GAFA LAME
Yaaddo—“Duuchu Raginni Qohannori Iillannonke”
“Adhamme 25 diro keeshshinummohu gedensaanni galtenke diigantu. Hakkiinnino oosoꞌya halaalu mininni fultu. Qoleno addi addi dhibbi waadie. Kuni baalu gamba yee quwa saꞌino yaaddo amaddannoe gede assie. Iillinoe qarri wolqaꞌyara aleenni ikkinohu gede asse hedoomma daafira fuleemma furcho baala beebbue. Konninni kainohunni gambooshshe haꞌra agurumma; ayyaanaamittetennino daafurumma.”—Juuni.
YAACHISHANNO coyi manna baalaho wole agurina Maganu mannira nafa iillanno. Faarsaanchu ‘yaaddo batidhinosita’ coyiꞌrino. (Faarso 94:19) Yesuusino goofimarchu yannara ‘heeshshote hasiisannorira yaada’ Yihowara soqqama kabbaade ikkitanno gede assitannota coyiꞌrino. (Luqaasi 21:34) Aterana togoori iillinohe? Angate anjenni, hattono maatete woy fayyimmate qarrinni kainohunni duhu batiꞌrinohehu gede ikke macciishshamannohe? Yihowa togoo qarra dandaatto gede kaaꞌlannohehu hiittoonniiti?
“Mannu Wolqara Aleenni Ikkitino Wolqa”
Yaachishanno coye uminke wolqanni qeela didandiineemmo. Hawaariya Phaawuloosi ‘duuchu raginni qohannori iillannonke; . . . tultaambeemmo; . . . hattono yaaddo huxxite amaddinonke’ yiino. Ikkirono isi lede togo yiino: “Millo miliqqo dihoongeemmo,” “fulleemmo furcho dihoongeemmo,” hattono “dibaꞌneemmo.” Ikkina, kaajjine uurrineemmo gede kaaꞌlannonkeri maati? “Mannu wolqara aleenni ikkitino wolqa”, yaano duuchanka dandaanno Magani Yihowawiinni afiꞌneemmo wolqa kaaꞌlitannonke.—2 Qorontoosi 4:7-9.
Hanni konni albaanni “mannu wolqara aleenni ikkitino wolqa” kaaꞌlitinohe gara hedi. Yihowaha baꞌꞌannokki baxille albinni roore naadatto gede assitinohe lallawo qulli yitannohe? Uulla Gannate ikkitannota kultanno hexxo mannaho kulteenna Yihowa qaale eino coyira ammanakki lexxitino woti no? Kiristaanu gambooshshe haꞌrankenna ammananke wolootaho kulanke, iillannonke qarra dandiine kaajjine uurrineemmo gede assitannonke jawaante afiꞌneemmo gede kaaꞌlitannonke; hattono surrete salaame afiꞌne Yihowara hagiirrunni soqqammeemmo gede assitannonke.
“Yihowa Dancha Ikkinota Qamasse, Hattono Laꞌe”
Duuchu coyi duure amaddinohehu gede ikke macciishshamahera dandaannoti egennantinote. Lawishshaho, Yihowa heeshshonke giddo Mangistesi balaxisiinsammoranna ayyaanaamittete looso ganyine loonsammora hasiꞌranno. (Maatewoosi 6:33; Luqaasi 13:24) Kayinni dartu, ordu fayyimma hooga, woy maatete qarri wolqakki xuuxe gudannoha ikkara dandaanno. Woy loosatto loosi songote ledo sayisatto yannanna wolqa gudannoheha ikkara dandaanno. Assattori batiꞌre heeꞌreenna noohe yannanna wolqa kayinni shiima ikkituro, wolqakkira aleenni ikkino duha duqqoottohu gede ikke macciishshamahera dandaanno. Qoleno Yihowa wolqakkira aleenni ikkinore assattora hasiꞌrannoha lawahera dandaanno.
Yihowa heeshshonke gara afanno. Isi wolqankera aleenni ikkinore assinammora horo dihasiꞌranno. Qoleno isi duha ikke daafursinonke coyinni furgaꞌne galagalle wolqa afiꞌrate yanna hasiissannonketa afino.—Faarso 103:13, 14.
Lawishshaho hanni Yihowa masaalaanchosi Eeliyaasi towaatino gara hedi. Eeliyaasi lowo geeshsha hexxo mudhinonna waajjino daafira halalli gobba fule bai yannara Yihowa Eeliyaasi boroorinoni? Qoleno, uyinoonnisi loosira higanno gede hajajinosini? Deeꞌni. Yihowa lame hige sokkaancho soye Eeliyaasi sununni baqqi asse sagale itanno gede assino. Ikkollana, 40 barri gedensaannino Eeliyaasi yaadanna waajja diagurino. Yihowa iso kaaꞌlate lede maa assino? Umo, Yihowa iso agara dandaannota afanno gede assinosi. Hakkiinnino Yihowa Eeliyaasi “suutunni woy shiima huuronni” sheshifachishinosi. Jeefote Yihowa, ammaname iso magansiꞌrannohu lowo kume ikkanno manni noota huwatanno gede assinosi. Eeliyaasi bayichonko galagale diinaggaawe soqqama hanafino. (1 Negesti 19:1-19) Tenne xaggenni maa ronseemmo? Eeliyaasi yaaddo qeeltusi yannara Yihowa cincatenninna shaqqillunni amadinosi. Yihowa xaano disoorramino. Isi ninkeno hakko garinni towaatannonke.
Yihowara aatto coye hedatto wote, dandaattokkire assate kaꞌooti. Xa assa dandaattore bashsho assattori ledo heewisiissooti. Hanni mitto lawishsha laꞌno: Haammata agana woy diro rosiisiꞌra agure keeshshinohu mittu qolchansho qolchamanno manchi hakkawontenni kae biꞌreesi gede ikke doda didandaanno. Hatteentenni, biꞌreesi gede ikke dodate mixo fushshiꞌre shiima shiima geeshsha dodanni rosiisiꞌra hanafanno. Kiristaanuno qolchamanno manni gedeeti. Qolchamannohu mitte mixo wodanaho wodheeti. (1 Qorontoosi 9:24-27) Atino xa noohe dhukinni wonshiꞌra dandaattota mitte mixo mayira difushshiꞌratto? Lawishshaho, mitto songote gambooshshe haꞌrate mixo fushshiꞌra dandaatto. Tenne mixokki wonshiꞌrate kaaꞌlannohe gede Yihowa huucciꞌri. Galagalte ayyaanaamittete jawaante afiꞌratto wote, ‘Yihowa dancha ikkinota qamasse laꞌꞌatto.’ (Faarso 34:8) Yihowa baxattota leellishate assattohu aye coyino shiimare lawirono isi hakkoye lowo geeshsha naadannota deꞌooti.—Luqaasi 21:1-4.
Yihowa wolqankera aleenni ikkinore assinammora horonta dihasiꞌranno
“Hooge Heeꞌreemma Jawaante Afiꞌrumma”
Juuni Yihowawa higate jawaante afidhinohu hiittoonniiti? Ise togo yitino: “Yihowa kaaꞌlannoe gede huucciꞌranni keeshshoomma. Hakkiinnino beettiꞌya beetto ani heeꞌreemma katamira jawu gambooshshi noota kultue. Konne gambooshshe haꞌre mitto barra macciishshate kaumma. Galagale Yihowa manni ledo gamba yaaꞌya lowo geeshsha hagiirsiissinoe! Hakko gambooshshinni hooge heeꞌreemma jawaante afiꞌroomma. Xa galagale Yihowara hagiirrunni soqqamanni noomma. Qoleno heeshshoꞌya albinni roore alaamu noota ikkitino. Yihowa manniwiinni baxxe callaꞌya heeꞌra dandeemmakkita xa roore afoomma. Yanna gooffukkinni higoomma daafira Yihowa galaxxeemmasi.”