Yihowa Farciꞌraasine Addu Kiristaanaati?

Ninke Yihowa Farciꞌraasine, addu Kiristaana ikkinoommota ammanneemmo. Mayira? Hanni ammananke mayi aana xintantinotero, bande anfanninke gede assanno suꞌmankenna mereeronke noo baxille laꞌno.

1. Yihowa Farciꞌraasine ammana mayi aana xintantinote?

Yesuusi, “[Maganu] qaali halaaleho” yiino. (Yohaannisi 17:17) Yesuusinte gede, Yihowa Farciꞌraasine woꞌmanka woyite Maganu Qaali yaannore ammantanno. Hanni dirinketa Yihowa Farciꞌraasine xagge laꞌno. Dirinkera 19^ki sanira, boode Qullaawu Maxaafi rosaano Qullaawa Maxaafa seekkite xiinxalla hanaffu. Insa Qullaawu Maxaafi kulannori beetekiristaanna rosiissanno rosiwiinni baxxinoha ikkirono, Qullaawu Maxaafi yaannore ammantino. Hakkiinni, insa huwattinoha Qullaawu Maxaafi halaale mannaho kula hanaffu.a

2. Yihowa Farciꞌraasine yinanni suꞌminni woshshammeemmohu mayiraati?

Yihowa magansidhannosiri isi daafira halaale rosiissannohura, farciꞌraasineꞌya yiinonsa. (Ibiraawoota 11:4–12:1) Lawishshaho, hundi waro Maganu mannasi “Kiꞌne . . . naqaashsheꞌyaati [“farciꞌraasineꞌyaati,” NW]” yiino. (Isayaasi 43:10 nabbawi.) Yesuusano “ammanamino naqaashshe” woy Farciꞌraasincho yinoonni. (Yohaannisi Ajuuja 1:5) Konnira, 1931nni Yihowa Farciꞌraasine yaanno suꞌma doodhinoommo. Konni suꞌminni woshshama ninkera lowo ayirrinyeeti.

3. Yihowa Farciꞌraasine Yesuusihu gedee baxille leellishshannohu hiittoonniiti?

Yesuusi rosaanosi lowo geeshsha baxanno daafira, insa isira maatesi gedeeti. (Maarqoosi 3:35 nabbawi.) Hatteente gede, alame woꞌmate noori Yihowa Farciꞌraasine baalanti mitte maateeti. Mimmito rodoo yine woshshineemmohu iseraati. (Filimoona 1, 2) Qoleno “Roduuwa [baalanka] baxxe” yine hajanjoonninke hajajo ayirrinseemmo. (1 Pheexiroosi 2:17) Yihowa Farciꞌraasine togoo baxille babbaxxitino doogonni leellishshanno; lawishshaho, alamete doyichora noori ammanate roduuwinke qarrantanno woyite kaaꞌlineemmo.

LEDDE XIINXALLI

4. Ammananke Qullaawu Maxaafi aana xintantinote

Yihowa Qullaawu Maxaafi halaali roore xawannota balaxe masaalino. Daanieeli 12:4 (NW) nabbabbe;b hakkiinni tenne xaꞌmo hasaabbe:

• Maganu manni Qullaawa Maxaafa seekke xiinxalliro mereeronsa mayi “woꞌmitanno”?

Hanni Charlesi Raasilinna ledosi noori Qullaawu Maxaafi rosaano Maganu Qaale xiinxallitinohu hiittoonniitiro wodanchi. VIIDIYO laꞌe; hakkiinni aante noo xaꞌmo hasaabbe.

VIIDIYO: Qullaawu Maxaafi Halaale Wirro Buuxa (7:45)

• Viidiyote giddo, Charlesi Raasilinna ledosi noori Qullaawu Maxaafi Rosaano Qullaawa Maxaafa xiinxallitinohu hiittoonniiti?

Ati tenne afootto?

Saꞌne saꞌne, ammanneemmo coyi giddo mito taashshinoonni. Mayira? Soodo duuꞌmo saaqqanno woyite qooxeessaho noori roore xawe leellannonte gede, Maganu Qaalesi huwanteemmo gede assannohu dirimu dirimunniiti. (Lawishsha 4:18 nabbawi.) Konni daafira, Qullaawu Maxaafi soorramannokkiha ikkirono, Qullaawu Maxaafi egennonke roore lexxitanno woyite ammanneemmo coye taashshiꞌneemmo.

5. Suꞌminke garinni heeꞌneemmo

VIIDIYO: Ayimmanke Seekke Kulanno Suꞌma (2:40)

• Yihowa Farciꞌraasine yaanno suꞌmi ninkera malinoho yineemmohu mayiraati?

Yihowa manna farciꞌraasinesi ikkara doodhinohu mayiraati? Isi daafira lowo kapho tareessinoonni daafira, Isi halaalaancho Magano ikkinota farcidhanno gedeeti. Hanni konni kaphi giddo lame calla laꞌno.

Mite ammaꞌno, Magano magansiꞌrate misile horoonsiꞌra hasiissanno yite rosiissanno. Tini halaaleho? Leewaawoota 26:1 nabbabbe; hakkiinni aante noo xaꞌmuwa hasaabbe:

• Kuni qummeeshshi kulannonke halaali maati? Yihowa iso magansiꞌrate misilla horoonsiꞌnannita baxanno?

Mitu ammaꞌnote murrooti Yesuusi Maganoho yite rosiissanno. Tini halaaleho? Yohaannisi 20:17 nabbabbe; hakkiinni aante noo xaꞌmuwa hasaabbe:

• Kuni qummeeshshi kulannonke halaali maati? Woꞌmanka Dandaanno Maganinna Yesuusi mittoho?

• Yihowa Farciꞌraasinesi isinna Beettisi daafira halaale kultanno gede soqqinota hedatto woyite mayyaatto?

6. Mimmito banxeemmoreeti

Qullaawu Maxaafi Kiristaana mannu bisi ledo heewisiisanno. Umi Qorontoosi 12:25, 26 nabbabbe; hakkiinni aante noo xaꞌmuwa hasaabbe:

• Addu Kiristaani ammanate roduuwinsa qarrantanno woyite maa assa hasiissannonsa?

• Yihowa Farciꞌraasine mereero baxillu daafira maa laootto?

Mittu qarqarira noori Yihowa Farciꞌraasine qarrantanno woyite, alamete doyichora noori Yihowa Farciꞌraasine hakkawoyintenni kaaꞌlate sharrantanno. Tennera mitto lawishsha laꞌꞌate, VIIDIYO laꞌe. Hakkiinni, aante noo xaꞌmo hasaabbe.

VIIDIYO: Heyiti Maatiwu Yinanni Hombobalatte Gantuhu Gedensaanni (5:29)

• Yihowa Farciꞌraasine roduuwansa kaaꞌlate assitinori baxillensa leellishanno yineemmohu mayiraati?

XAPHISHSHA

Yihowa Farciꞌraasine addu Kiristaanaati. Alamete doyichora ninke mitte maateeti; ammananke Qullaawu Maxaafi aana xintantinote; hattono Yihowa daafira halaale farciꞌneemmoreeti.

Kageeshsha Rosoottore

• Yihowa Farciꞌraasine yaanno suꞌma doodhinoommohu mayiraati?

• Mimmito banxeemmota leellinsheemmohu hiittoonniiti?

• Yihowa Farciꞌraasine addu Kiristaana labbannohe?

EGENNO LEXXI

Xaggenke daafira ledde afi.

Yihowa Farciꞌraasineta Loosunni Leeltanno Ammana, Gafa 1: Tunsichunni Fula (1:00:53)

Yihowa Farciꞌraasine kaphu roso xawo fushshitinohu hiittoonniiti?

Maganu Manni Suꞌmisi Ayirranno Gede Assanno (7:08)

Yihowa Farciꞌraasine daafira noohe xaꞌmora dawaro afiꞌra hasiꞌratto?

“Yihowa Farciꞌraasine Daafira Duuchu Manni Xaꞌmanno Xaꞌmuwa” (Webisayitenkera noo gafa)

Istiifeni alba wole sircho lowo geeshsha giwanno daafira insa gawajjannoho. Soorrame dancha mancho ikkanno gede kaaꞌlinosiri maatiro nabbawi.

“Albi Heeshshoꞌya Horo Anganni Fultinote” (Agarooshshu Shaera fulino birxicho)