Balanxe masaalloonninte gede, xaa yannara batinyu manni uminsa daafira calla hedanno, uminsa qiniite calla laꞌꞌanno, insa hagiirsiisannore calla hasiꞌranno, uminsa heeshsho seekkannore calla hedanno. Qoleno togoo akati roore lexxannilla haꞌranni no. Batinyu manni uminsa daafira quwa sae hedanno daafira, “danchumma giwannoha” ikkino; yaano dancha akatta baxa dandaannokkiha ikkino. “Galata afiꞌrinokkiha” ikkino daafira, noonsa coyira woy wolu manni assinonsarira galata hasiissannoe yee dihedanno.

• Suꞌma huna. Xaa yannara ‘xonamaano’ hattono ‘hemaano’ batidhino. (2 Ximootewoosi 3:2, 3) Tini qaalla manna woy Magano xonanno manna woy insa daafira nookkire coyiꞌranno manna kultannote.

• Mokkookka. Xaa yannara batinyu manni ‘qullaawa heeshsho afiꞌrinokkiho,’ ‘araara giwannoho,’ ‘yiinowa hosannokkihonna’ ‘muddamaasinchoho.’ (2 Ximootewoosi 3:2-4) Duuchu manni togoo akatta noonsa daafira, hasaawe afoo xaadate woy amaalame mala abbate sumuu diyaanno; qoleno, eino sheemaate diayirrisanno.

• Urungicha. Yannankera batinyu manni “mararro afiꞌrinokkiha” ikkino daafira, mulenni hanqanno. Konni garinni hanqe kaꞌꞌanno woyite, biso shorodhi assannore woy mararro nookki coye assanno.—2 Ximootewoosi 3:3.

• Mini manna baxa hooga. Lowo manni “iltinonsarira hajajamannokkiha” hattono “baxillu nookkiha” ikkino daafira, mininsa manna ditowaatanno, beebba assiꞌranno, hattono wolqatenni gawajjanno.—2 Ximootewoosi 3:2, 3.