonsata leellisha woyyate. (1 Qor. 12:23) Hakkuyi gedensaanni, hasiisinonsare huwatanna kaaꞌla dandiineemmo.

¹⁷ Lawishshaho, aleenni qummi assinita Sinta temokkiro laꞌno. Minaannise isenna lame meya qaaqquullese hune haꞌrita callimma macciishshantinonsa. Ammanate roduuwinsa ma assituyya? Ise togo yitino: “Ikkinore silketenni dowwolle roduuwaho kullummota insa 45 daqiiqi giddo mininkera daye iilli. Insa dadille wiꞌlino. Umo lamu woy sasu barri geeshsha ninkewiinni dibaxxino. Hatte yannara sagale giwisinonke qoleno lowo geeshsha xissiisiꞌnoommo; hakko daafira, boode yanna roduuwu insata haare haꞌrinke.” Tini temokkiro Yaaqoobi togo yee borreessinota qaagiissitannonke: “Mittu rodii woy rodoo kallituronna barraho hasiissannota gari sagale hoogguro, kiꞌne giddo mittu, ‘Keerunni haꞌri, qiidu ganoonkehe, duuwi’ yiironna mannimmansara hasiisannore kayinni aa hooginsaro ma kaaꞌlannonsa? Hatteente gede, loosu nookki ammana umise reyitinote.” (Yaq. 2:15-17) Sintanna oosose roduuwu hasiisannonsare assite kaaꞌlitinonsa daafira, jawaante afiꞌre lewu agani gedensaanni kaaꞌlaano suwisaano ikke soqqama dandiino.—2 Qor. 12:10.

DUUCHU GARINNI KAAꞌLITANNO

18, 19. (a) Laaffinore kaaꞌla dandiineemmohu hiittoonniiti? (b) Laaffinore kaaꞌlinummoro horo afiꞌrannohu ayeti?

¹⁸ Buutote dhibbi amadiro dhaabbatate yanna hasiissannota umikki heeshshonni huwatoottoha ikkara dandaanno. Hatteente gede, mittu Kiristaanchi iillinosi qarrinni woy umisi soꞌronni laafiro woy dhuka bairo ayyaanaamittetenni jawaatate yanna hasiissannosi. Rodiinke gillete xiinxallonni, huuccattotenninna wole ayyaanaamittete millimmonni ammanasi jawaachishiꞌra hasiissannositi egennantinote. Kayinni jawaata geeshsha ninke cincine kaaꞌla dihasiissannonke? Qoleno, hattee yannara banxeemmosita leellisha dihasiissannonke? Iillinonsa qarrinni kainohunni laaffinori kaffi assine laꞌneemmonsatanna banxeemmonsata affanno gede assate woꞌnaalleemmo?—2 Qor. 8:8.

¹⁹ Roduuwanke kaaꞌlineemmo wote, uyine calla afiꞌnanni hagiirre afiꞌneemmota deꞌinoonte. Qoleno, albinni roore manna mararreemmorenna cincineemmore ikkineemmo. Kayinni hakkiino saino atooti no. Songo gudisidhe baxillu woꞌminota ikkitanno. Qoleno, mitto mittonka mancho muxxe ikkino gede asse laꞌꞌannoha Yihowa lawishsha harunsineemmo; waanna qolte tenneeti. Ee, ‘laaffinore kaaꞌlineemmo gede’ assannonkehu lowo korkaati no.—Looso 20:35.