Qullaawu Maxaafi Teeda Baꞌino Misilla Daafira Mayyaanno? Saybersekse Soꞌrote?

Qullaawu Maxaafi mayyaanno?

Qullaawu Maxaafi teeda baꞌino misilla daafira, sayberseksete woy wole togoo coyibba daafira xaaddote dikulanno. Ikkollana, adhaminokki manni siimu xaadooshshe assanno gede woy mannu siimu xaadooshshe afimalsanno gede kakkayisanno assoote Maganu ma garinni laꞌꞌannoro Qullaawu Maxaafi xawise kulanno. Hanni mite Qullaawu Maxaafi qummeeshshuwa laꞌno:

• “Uullate aana noota tenne gobba yorto duucha shiiyye. Hakkurino foorrete, battaawate, maalu [yortooti], busha halchooti.” (Qolasiyaasi Sokka 3:5) Teeda baꞌino misilla laꞌꞌa busha yorto shaantenni, roore lexxitanno gede assitanno. Laꞌꞌanno manchino Maganu albaanni battaawinoha woy xurinoha ikkanno gede assitanno.

• “Meyata lae yorinoha baala wodanisinni ise ledo foorinohu gede assine kiirranni.” (Maatewoosi 5:28) Amanyoote bainoha siimu xaadooshshe leellishshanno misilla, wodanu giddo busha yorto kalaqantanno gede assitanno; busha yorto qolte bushare assate widira massitanno.

• “Foorre woy saalimale ikkito woy busha yortoha ikka agurina, mereeroꞌne togoohu duduwu nafa horonta heeꞌroonke.” (Efesooni Sokka 5:3) Amanyoote bainore leellishshanno misilla laꞌneemmota woy togoo borro nabbambeemmota agurina, haariimote yine togoore coyiꞌra nafa dihasiissannonke.

• “Maalu loosi egennammoho; hakkuno: Foorrete, battete, . . . woluno kore lawannoho. Balaxe kulummoꞌnente gede xaano lede yeemmoꞌnena, hattoo coye assitannori Maganu gashshoote diragidhanno.” (Galatiyu Sokka 5:19-21) Teeda baꞌino misilla laꞌannori woy saybersekse, foonisekse, woy sekistinge horoonsidhannori Maganu albaanni battaabbinoreeti. Togoo rosichi noosi manchira Maganu ledo noosi jaaloomi woꞌmunni woꞌma baꞌꞌasira dandaanno.