Kiristaanu Heeshshonna Soqqanshote Xiinxallote Maxaafichora Qummi Assinoonni Borro—Onkoleessa 2021
ONKOLEESSA 3-9
MAGANU QAALI GIDDO NOOTA MUXXE JIRO | KIIRO 27-29
“Yihowa Gede Mallaaddinannikkire Ikke”
w13 6/15 10 guf. 14
Yihowa Akatta Seekkitine Egenne
14 Onte roduuwi Musewa mare, “‘Anninke . . . labbaa beetto hoongo daafira calla suꞌmisi gaꞌresi giddonni baꞌꞌanno? Ayiddinke ledo ninkerano iqqa uuyyenke’ yee xaꞌmiꞌri.” Muse ‘Tenne daafira kulanno seeri dino’ yee giwinonsani? Digiwino; isi “coyensa haaꞌre Kaaliiqiwa shiqishi[no].” (Kir. 27:2-5) Yihowa mayyee qoliyya? Isi Musera togo yiino: “Selofihaadi seenni xaꞌmiꞌrino xaꞌmo garaho, ayiddinsa ledo iqqa adha hasiissannonsana anninsa qeecha iillishinsa.” Yihowa hakkiinnino sainore assino. Isi wole woyite togoori kalaqamanno woyitira, Musera togo yee biddishsha uyinosi: “Mittu manchi labbaaha ilikkinni reyiro, meya beettosi ragidhona.” (Kir. 27:6-8; Iya. 17:1-6) Hatte yannanni kayise Israeelete meentira togoo coyi iillannonsa woyite hajonsa konni seeri garinni tirranni.
w13 6/15 11 guf. 15
Yihowa Akatta Seekkitine Egenne
15 Tini Yihowa shaqqadonna mallaadannokkiha ikkinota leellishshannote. Yihowa kuri qarraataammu meentira assinori, wolu dancha heeshsho heeꞌrannohu Israeelete mannira assinanniri ledo taaloho. (Far. 68:5) Yihowa baalanta soqqamaanosi taashshe laꞌꞌannota leellishshannote Qullaawu Maxaafi giddo noote duucha xagge giddo tini mittetella.—1 Sam. 16:1-13; Soq. 10:30-35, 44-48.
w13 6/15 11 guf. 16
Yihowa Akatta Seekkitine Egenne
16 Yihowa gede mallaandeemmokkire ikka dandiineemmohu hiittoonniiti? Mallaandeemmokkire ikkate lamu coyi hasiisannota qaango. Baalanka manna taashshine laꞌꞌa dandiineemmohu giddonkenni mallaandeemmokkire ikkinummoro callaati. Ninke baalunku baalanka manna taashshine laꞌneemmohunna mallaandeemmokkihu gede assine hendammora dandiineemmo. Ikkirono ninkeneeto layiꞌra duucha woyite shota ikka hooggankera dandiitannoti egennantinote. Ikkina mannu ninke daafira mayyee hedannoro afa dandiineemmohu hiittoonniiti? Yesuusi mannu isi ayimma daafira mayyee hedannoro afa hasiꞌrino daafira, ammananno jaallasi “Mannu Manchi Beetto ayeti yaanno?” yee xaꞌminonsa. (Mat. 16:13, 14) Atino Yesuusi lawishsha harunsi. Ammanatto jaallakki manna mallaadattoronna teꞌee maaxxukkinni kultannohe gede xaꞌma dandaatto. Mannu gaꞌre, ayimmansa woy jironsa laꞌe mallaadattokkiha ikkoottota kulate shiima geya huluullantannoha ikkiro maa assa hasiissannohe? Yihowa gede woꞌmunni woꞌma mallaadattokkiha ikkate akatakki biddi assiꞌrattora kaaꞌlannohe gede, giddokkita kulte, eeggifatte Yihowa huucciꞌri.—Mat. 7:7; Qol. 3:10, 11.
Maganu Qaalinni Ronseemmore
it-2 528 guf. 5
Fushshaate
Agattote fushshaate. Agattote fushshaate shiqinshannihu wolu lowo fushshaati ledooti; roorenkanni hatto assitannohu Israeele Hexxote Gobba eꞌuhu gedensaanniiti. (Ki 15:2, 5, 8-10) Kuni fushshaati woyinete (‘dimbissanno agattooti’); hattono konne fushshaate kakkalote darga dunnanni. (Ki 28:7, 14; Fu 30:9 tenna Ki 15:10 ledo heewisiisi.) Soqqamaasinchu Phaawuloosi Filiphisiyusi heeꞌranno Kiristaanira togo yee borreessino: “Ammanaꞌne kakkayisseennaꞌne shiqishshinannite qullaawa soqqanshora aanaho agattote fushshaati gede ikke duꞌnamoommoro tashshi yaannoe; qoleno kiꞌne baalunku ledo hagiidheemmo.” Isi agattote fushshaate lawishsha asse horoonsiꞌrinohu ammanate roduuwisira yee heeshshosi sayise aate maahoyye yaannoha ikkinota kulateeti. (Fil 2:17, NW) Isi reyara shiima yannara albaanni Ximootewoosira togo yee borreessino: “Ani kayinni agattote fushshaati gede duꞌnamanni noommo; qoleno keere fuleemmo yanna iillitino.”—2Xi 4:6, NW.
w07 4/1 17-18
Magano Hagiirsiissanno Kakkalo Shiqisha
ZE MAYITII Azitiksi yinanni maxaafi togo yaanno: “Meesoameerikaho heedhinoti lowo manna kakkalo assite shiqishshannoti Azitiksi daga ‘Heeshsho dagginohu reyotenniiti’ yite ammantanno. Insa gashshootinsa halaꞌlanni haꞌrita roore kaajjate yite lowo manna kakkaltino.” Wole borro kultanno garinni kuri daga diru kiiro 20,000 ikkanno manna kakkaltanno.
Hundi yannanni kayisse mannu ooso waajjitenna huluullante hattono insaneeto bushiishshenna gaabbite magannansara addi addi kakkalo kakkaltanni keeshshitino. Qullaawu Maxaafi kayinni, Woꞌmanka Dandaanno Magani Yihowa mite kakkalo kakkallanni gede hajajinota kulanno. Hakko daafira togo yine xaꞌma hasiissannote: Magano hagiirsiissannoti hiittoo kakkalooti? Xaa yannara Magano magansiꞌrate fushshaatenna kakkalo shiqisha hasiissannonke?
Yihowa Magansiꞌrate Shiqinshanni Fushshaatenna Kakkalo
Yihowa Israeelete daga xinti woyite, mannisi iso magansiꞌrannohu hiittoonniitiro kulinonsa; kuri giddo mittu fushshaatenna kakkalo shiqishate daafira kulanno biddishshaati. (Kiiro fooliishsho 28 nna 29) Fushshaatu giddo mitu baatto laashshitinoreeti; wolu kayinni saadate kakkalooti lawishshaho, booto, geꞌreewo, meꞌꞌe, lemboolanna bukukkaama kakkalo assine shiqinshanni. (Leewaawoota 1:3, 5, 10, 14; 23:10-18; Kiiro 15:1-7; 28:7) Woꞌmunni woꞌma giiratenni shilqinshe shiqinshanni kakkalono no. (Fulo 29:38-42) Mittimmate kakkalono shiqinshanni; tenne kakkalo shiqishanno manni Maganoho shiqishihu gedensaanni tenne kakkalo itanno.—Leewaawoota 19:5-8.
Muse seeri garinni Israeelete daga Maganoho fushshaatenna kakkalo shiqishshannohu iso magansiꞌrateetinna kalqe alamera Aliidiha ikkinota ammantannota leellishateeti. Israeelete daga Yihowawiinni afidhanno atootira, agarooshshiranna maarora iso galatate togoo kakkalo shiqishshanno. Insa ammanante Yihowa hasiꞌranno garinni magansidhannosi woyite lowo atoote afidhanno.—Lawishsha 3:9, 10.
Yihowa roorse illachishannohu kakkalo shiqishanno mannira noonsa laooti. Yihowa masaalaanchisi Hosei widoonni togo yiino: “Ani kakkalotenni roorse baxille hasiꞌreemmo; shilqinshanni kakkalonni roorse mannu Magano afannota doodheemmo.” (Hoosei 6:6) Hakko daafira mannu halaalu magansiꞌrara badhe wodhe maaeelare assanninna lubbo shaanni heeꞌre shiqishanno kakkalo waaga diafidhanno. Yihowa Isayaasi widoonni Israeelete togo yee kulinohu iseraati: “Kakkaloꞌne batinyi anera maꞌꞌassannoe? Xaa geeshsha shiqishshinoonniehu geꞌrechu goci, shilqote kakkalonna misino booti coomi ceeꞌmishshinoe. Woraamu, geꞌreewunna meu gocca mundee dihagiirsiissinoe.”—Isayaasi 1:11.
ONKOLEESSA 10-16
MAGANU QAALI GIDDO NOOTA MUXXE JIRO | KIIRO 30-31
“Xanoꞌne Wonshe”
it-2 1162
Xano
Meessi Fajjonni Assinannire Kayinni Afoo Fullihu Gedensaanni Assinikki Agurrannikkire. Xano woꞌmunni woꞌma meessi fajjonni assinannireeti. Ikkirono Maganu seeri mittu manchi xano xaꞌnihu gedensaanni wonsha hasiissannosita kulanno. Hakko daafira xano xaꞌnate afoo fulino manchi, xaꞌninore wonsha hoogiro heeshshosi hoogara dandaanno. (Ki 30:2; Ro 1:31, 32 no lai.) Qullaawa Borro mittu manchi xano xaꞌnara albaanni qorophe heda hasiissannosita kultannohu iseraati. Maganu Seeri togo yaanno: “Maganiꞌne Kaaliiqira xano xaꞌnitiniro, Kaaliiqi xaꞌnitinoonni xano wonshitinara hasiꞌrannona, sao ikkannoꞌnekki gede rakkine uuyye. Xaꞌna hoogginiro kayinni sao diꞌꞌikkannoꞌne.”—Mar 23:21, 22.
Eootto Qaale Wonshi
2 Qullaawu Maxaafi xano xaꞌna Maganoho qaale ea ikkitinota kulanno. Mittu manchi mitore assate, aate, soqqamate woy mitto coye assa giwate qaale ea dandaanno. Qaale eꞌnannihu banxeeti. Ikkollana, eꞌnoonni qaali shotinse laꞌnannire diꞌꞌikkino; Maganu eꞌnoonni qaale, mitto coye assate woy assa hoogate xaꞌninoonni xano gede asse laꞌꞌanno daafira, afoo fulloonnire wonshinara hasiꞌranno. (Kal. 14:22, 23; Ibi. 6:16, 17) Qullaawa Borro Maganoho eꞌnoonni qaali shotinse laꞌnanniha ikkinokkita xawissannohu hiittoonniiti?
w04 8/1 27 guf. 3
Kiirote Maxaafita Qara Qara Hedo
30:6-8—Kiristaancho ikkino minaanni minaamasi xaꞌnitino xano hoolara dandaanno? Yihowa xaa yannara mittu mittunku soqqamaanchisi umosi dandee xaꞌnara hasiꞌranno. Lawishshaho mittu manchi isonooto Yihowara sayise aate xaꞌnannohu umisinniiti. (Galatiyu Sokka 6:5) Mittu minaanni minaamasi togoo xano xaꞌnitannokki gede assa woy xaꞌnitino xano hoola didandaanno. Ikkollana minaama Maganu Qaali woy minaannise silxaane ledo sumuu yitannokki xano xaꞌna dihasiissannose.
Maganu Qaalinni Ronseemmore
it-2 28 guf. 1
Yofitahe
Mitto mancho qullaawa mine Yihowara calla soqqamanno gede uyinara dandiinanni. Hatto assa annunna amate qoossooti. Lawishshaho Haanna qaaqqise Saamueeli ilamara albaanni xaadooshshu dunkaanira soqqamanno gede Maganoho oyemma yite xaꞌnitino. Minaannise Hilqaanano tennera sumuu yiino. Saamueeli unuuna qana aguranni heeꞌreennanni Haanna iso xaadooshshu dunkaanira soqqamanno gede uyitino. Ise Saamueeli haadhe hadhu woyite kakkaltanno saadano haadhe hadhino. (1Sa 1:11, 22-28; 2:11) Samisonino Maganoho Naaziricha ikke soqqamanno gede uyinoonni.—Ej 13:2-5, 11-14; annu meya beettosira noosi silxaane leellishshannota Ki 30:3-5, 16 lai.
ONKOLEESSA 17-23
MAGANU QAALI GIDDO NOOTA MUXXE JIRO | KIIRO 32-33
“Hakkiicho Noo Manna Baala Shorritine Hunne”
w10 8/1 23
Ati Tenne Afootto?
Ibiraawootu Afiite Qullaawa Borro giddo duucha hinge kulloonni “tulluwa” maati?
Israeele Hexxote Gobba eꞌara rakke heedheenna Yihowa hakko qooxeessira heeꞌrannohu Kanaꞌꞌaani manni magansiꞌrate horoonsiꞌranno base baala huntanno gede kulinonsa. Maganu togo yee hajajinonsa: “Boncenna daashshine seekkinoonnita kaphu maganna baalanta gudde; magansiꞌnanni tulluwa baala diigge.” (Kiiro 33:52) Togooti kaphu maganna magansiꞌnanni base, ilaalu sammora nooha fano bayicho woy haqqete hundanna katamu giddo seekkinoonni base ikkitara dandiitanno. (1 Mootoolla 14:23; 2 Mootoolla 17:29; Hiziqeeli 6:3) Togoo basera kakkallanni bayichi, magansiꞌnanni sooddiyyenna mokkollo, misilla, hixaana giirranni basenna woluri togoori heeꞌranno.
w08 2/15 27 guf. 5-6
Israeele Loossino Soꞌronni Rosse
Xaa yannara Israeelete iillino gedeehu batinyu fonqoli iillannonke. Yannankerano mannaho kaphu maganna ikkannonsari no. Kuri giddo mitu woxe, boohaarshunninna ispoortetenni maccare ikkitinore, poletiku gashshoote, ammaꞌnote murroota wole agurina maatete miilla nafa ikkitara dandiitanno. Kuri heeshshonke giddo qara coyibba ikkitara dandiitanno. Yihowa baxxannokkiri ledo jaalooꞌma ayyaanaamittenke gawajjitara dandiitanno.
Mannu Baꞌꞌaali magansiꞌranno woyite siimu xaadooshshinni akkimalanno; tini Israeele doogantannonna sodhanno gede assitino. Xaa yannarano mitu Kiristaani togoo woshshaadonni amadamanno. Lawishshaho mittu manchi callisi noo woyite mitore afate quqquxame qorophikkinni kompiyuteresi calla qaqqase tiiasi xursiisannore assara dandaanno. Mittu manchi Interneetete aana teeda baꞌino misilla lae togoo woshshaadonni amadamasi lowo geya dadillissannote!
it-1 404 guf. 2
Kanaꞌꞌaani
Iyyaasu Kanaꞌꞌaani manna huni woyite, Yihowa ‘Muse hajajino garinni, baalanka coye assino; mittorichono digatisino.’ (Iy 11:15) Israeele kayinni isi faale dihadhino hattono gobba batteessannore gudisse dihuntino. Kanaꞌꞌaani manni Israeelete ledo heeꞌransa Israeele gawajjitino; insa hajanjoonninsa garinni Kanaꞌꞌaani manna gudisse huna hoogansa, huntanno gede hajanjoonninsahu Kanaꞌꞌaani manninni roorinohu Israeelete manni reyanno gede (jaddo, foorrenna kaphu maganna batidhanno gede assitinota agurranna) assitinoti dihuluullissannote. (Ki 33:55, 56; Ej 2:1-3, 11-23; Fa 106:34-43) Yihowa Israeelete dagara yoosi taalo ikkitinota kule qorowisiisinonsa; hattono Kanaꞌꞌaani manniwa aanturo, insa ledo adhanturo, ammaꞌnonsanna budensa harunsituro uminsara bao abbidhannotanna Kanaꞌꞌaani manni gede ‘baatto tuffannonsata’ kulinonsa.—Fu 23:32, 33; 34:12-17; Le 18:26-30; Mar 7:2-5, 25, 26.
Maganu Qaalinni Ronseemmore
it-1 359 guf. 2
Danna
Mitte gaꞌre iqqansa adhitannohu hiikkaanniitiro hixunni murrihu gedensaanni, layinki seerinni yaano mitte gaꞌre batinye laꞌne mageeshshi baatto adha hasiissannonsaro murranni. Qullaawu Maxaafi togo yaanno: “Baatto gaꞌre gaꞌrentenni hixunni beeqqitine adhe. Kiiro haammattinorira halaꞌlishshine, kiiro ajjannorira kayinni ajishshine uuyye.” (Ki 33:54) Mitte gaꞌre iqqa adhitanno raga murrannihu hixunni ikkirono, adhituhu gedensaanni mito coye biddi assinara dandiinanni. Lawishshaho Yihudu gaꞌrera uyinoonni iqqi lowo geeshsha batiꞌrino daafira gama haaꞌne Simiooni gaꞌrera uyinoonni.—Iy 19:9.
w09 10/1 30, saaxine
Maganu Kaaꞌlonni Qeelloonni Ola
Kiristinnu xintamara lowo diri albaanni, Maganu doodhinoti Israeelete daga olanto gamba assidhe olaho fultanno gede kulloonninsa woyiti no. Israeele Maganu Abirihaamira qaale einota Kanaꞌꞌaani gobba eꞌara albaanni togo yinoonninsa: “Maganiꞌne Kaaliiqi angaꞌnera sayise aannoꞌne yannaranna kiꞌneno insa qeeltinanni yannara, baalanka coꞌo assitine hunne. Insa ledo namoontinoonte; marartinoontensa.” (Marro 7:1, 2) “Israeelete Magani Kaaliiqi uyino hajajo” garinni Israeelete massagaanchi Iyyaasu diinnansa qeelino.—Iyyaasu 10:40.
Kuni oli Israeele wole gobba manna horrate woy mulqiꞌrate yite olantino olaatini? Deeꞌni. Hatti daga kaphu maganna magansidhannoreeti, lubbo shitannoreetinna foortannoreeti. Insa qaaqquulle nafa giiratenni kakkaltanno. (Kiiro 33:52; Ermiyaasi 7:31) Maganu qullaawa, taashshannohanna mannasi baxannoha ikkino daafira uullate aaninni batte baala hunino. Ikkollana Yihowa mittu mittunku manchi wodana laino daafira, bunshete doogonsa agurte iso magansiꞌra hasidhannore gatisinonsa; xaa yannara togo assa dandaannohu olantote hajajaanchi dino.
ONKOLEESSA 24-30
MAGANU QAALI GIDDO NOOTA MUXXE JIRO | KIIRO 34-36
“Yihowa Goloꞌne Assidhe”
Yihowa Goloꞌne Assidhinoonni?
4 Israeele mittu manchi afikki mannu lubbo shiiro maa assitanno? Hakku manchi lubbo shiinohu afikki ikkirono, beebbaataame lubbo shiino daafira xaꞌmamasi digattanno. (Kal. 9:5) Ikkirono, kuni manchi rabbisirannohu shaannosikki gede lee eeggote katamma giddo mittenniwa xooqa dandaanno. Hakkiicho isi agarooshshe afiꞌranno. Afikkinni mannu lubbo shiino manchi, kakkalaanote biili reya geeshsha eeggote katamira keeshsha hasiissannosi.—Kir. 35:15, 28.
Yihowa Goloꞌne Assidhinoonni?
6 Mittu manchi hedeweelcho mannu lubbo shiiro, eeggote katamiwa mare “katama eꞌnanni waalchira nooriwa yoo yitanno geerriwa shiqe ikkino coye baala kuꞌla” hasiissannosi. Geerru iso anga fante haadhanno. (Iya. 20:4) Shiima yanna gedensaanni, hakkonne mancho lubbo shii katamira noo geerriwa sonkanni; hakkiinni insa yoo yitanno. (Kiiro 35:24, 25 nabbawi.) Kuni manchi eeggote katama higannohu, geerru isi lubbo shiinohu hedeweelcho ikkinota buuxxu gedensaanni callaati.
Yihowa Goloꞌne Assidhinoonni?
13 Eeggote katama eino manchi, hakkiicho salaametenni heeꞌra dandaanno. Yihowa eeggote katamma daafira coyiꞌranni kuri katamma ‘xooqqine gattinanniwa’ ikkitannoꞌne yiino. (Iya. 20:2, 3) Yihowa hedeweelcho mannu lubbo shiino manchi tenne soꞌrora wirro xaꞌmamara dihasiꞌranno; qoleno rabbisiꞌranno manchi eeggote katama eꞌꞌe hakkonne mancho shaara difajjinannisi. Konni daafira, xooqe eeggote katama eino manchi rabbisiꞌnannie yee diwaajjanno. Isi konni katamira heeꞌri geeshsha Yihowa agarooshshe afiꞌre beꞌe yiikki heeꞌra dandaanno. Eeggote katami usuru mine diꞌꞌikkino. Kuni manchi katamu giddo looso loosa, woloota kaaꞌlanna salaametenni Yihowara soqqama dandaanno. Ee, isi hagiirru noo heeshsho heeꞌra dandaanno!
Maganu Qaalinni Ronseemmore
w91 2/15 13 guf. 13
Baalunku Mannira Qixxaabbino Wodo
13 Ikkollana Addaamino Heewanino wodotenni hoꞌro diafiꞌranno. Muse Seerira togo yaannohu xintu seeri no: “Reya hasiissannosi manchiwiinni guma ittinoonte; horonta reyona.” (Kiiro 35:31) Addaami dogaminokki daafira cubbo loosinohu afanni heeꞌrenniiti. (1 Ximootewoosi 2:14) Addaami sirchi isiwiinni cubbo ragiꞌre reyannoha ikkino daafira isi sirchosi baala shiinohu gede assine kiirranni. Addaami guuta mancho ikke heeꞌrenni, Maganoho finqila doodhino daafira reyo hasiissannosi. Yihowa Addaami wodotenni horo afiꞌranno gede assoommero, tini keeraancho ikkinohu xintu seerisi ledo sumuu diyitannote. Ikkollana Maganu Addaami loosino cubbira waaga baate, Addaami sircho reyotenni gatisino! (Roomu Sokka 5:16) Wole yaattonni cubbu afiꞌrinota shaate wolqa rumushshunku buqqise hunino. Wodo ikkinohu Yesuusi, Addaami ooso baalante cubbira yee reyino.—Ibiraawoota 2:9; 2 Qorontoosi 5:21; 1 Pheexiroosi 2:24.
ONKOLEESSA 31–ELLA 6
MAGANU QAALI GIDDO NOOTA MUXXE JIRO | MARRO 1-2
“Yoo Maganunnite”
w96 3/15 23 guf. 1
Yihowa Keeraanchimmanna Taashsho Baxanno Maganooti
Songote cimeeyye shota ikkinokki cubbo loosinohura yoo yaate qeechi noonsa. (1 Qorontoosi 5:12, 13) Insa togo assitanno woyite, Maganu taashsho maarono noota ikkitinota dideꞌanno. Cubbo loosinohu maaro ea hoogiro, iso gatona yinannisi gede assannori diheeꞌranno. Ikkirono cimeeyye togoo manna songotenni bokkannohu rabbisiꞌrate yite diꞌꞌikkino. Insa tini qixxaawo cubbo loosino manchi soꞌrosi huwatanno gede assitannosi yite hexxitanno. (Hiziqeeli 18:23 ledo heewisiisi.) Songote cimeeyye Kiristoosi biddishsha harunsite, taalo ikkinore assitanno; insa “mannu bubbetenna wishotenni goꞌlannowa” ikkate sharrantanno. (Isayaasi 32:1, 2) Hakko daafira insa mallaaddannokkire ikkanna coye heeshshi gotti assite heda hasiissannonsa.—Marro 1:16, 17.
w02 8/1 9 guf. 4
Maganu Silxaanera Maahoyye Yitine Galle
4 Yoo yaate seera afa calla diꞌꞌikkitanno. Israeelete geerri guunte noonsakkire ikkitino daafira, taalo yoo yitannokki gede assara dandaannore, lawishshaho umonsa calla baxate akata, mallaadanna hafuurre qoropha hasiissannonsa. Muse togo yee kulinonsa: “Yoo dawissinoonte; lowohano shiimano taashshitine laꞌe. Yoo Magannunnita ikkitinohura ayeno waajjitinoonte.” Ee, Israeelete daanyooti yoo yitannohu Magano riqibbeeti. Tini lowo geeshsha ayirrado qoossooti!—Marro 1:16, 17.
Maganu Qaalinni Ronseemmore
w13 9/15 9 guf. 9
Yihowa Qaagiishshi Addaxxinanniho
9 Israeele 40 diro “waajjishshannota halallitte gobba” tayisse saꞌe haꞌrate fultu woyite, Yihowa hiittoonni massagannonsaro, agarannonsaronna towaatannonsaro mitto mittonka coye balaxe dikulinonsa. Ikkirono isonna biddishshasi addaxxitanno gede assannonsare duucha hige leellishinonsa. Barra gomichu heelliichonni hashsha kayinni giirate heelliichonni massage injaannokki halalla tayisse saꞌanno gede asse ledonsa noota qaagganno gede assinonsa. (Mar. 1:19; Ful. 40:36-38) Qoleno isi hasiisannonsare uyinonsa. “Uddanonsano digooffino; lekkansano didarshitino.” Isi ‘hasiisannonsare baalare qixxeessinonsa.’—Neh. 9:19-21.
w13 8/15 11 guf. 7
Yihowa Horonta ‘Abbooshshidhinoonte’
7 Wolootu coyidhannohu gara ikkinokki coyi guficho ikkankera dandaanno. (Marro 1:26-28 nabbawi.) Israeele Gibitsete borojjimmanni fultunku dikeeshshitino. Yihowa gadadissinonsa dagara maalaletenni tonne qoomama abbino hattono Feriooninna olantosi Duumu Baari giddo hunino. (Ful. 12:29-32, 51; 14:29-31; Far. 136:15) Maganu manni Hexxote Gobba eara rahe no. Kayinni hattee baxxitino yannara Israeele Yihowara gunguma hanaffu. Insa ammana hoogganno gede assinonsari maati? Gobba qottara sonkoonniri giddo gamu gara ikkinokkire coyidhe wodaninsa daaqanno gede assitino daafiraati. (Kir. 14:1-4) Hakkiinni mayi ikkiyya? Hatti ilama woꞌma “dancha gobba” eꞌannota hoolloonni. (Mar. 1:34, 35) Mito woyite wolootu coyidhannohu gara ikkinokki coyi ammananke hunara woy Yihowara gungummeemmo gede assankera wodha hasiissannonkeni?
Xiinxallote kaaꞌlitanno borro Mt 24:8
Ilate game: Koye tenne yaatto horoonsiꞌnoonnihu, yaaddo, xissonna mitiimma xawisate ikkirono, Maatewoosi 24:21te kulloonnihu bayiru qarri hanafara albaanni ilate gamaaꞌmitanno mancho gede qarrunna shetto yannate kiiro lexxitanni hadhannota leellishshannota ikkitara dandiitanno.
od 176 guf. 15-17
Yihowa Dirijjitewa Gamba Yitine Heedhe
15 Gashshaasine loosonke agawansa, olu, poletiku soorramanna dartu Magano faajjetenni magansiꞌneemmokki gede assara dandaanno. Songote deerrinni gamba yaa qarra ikkitankera dandiitanno. Sinu biiro ledono xaada qarra ikkitara dandiitanno. Woradu aliidi laꞌꞌaanchi towaanyono gattara dandiitanno. Borrono afiꞌra hoongammora dandiineemmo. Kuri baalu coyi ikkiro ma assa hasiissannohe?
16 Togoo woyite assa dandaattore baala assi. Hojju xiinxallo assiꞌra dandaatto. Duucha woyite roduuwu mine gaamo gaamo ikkine gambooshshe assiꞌra dandiineemmo. Konni albaanni xiinxallinoommo borronna Qullaawa Maxaafa gambooshshunniwa xiinxalla dandiineemmo. Togoo woyite yaada woy masa dihasiissannohe. Xaphoomunni, Aliidi Bisi harancho yanna giddo shoomantino roduuwi ledo xaandanni faro heedhanno gede assanno.
17 Ammanate roduuwikki baaluwiinni baxxittoro nafa, Yihowanna Beettisi Yesuusi Kiristoosiwiinni baxxoottokkita deꞌooti. Hexxokki baꞌukki heeꞌra dandaatto. Yihowa xaano ikkiro huuccattokki macciishshanno hattono ayyaanisinni jawaachishannohe. Isi biddishsha hasiꞌri. Yihowa soqqamaanchonna Yesuusi Kiristoosi rosaancho ikkoottota qaagi. Hakko daafira afiꞌritto faro baalate farciꞌri. Yihowa assattore maassiꞌrannohe; hattono wolootu mulenni Yihowa magansidhannore ikkitara dandiitanno.—Soq. 4:13-31; 5:27-42; Fil. 1:27-30; 4:6, 7; 2 Xim. 4:16-18.
g17.5 4, 6
Dano Kalaqantanno Woyite Heeshsho Gatisate Assa Dandaattore
BALAXXE QIXXAAWI!
DANO kalaqantannokki gede assiꞌra dandaannohu dino. Togoo woyite gatate qaru coyi balanxe qixxaawate. Ikkina qixxaawate ma assa dandiinanni?
• Dano kalaqantara dandiitannota hende agara. Dano kalaqantara hattono atenna maatekki woy jaallakki gawajjitara dandiitannota afi. Dano kalaqantu gedensaanni qixxaawa beebbate daafurooti.
• Ate qooxeessira kalaqantara dandiitanno dano hedi. Xoonqe maaxama dandiinannihu hiikkootiro afi. Mine miꞌnootto garinna miꞌnootto qooxeessi dancha ikkasinna teꞌee buuxi. Giira kaꞌanno gede assara dandaannore hooli. Mini giddo mitiri giirame wiliiliro afate kaaꞌlanno uduunnicho wodhi; hattono kuni uduunnichi loosanno gede assanno kincho ajayi ajeenna diruyi mitte higgine soorri.
• Dano kalaqantanno woyitira hasiisannore qixxeessiꞌri. Dano kalaqantanno woyite korreente, wayi, silkenna hodhishshu hoogara dandaanno. Makeenu nooheha ikkiro nadaaje lowo geya xeꞌannokki gede assiꞌri; hattono woꞌmanka woyite togoo woyitira ikkitanno sagale, waanna hasiisannoha wole coye qixxeessite wodhi.—“Dano Kalaqantanno Woyitira Hasiisannore Qixxeessiꞌrootto?” yitanno saaxine lai.
• Mulekkino ikko xeertote heedhanno jaallakkiti silkensa kiiro heedhannohe gede assiꞌri.
• Dano kalaqantanno woyite xoonqe fula dandiinanni gara rosiisiꞌri. Heeꞌratto mini giddo rahe fulate kaaꞌlitanno furcho noohu hiikkaanniitiro afi; hattono oosokki rosu mine heedheenna dano kalaqanturo maa assitannoro hasaabbe. Dano kalaqantanno woyite maatekki ledo mama xaaddinanniro hasaabbe. Xaaddinanni bayichi mittu mule nooha wolu kayinni xeertiꞌre nooha ikkara dandaanno; lawishshaho rosu mine, woy maxaaffate mine xaaddinanni gede hasaawa dandiitinanni. Egennaammu, maateꞌne ledo xaadate heddinoonni bayicho lekkatenni hadhinanni rosiisiꞌra dancha ikkitinota coyidhanno.
• Woloota kaaꞌlate qixxaawi, lawishshaho geerranna dhuku anje noonsare kaaꞌla dandaatto.
DANO KALAQANTANNO WOYITIRA HASIISANNORE QIXXEESSIꞌROOTTO?
Dano kalaqantanno woyite biddishsha uyitanno dirijjitta, maate dano kalaqantanno woyitira hasiisannore qixxeessidhanno gedenna diru kiiro buuxidhanno gede kultanno. Qixxeessiꞌnanniri qooxeessunna ikkitote garinni babbaxxara dandaanno; hakko daafira gashshootu kiꞌne qooxeessira ma garinni qixxaawa hasiissannoro kulinoro buuxi.
Xaphoomunni mittu mittunku manchira 11 litire ikkanno waanna sasu barrira ikkitannota rakke baꞌannokki sagale qixxeessiꞌra danchate.
Mite maate borsaho konni woroonni noore qixxeessite wodhitanno:
■ Bindillise, duꞌma uddanonna caamma
■ Baatire, raadoonenna baatirete kinna
■ Yannate geeshsha xagisiꞌrate ikkannorenna ballo iillenke yinanni gede assannori heeꞌriro ufuunfannire
■ Sagale wodhinanni saane, xaasa fannannire, shiimaaddare murate kaaꞌlannorenna kifiriite
■ Sanotenna afooho wodhinanni maaske, mite plaasterenna xeena ganiro goꞌlinanni laastike
■ Hinkote burushe, saamuna, fooxanna soofte
■ Qaaqquulleho, geerraho woy bisu xeꞌne noonsarira hasiisannore
■ Mite xagga, akime hajajjino xagicho kulanno woraqatanna wolere hasiisannore wodhinannita waa eessitannokki laastike
■ Dano iillitanno woyite woshshiꞌneemmo manni suꞌmanna xaandeemmo bayicho hattono raga leellishanno kaarta
■ Birranna eetii-emme woy buuke
■ Minunna makeenu qulfuwa
■ Woraqatta, irsaasuwa, maxaaffanna qaaqquullu godoꞌlannore
■ Qullaawa Maxaafa
ELLA 7-13
MAGANU QAALI GIDDO NOOTA MUXXE JIRO | MARRO 3-4
“Yihowa Seeri Hayyonna Taashsho Nooho”
it-2 1140 guf. 5
Wodancha
Mittu manchi Maganu Qaalenna hajajosi diinaggaawe xiinxallannohanna loosu aana hosiisannoha ikkiro, rosiisaanosinninna jajjabbu manninni roore xiinxalla ikkara dandaanno. (Fa 119:99, 100, 130; Lu 2:46, 47te ledo heewisiisi.) Mayira yiniro, Maganu seerinna wodho hayyonna wodancha noote; konni daafira Israeelete daga Maganu seeranna wodho ammanante harunsitannoha ikkiro qooxeessinsara noo daga ‘ogimmanna wodancha afidhino gosa’ gede assite laꞌannonsa. (Mar 4:5-8; Fa 111:7, 8, 10; 1Mo 2:3te ledo heewisiisi.) Xiinxallu manchi Maganu Qaali diiga hasiissannokkiha ikkinota huwatanno hattono Maganu Qaale horoonsiꞌre isonooto layiꞌranno; qoleno tennera kaaꞌlannosi gede Magano huucciꞌranno. (Fa 119:169) Isi Maganu Qaali giddosira lixe eanno gede assiꞌranno (Mt 13:19-23), wodanisira borreessiꞌranno (La 3:3-6; 7:1-4), hattono ‘bushare’ tiyyiꞌre giwanno (Fa 119:104). Maganu Beettino uullate aana noo yannara hatto asse xiinxalla ikkinota leellishino; isi haqqu aana sunte shinannisita nafa xooqe gata giwino; korkaatuno Qullaawa Borro giddo kulloonniri woꞌmannohu isi hakko garinni reyirooti.—Mt 26:51-54.
w99 11/1 20 guf. 6-7
Shaqqillunni Lowore Aa
Mootitte macciishshitinorinna laꞌinori lowo geeshsha dhagge ikkinose daafira iseneeto heeshshi assite togo yitino: “Mulekki heeꞌre hayyonniha hasaawakki macciishshannohu mannikkinna ledokki gashshaano baꞌraadhinoreeti!” (1 Mootoolla 10:4-8) Ise Selemooni soqqamaano baraadhinore ikkitinota coyidhinohu jirote batinye laꞌe diꞌꞌikkino. Ise Selemooni soqqamaano baraadhinoonnireeti yitinohu Selemooni Maganu uyinosi hayyo coyiꞌranna woꞌmanka woyite macciishshitanno daafiraati. Kalaqaanchunna Beettisi Yesuusi Kiristoosi hayyo lae hagiidhannohu xaa yannara noohu Yihowa mannira Saaba mootitte kaajja lawishsha ikkitanno!
Saaba mootitte Selemoonira hakkiinni aanchite coyidhinorino dhagge ikkannoreeti, ise “Maganikki Kaaliiqi [Yihowa] galatamo!” yitino. (1 Mootoolla 10:9) Ise Selemooni jironna hayyo afiꞌrinohu Yihowawiinni ikkinota affukki digattino. Tini Yihowa hakkuyira albaanni Israeelete mannira eino qaali ledo sumuu yitannote. Isi togo yiinonsa: “Tenne woga baala macciishshitannoriranna, ‘Halaalinta tini bayira gosa mageeshshi ogimmanna wodancha afidhino!’ yaanno mannira ogimmaꞌnenna wodanchaꞌne leeltanno gede seekkitine agadhe.”—Marro 4:5-7.
w07 8/1 29 guf. 13
Ati “Maganu Albaanni” Dureessaho?
13 Yihowa mannisira atoote dunanno woyite woꞌmanka woyite insara woyyinore aannonsa. (Yaiqoobi 1:17) Lawishshaho Yihowa Israeelete qae asse uyinonsa gobba “malawunna ado lolakkanno[te].” Gibitsete gobba daafira hatto yinoonniha ikkirono, Yihowa Israeelete uyinonsa gobba ajayi ajeenna mittu coyinni baxxitinote. Muse Israeelete dagara, “Tini baatto Maganiꞌne Kaaliiqi agarannosete” yiino. Wole yaattonni Yihowa towaatanni noonsa daafira Israeele dureeyyete. Israeele Yihowara ammanante heedhino yanna baalantera Isi maassiꞌrinonsa; hattono qooxeessinsara noo daga baalantenni roortino heeshsho heedhino. Ee, Yihowa maasso “jiro abbitanno.”—Kiiro 16:13; Marro 4:5-8; 11:8-15.
Maganu Qaalinni Ronseemmore
w04 9/15 25 guf. 3
Marrote Maxaafita Qara Qara Hedo
4:15-20, 23, 24—Misile boccine seekkidhinoonte yaa bonce loonsoonnire seesahono horoonsidhinoonte yaateni? Hatto yaa diꞌꞌikkino. Hoolloonnihu misilla seekkiꞌne kuri misillara ‘kumbuullannikkinna magansiꞌnannikki gedeeti.’ Qullaawa Borro seesaho yine mitore bonce seekkiꞌra woy misile kayisa dihooltanno.—1 Mootoolla 7:18, 25.
ELLA 14-20
MAGANU QAALI GIDDO NOOTA MUXXE JIRO | MARRO 5-6
“Oosoꞌne Yihowa Baxxanno Gede Qajeelse”
w05 6/15 20 guf. 11
Annuwanna Amuuwa, Maateꞌnera Hasiisannore Wonshe
11 Tenne hajo lainohunni duucha hinge qummi assinanni qummeeshshi Marro 6:5-7te. Hanni Qullaawa Maxaafaꞌne faꞌnitine konne qummeeshsha nabbabbe ballo. Konni qummeeshshira balaxxe annuwunna amuuwu ayyaanaamittensa kaajjishiꞌra yaano Yihowara noonsa baxilli lexxanno gede assiꞌranna Maganu Qaali wodaninsara coanno gede assiꞌra hasiissannonsata kulloonnita qaagge. Ee, Maganu Qaale seekkitine xiinxalla hasiissannoꞌne; Qullaawa Maxaafa ganyitine xiinxallanna hiinca seekkitine wodanchitinanni gede hattono Yihowanna seerasi baxxinanni gede assitannoꞌne. Hatto assitiniro wodaniꞌnera dhagge ikkannohu Qullaawu Maxaafi halaali woꞌmanno daafira hagiirraamma ikkitinanni hattono Yihowara nooꞌne ayirrinyinna baxilli lexxanno. Qoleno oosoꞌnera kultinanniha lowoha dancha coye afidhinanni.—Luqaasi 6:45.
w07 5/15 15-16
Oosoꞌya Qajeeltinore Ikkitanno Gede Kaaꞌla Dandeemmohu Hiittoonniiti?
Halchoꞌne, hasattoꞌnenna lowori gede assitine laꞌinanni coyi coyidhinannirinni calla ikkikkinni assitinannirinnino leellanno. (Roomu Sokka 2:21, 22) Qaaqquullu anjensanni kayisse anninsanna amansa assannore laꞌe roso afidhanno. Ooso anninsanna amansa lowori gede asse laꞌꞌannore huwattanno daafira, insano konne coye lowori gede assite laꞌanno. Kiꞌne Yihowa lowo geeshsha baxxinanniha ikkiro, oosoꞌne tenne wodanchitanno. Lawishshaho insa Qullaawa Maxaafa nabbawanna xiinxalla lowori gede assitine laꞌinannita affanno. Hattono Maganu Mangiste balaxisiissinannita huwattanno. (Maatewoosi 6:33) Songote gambooshshe haꞌraꞌnenna Maganu Mangisteha dancha duduwo duduwaꞌne Yihowara soqqantinannita qullaawa soqqansho lowori gede assitine laꞌinannita leellishshanno.—Maatewoosi 28:19, 20; Ibiraawoota 10:24, 25.
w05 6/15 21 guf. 14
Annuwanna Amuuwa, Maateꞌnera Hasiisannore Wonshe
14 Annuwanna amuuwa, Marro 6:7 leellishshannonte gede oosoꞌne ledo ayyaanaamittete coye hasaabbinanniti lowo faro nooꞌne. Mitteenni hadhinanni woyite woy looso loossinanni woyite, hattono ledonsa boohaartinanni woyite oosoꞌneta ayyaanaamittete hasattonsa wonshate faro afidhinara dandiitinanni. Togo yaa kayinni oosoꞌnera hashshe soodi kiiro Qullaawa Maxaafa rosiissinanni yaa diꞌꞌikkitino. Kayinni hasaabbinanni hasaawi ayyaanaamittetenni dhaawannoha ikkanno gede assate sharramme. Lawishshaho Baqqi Yiiyye! yitanno metseetera batinyu addi addi birxichi no. Kuri birxichuwa Yihowa kalaqino saada daafira, alamete doyichora noohu addi addihu biifadu qooxeessirenna mannunnihu addi addi budire hattono heeshshonsare kayinse hasaawate kaaꞌlitanno. Togoo hasaawi, wedellu ammanaminohunna wodanaamu borojjichi qixxeessino borro roore nabbawate kaꞌanno gede assansara dandaanno.—Maatewoosi 24:45-47.
Maganu Qaalinni Ronseemmore
Yihowa Hundi Israeelera Baxillenna Taashsho Leellishinohu Hiittoonniiti?
11 Maa ronseemmo? Yihowa aaniido calla ikkikkinni giddonkeno laꞌꞌanno. Isi wodananke yaano giddiidi ayimmanke laꞌꞌanno. (1 Sam. 16:7) Isiwiinni goꞌlitino hedo, yorto woy assooti dino. Yihowa giddonke nooha dancha coye laꞌꞌanno; hattono konne dancha coye lossiꞌra dandiineemmo gede kaaꞌlannonke. Ikkollana giddonke nooti busha hedo lophite bushu assootiwa qolte massitankera albaanni afiꞌne qorophinammora hasiꞌranno.—2 Dud. 16:9; Mat. 5:27-30.
ELLA 21-27
MAGANU QAALI GIDDO NOOTA MUXXE JIRO | MARRO 7-8
“Insa Ledo Adhantinoonte”
w12 7/1 29 guf. 2
Yihowa Dagasi Iso Magansidhannori Ledo Calla Adhantanno Gede Hajajinohu Mayiraati?
Yihowa, Israeele kaphu maganna magansidhano gede asse Sheexaanu battaabbanno gede assansara hasiꞌrannota afino. Hakko daafira Maganu Israeele, ammantinokki daga ‘oosoꞌne ane hoode hadhannota hoolte wole maganna magansidhanno gede assitannonsa’ yee qorowisiisinonsa. Kuni mulluri gede assine laꞌnanni coye diꞌꞌikkino. Israeele wole maganna magansidhuro, Magano dadillissanno hattono isi agarooshshe afidhannokki daafira diinnansa gawajjitannonsa. Hatto ikkiro insa widoonni daanno yinoonni Mesihichi hiitto ikke daanno? Konnira, Sheexaanu Israeele ammantannokki daga ledo adhantanno gede assate woꞌnaalannohu dimullaati.
w15 3/15 30-31
‘Ammaninohu’ Ledo Calla Adhama Xaano Assa Hasiissannoreeti?
Yihowa, ammaninohu ledo calla adhama hasiissannota kulanno biddishshi Qaalisi giddo heeꞌranno gede assino. Mayira? Isi mannisira woyyannori maatiro afino daafiraati. Isi mannisi gara ikkinokkire asse qarramannokki gede agaransara calla ikkikkinni hagiirraamma ikkarano hasiꞌranno. Nehimiya waro Yihudu manni Yihowa magansiꞌrannokkiha wole gobba meento adhi yannara, Nehimiya Selemooni lawishsha qummi asse coyiꞌrino. Selemooni ‘Maganu baxannosiha’ ikkirono iso “wole gobba meenti soꞌrisiisinosi.” (Neh. 13:23-26) Maganu soqqamaanosi iso magansidhannori ledo calla adhantanno gede hajajinohu ninke horora yeeti. (Far. 19:7-10; Isa. 48:17, 18) Addu Kiristaani Maganu baxillunni towaatannonsata naadanno hattono biddishshasi addaxxitanno. Insa isira maahoyye yite galte, kalqe alamera Aliidi Gashshaancho ikkasi ammantannota leellishshanno.—Law. 1:5.
Tenne Goofimarchu Yannara Busha Jaalooma Qorophe
12 Busha jaalooma qoropha hakko iso adhama hasiꞌranno Kiristaanira roore hasiissannote. Maganu Qaali xawise togo yee amaalanno: “Ammantinokkiri ledo gara ikkitinokki doogonni quraanyantinoonte. Keeraanchimmanna finqille mayi xaadooshshe afidhino? Woy xawaabbahonna tunsichoho mayi guti noonsa?” (2 Qor. 6:14) Qullaawu Maxaafi, adhama hasidhannori Maganu soqqamaano ‘Mooticha ammaninohu ledo calla’ yaano heeshshosi Yihowara sayise oye cuuaminohunna Qullaawa Borro seeri garinni heeꞌranno manchi ledo calla adhama hasiissannonsata amaalanno. (1 Qor. 7:39) Kiristaanu ammanate roduuwinsa mereerinni adhitannoha ikkiro, Maganoho ammanantinore ikkate kaaꞌlitannonsata Yihowa baxxanno aggaare afidhanno.
Maganu Qaalinni Ronseemmore
w04 2/1 13 guf. 4
Yihowa Barraho Hasiisannonkere Aannonke
4 Barraho hasiissannonke sagale afiꞌrate huucciꞌneemmo huuccatto barru baala hasiissannonketa ayyaanaamittete sagale qaangeemmo gede assitannonke. Yesuusi lowo yanna xoome hudiꞌre noo yannara Sheexaanu kinna timma ikkitanno gede assi yee jifisita, “‘Mannu Maganu afiinni fulanno qaali baalunni ikkinnina, sagale callatenni diheeꞌranno’ yine borreessinoonni” yee qolino. (Maatewoosi 4:4) Yesuusi dawaro qolinohu Masaalaanchu Muse Israeelete togo yee kulino hedo giddonni qummi asseeti: “[Yihowa] affinaranna rosiisaꞌnera yee hudiissinoꞌne. Kiꞌnenna annuwaꞌne affinoonnikkita menna yinanni sagale itisinoꞌne. Hatto assinohu mannu Maganu afiinni fulanno qaali baalunni ikkinnina sagale callatenni heeꞌrannokkita egensiisaꞌneraati.” (Marro 8:3) Yihowa Israeelete menna qixxeessino gari maalaamittete sagale calla ikkikkinni ayyaanaamittete rosono afidhanno gede assannoho. Insa “hakko barrira ikkitanno [sagale] calla gamba” assiꞌra hasiissannonsa. Insa mittu barrinni saꞌino sagale gamba assidhuro gattinoti daꞌmuulte bobbanno. (Fulo 16:4, 20) Kayinni leyikki barra Sambatu barrirano ledde gamba assidhanno woyite gattinoti dibobbanno. (Fulo 16:5, 23, 24) Hakko daafira mennaho yinanni sagale qixxaabbino gari, hajajama hasiissannonsatanna heeshshote heedhannohu maalaamittete sagalenni calla ikkikkinni “Maganu afiinni fulanno qaali baalunni” ikkinota qaagganno gede assitannonsa.
w06 1/1 28 guf. 14-15
Keeraanchimma Hasiꞌra Agarooshshe Ikkitannonke
14 Israeele Hexxote Gobba eꞌuhunni shiima yanna gedensaanni Yihowa, insa iso habbannokki gede qorowisiisinonsa. Isi togo yiinonsa: “Techo barra eemmoꞌne hajajo, seerasinna wogasi agadha hooggine Maganoꞌne Kaaliiqa habbinannikki gede qorophe. Ittine duubbinanni woyitenna dancha mine miꞌnitine heedhinanni yannara, qoleno lalu, geꞌreewunna meu batiꞌrannoꞌne yannara, birrunna culku haammatannoꞌne yannara, nooꞌneri baalu kiiro lexxanno woyite, wodaniꞌne naaxxeenna . . . Maganoꞌne Kaaliiqa habbinannikki gede agadhe.”—Marro 8:11-14.
15 Xaa yannarano togoori ikkara dandaanno? Ee, balaxa hasiissannokkire balaxisiinsummoro ikkara dandaanno. Ikkollana balanxe Maganu keeraanchimma hasiꞌneemmoha ikkiro, heeshshonke giddo addu magansiꞌra lowori gede assine laꞌneemmo. Soqqamaasinchu Phaawuloosi jawaachishinonkente gede, ‘Afiꞌneemmo yanna baalanta hayyotenni’ horoonsiꞌneemmo hattono diinaggaambe soqqammeemmo. (Qolasiyaasi Sokka 4:5; 2 Ximootewoosi 4:2) Ikkollana boohaarshanna wole hagiirsiisanno coye gambooshshunninna soqqanshotenni roorsine laꞌneemmoha ikkiro Yihowa hambammora dandiineemmo. Phaawuloosi, goofimarchu barruwara mannu “Maganunni roorse qiniitesi baxannoha ikkanno” yiino. (2 Ximootewoosi 3:4) Hakko daafira Kiristaanu togoo hedonni doogamannokki gede woꞌmanka woyite insaneeto layiꞌra hasiissannonsa.—2 Qorontoosi 13:5.
ELLA 28–MAAJA 4
MAGANU QAALI GIDDO NOOTA MUXXE JIRO | MARRO 9-10
“Yihowa Ati Maa Assattora Hasiꞌranno?”
w09 10/1 10 guf. 3-4
Yihowa Maa Assinammora Hasiꞌranno?
Maganoho uminke fajjonni hajajammeemmo gede assannonkeri maati? Muse mitto korkaata kulanni ‘Maganoꞌne Kaaliiqa ayirrisse [waajje, NW]’ yiino. (Marro 10:12) Tini waajja qoricha waajjine qece yinannita ikkitukkinni, Maganonna hajajosi banxe waajjinanni waajjaati. Magano lowo geeshsha ayirrinseemmoha ikkiro iso dadillisannore assineemmokki gede qorophineemmo.
Ikkina Maganoho hajajammeemmo gede assannonkehu qaru coyi maa ikka hasiissannosi? Muse togo yiino: ‘[Yihowa] baxxe, woꞌmu wodaniꞌnenninna woꞌma lubboꞌnenni soqqamme.’ (Marro 10:12) Magano baxate, baxeemmo yaatenni sainore assa hasiissanno. Mitte borro togo yitino: “Ibiraawootu Afiiti mitte hedo xawissanno yaatto, mito woyite hatte hedonni kaꞌne assinannireno mitteenni amaddanno.” Hatti borro, Magano baxate yaa iso “baxeemmota leellishanno garinni heeꞌrate” yitanno. Wole yaattonni Magano addinta banxeemmoha ikkiro iso hagiirsiisannore assineemmo.—Lawishsha 27:11.
w09 10/1 10 guf. 6
Yihowa Maa Assinammora Hasiꞌranno?
Maahoyye yine hajajama atoote afiꞌneemmo gede assitannonke. Muse togo yee borreessino: “Seyannoꞌne gede techo ani eemmoꞌne hajajonna woga baalanta agadha hasiissannoꞌne.” (Marro 10:13) Ee, Yihowa asse yee kulannonke hajajo baala ninkera seyannonke gede assitannote. Togo yee ammananke garaho; korkaatuno Qullaawu Maxaafi “Maganu baxilleho” yaanno. (1 Yohaannisi 4:8) Yihowa kuri hajajo uyinonkehu hegerera horo afiꞌneemmo gedeeti. (Isayaasi 48:17) Yihowa asse yaannonkere baalare assanke, xaa yannara qarru iillannonke woyite hexxo mudhineemmokki gede kaaꞌlitannonke hattono Maganu Mangiste uulla gashshitanno woyite geedanno atoote afiꞌneemmo gede assitannonke.
cl 16 guf. 2
Addinta ‘Maganunniwa Shiqa’ Dandaatto?
2 Hundi yannara heeꞌrinohu Abirihaamira Maganu ledo danchu jaaloomi noosi. Yihowa konne ammanamino mancho ‘Jaalaꞌyaati’ yiinosi. (Isayaasi 41:8) Ee, Yihowa Abirihaami muli jaalisi gede asse lainosi. Abirihaamira Maganu ledo muli jaaloomi heeꞌrinosihu isi ‘Magano ammanino’ daafiraati. (Yaiqoobi 2:23) Xaa yannarano Yihowa isira baxillunni kaꞌe soqqantannosiri ledo jaalooꞌma hasiꞌranno. (Marro 10:15) Qaalisi togo yee jawaachishannonke: “Maganunniwa shiqqi yiiyye; isino kiꞌnewa shiqqi yaanno.” (Yaiqoobi 4:8) Kuni Qummeeshshi Yihowa jaalasi ikkinammora koyisinonketanna qaale einonketa leellishanno.
Maganu Qaalinni Ronseemmore
it-1 103
Enaaqoota
Enaaqi ilama Kanaꞌꞌaani ilaallara hattono mite baaru qacce qooxeessira roorenkanni wodiidoonni heeꞌrannoho jigeeyye mannaati. Mitte yannara Enaaqi ilama wido ikkitinori sasu maccare ikkitinori yaano, Akimaani, Sesiininna Talmayi Kebirooni yinanniwa heedhino. (Ki 13:22) Tonaa lamu Ibiraawootu qotaano umi qara Enaaqi gosa laꞌinohu hakkooti; insa giddonni tonnu kuri manna laꞌe waajjitinota coyidhino; insa kuni manni Baote Wayi albaanni heeꞌrinohu Nefiliimi sircho ikkinohu gede assite hedde insa laꞌniro Ibiraawootu “koroꞌmiisu” geeshshireeti yite heddino. (Ki 13:28-33; Mar 1:28) Enaaqi manni jigeeyye ikkansa, Ibiraawootu Emiitootunna Refootu nafa insa gedeereeti yite heddanno gede assitinonsa. Mannu insa, “Enaaqoota ittisara dandaannohu nooni?” yee coyiꞌranno gede assitinoti jawaantensa ikkitara dandiitanno.—Mar 2:10, 11, 20, 21; 9:1-3.