XIINXALLOTE BIRXICHO 46
Yihowa Hagiirrinke Baikkinni Cincine Heeꞌneemmo Gede Kaaꞌlannonke Gara
“Yihowa ayirrisaꞌnera cincatenni agadhe no; qoleno maaraꞌnera kaꞌꞌanno.”—ISA. 30:18, NW.
FAARSO 3 Wolqanke, Hexxonkenna Irkonke
GUULCHOa
1-2. (a) Hiikkuri xaꞌmuwa hasaambeemmo? (b) Yihowa ninke kaaꞌlate quqquxamannota leellishannori maati?
YIHOWA iillannonke qarra dandiine saꞌneemmo gedenna hagiirrinke baikkinni isira soqqammanni heeꞌneemmo gede kaaꞌlannonke. Isi kaaꞌlannonkehu hiitte doogganniiti? Isi kaaꞌlonni woꞌmunni woꞌma hoꞌro afiꞌra dandiineemmohu hiittoonniiti? Konni birxichira kuri xaꞌmuwara dawaro qollanni. Ikkirono hanni kuri xaꞌmuwa hasaambammora albaanni, kuri xaꞌmuwa ledo xaadooshshe afidhinota Yihowa addinta ninke kaaꞌla hasiꞌranno? yitanno xaꞌmo laꞌno.
2 Soqqamaasinchu Phaawuloosi Ibiraawootu Kiristaanira sokka borreessi woyite coyiꞌrino qaali tenne xaꞌmora dawaro afiꞌrate kaaꞌlannonke. Isi “Kaaliiqi kaaꞌlaanchoꞌyaatina diwaajjeemmo. Mannu ma assannoe?” yiino. (Ibi. 13:6) Mittu Qullaawu Maxaafi qaalla tiranno maxaafira, tenne kiirora nooha “kaaꞌlaancho” yaanno qaale kaaꞌlo hasiisseennasi raarannoha kaaꞌlara dodanno mancho kulate horoonsiꞌnoonnita kulloonni. Hanni Yihowa qarru giddo nooha mitto mancho gatisate wiinamanna hedi. Kuni xawishshi Yihowa ninke kaaꞌla lowo geeshsha hasiꞌrannota leellishannoho; addanko isi ninke kaaꞌlate quqquxamanno. Yihowa ledonke noo daafira hagiirrinke baikkinni iillannonke qarra cincine saꞌꞌa dandiineemmo.
3. Yihowa hagiirrinke baikkinni iillannonke qarra dandiine saꞌneemmo gede kaaꞌlannonketi sase doogga hiikkuriiti?
3 Yihowa hagiirrinke baikkinni iillannonke qarra dandiine saꞌneemmo gede kaaꞌlannonketi mite doogga hiitteeti? Hanni dawaro afiꞌrate Isayaasi maxaafa laꞌno. Mayira? Isayaasi qullaawu ayyaani massageennasi borreessinoti batinye masaalo xaa yannara noota Maganu soqqamaano kaaꞌlitannote. Hakkiinnino sae Isayaasi duucha hige Yihowa daafira xawisinohu qarrammummokkinni huwata dandiineemmo gede asseeti. Lawishshaho hanni Isayaasi fooliishsho 30 laꞌno. Tenne fooliishshora Isayaasi Yihowa mannasi kaaꞌlanno gara xawisate kaajja lawishshuwa horoonsiꞌrino. Isi borreessinori (1) Yihowa seekke macciishshannonketanna huuccattonkera dawaro qolannota, (2) biddishsha aannonketa hattono (3) xaano ikko albillitte atootesi oye kaaꞌlannonketa leellishanno. Hanni Yihowa kaaꞌlannonketa kuri sase doogga seekkine laꞌno.
YIHOWA MACCIISHSHANNONKE
4. (a) Yihowa Isayaasi yannara heeꞌrinohu Yihudu manni daafira mayino? Gedensaanni isi insa ma ikkitara fajjino? (b) Ammanaminohu Yihudu mannira Yihowa hiittee hexxo kulino? (Isayaasi 30:18, 19)
4 Isayaasi fooliishsho 30 hanafote Yihowa Yihudu manni ‘haxawarrootanna cubbu aana cubbo ledannoha’ ikkinota coyiꞌrino. Qoleno isi insa finqilaasine ikkitinotanna Isira ‘badhe wodhitinota’ coyiꞌrino. (Isa. 30:1, 9) Insa macciishsha gibbino daafira Isayaasi, Yihowa qarru iillannonsa gede fajjannota masaalino. (Isa. 30:5, 17; Erm. 25:8-11) Addanko insa Baabiloonootu qafadde adhite hadhino. Ikkirono insa giddo mitu ammanantino Yihudooti no; hattono Isayaasi insara hexxo uyitanno sokka kulino. Isi, Yihowa insa barrunni mitto barra higge Yerusaalamete heedhanno gede assannota kulino. (Isayaasi 30:18, 19, (NW) nabbawi.b) Isayaasi yiinori woꞌmino. Yihowa insa qafadotenni fultanno gede assino. Ikkirono insa qafadotenni fulta geeshsha lowo diri saino. “Yihowa ayirrisaꞌnera cincatenni agadhe no” yitanno yaatto, ammanantinori gatte fulta geeshsha mito geeshshi yanna saꞌannota leellishshannote. Isinni gatino manni Yerusaalame higara albaanni Israeelete manni Baabiloonete qafadame lamalawo diro keeshshino. (Isa. 10:21; Erm. 29:10) Israeelete manni gobbansa higita qafadame heeꞌre wiꞌlino wiꞌla hagiirreho soorrantino.
5. Isayaasi 30:19 maa buuxissannonke?
5 “Isi kaaꞌlo afiꞌrate raartinanni woyite maarannoꞌne” yitannoti Qullaawu Maxaafi hedo xaa yannara shesho afiꞌneemmo gede assitannonke. (Isa. 30:19, NW) Isayaasi Yihowa raarenke seekke macciishshannotanna eeggifante huucciꞌneemmo huuccattora bayichonkonni dawaro qolannota buuxisinonke. Isayaasi lede “Raareꞌne macciishshanni heeꞌrenni dawaro qolannoꞌne” yiino. Tini Anninke Yihowa isiwa raartannore kaaꞌla hasiꞌrannota buuxissannote; addanko isi insa kaaꞌlate quqquxamanno. Tenne afanke hagiirrinke baikkinni cincine heeꞌneemmo gede kaaꞌlitannonke.
6. Isayaasi coyiꞌrinori Yihowa mittu mittunku soqqamaanchisi huuccatto macciishshannota leellishannohu hiittoonniiti?
6 Konni qummeeshshinni huuccattonke daafira wolere maa ronseemmo? Yihowa mittu mittunku huucciꞌneemmo huuccatto seekke macciishshanno. Hatto yineemmohu mayiraati? Isayaasi fooliishsho 30te umi gafira Yihowa mannisira coyiꞌrinohu gaamote deerrinniiti. Ikkirono kiiro 19te coyiꞌrinohu Qullaawa Maxaafa umo borreessinoonni afii tiro garinni duuchu mannira ikkikkinni mittu mittunku manchiraati. Hatte tirora noo qummeeshshi togo yaanno: “Xaate konni kaꞌa diwiꞌlatto; Kaaliiqi shaqqado ikkino daafira kaaꞌlannohe; huucciꞌratto yannara macciishshe dawarannohe.” Yihowa baxillaancho Anna ikkino daafira hexxo mudhino beettosi, “Ati rodiikki woy rodookki gede ikka hasiissannohe” diyaannosi. Hatteentenni isi mitto mittonka laꞌꞌannonke hattono mittu mittunku huucciꞌneemmo huuccatto macciishshanno.—Far. 116:1; Isa. 57:15.
Isayaasi, Yihowara “fooliishsho uyitinoonte” yaasi mayyaate? (Gufo 7 lai)
7. Isayaasinna Yesuusi agurrikkinni huucciꞌra hasiissannota ikkitinota xawissinohu ma garinniiti?
7 Yaachishinonke coyi daafira Yihowa huucciꞌneenna isi huuccattonkera dawaro bayichonkonni qoliro, tini iillinonke qarra dandiine saꞌꞌate jawaante afiꞌneemmo gede kaaꞌlitankera dandiitanno. Iillinonke qarri ninke hendoommo garinni rahe hoꞌla hoogiro, Yihowa dandiine saꞌneemmo gede jawaante aankera hinge hinge huucciꞌra hasiissannonkeha ikkara dandaanno. Isi hatto assineemmo gede koyisinonke. Isayaasi coyiꞌrinori tenne leellishanno; isi “[Yihowara] fooliishsho uyitinoonte” yiino. (Isa. 62:7) Hatto yaa mayyaate? Yihowa hinge hinge huucciꞌra hasiissannonke; hatto assineemmoha ikkiro Yihowara fooliishsho hoꞌlinanni heeꞌnoommohu gedeeti. Isayaasi coyiꞌrinori Yesuusi Luqaasi 11:8-10, 13 huuccattote daafira lawishshunni kulinore qaangeemmo gede assannonke. Hakkiicho Yesuusi ‘qarrinse’ huucciꞌneemmo gedenna qullaawa ayyaana afiꞌrate agurrummokki ‘huucciꞌneemmo’ gede jawaachishinonke. Qoleno, Yihowa danchare doodhineemmo gede kaaꞌlannonke biddishsha aankera huucciꞌra dandiineemmo.
YIHOWA MASSAGANNONKE
8. Isayaasi 30:20, 21 noo masaalo hundi yannara woꞌmitinohu hiittoonniiti?
8 Isayaasi 30:20, 21 (NW) nabbawi.c Baabiloonootu mitto dironna darate Yerusaalame doyissitu yannara, Yihudu mannira iillino qarri insara sagaletenna wayi gede rosamino qarra ikkino. Kayi kiiro 20 nna 21 kultannonte gede Yihudu manni maaro eironna akatansa biddi assiꞌriro Yihowa gatisansara qaale eino. Isayaasi, Yihowa “Bayira Rosiisaancho” ikkino daafira, Iso hagiirsiisanno garinni magansidhanno gara rosiisannonsata kulinonsa. Yihudu manni qafadotenni fuli yannara tini masaalo woꞌmitino. Yihowa Bayira Rosiisaanchonsa ikkinota leellishino hattono Yihowa biddishshi garinni Yihudu manni xalala magansiꞌra wirro xinta dandiino. Xaa yannarano Yihowa Bayira Rosiisaanchonke ikkino daafira baraaꞌnoommoreeti.
9. Xaa yannara Yihowa rosiisannonketi mitte doogo hiittenneeti?
9 Isayaasi konni qummeeshshira, ninke rosaanote gede ikkinoommotanna Yihowa lame doogonni rosiisannonketa coyiꞌrino. Isayaasi umo, “Bayira Rosiisaanchokki illekkinni laꞌꞌatto” yiino. Konni lawishshira rosiisaanchu rosaanosira albaanni uurre noohu gede assine xawinsoonni. Xaa yannara Yihowawiinni rosa ninkera lowo qoossooti. Yihowa rosiisannonkehu hiittoonniiti? Dirijjitesi widoonniiti. Yihowa dirijjite xawe leellanno biddishsha uyitannonke daafira tini hagiirsiissannonke! Songote gambooshshinna qoqqowu gambooshshi widoonni, borronke widoonni, JW Biroodikaaste widoonninna wole doogganni ronseemmo rosi, hagiirrinke baikkinni iillannonke qarra dandiine saꞌneemmo gede kaaꞌlannonke.
10. Yihowa huuro ‘badhenkeenni’ macciishshineemmohu ma garinniiti?
10 Isayaasi Yihowa rosiisannonketa layinki doogo kulanni, “Maccakki badhekkiinni . . . huuro macciishshitanno” yiino. Isayaasi kowiicho Yihowa rosaanosira badheenni haꞌranni hadhanno doogo kulanno rosiisaanchi gede asse xawisino. Xaa yannara Yihowa huuro badhenkeenni macciishshineemmo. Hiittoonni? Maganu Qaale qullaawu ayyaaninni borreessinoonnihu lowo yannara albaanniiti. Hakko daafira Maganu Qaale nabbambeemmo woyite Yihowa huuro badhenkeenni macciishshinanni heeꞌnoommohu gedeeti.—Isa. 51:4.
11. Hagiirrinke baikkinni heeꞌrate maa maa assa hasiissannonke? Mayira?
11 Yihowa dirijjitesinna Qaalisi widoonni rosiisannonke rosinni woꞌmunni woꞌma horo afiꞌra dandiineemmohu hiittoonniiti? Hanni Isayaasi coyiꞌrinota lame hedo laꞌno. Isi umo “doogo tenneeti” yiino. Hakkiinni, “kawaanni higge haꞌri” yiino. (Isa. 30:21, NW) “Doogo” afa calla diꞌꞌikkitanno. Ise aana “haꞌra” hasiissanno. Qaalisinna dirijjitesi widoonni Yihowa maa assinammora hasiꞌrannoro ronseemmo. Qoleno ronsoommore loosu aana hosiisa dandiineemmo gara ronseemmo. Hagiirrinke baikkinni Yihowara soqqammanni heeꞌrate konne lamenka coye assa hasiissannonke. Yihowa atoote afiꞌneemmohu hatto assinummoro callaati.
YIHOWA MAASSIꞌRANNONKE
12. Isayaasi 30:23-26 kultanno garinni Yihowa mannasi maassiꞌrinohu hiittoonniiti?
12 Isayaasi 30:23-26 nabbawi. Tini masaalo Baabiloonete qafadonni Yerusaalame higinohu Yihudu mannira woꞌmitinohu hiittoonniiti? Insa maalaamitteteno ayyaanaamitteteno falahino atoote afidhino. Yihowa lowota maalaamittete sagale oye mannasi maassiꞌrino. Wolu baalunkunni roore sunu sununni xalala magansiꞌra galagalte xintantanno gede asse falakkinota ayyaanaamittete sagale afidhanno gede assinonsa. Maganu manni hattee yannara afiꞌrinohu ayyaanaamittete atooti hakkuyira albaanni afiꞌre diegenninoho. Kiiro 26 kultannonte gede Yihowa ayyaanaamittete xawaabbi albinni roore xawanno gede assino. (Isa. 60:2) Yihowa atooti ‘soqqamaanosi wodaninsa hagiidheenna’ jawaante afidhe hagiirrinsa baikkinni soqqantanno gede kaaꞌlinonsa.—Isa. 65:14.
13. Xalala magansiꞌra wirro xintate daafira kultanno masaalo xaa yannara woꞌmitinohu hiittoonniiti?
13 Xalala magansiꞌra wirro xintantinota kultanno masaalo xaa yannara ninke kaaꞌlitanno? Ee kaaꞌlitannonke. Ma garinni? Lowo miliyoone ikkanno manni 1919 M.D. kayise Bayira Baabiloone yaano alamete doyichote kaphu ammaꞌno qafado giddonni fulino. Kuni manni hakkiinni fule eino bayichi Israeele eꞌinota Hexxote Gobba lowo geeshsha roorannoho. Kuni manni ayyaanaamittete gannate eino. (Isa. 51:3; 66:8) Tini ayyaanaamittete gannate maati?
14. Ayyaanaamittete gannate maati? Xaa yannara hakko heedhannori ayeooti? (Harancho Xawishsha lai.)
14 Buuramino Kiristaani 1919 M.D hanafe ayyaanaamittete gannate giddora eanni no.d Gedensoonni uullate aana heeꞌrate hexxo noonsari yaano wolu geꞌreewi wido ikkitinorino, tenne ayyaanaamittete gannate eꞌe falahinoha Yihowa atoote afidhino.—Yoh. 10:16; Isa. 25:6; 65:13.
15. Ayyaanaamittete gannate noohu hiikkooti?
15 Xaa yannara ayyaanaamittete gannate noohu hiikkooti? Yihowa magansiꞌranno manni noohu uulla woꞌmateeti; hakko daafira insa nooti ayyaanaamittete gannate noohu alame woꞌmateeti. Konnira, xaa yannara uullate aana heeꞌneemmo bayichi ikkihano ikkiro, halaalu magansiꞌrara kaaꞌlammummo geeshsha ayyaanaamittete gannate giddo heeꞌra dandiineemmo.
Mittu mittunku ayyaanaamittete gannate biinfilli lexxanno gede kaaꞌla dandiineemmohu hiittoonniiti? (Gufo 16-17 lai)
16. Woꞌmanka woyite ayyaanaamittete gannate biinfille laꞌꞌa dandiineemmohu hiittoonniiti?
16 Ayyaanaamittete gannate giddo heeꞌrate hasiisanno coyi giddo mittu, alamete doyichora noota Kiristaanu songo woꞌmanka woyite naadate. Tenne assa dandiineemmohu hiittoonniiti? Ammanate roduuwinketa guuntete xeꞌnensa ikkikkinni biinfillensa iillachinsheeti. (Yoh. 17:20, 21) Hatto assa hasiissannota ikkitinohu mayiraati? Hanni mitto lawishsha laꞌno. Mitte biifado paarke giddo addi addi haqqe heedhannoti egennantinote. Hatteente gede xaa yannara songuwate giddono addi addi roduuwi no. (Isa. 44:4; 61:3) Illachisha hasiissannonkehu “paarkete” biinfilleeti ikkinnina mulenke noote mitte mittente “haqqicho” muso diꞌꞌikkino. Ninke uminketinna songote giddo nooriti wolootunniti guuntete xeꞌne mittimma noote alamete doyicho songo biinfille laꞌneemmokki gede assitankera wodha dihasiissannonke.
17. Mittu mittunku songote mittimma kaajjite heedhanno gede kaaꞌlate ma assa dandiineemmo?
17 Mittu mittunku songote mittimma kaajjite heedhanno gede kaaꞌla dandiineemmohu hiittoonniiti? Keere kalanqeemmore ikkineeti. (Mat. 5:9; Rom. 12:18) Woꞌmanka woyite, songote giddo noori ledo dancha aante heedhannonke gede assiꞌneemmoha ikkiro, ayyaanaamittete gannate biinfilli lexxanno gede assineemmo. Mitto mittonka ayyaanaamittete gannate giddora abbinonkehu Yihowa ikkinota dea dihasiissannonke. (Yoh. 6:44) Yihowa muxxe soqqamaanosi mereero albinni roore keerunna mittimma heedhanno gede assate sharrammanna laꞌꞌanno woyite mageeshsha hagiidhannoro hanni hedi!—Isa. 26:3; Hag. 2:7.
18. Duucha woyite hiinca hasiissannonke coyi maati? Mayira?
18 Maganu soqqamaanosira aanno atootinni woꞌmunni woꞌma horo afiꞌra dandiineemmohu hiittoonniiti? Maganu Qaalinni hattono Qullaawu Maxaafi aana xintantino borruwankenni xiinxallinoommore seekkine heda hasiissannonke. Konni garinni xiinxallanna hiinca, songote giddo noori ledo ‘rodiimmate baxillinni baxammeemmo’ gede assitannota Maganu baxanno akatta lossiꞌrate kaaꞌlitannonke. (Rom. 12:10) Xa afiꞌnoommo atoote hiincineemmo woyite Yihowa ledo noonke jaaloomi kaajjanno. Yihowa albillitte qixxeessinonke atoote hiinca, isira hegerera soqqammanni heeꞌrate hexxonke xabbe leeltannonke gede assitannonke. Kuni coyi baalu xaa yannara Yihowara hagiirrunni soqqammeemmo gede kaaꞌlannonke.
CINCITINE HEEꞌRATE MURCIDHE
19. (a) Isayaasi 30:18 kultanno garinni huluullammeemmokki coyi maati? (b) Hagiirrinke baikkinni heeꞌneemmo gede kaaꞌlannonkeri maati?
19 Yihowa tenne busha alame hunanno woyite ninke gatisate “kaꞌꞌanno.” (Isa. 30:18, NW) Yihowa ‘taashshote Magano’ ikkino daafira Sheexaanu alame baꞌꞌa hasiissannose barrinni saꞌe mitto barra nafa heedhanno gede assannokkita addaxxa dandiineemmo. (Isa. 25:9) Hakku gatote barri daa geeshsha Yihowa cincine agadhineemmo. Hakka geeshsha kayinni huuccattote qoossonke naadate, Maganu Qaale xiinxallatenna loosu aana hosiisate hattono afiꞌnoommo atoote hiincate murciꞌno. Hatto assineemmoha ikkiro Yihowa hagiirrinke baikkinni isira soqqammanni heeꞌneemmo gede kaaꞌlannonke.
FAARSO 142 Hexxonke Seekkine Cuꞌmiꞌno
a Konni birxichira, Yihowa mannisi qarra ikkannori heeꞌrirono hagiirrinsa baikkinni cince saꞌꞌanno gede kaaꞌlannonsata sase doogo laꞌneemmo. Kuri coyibba daafira roore afate Isayaasi fooliishsho 30 xiinxallineemmo. Tenne fooliishsho xiinxallineemmo woyite Yihowa huucciꞌra, Qaalesi xiinxallanna xaano ikko albillitte afiꞌneemmo atoote hiinca hasiissannota ikkitinota huwanteemmo.
b Isayaasi 30:18, 19 (NW): “Ikkollana, Yihowa ayirrisaꞌnera cincatenni agadhe no; qoleno maaraꞌnera kaꞌꞌanno. Korkaatuno Yihowa taashshote Maganooti. Hexxotenni iso agadhitannori baalunku hagiirraammaho. Mannu Yerusaalamete heeꞌranno yannara diwiꞌlitinanni. Kaaꞌlo afiꞌrate raartinanni woyite isi mararannoꞌne; raareꞌne macciishshanni heeꞌrenni dawaro qolannoꞌne.”
c Isayaasi 30:20, 21, (NW): “Yihowa qarru timanna gadadu waa aannoheha ikkirono, Bayiru Rosiisaanchikki xaate isonooto atewiinni dimaaxanno, atino Bayira Rosiisaanchokki illekkinni laꞌꞌatto. Qiniitira higge haꞌra hasiissuhero woy gurara higge haꞌra hasiissuhero, maccakki badhekkiinni, ‘Doogo tenneetina, kawaanni higge haꞌri’ yitanno huuro macciishshitanno.”
d HARANCHO XAWISHSHA: “Ayyaanaamittete gannate” Yihowa mittimmatenni magansiꞌnanni teense heeꞌneemmo baseeti. Tenne basera kaphu ammaꞌno rosi kisinokkita falakkinota ayyaanaamittete sagale afiꞌneemmo; qoleno, kassi assannohu Maganu Mangisteha dancha duduwo duduwate loosi noonke. Yihowa ledo muli jaaloomi noonke; qoleno ammanate roduuwinke ledo salaametenni heeꞌneemmo. Insa hagiirrinke baikkinni iillannonke qarra dandiine saꞌneemmo gede kaaꞌlitannonke. Ayyaanaamittete gannate eꞌneemmohu Yihowa garunni magansiꞌra hananfummorootinna isi lawishsha harunsate dandiinummore baala assinummorooti.