2. Alamete ikkitonna mannu akati 1914 kawa hiittooha ikkino?

Yesuusi rosaano iso “Ate daaranna diru goofimarchira malaatu maati?” yite xaꞌmitinosi. (Maatewoosi 24:3) Yesuusi tenne xaꞌmora dawaro qolanni, isi gordoho Maganu Mangistera Moote ikke gashsha hanafihu gedensaanni ikkannoha batinye coye kulino. Kuri giddo gamu: olaho, hudetenna baattote huxanooti. (Maatewoosi 24:7 nabbawi.) Qoleno Qullaawu Maxaafi, “goofimarchu barra” mannu akati horo bushanno daafira heeshsho ‘qarra’ ikkitannota coyiꞌrino. (2 Ximootewoosi 3:1-5) Togooti alamete ikkitonna mannu akati, hakko iso 1914 kawa roore xawe leellino.

3. Maganu Mangiste gashsha hanaffu kawa alamete ikkito roore bushshinohu mayiraati?

Yesuusi Maganu Mangistera Moote ikkihunni shiima yanna gedensaanni, iima Sheexaanunna durriissate ledo olamino. Hakkuyi olira Sheexaanu qeelamino. Qullaawu Maxaafi kulanno garinni, hakkuyi gedensaanni Sheexaane “uullara tungi; sokkaasinesino isi ledo tugantu.” (Yohaannisi Ajuuja 12:9, 10, 12) Sheexaanu baꞌꞌannota afino daafira lowo geeshsha hanqino. Konni daafira, alame woꞌmate aana qarrunna shetto batidhanno gede assino. Alamete ikkito togo bushshinohu iseraati! Maganu Mangiste konne baalanka qarra hooltanno.