Yihowa ‘Jaalaꞌya’ Yiinosi

1, 2. (a) Mannu ooso Maganu jaala ikka dandiitannota mayinni anfeemmo? (b) Konni birxichira maa ronseemmo?

ILAMMUMMOHUNNI kayise reyinammo geeshsha baxillu hasiisannonke. Ee, manchu beettira baxillu lowo geeshsha hasiisannosi. Mannu ledo jaalooꞌmanna aana lowo geeshsha hasiꞌneemmo. Ikkollana wolu baalunkunni roore hasiisannonke baxilli no; hakkuno Yihowa baxilleeti. Batinyu manni, duuchanka dandaannohunna illete leellannokkihu iima heeꞌranno Magani ledo muli jaalooma kalaqiꞌra dandiinannikkihu gede asse hedanno. Ninkera hattoo hedo noonkeni? Horonta dinonke!

² Qullaawu Maxaafi guuntete xeꞌne noonsa manni Maganu jaala ikka dandaannota kulannonke. Togoo jaaloomi heeshshonke giddo lowo geeshsha hasiisannonke daafira insa lawishsha seekkine heda hasiissannonke. Togoo jaalooma kalaqiꞌre kaajja lawishsha ikkannonkehu Abirahaamiiti. (Yaaqoobi 2:23 nabbawi.^[1]) Abirahaami Yihowa ledo togoo jaalooma kalaqiꞌrinohu hiittoonniiti? Tennera kaaꞌlinosihu mittu qaru coyi ammanate. Isinni Qullaawu Maxaafi iso “ammana noonsarira baalaho annaho” yaanno. (Rom. 4:11) Hanni Abirahaami ammanasi Maganu ledo muli jaalooma kalaqiꞌranno gede kaaꞌlitinosi gara laꞌno. Qoleno ninkeneeto, ‘Abirahaami ammana harunsanna Yihowa ledo nooe jaaloomi lexxanno gede assiꞌra dandeemmohu hiittoonniiti?’ yine xaꞌma hasiissannonke.

ABIRAHAAMI YIHOWA JAALA IKKINOHU HIITTOONNIITI?

3, 4. (a) Abirahaami ammana fonqolinoha buutote coye xawisi. (b) Abirahaami Yisaaqi kakkalo asse shiqishate maahoyye yiinohu mayiraati?

³ Hanni ilaala gooddiꞌranni noo geercho hedi. Tini haꞌrinsho heeshshosi giddo wole baalantenni roore kabbaade ikkitusikki digattino. Haꞌrinsho kabbaade ikkitinosihu geedhino daafira diꞌꞌikkino. Hakkawote Abirahaamira mito 125 diro ikkannosi; ikkirono jawaantesi dibaꞌino.^[2] Ledosi noohu aja beettooti; konni beettira 25 diro ikkisikki digatino. Hakku beettosi Yisaaqiiti; isi giirranni haqqe duhe no. Abirahaami qole billawanna giira haaꞌre no. Yihowa iso beettokki kakkalo assie yiinosi!—Kal. 22:1-8.

⁴ Hakkawote Abirahaamira ammanasi fonqolannohu buutote coyi tuncu yiinosi. Mitu manni Maganu Abirahaami hatto assanno gede hajajinohura kaajjadoho yee coyiꞌranno; wolu qole Abirahaami hatto assinohu gari-garimmo laikkinniiti hattono beettosi baxannokki daafiraati yaanno. Insa hatto yite coyidhannohu ammana noonsakki daafiraatinna ammana maatiro huwattinokkihuraati. (1 Qor. 2:14-16) Abirahaami Maganoho hajajaminohu gari-garimmo laikkinni diꞌꞌikkino. Hatteentenni isi hajajaminohu laino coyi noohuraati. Abirahaami ammana noosihura iimi Annisi Yihowa soqqamaanosi hegerera gawajjannonsare asse yaannonsakkita huwatino. Isi Yihowara hajajamiro Maganisi isono muxxe beettosi Yisaaqino maassiꞌrannonsata afino. Abirahaamira togoo ammana heedhannosi gede assinosiri maati? Egennotenna woꞌnaalshaho woy heeshshosi giddo laino coyeeti.

5. Abirahaami Yihoware rosinohu aye widoonni ikkara dandaanno? Hatti egenno maaho kaaꞌlitinosi?

⁵ Egenno. Abirahaami lophinohu kaphu maganna magansiꞌrannohu Kelediyu manni katamira Uurira ikkirono Yihowa afino. Annisi Taara kaphu maganna magansiꞌrannoha ikkina, Abirahaami Yihowa afinohu hiittoonniiti? (Iya. 24:2) Qullaawu Maxaafi tenne bade dikulanno; ikkirono Seeminni hananfe kiirriro Abirahaami honsikki ilama ikkinota huwachishannonke; Seemi Nohi beettootinna jawaata ammana noosi manchooti. Seemi Abirahaamira mito 150 diro ikkasi geeshsha lubbote no. Abirahaamira Yihoware rosiisinosihu Seemiitiro bande dianfoommo. Ikkollana Seemi Yihowa daafira afinore maatesira rosiisino yine hedanke garaho. Hakku rosi mite doogonni Abirahaamira iillikki digatino; hatti egenno wodanasi kakkayissino. Isi Maganu daafira rosihu gedensaanni iso baxa hanafino; hattono afiꞌrino egenno ammanasi kaajjishiꞌranno gede kaaꞌlitinosi.

6, 7. Abirahaami afiꞌrino woꞌnaalshi ammanasi jawaachishinohu hiittoonniiti?

⁶ Woꞌnaalsha. Abirahaami Yihowara noosi ammana jawaattanno gede assanno woꞌnaalsha afiꞌrinohu hiittoonniiti? Mitu manni, hendeemmo coyi giddonke mitturi macciishshamannonke gede assanno, hatti macciishshantannonke hedo qolte mitto coye assineemmo gede kakkayissannonke yaanno. Abirahaami Yihowa daafira rosinori “Duuchunkura Aliidi Maganonna iimanna uulla Kalaqaancho Yihowa” lowo geeshsha ayirrisanno gede kaaꞌlinosi. (Kal. 14:22) Qullaawu Maxaafi tenne ‘Magano waajjate’ yaanno; tini qolte Maganu ledo muli jaalooma kalaqiꞌrate lowo geeshsha hasiissannote. (Ibi. 5:7; Far. 25:14) Togoo waajja Abirahaami Maganu yiinosire assanno gede kakkayissinosi.

⁷ Maganu, Abirahaaminna Saara Uuri gobbanni fulte wole gobba hadhanno gede hajajinonsa. Insa gatinoha heeshshonsa diro dunkaanaho heedhanno. Abirahaami hajajamasi Yihowa maassiꞌrannosinna agarannosi gede assitino. Lawishshaho, Abirahaami xuma ikkitinota minaamasi Saara wolu manni adhe iso shaannosiha lawinosi daafira waajjino woti no. Hige waajjasi garankolla; ikkirono Abirahaami togoo yaaddo Yihowara hajajamannota hooltasira diwodhino. Konnira Yihowa Abirahaaminna Saara lame sase hige maalaletenni gawajjotenni agarinonsa. (Kal. 12:10-20; 20:2-7, 10-12, 17, 18) Abirahaami heeshshosinni afiꞌrinohu kuni woꞌnaalshi ammanasi jawaattanno gede assinosi.

8. Yihowa ledo noonke jaaloomi lexxanno gede assitanno egennonna woꞌnaalsha afiꞌra dandiineemmohu hiittoonniiti?

⁸ Ninke Yihowa ledo jaalooꞌma dandiineemmo? Ee, dandiineemmo! Tennera kaaꞌlitannonke egennonna woꞌnaalsha qarrammummokki afiꞌra dandiineemmo. Qullaawu Maxaafi giddo noote lowo hayyo giddo Abirahaamira noositi shiimatella. (Dan. 12:4; Rom. 11:33) Maganu Qaali “iimanna uulla Kalaqaancho” seekkine afatenna iso ayirrinseemmonna banxeemmo gede kaaꞌlitannonketa lowo jiro amadino. Magano ayirrinsenna banxe hajajammeemmosiha ikkiro, isira hajajama kaaꞌlitanno gara laꞌneemmo daafira woꞌnaalshu heeꞌrannonke. Amaalesi gawajjotenni agartannota, hattono isi maassiꞌrannonketanna jawaante aannonketa huwanteemmo. Maganoho woꞌmu wodaninni soqqama harshammo, salaamenna hagiirre uyitannota anfeemmo. (Far. 34:8; Law. 10:22) Togoo egennonna woꞌnaalshinke lexxanni haꞌranno wote, Yihowara noonke ammananna isi ledo noonke jaaloomino hattonni lexxanni haꞌranno.

ABIRAHAAMI MAGANU LEDO NOOSI JAALOOMA AGADHE HEEꞌRINO GARA

9, 10. (a) Jaaloomu jawaate heeꞌranno gede mayi hasiisanno? (b) Abirahaamira Yihowa ledo noosi jaaloomi lowore ikkinotanna isi hakkonne jaalooma agadhe heeꞌrinota leellishannori maati?

⁹ Jaaloomu muxxe jirooti yaa dandiinanni. (Lawishsha 17:17 nabbawi.^[3]) Ikkollana, jaaloomu hidhine kaꞌne mitto bayicho worre agurranni uduunnichi gede diꞌꞌikkino. Jaaloomu seye heeꞌranno gede towaanyonna agarooshshu hasiisannosi; hakko daafira heeshsho afiꞌrinori gedeeti yaate. Abirahaamira Yihowa ledo noosi jaaloomi loworeeti; qoleno konne jaaloomasi baꞌannokki gede agadhe heeꞌrino. Isi konne assinohu hiittoonniiti?

¹⁰ Abirahaami, alba Magano waajjenna hajajame heeꞌroommo heeshsho ikkitino yee dihedino. Isi halaꞌlado maatesi ledo Kanaani gobba haꞌri yannara, shiimaaddano jajjabba coyeno assanno wote Yihowa biddishsha harunsa diagurino. Yisaaqi ilamara mittu diri albaanni, Abirahaami 99 dirihu noo waro, Yihowa Abirahaami mine noo labballi woꞌmunku barcimanno gede hajajino. Hakkawote Abirahaami hattee hajajo huluullaminoni? Woy Hajajamikki saꞌꞌanno faro hasiꞌrinoni? Deeꞌni; isi Magano addaxxe hattee hajajo “hakko barranni” wonshino.—Kalaqo 17:10-14, 23.

11. Abirahaami Soddoomunna Gomooru katamma daafira yaadinohu mayiraati? Yihowa iso kaaꞌlinohu hiittoonniiti?

¹¹ Abirahaami shiimare lawanno coyira nafa Yihowara hajajamate rosichi noosi daafira, Maganu ledo noosi jaaloomi seyenna suꞌnee heeꞌrino. Isi wodanisira noo hedo Yihowara fushshe hasaapha diwaajjino; qoleno Magano huluullite dhibbinosi xaꞌmuwa xaꞌmino. Lawishshaho, Maganu Soddoomunna Gomooru katamma hunara kainota afi wote, keeraanono bushuullu ledo baꞌakka yee yaadino. Abirahaami miteekke hatte yannara Soddoomu katamira noohura rodiisi beettira Looxi daafira yaadinoha ikkara dandaanno. Abirahaami noosi xaꞌmo xaꞌminohu lowo shooshanqenninna “uulla woꞌmate Daanya” ikkino Magano addaxxannota leellishanno garinniiti. Yihowa yoote yannara nafa maaranno Maganonna keeraano ikkitinore gatisate mannu baalunku wodana laꞌꞌannoha ikkinota Abirahaamira cince rosiisinosi.—Kal. 18:22-33.

12, 13. (a) Abirahaami afiꞌrino egennonna woꞌnaalshi gedensoonni kaaꞌlinosihu hiittoonniiti? (b) Abirahaami Yihowa addaxxinota leellishannori maati?

¹² Abirahaami afiꞌrino egennonna woꞌnaalshi baalunku Yihowa ledo noosiha muli jaalooma agadhe heeꞌranno gede kaaꞌlinositi egennantinote. Hakko daafira gedensoonni kabbaade fonqoli tuncu yiisi wote yaano, Yihowa beettosi kakkalo asse shiqishanno gede xaꞌmisi yannara, iima noo Jaalisi akatta hiinca dandaanno. Hanni tenne kuni ammanamino manchi Mooriyaho ilaala gooddiꞌri yannara ikkino coyiwa hingo. Hakkawote Abirahaami Yihowa hedeweelcho soorrame godowa kaajjado ikkino yee hedinoni? Isi horonta hatto asse dihedino! Tenne mayinni anfeemmo?

¹³ Abirahaami ledosi noo soqqamaanosiwiinni baxxi wote togo yiinonsa: “Kiꞌne harrichu ledo kowiicho agarre; qaaqqunna ani kayinni kaaira haꞌne magansiꞌne hingeemmo.” (Kal. 22:5) Abirahaami hatto yaasi mayyaate? Yisaaqi kakkalo ikkannota afanni heeꞌrenni higanno yee soqqamaanosi doganni no yaateni? Deeꞌni. Qullaawu Maxaafi Abirahaami hakkawote maa hedinoro huwatate kaaꞌlannonkere kulannonke. (Ibiraawuyaani 11:19 nabbawi.^[4]) Abirahaami “beettosi Maganu reyotenni nafa kayisara dandaannota wodanchino.” Ee, Abirahaami kao noota ammanino. Isi Yihowa isinna Saara geedhi gedensaanni nafa ila dandaanno gede kaaꞌlinonsata afino. (Ibi. 11:11, 12, 18) Abirahaami Yihowara hoogamannosiri mitturino nookkita huwatino. Hakko daafira, hakkoye kabbaade barra ikkiri ikkirono, Yihowa eino qaali baalunku woꞌmanno gede baxanno beettisi galagale heeshsho afiꞌrannota Abirahaami dihuluullamino. Ee, Abirahaami “ammana noonsarira baalaho [annaho]” yaamamasi garankolla!

14. Yihowara soqqamatto wote qarra ikkannoheri maati? Abirahaami lawishshi kaaꞌlahera dandaannohu hiittoonniiti?

¹⁴ Ninkena? Xaa yannara, Maganu Abirahaami assi yiire asse yaannonkekkiti egennantinote. Ikkirono, isi hajajosi wonshate shota ikkitannonkekki woteno woy mitto coye mayira asse yiinonkero anfeemmokki woteno hajajammammora hasiꞌranno. Maganu hajajo giddo wonshate qarrissinoheti no? Mitu roduuwira, sabbaka qarrissansara dandiitanno. Togoo roduuwi miteekkite manna ille qasse laꞌꞌa waajjitannohura affinokki manna coyishiishshe dancha duduwo kula kabbaade ikkitansara dandiitanno. Wolu roduuwi kayinni rosu mine woy loosu bayicho wolootuwiinni baxxite leella qarra ikkitansara dandiitanno. (Wol. 23:2; 1 Tes. 2:2) Aterano Abirahaami gede Mooriyaho ilaala gooddidhanni noottoha woy wolqakkira aleenni ikkinore assate woꞌnaaltanni noottoha lawannohe woti no? Hatto ikkiro, Abirahaaminna ammanasi hedde jawaati. Ammanamino manni lawishsha hiincanke insa faale haꞌneemmo gedenna Yihowa Jaalanke assiꞌne isiwa shinqeemmo gede kaaꞌlitannonke.―Ibi. 12:1, 2.

ATOOTE ABBANNO JAALOOMA

15. Abirahaami Yihowara hajajamanni heeꞌrasinni horonta gaabbinokkita mayinni anfeemmo?

¹⁵ Abirahaami Yihowara hajajamanni heeꞌrino daafira gedenoonni gaabbinoha lawannohe? Hanni Qullaawu Maxaafi heeshshosi jeefore kulanni yaannore lai: “Abirahaamira foolisi qocci yii; isi geedhe, dancha heeshsho heeꞌre, lowo diro ikkeennasi reyi.” (Kal. 25:8) Abirahaami 175 diro ikkisita daafurino; ikkirono, isi heeꞌrino heeshsho hedanno wote hagiidha dandaanno. Isi heeshshosi giddo Maganu Yihowa ledo noosi jaalooma balaxisiisino. Ikkollana, Abirahaami “geedhe, dancha heeshsho heeꞌre” reyino yaa, heeshsho duuwe reyino daafira galagale heeꞌra dihasiꞌranno yaate yine heda dihasiissannonke.

16. Abirahaami Gannatete mayi hagiirre afiꞌranno?

¹⁶ Qullaawu Maxaafi Abirahaamire kulanni togo yaanno: “Isi Maganu xintinonna kalaqinoha addu xinta afiꞌrino katama agadhino.” (Ibi. 11:10) Abirahaami barrunni mitto barra hakkonne katama yaano uulla gashshitannota Maganu Mangiste laeemmo yee hexxanni heeꞌrino; qoleno laꞌꞌasi digattanno! Abirahaami Gannate ikkitino uullara galagale heeꞌranno wotenna Yihowa ledo noosi jaalooma lede kaajjishiꞌranno wote hagiidhanno gara heda dandaatto? Isi ammanasi lowo kume diro Yihowa soqqamaanora jawaante ikkitino gara afanno wote mageeshshi geeshsha hagiidhannoro hanni hedi! Qoleno, isi Gannatete heeꞌranno wote Yisaaqi galagale isiwa higino gari hakkiinni roorino coyira “lawishsha” ikkinota huwatanno. (Ibi. 11:19) Hakkiinni saeno, isi Yisaaqi kakkalo assara kai wote xissiisiꞌrino xisso lowo miliyoone ikkannohu ammanamino manni Yihowa Beettosi Yesuusi Kiristoosi wodo asse uyinke wote macciishshantinosi xisso hedanno gede kaaꞌlitinota afanno. (Yoh. 3:16) Abirahaami lawishshi wodote kakkalo roore naandeemmo gede kaaꞌlinonke; tini kakkalo taalle nookki baxille leellishshannote!

17. Maa assate murcidhe kaootto? Aananno birxichira maa laꞌneemmo?

¹⁷ Ninke baalunku ammanatenni Abirahaami lawate murciꞌne kaꞌno. Isi gede ninkerano egennonna woꞌnaalshu hasiisannonke. Yihowa albinni roore anfanni haꞌneemmo wotenna isira hajajammeemmo wote, isi maassiꞌrannonkenna agarannonke gara laꞌneemmo. (Ibiraawuyaani 6:10-12 nabbawi.^[5]) Yihowa hegerera Jaalanke assiꞌno! Aananno birxichira, Maganoho muli jaala ikkinohu wolu sasu manni lawishsha laꞌneemmo.