“Daga Baala Shafeemmo”

1-2. Masaalaanchu Hage dirinkera hiittoo shafama heedhanno yee masaalino?

“SHIIMU daqiiqi giddo, suuqqanna lowo diro heedhino minna toꞌe uulla ubbu.” “Mannu baalu mase qece yiino . . . Batinyu manni baatto mito lame daqiiqalla huxidhino yiino. Ani kayinni mase quuxxi yoommo daafira, lowo saate huxidhinoha lawinoe.” Tenne coyidhinori 2015nni Neppaali gobbara baatto huxidhu woyite gatte saꞌino mannootaati. Aterano togoohu waajjishanno coyi tuncu yiinoheha ikkiro, horo hawattokkiti egennantinote.

² Ikkollana, yannankera aleenni kulli shafamanni baxxitino shafama ikkitanna laꞌnanni heeꞌnoommo. Yihowa yannankera mitto katama woy mitte gobba calla ikkikkinni daga baala shafanni no; qoleno konni garinni daga shafanna lowo diri saino. Masaalaanchu Hage tenne shafama daafira masaalo coyiꞌrino. Togo yee borreessino: “Olantote Mootichi Kaaliiqi [togo yaanno]: ‘Harancho yanna giddo, galagale gordonna gobba baaranna baatto shafeemmo.’”—Hage 2:6.

3. Hage masaalino shafama baattote huxanowiinni baxxitannohu hiittoonniiti?

³ Hage masaalino shafama baattote huxano gede diꞌꞌikkitino; baattote shafama gawajjitannota ikkinnina kaaꞌlitannori dino. Hage masaali shafama kayinni danchuri ikkanno gede assitannote. Yihowa umisi togo yiino: “Daga baala shafeemmo; daga baalate mereero noohu ayirradu coyi daanno; konne mineno ayirrinyu woꞌmanno gede asseemmo.” (Hage 2:7, NW) Tini masaalo Hage waro noo manna kaaꞌlitinohu hiittoonniiti? Ninke yannara mayi tiro afidhinoyya? Konni birxichira kuri xaꞌmuwara dawaro afiꞌneemmo; qoleno yannankera daga shafate looso kaaꞌla dandiineemmo gara ronseemmo.

HAGE WARO KULLOONNITA JAWAACHISHSHANNO SOKKA

4. Yihowa mannisiwa masaalaancho Hage soyinohu mayiraati?

⁴ Yihowa Hagera mitto lowo geeshsha hasiisanno looso uyinosi. Hanni hakkuyira albaanni mayi ikkinoro laꞌno. Gamu Ayihudete manni 537 K.A., Baabiloonete qafadonni fule Yerusaalame higino; Hageno insa ledo higikki digatino. Kuni ammanamino manni Yerusaalame iillihunni shiima yanna gedensaanni, Yihowa mine wirro minate safo safino. (Izi. 3:8, 10) Ikkollana, mulenni dadillisanno coyi tuncu yiinonsa. Insa qooxeessaho noo manni waadinonsa daafira, hexxo mudhite qullaawa mine mina agurtino. (Izi. 4:4; Hag. 1:1, 2) Konni daafira 520 K.A., insa wirro diinaggaabbe loosse qullaawa mine minte guddanno gede jawaachishansara Yihowa Hage soyino.b—Izi. 6:14, 15.

5. Hage kulino sokka Maganu manna jawaachishshukki digattino yineemmohu mayiraati?

⁵ Yihowa Hage tenne sokka kulanno gede assinohu Ayihudete manni ammana kaajjishateeti. Masaalaanchu Hage hili geeshshano waajjikki, hexxo mudhinohura Ayihudete mannira togo yee kulino: “‘Xa kayinni baalunku jawaatte! Ani ledoꞌne noommona minne!’ yaanno Olantote Mootichi Kaaliiqi.” (Hag. 2:4) “Olantote Mootichi Kaaliiqi” yitanno yaatto, jawaachishshinonsati dihuluullissannote. Yihowa lowota sokkaasinete olanto hajajanno Mootichaati; hakko daafira, Ayihudete manni qinaannonsa gede iso addaxxa hasiissannonsa.

6. Hage masaalino shafama mayi ikkanno gede assitanno?

⁶ Yihowa daga baalanta shafannota Ayihudete mannira kulanno gede Hage soyino. Yihowa soyinoti tini sokka hexxo mudhe qullaawa mine mina agure nooha Ayihudete manna jawaachishshino. Hatti sokka, Yihowa hakkawaro alame woꞌmate wolqaataamo ikkinoha Faarsi gashshoote shafannota kultannote. Tini shafama abbitanno gumi maati? Umihunni, Maganu manni qullaawa mine mine gudanno. Layinkihunni, haarote minnoonnihu qullaawu minira Ayihude ikkinokki manni insa ledo Yihowa mitteenni magansiꞌranno. Konni daafira, hatti sokka Maganu manna lowo geeshsha jawaachishshinoti dihuluullissannote!—Zak. 8:9.

XAA YANNARA BAATTO SHAFANNI NOO LOOSO

7. Yannankera ninke kaaꞌlinanni heeꞌnoommohu daga shafate loosi hiikkoyeti? Xawisi.

⁷ Hage masaalino masaalo yannankera mayi tiro afidhino? Xaa yannarano Yihowa daga baalanta shafanni no; ninkeno konne looso kaaꞌla dandiineemmo. Hanni tenne hedi: Yihowa 1914nni gordu Gashshootisira Moote ikkanno gede Yesuusi Kiristoosi shoomino. (Far. 2:6) Tini Mangiste xintantinota alamete gashshaano dibaxxino. Maganu Mangiste gashsha hanaffu yaa, “dagate yanna” saꞌino yaate; wole yaattonni, Yihowa shoomino gashshaanchi nookkiha mannu insaneeto gashshino yanna gooffino yaate. (Luq. 21:24) Konninni kainohunni, hakko iso 1919 kawa, Yihowa soqqamaasine mannu ooso qarra baalanka tirtannoti Maganu Mangiste calla ikkitinota dudubbanni keeshshitino. Kuni ‘Maganu Gashshootiha Dancha Duduwo’ duduwate loosi, alame woꞌma shafino.—Mat. 24:14.

8. Faarso 2:1-3 kultanno garinni, roore daga dudumbeemmo sokka macciishshite hiitto ikkitino?

⁸ Mannu tenne sokka maahoyye yee macciishshino? Rooru manni macciishsha giwino. (Faarso 2:1-3 nabbawi.) Daga macciishsha gibbe gunguntino. Insa Yihowa shoomino Gashshaanchira hajajama gibbino. Dudumbeemmoti Maganu Mangiste sokka insara “dancha duduwo” diꞌꞌikkitino. Mite mangistubba isinni sabbakate loosonke hooltino! Hattee gobbuwara heedhannoti batinye gashshaasine Magano magansiꞌneemmoreeti yiturono, silxaanensa sayisse aa dihasidhannoreeti. Konnira Yesuusi waro noo gashshaasine assitinonte gede, yannankera noo gashshaasineno ammanantinore Yesuusi rosaano gawajjite Yihowa buurinoha konne Moote gibbannota leellishshino.—Soq. 4:25-28.

9. Yihowa Maganu Mangiste sokka macciishsha gibbino daga kaaꞌlate maa assino?

⁹ Yihowa Maganu Mangiste sokka macciishsha gibbino daga kaaꞌlate maa assino? Faarso 2:10-12 togo yitanno: “Xaano kiꞌne mootoolla, wodana asse; kiꞌne gobba gashshitinoonniri qorophe. Kaaliiqira waajjatenni soqqamme; isono huxidhine waajje. Hanqisi rahe daye hunannoꞌnekki gedenna, kiꞌneno hedeweelcho baꞌinannikki gede isira kumbuulle. Iso golo assidhannori baraadhinoreeti.” Yihowa, tini daga gara ikkinore doodhitanno gede shaqqillunni yanna uyino. Insa hedonsa biddi assidhe Yihowa Mangiste doodha dandiitanno faro noonsa. Ikkollana, uyinoonni yanna gooffe daggino. Heeꞌnoommohu ‘goofimarchu barruwa’ giddooti. (2 Xim. 3:1; Isa. 61:2) Mannu halaale macciishshe Yihowara soqqama doodha dandaanno yanna xaati.

DAGA SHAFATE LOOSI ABBINOHA DANCHA GUMA

10. Hage 2:7-9 Yihowa daga baala shafanno woyite hiikku danchu coyi ikkannota kultanno?

¹⁰ Hage masaalino garinni, Yihowa daga baala shafanno woyite mitu manni maahoyye yaanno. Masaalo kultanno garinni, Yihowa daga baala shafeenna “daga baalate mereero noohu ayirradu coyi [suwashshu wodani noonsa manni]” Yihowa magansiꞌrara daanno.c (Hage 2:7-9 (NW) nabbawi.d) Isayaasino Mikiyaasino “goofimarchu yannara” togoori ikkannota masaaltino.—Isa. 2:2-4; Mik. 4:1, 2.

11. Mittu rodii Maganu Mangiste sokka macciishshi woyite ma assino?

¹¹ Hanni xa qara biironkera soqqamanni noohu Keeni yinanni rodii, tenne baatto shaffanno sokka macciishshi woyite ma assinoro laꞌno. Isi mitu 40 diri albaanni Maganu Mangiste sokka macciishshi woyite hiitto ikkinoro xaa geeshsha qaaganno. Keeni togo yiino: “Maganu Qaali giddo noo halaale macciishshummo woyite, heeꞌnoommohu goofimarchu barruwa giddo ikkinota rosaꞌyanni hagiidhoommo. Magano hagiirsiisatenna hegere heeshsho afiꞌrate, tenne hembeelantanni noo alamewiinni baxxe Yihowa wido ikka hasiissannoeta huwatoommo. Huuccatto assiꞌre bayichonko hatto assoommo. Hakkawoyintenni tenne alame facci asse agure, shashshafantannokkita Maganu Mangiste cuꞌmiꞌroommo.”

12. Tenne goofimarchu barruwara Yihowahu ayyaanaamittennihu qullaawu minira ayirrinyu woꞌminohu hiittoonniiti?

¹² Yihowa mannasi maassiꞌrinoti xabbe leeltino. Tenne goofimarchu barruwara, iso magansiꞌranno manni kiiro lowo geeshsha lexxitino. Alba 1914nni kiironke shiima kumella ikkitanno. Xa kayinni sette miliyoone saꞌꞌanno manni Yihowara diinaggaawe soqqamanni no; qoleno lowo miliyoone ikkanno manni diru dirunku Qaagooshshu Ayyaana ledonke ayirrisanno. Konni garinni, “daga baalate mereero noohu ayirradu coyi” daye, Yihowahu ayyaanaamittennihu qullaawu minite uullayidi hoowera (Yihowa halaalu magansiꞌrara qixxeessino qixxaawooti) woꞌmino. Qoleno kuni manni haaro mannimma uddiꞌre heeshshonsa biddi assiꞌranno woyite Yihowa suꞌmi gotti gotti yaanno.—Efe. 4:22-24.

13. Tini dhagge ikkitanno lopho wole hiitti masaalo woꞌmitanno gede assitino? (Aaniidi qoolira noo misile lai.)

¹³ Tini dhagge ikkitanno lopho wole masaalono woꞌmitanno gede assitino; kuri giddo mitte Isayaasi fooliishsho 60te noote. Isayaasi 60:22 togo yitanno: “Insa giddonni ajjino ilama kume, woꞌmunkura maaꞌne ikkitinori, wolqaataame gosa ikkitanno; ani Kaaliiqi kuni coyi yannasinni rahe woꞌmanno gede asseemmo.” Batinyu manni Yihowa minira daanni noo daafira, dhagge ikkanno coyi ikkanni no. Kuni “ayirradu coyi” woy manni addi addi dandoonna ‘Maganu Gashshootiha Dancha Duduwo’ duduwate hasatto noonsareeti. Konninni kainohunni, Isayaasi masaalinonte gede, Yihowa manni “dagate ado” aganni no. (Isa. 60:5, 16, NW) Kuri muxxe labballinna meenti kaaꞌlonni, sabbakate loosonke 240 gobbara loonsanni heeꞌnoonni; hattono borronke 1,000 saꞌꞌanno qaalinni tirranni heeꞌnoonni.

MITTE DOODHA HASIISSANNO YANNA

14. Xaa yannara mannu maa doodha hasiissannonsa?

¹⁴ Tenne goofimarchu yannara, Yihowa daga baala shafasi mannu mitte doodhanno gede assitanni no. Mannu Maganu Mangiste doodhannonso, tenne alame gashshoote addaxxa ikka? Baalunku manni lamente giddo mitte doodha hasiissannonsa. Yihowa manni heeꞌranno gobba gashshooti seera ayirrisannoha ikkirono, tenne alame poletikira horonta anga diwodhanno. (Rom. 13:1-7) Insa mannu ooso qarra tira dandiitannoti Maganu Mangiste calla ikkitinota affino. Maganu Mangiste tenne alame wido diꞌꞌikkitino.—Yoh. 18:36, 37.

15. Ajuujate maxaafi Maganu manni ammanama fonqolantannota kulannohu hiittoonniiti?

¹⁵ Ajuujate maxaafi, goofimarchu barruwara Maganu manni ammanama fonqolannori heeꞌrannota kulanno. Kuni fonqoli dartu iillannonke gedenna feexiꞌne gimbanninke gede assannoho. Tenne alame gashshaasine Maganoho uyinannire uyinammonsara murrissannonke; hattono insa wido ikka gibbannore xiibbanno. (Aju. 13:12, 15) Insa “jajjabbuno shiimmaadduno, dureeyyeno buxaneno, mootoolluno faantootu baalu, qiniiticho angara woy albaho malaate wodhitanno gede [giddeessitanno].” (Aju. 13:16) Biꞌree waro borojjootaho insa ayireetiro leellishanno malaate bisinsa aana malaatinsanni. Hatteente gede, yannankera dagoomu mittu mittunku manchi aye widootiro leellishanno malaate angasira woy albaho wodhara hasiꞌranno. Qoleno insa mannu baalu hedonsanninna assootinsanni poletiku gashshootira halamara hasidhanno.

16. Yihowara albinni roore ammanamate xaanni jawaata hasiissannonkehu mayiraati?

¹⁶ Ninke konne malaate wodhine poletiku gashshootira halammeemmo? Konne malaate adha gibbannore qarru amadannonsati egennantinote. Ajuujate maxaafi hakkiinni aanche togo yaanno: “Moyichu suꞌma ikkino malaati woy suꞌmisi kiiro noosikki manchi ayino hirano hidhano didandaanno.” (Aju. 13:17) Ikkollana, Maganu Yohaannisi Ajuuja 14:9, 10 kulloonni malaate adhitinore ma assannoro Maganu manni afino. Maganu manni konne malaate adhantenni, lawishshu yaattonni angansara “Ninke Maganu mannaati” yee borreessiꞌranno. (Isa. 44:5) Maganoho addinta ammanammoommore ikkinoommota buuxiꞌra hasiissannonkehu xaati. Hatto ikkiro, Yihowa hagiidhe ‘Kiꞌne ane mannaati’ yaannonke!

JEEFOTE SHAFAMA

17. Yihowa cinca daafira maa qaaga hasiissannonke?

¹⁷ Yihowa tenne goofimarchu barruwara cincasi lowota ikkitinota leellishino. Isi ayino baꞌꞌara dihasiꞌranno. (2 Phe. 3:9) Isi baalunku manni aagintaawe higanno gedenna gara ikkinore doodhanno gede yanna uyino. Ikkollana cincasi gooffanno yanna no. Maganu Mangistera halama gibbannorira Muse waro Ferioonira iillinori iillannonsa. Yihowa Feriooni togo yiino: “Atenna mannakki dhibbunni ganoommoro, baalunku baattote aaninni gooffinanni. Kayinnilla, reyattokki gede assoommohehu, wolqaꞌya afatto gedenna suꞌmiꞌya gobba baalate ayirranno gede assateeti.” (Ful. 9:15, 16) Daga baalanti halaalaanchu Magani Yihowa calla ikkinota affanno yanna dagganno. (Hiz. 38:23) Kuni ikkannohu hiittoonniiti?

18. (a) Hage 2:6, 20-22 wole hiittee shafama daafira kulloonni? (b) Hage coyiꞌrino masaalo albillitte woꞌmitannota ikkitinota mayinni anfeemmo?

¹⁸ Hage heeꞌrihunni lowo xibbi diri gedensaanni, soqqamaasinchu Phaawuloosi Hage 2:6, 20-22 noo masaalo albillitte woꞌmitannota qullaawu ayyaaninni coyiꞌrino. (Qummeeshsha nabbawi.) Phaawuloosi togo yee borreessino: “Xa kayinni, ‘Baatto calla ikkitukkinni, layinkimeeshsho gordono shafeemmo’ yee coyiꞌrino. Kuni, ‘layinkimeeshsho’ yaanno qaali, shafamannokki coyi kaajje heeꞌrannotanna shafamannohu woy kalaqamino coyi baꞌꞌannota malaatisanno.” (Ibi. 12:26, 27) Kowiicho kulloonni shafama, Hage 2:7 kulloonni shafamanni baxxitinote. Tini shafama, Yihowara gashshate qoosso noosita Feriooni gede ammante adha gibbannori hegerera baꞌannota leellishshannote.

19. Shafamikki gatannori maati? Tenne mayinni anfeemmo?

¹⁹ Shafamikki woy baikki gatannori maatiyya? Phaawuloosi lede togo yiino: “Ninke shafamannokki gashshoote ragiꞌneemmo daafira Magano galaxxineemmo. Hagiidhanno garinni ayirrinyunninna waajjatenni magansiꞌnosi.” (Ibi. 12:28) Tenne jeefote shafama gedensaanni, gattannoti Maganu Mangiste callate. Tini Mangiste hegerera kaajjite heedhanno!—Far. 110:5, 6; Dan. 2:44.

20. Mannu maa doodha hasiissannonsa? Ninke insa kaaꞌla dandiineemmohu hiittoonniiti?

²⁰ Gattino yanna lowo geeshsha shiimate! Mannu tenne alamera halama doodhannoha ikkiro, baꞌꞌanno; Yihowara soqqamanna fajjosi wonshate heeshshonsa biddi assiꞌra doodhannoha ikkiro kayinni hegere heeshsho afiꞌranno. Konni daafira tenne lamente giddo mitte doodha hasiissannonsa. (Ibi. 12:25) Sabbakate loosonke loonseemmo woyite, tenne hasiissanno hajo lainohunni mannu mitte doodhanno gede kaaꞌlineemmo. Dandaami deerrinni batinyu manni Maganu Mangistera halamanno gede kaaꞌlino. Qoleno Mootichinke Yesuusi coyiꞌrino qaale woꞌmanka woyite qaango; isi togo yiino: “Gosa baalate naqaashshe ikkanno gede kuni Maganu Gashshootihu Danchu Duduwi gobba baalate kulamanno; hatte yannara goofimarchu daanno.”—Mat. 24:14.