Mimmitu Ledo Heewisama Agurre Keeru Heeꞌranno Gede Assino

1. Heewo mannu maa assanno gede assitara dandiitanno?

XAA yannara batinyu manni umonsa calla baxanno daafira wolootu ledo heewisamanno. Mittu daddalaanchi woloota roorate yee insa gawajjannore assara dandaanno. Ispoortete heewo heewisantannori qeelate yite ledonsa heewisamannoha affanni heedhenni gawajjitara dandiitanno. Fonqolo fonqolamanno rosaanchi egennantino yuniversite eate yee fonqolo moorara dandaanno. Ninke Kiristaana ikkinoommo daafira kuni assooti gara ikkinokkita anfoommo; togoo assooti ‘maalu loosooti.’ (Gal. 5:19-21) Ikkollana mite Yihowa soqqamaano affukki nafa songote giddo heewo kaꞌanno gede assitara dandiitanno? Heewo roduuwu mittimma daaffara dandiitannohura tenne daafira heda hasiissannote.

2. Konni birxichira maa ronseemmo?

² Konni birxichira roduuwinke ledo heewisammeemmo gede assitankera dandiitannoti busha akatta hiikkuriitiro laꞌneemmo. Qoleno Qullaawu Maxaafi giddo kulloonnihu, heewote akatta giwinohu Yihowara ammaname soqqamino manni lawishsha laꞌneemmo. Hanni umo ninkeneeto layiꞌra dandiineemmohu hiittoonniitiro laꞌno.

ATENEETO LAYIꞌRI

3. Ninkeneeto mayine xaꞌma hasiissannonke?

³ Yannate kiiro ninkeneeto layiꞌra danchate. Ninkeneeto togo yine xaꞌma dandiineemmo: ‘Aneneeto wolootu ledo hewisiise insa rooroommoha lawiero hagiidheemmo? Songote giddo mito looso diinaggaawe looseemmohu baalanka roduuwa woy mito roduuwa roorateetinso Yihowa hagiirsiisateeti?’ Ninkeneeto kuri xaꞌmuwa xaꞌma hasiissannonkehu mayiraati? Hanni Maganu Qaali mayyaannoro laꞌno.

4. Galatiyu Sokka 6:3, 4 kultanno garinni ninkeneeto wolootu ledo heewisiisa hasiissannonkekkihu mayiraati?

⁴ Qullaawu Maxaafi ninkeneeto wolootu ledo heewisiinseemmokki gede amaalannonke. (Galatiyu Sokka 6:3, 4 nabbawi.) Mayira? Ninkeneeto wolootu ledo heewisiinseenna roorroommoha lawinkero naaxxinammora dandiineemmo. Qoleno ninkeneeto wolootu ledo heewisiinseenna wolootu roortinonkeha lawinkero hexxo mudhinammora dandiineemmo. Lamenti gara ikkitinokki hedooti. (Rom. 12:3) Giriikete heedhannoti Kateriinab yinanni rodoo togo yitino: “Alba aneneeto xumuullu, soqqanshote worbuulle ikkinorinna dancha jaalla noonsari ledo heewisiiseemma. Togo assaꞌya waagu dinooete yee hedeemma gede assitinoe.” Yihowa minisira abbinonkehu xumuulle, coyiꞌrate dandoo noonkere woy mannu baxannonkere ikkinoommohura ikkikkinni, iso baxatenna Beettosi macciishshate hasatto noonkehura ikkinota qaaga hasiissannonke.—Yoh. 6:44; 1 Qor. 1:26-31.

5. Roduu Hiyuni woꞌnaalshinni maa rosootto?

⁵ Ninkeneeto togo yineno xaꞌma dandiineemmo: ‘Wolootu keere kalaqeemmohu gede assite laꞌannoenso duucha woyite mannu ledo kanca yeemmo?’ Hanni Wodiidi Kooriyira heeꞌrannohu Hiyuni yinanni rodii woꞌnaalsha laꞌno. Alba isi songote giddo qoosso noonsare isi ledo hettisantannori gede asse laꞌꞌanno. Isi togo yiino: “Duucha woyite kuri roduuwi soꞌro xinqisiisiꞌreemmo hattono insa yitannorira sumuu diyeemmo.” Hakkiinni mayi ikkiyya? Isi lede, “Akatiꞌya songote giddo mittimma heedhannokki gede assino” yiino. Mite jaallasi Hiyuni soꞌrosi huwatanno gede kaaꞌlitinosi. Hiyuni akatasi biddi assiꞌre xa worba songote cimeessa ikke soqqamanni no. Songote giddo salaame heedhanno gede assantenni heewo kakkayisate akati noonketa anfummoro ranke biddi assiꞌra hasiissannonke.

HAAFA ADAWARSHANNA HINAASA QOROPHE

6. Galatiyu Sokka 5:26 kultanno garinni heewo kalaqantanno gede assitannoti busha akatta hiikkuriiti?

⁶ Galatiyu Sokka 5:26 nabbawi. Heewisammeemmo gede assitankera dandiitannoti busha akatta hiikkuriiti? Kuri giddo mittu haafa adawarshaati. Haafa adawadhanno manchi naaxxannohonna umosi calla baxannoho. Wolu bushu akati qole hinaasate. Hinaasanno manchi wolu manchira noosire afiꞌrate halchannoha calla ikkikkinni hakku manchi afiꞌrinore hooganno gede assa hasiꞌranno. Hinaasa manna gimbanni gede assitanno. Hadhote gede ikkitinota kuri busha akatta giwa hasiissannonke!

7. Haafu adawarshinna hinaasa gawajjitanno gara leellishanno lawishsha kuli.

⁷ Haafu adawarshinna hinaasa mine ittanno hoolo gedeeti. Minu aye geeshshano biifado lawiro gale hose toasi digattanno. Mittu manchino kuri akatta heedheennasinni Yihowara mite yanna geeshsha soqqamara dandaanno. Ikkollana haafa adhawadhannohanna hinaasannoha ikkiro uwasi digattanno. (Law. 16:18) Isi Yihowara soqqama aguranno hattono isonootono ikko woloota gawajjanno. Ikkina haafa adawarshanna hinaasa gargadha dandiineemmohu hiittoonniiti?

8. Haafa adawarsha gargadha dandiineemmohu hiittoonniiti?

⁸ Soqqamaasinchu Phaawuloosi Filiphisiyusi Kiristaana amaalino amaale harunsineemmoha ikkiro haafa adawarsha gargadha dandiineemmo; isi togo yiino: “Umoꞌne roorsidhine haafu adawarshinni mittore nafa assitinoonte. Hatteentenni wolu manni kiꞌnenni roorinohu gede assitine hedde.” (Fil. 2:3) Wolootu ninkenni roortinohu gede assine hendeemmoha ikkiro, ninketenni roortino dandoo woy ogimma noonsari ledo dihettisammeemmo. Hatteentenni togoo dandoo noonsa daafira hagiidhineemmo. Hakko iso dandoonsa Yihowara soqqamate horoonsidhanni nooha ikkiro roore hagiidhineemmo. Dandoo noonsa roduuwinkeno Phaawuloosi amaale harunsitannoha ikkiro, ninkera noonketa dancha akatta illachishshanno. Hatto ikkiro baalunku songote giddo keerunna mittimma heedhanno gede assineemmo.

9. Hinaasate akata gargadha dandiineemmohu hiittoonniiti?

⁹ Dhukanke anfoommoha yaano assa dandiineemmokkiri noota huwanteemmoha ikkiro hinaasate akata gargadha dandiineemmo. Dhukanke anfoommore ikkinummoro wolootunnitenni roortino dandoo noonketa mannaho leellishate disharrammeemmo. Hatteentenni ninketenni roortino dandoo noonsariwiinni rosate woꞌnaalleemmo. Lawishshaho hanni mittu rodii songote giddo lallawo dancha gede shiqishanno yine hendo. Isi lallawo qixxaawannohu hiittoonniitiro xaꞌma dandiineemmo. Mitte rodoo sagale coommishshe qishidhannoha ikkiro coomishidhinohu hiitto assiteetiro xaꞌma dandiineemmo. Mittu wedellichu rodii wolootu ledo jaalooꞌma qarra ikkitannosiha ikkiro, jaalla kalaqiꞌrate worba ikkino rodoo amaaꞌla dandaanno. Konni garinni hinaasa gargadhineemmo hattono dandoonke woyyeessiꞌneemmo.

QULLAAWU MAXAAFI GIDDO KULLOONNI MANNI LAWISHSHINNI ROSSE

10. Gedewoonira mayi fonqoli iillinosi?

¹⁰ Hanni Minaase gaꞌre wido ikkinohu Gedewooninna Efireemi gaꞌre wido ikkino manni mereero kalaqaminore laꞌno. Yihowa kaaꞌlonni Gedewooninna 300 mannisi lowo qeelle afidhino; tini qeelle woleteemmero naaxxitanno gede assitansara dandiitannote. Efireemi manni Gedewooniwa dayinohu iso galatate ikkikkinni isi ledo yekkeeramateeti. Insa, Gedewooni Maganu diinna qasi yannara ledosi olantanno gede woshshinonsakki daafira hanqitukki digattino. Insa gaꞌrensa ayirrinye calla heddino daafira roore hasiisanno coye yaano, Gedewooni Maganu suꞌmi ayirranno gede assinotanna Yihowa manna gatisinota deꞌino.—Eje. 8:1.

11. Gedewooni Efireemi manna hasaawisinohu hiittoonniiti?

¹¹ Gedewooni isonooto heeshshi asse Efireemi manna, “Ani assoommohunni kiꞌne assitinoonnihu dirooranno?” yiino. Hakkiinni isi Maganu maassiꞌrinonsata leellishanno lawishsha kulinonsa. Hatto yiita ‘hanqinsa qiidino.’ (Eje. 8:2, 3) Gedewooni isonooto heeshshi asse Maganu manni mereero noo keeri baꞌꞌannokki gede assino.

12. Efireemi manninna Gedewooni lawishshinni maa ronseemmo?

¹² Tenne xaggenni maa ronseemmo? Efireemi manni lawishshinni, uminkera ayirrinye hasiꞌrantenni Yihowa ayirranno gede assa hasiissannonketa ronseemmo. Maatete umo ikkitinorinna songote cimeeyye Gedewooni lawishshinni lowore rosa dandiitanno. Mittu manchi assinoommorinni koffi yiiro, hanqanno gede assinosiri maatiro heda hasiissannonke. Qoleno assinohu danchu coyira galantammosira dandiineemmo. Hakko iso soꞌrinohu hakko mancho ikkiro, tenne assate ninkeneeto heeshshi assa hasiissannonke. Uminke ayirrinyinni roore salaame roortannota dea dihasiissannonke.

13. Haannara mayi fonqoli iillinose? Ise konne fonqolo qeelte saꞌinohu hiittoonniiti?

¹³ Haanna lawishshano heda dandiineemmo. Ise Hilqaana yinanni Leewaawichira assidhino; isi lowo geeshsha baxannose. Ikkollana Hilqaanara Finaana yinanniti wole galte noosi. Hilqaana Haanna Finaananni roorse baxanno; ikkirono “Finaanara ooso noosena Haanna kayinni ila diafidhino.” Hakko daafira Finaana, “qussitanni caacceessituse.” Haanna hiitto ikkituyya? Ise lowo geeshsha fooggaltino! Ise wiꞌlitanni sagale nafa ‘ita hooggino.’ (1 Sam. 1:2, 6, 7) Ikkirono Haanna Finaana rabbisiꞌrate woꞌnaaltinota leellishannori dino. Ise giddoseta gudisse Yihowara kuꞌlitino hattono isi kaaꞌlannoseta addaxxitino. Finaana Haanna misha agurtino? Qullaawu Maxaafi tenne daafira kulannori dino. Kayinni Haanna wirro giddoyidi keere afidhinota anfoommo. “Hakkunni gedensaanni albisera dadillu dileellino.”—1 Sam. 1:10, 18.

14. Haanna lawishshinni maa ronseemmo?

¹⁴ Haanna lawishshinni maa ronseemmo? Mittu manchi ate ledo hettisamate woꞌnaaliro, atino isi gede hettisama hasiissannohe yaa ikkinokkita deꞌooti. Busha assinohehura busha assantenni, hakko manchi ledo noohe salaame baꞌannokki gede assate woꞌnaali. (Rom. 12:17-21) Isi giwiro nafa, giddiidi keerikki baikkinni heeꞌra dandaatto.

15. Aphiloosinna Phaawuloosi mitto assannonsari maati?

¹⁵ Hanni xa rosaanchu Aphiloosinna soqqamaasinchu Phaawuloosi lawishshinni maa ronseemmoro laꞌno. Insa lamunku Qullaawa Borro seekkite egentinoreeti. Lamunku egennantinoreetinna worba rosiisaanooti. Insa lowo manni rosaano ikkanno gede kaaꞌlitino. Ikkirono lamunku mimmito dihettissino.

16. Aphiloosi hiittoo manchooti?

¹⁶ Aphiloosi ilaminohu umi xibbi diro lowo roso ronsannihu ‘Alekisaanderiyu’ katamiraati. Isi seekke coyiꞌra egennino manchooti; hattono “qullaawa borro xunse afinoho.” (Soq. 18:24) Aphiloosi Qorontoosi noo yannara songote giddo noori mitu roduuwi Phaawuloosinna wolu roduuwinni iso roorsidhannota coyidhino. (1 Qor. 1:12, 13) Aphiloosi mannu hatto yee hedino daafira wolootunni roorinohu gede asse hedinoni? Hatto assino yine dihendeemmo. Isinni Aphiloosi Qorontoosi kataminni haꞌrihu gedensaanni Phaawuloosi isi wirro hakkira haꞌranno gede kulinosi. (1 Qor. 16:12) Phaawuloosi, Aphiloosi songote giddo babbadooshshe kalaqanni no yee hedoommero hatto diassanno. Aphiloosi dandoosi, dancha duduwo duduwatenna roduuwasi jawaachishate horoonsiꞌrino. Qoleno Aphiloosi isonooto heeshshi assannoha ikkinota leellishino. Lawishshaho Aqiilanna Phirisqilla “Maganu doogore isi afinohunni roorsite garunni kultusi” yannara koffi yiinota leellishannori dino.—Soq. 18:24-28.

17. Phaawuloosi salaame heedhanno gede assinohu hiittoonniiti?

¹⁷ Soqqamaasinchu Phaawuloosi Aphiloosi loosinoha dancha looso afino. Ikkirono isi rooranni nooe yee dihedino. Phaawuloosi Qorontoosi Kiristaana amaalino amaale, isonooto heeshshi assannoha, dhukasi afinohanna quwa saꞌꞌannokkiha ikkinota leellishshanno. Phaawuloosi, mannu “ani Phaawuloosiho” yiinositera naaxxantenni baalunku Yihowanna Yesuusi Kiristoosa illachishshanno gede jawaachishino.—1 Qor. 3:3-6.

18. Umi Qorontoosi 4:6, 7 yitanno garinni Aphiloosinna Phaawuloosi lawishshinni maa ronseemmo?

¹⁸ Aphiloosinna Phaawuloosi lawishshinni maa ronseemmo? Yihowara soqqamate lowore assinoommoha hattono lowo manni cuuamanno gede kaaꞌlinoommoha ikkara dandaanno. Ikkollana afiꞌneemmohu danchu gumi baalu Yihowa atoote ikkinota dideꞌneemmo. Aphiloosinna Phaawuloosi lawishshinni ronseemmohu wolu rosino no; songote giddo noonke qoosso lexxitu kiiro, salaame heedhanno gede albinni roore kaaꞌla dandiineemmo. Shoomantino labballi songote giddo keerunna mittimma heedhanno gede assate sharrantanna laꞌneemmo woyite lowo geeshsha hagiidhineemmo; insa Maganu Qaale horoonsidhe amaaltanno; hattono mannu insa ikkikkinni lawishshanke ikkinoha Yesuusi Kiristoosa illachishanno gede assitanno.—1 Qorontoosi 4:6, 7 nabbawi.

19. Ninke mittu mittunku maa assa dandiineemmo? (“Mimmitu Ledo Heewisama Qorophino” yitanno saaxineno lai.)

¹⁹ Ninke mittu mittunkura Maganu uyinonke dandoo woy ogimma noonke. Tenne dandoonke ‘mimmitinkera soqqamate’ horoonsiꞌra dandiineemmo. (1 Phe. 4:10) Assineemmori tidhinokkire lawankera dandaanno. Ikkollana mittu mittunku haqqichi gamba yee mine ikkannonte gede, assineemmohu shiimu coyi songote mittimma heedhanno gede kaaꞌlanno. Heewisamate akata gargadhate sharrammo. Baalunku songote giddo keerunna mittimma heedhanno gede assate dandiineemmore baala assino.—Efe. 4:3.