Galteꞌne Yihowa Jawaachishannonna Agaranno Gede Assidhe

“Yihowa katama agara hoogiro, agaraanchu beebba goxikki galanno.”—FAR. 127:1⁠b.

1, 2. (a) Lemiina shoole kume ikkitanno Isiraeele dhagge ikkino atoote afidhukki gattinohu mayiraati? (b) Tini hundi xagge ninkera kaaꞌlitannonkehu hiittoonniiti?

HUNDA Isiraeelete daga Hexxote Gobba eꞌara shiimuri gate heeꞌreenna, lowo kume ikkitanno labballi “Moaabi meenti ledo foortino.” Konni korinni Yihowa 24,000 ikkitanno Isiraeele shee gudino. Hakkawote Isiraeele lowo diro agadhite keeshshitino raggensa afiꞌrate lowo geeshsha gambisse marte no; kayinni fatanaho anga uyitino daafira dhagge ikkanno atoote afidhukki gattino.—Zeh. 25:1-5, 9.

² Tini dadillissanno xagge borreessantinohu “diru goofimarchira heeꞌnoommorira ninkera qorowishsha ikkitanno gedeeti.” (1 Qor. 10:6-11) “Goofimarchu barruwa” gooffe dagginote tenne yannara, Maganu soqqamaano haaro alame eate gaxaho no. (2 Xim. 3:1; 2 Phe. 3:13) Ikkollana, mite Yihowa soqqamaasine amanyootu seera lashshi assitino; tini dadillissannote. Insa foorrete woshshaadonni amadante amanyootu maaeelle abbitannoha buutote qarra mixxitino. Qolteno, maaro eꞌannokkiha ikkiro hegere heeshsho hexxo hooggara dandiitanno.

3. Adhantinorira Yihowa biddishshinna agarooshshi hasiisannonsahu mayiraati? (Umi misile lai.)

³ Yannankera alamete aana foorre batidhino daafira, minaannuwunna minaamuwu galtensa agadhate sharrantanno sharro seekkanno gede Yihowa biddishshinna agarooshshi hasiisannonsa. (Faarso 127:1 nabbawi.a) Konni birxichira adhantinori wodanansa agadhite, Maganunniwa shiqqe, haaro mannimma uddidhe, mimmitu ledo garunni hasaabbenna galtete hasiisannore assite galtensa jawaachishiꞌra dandiitanno gara laꞌneemmo.

WODANAꞌNE AGADHE

4. Mito Kiristaana soorrote widira hige haꞌranno gede assinori maati?

⁴ Mittu Kiristaanchi sunu sununni foorrete widira hige haꞌrannohu hiittoonniiti? Buutote qarra abbitannota foorrete doogo haꞌra jammarannohu roore wote illesinniiti. Yesuusi togo yee xawisino: “Siimu xaadi simmeetesi kaꞌa geeshsha meyaata lae yorannohu baalunku hakkawote wodanisinni ise ledo soorrino.” (Mat. 5:27, 28; 2 Phe. 2:14) Batinyu Kiristaani soorrote widira hige haꞌrinohu, balaxe amanyootu seerira noonsa lao shoshshoggitanno gede assiꞌransanniiti; konne assinohu teeda baꞌino misilla lae, siimu xaadi simmeete kakkayissanno borro nabbawe, woy Interneetete aana siimu xaado faajjete leellishannore laeeti. Wolootu qolte siimu xaado faajjete leellishshanno filme, tiyaatire, woy televizhiinete pirogiraame laꞌino. Mitootu kayinni, hashsha woꞌma sirbinanni gallanni minira (hashshi kibabe), mullootu sirbinanni minnanna simmeete kakkayisanno garinni biso cuukkisiisiꞌnanniwa hadhino.

5. Wodananke agadha hasiissannonkehu mayiraati?

⁵ Mitootu kayinni fatanu giddora eꞌannohu towaanyo afiꞌrate galtensa agurte wolu manniwa higganno daafiraati. Heeꞌnoommo alamera mannootu hakkeeshshi geeshsha insaneeto diqeeꞌlitanno; hattono duuchunku gari foorre hagiirsiissannonsa. Qoleno, wodaninke guuntete xeꞌne noohanna hantaalaamo ikkino daafira galtenke ikkinokki mancho baxa jammarrammora dandiineemmo. (Ermiyaasi 17:9, 10 nabbawi.b) Yesuusi togo yiino: “Wodanu giddonni busha hedo, shoo, soorronna foorre fultanno.”—Mat. 15:19.

6, 7. (a) Hantaalaamu wodani cubbu doogo haꞌnanni gede assara dandaannohu hiittoonniiti? (b) Yihowa baddalatewiinni gata dandiinannihu hiittoonniiti?

⁶ Gara ikkitinokki yorto hantaalaamu wodani giddo rumuxxitu gedensaanni, mimmito baxa jammarinohu lamu manni galtensa ledo calla hasaawa hasiissannonsa coyibba kayise hasaawara dandaanno. Mulenni, lamunku albinni roore xaadate korkaata ikkannore kalaqiꞌranno; hattono hedeweelcho xaadinore lawe duucha hige xaadanno. Mimmitoho noonsa simmeete roore lexxitanni hadhanno wote, amanyootu dhukinsa shoshshogganni haꞌranno. Tenne cubbu doogo aana faffe hadhanno wote, assootinsa gara ikkinokkita affinoha ikkirono agure higa roore kabbaade ikkitannonsa.—Law. 7:21, 22.

⁷ Gara ikkitinokki yortonna hasaawi meessi galte ledo calla assinannire lawishshaho, mimmitoho anga amada, sunqama, mimmitoho biso amammada, hattono wole togoore assate deerra massannonsa wote, lamunku Yihowaha amanyootu seera horonta habbanno. Jeefoteno, ‘uminsa yorto goshooshsheennanna doggeenna fatanantanno.’ Yorto godobbu gedensaanni, “cubbo iltanno”; tini ikkitonsa iltanno cubbi foorrete. (Yaq. 1:14, 15) Tini lowo geeshsha dadillissannote! Lamunku mannooti galtete noonsa ayirrinyi baꞌꞌannokki gede Yihowa kaaꞌlannonsa gede assidhoommero konni garinni iso dibaddaltanno. Hiitto?

AYEWOTENO MAGANUNNIWA SHIQQE

8. Yihowa ledo jaalooꞌma amanyootu keeraanchimma agadhate kaaꞌlitannohu hiittoonniiti?

⁸ Faarso 97:10⁠a nabbawi.c Yihowa ledo jaalooꞌma amanyootenke agadhine heeꞌrate lowo geeshsha kaaꞌlitannonke. Maganunnite dhaggete akattare seekkine ronsummoro, ‘baxantino ooso gede iso lambeemmoha ikkiro, hattono baxillunni heeꞌneemmoha ikkiro,’ “foorrenna duuchunku gari batte” giwate dhuku heeꞌrannonke. (Efe. 5:1-4) Adhantinori “Maganu fooraasinenna soorraasine [faradannota]” affino daafira, galtensa ayirrinyu nootanna batte nookkita assiꞌrate baasa sharrama hasiissannonsa.—Ibi. 13:4.

9. (a) Yooseefi amanyootu fatana qeelinohu hiittoonniiti? (b) Yooseefi xaggenni maa ronseemmo?

⁹ Maganu soqqamaano giddo mitootu, ledonsa loosannohu Yihowa Farciꞌraasine ikkinokki manni ledo loosu saate gedensaanni aantanni amanyootu dhukinsa shoshshogganno gede assidhino. Loosu saatera nafa fatana ikkannori kalaqamara dandaanno. Xumu beetti Yooseefi loosiisaanchisi galte isira baasa mirgitinota afinohu loosu aana heeꞌreeti. Isi ledose fooranno gede assate barru barrunku wotto wortinosi. Hakkiinnino jeefote, “ise uddanosi cuꞌmite amadde, ‘Ledoꞌya goxi!’ yitusi.” Yooseefi kayinni ise agure xooqino. Yooseefira konni fatani yannara amanyootu dhukisi shoshshoggannokki gede kaaꞌlinosiri maati? Isi amanyootesi agadhe ammanaminoha ikkanno gede assinosihu Maganu ledo noosi fiixooma agadhe heeꞌrate murciꞌre kaꞌꞌasiiti. Konninni kainohunni isi loososi hoogino, hattono usuramino; ikkirono Yihowa maassiꞌrinosi. (Kal. 39:1-12; 41:38-43) Loosu bayichono ikko wole aye baserano heeꞌnoommo wote, fatanu giddora eessara dandaanno coyiwiinni xeertiꞌneemmo.

HAARO MANNIMMA UDDIDHE

10. Haaro mannimma uddiꞌra amanyoote agadhate kaaꞌlitannohu hiittoonniiti?

¹⁰ Haaro mannimma “Maganu fajjo garinni kalaqantinotanna halaalaancho keeraanchimmanna ammanama ledo sumuu yitannota” ikkitino daafira, galte jawaata assiꞌrate baasa kaaꞌlitanno. (Efe. 4:24) Tenne haaro mannimma uddidhinori uullayidi bisu kifillansa giddo noo dooꞌꞌo ‘shitanno’; insano: “foorre, batte, quwa saꞌinota siimu xaadi hasatto, busha yortonna hafuurrete.” (Qol. 3:5, 6) “Shiiyye” yaanno qaali, gara ikkitinokkita maalu yorto eemadhate hasiisannore baalankare assa hasiissannonketa leellishanno. Galtenke ikkinokki manchira siimu xaadi hasatto heedhannonke gede assannonke coyi baalunkuwiinni xeertiꞌneemmo. (Iyo. 31:1) Maganu fajjo ledo sumuu yaanno garinni heeꞌneemmoha ikkiro, ‘bushare effiꞌne giwanna danchuri ledo quraanyama’ ronseemmo.—Rom. 12:2, 9.

11. Haaro mannimma uddiꞌra galte jawaata ikkitanno gede kaaꞌlitannohu ma garinniiti?

¹¹ Haaro mannimma uddiꞌnummoro, Yihowate gedee akatta heedhannonke. (Qol. 3:10) Minaanninna minaama “godowinni marara, shaqqille, shooshanqe, joongillenna cinca” uddidhe galtensa jawaata assiꞌransa lowo atoote afidhanno gede assitannonsa! (Qol. 3:12) Qoleno, lamunku ‘Kiristoosi salaame wodanansa illaallissanno’ gede assidhannoha ikkiro, galtensa roore mittimma noota ikkitanno. (Qol. 3:15) Addaho, adhantinori ‘mimmito lubbora baxansa’ lowo geeshsha kiissannote! Mimmito lubbora baxanno minaanninna minaama ‘kuꞌu koꞌoye ayirrisa’ diqarrissannonsa.—Rom. 12:10.

12. Galte hagiirru noota ikkitanno gede assitanno akatta hiikkuri labbannohe?

¹² Siidi yinanni minaanni, galtensa hagiirraame ikkitanno gede kaaꞌlinonsari maatiro xaꞌmineenna togo yiino: “Heeꞌrankera lowo geeshsha sharrammoommohu qaru akati baxilleho. Qoleno, joongillu lowo geeshsha kaaꞌlannota huwantoommo.” Minaamasi Sooniya tennera sumuu yite, “Shaqqillu lowo geeshsha hasiisanno akataati. Qoleno, woꞌmanka wote shota ikka hoogirono shooshaqoota ikkate woꞌnaalleemmo” yitino.

DANCHU GARINNI HASAABBE

13. Galte teessanno gede assiꞌrate kaaꞌlannohu mittu qaru coyi maati?

¹³ Galte teessanno gede assiꞌrate kaaꞌlitannote qara coyibba giddo mittu awu afiinni hasaawate. Mitu adhamino manni, egenninokki mancho, wole agurina saadansa ayirrinyunni coyishiishanno geeshsha mimmitoho dicoyiꞌranno; tini lowo geeshsha dadillissannote! Mereeronsa “effire giwa, hanqu, giirama, boolaqiꞌre coyiꞌranna xono” heedhuro sunu sununni mittimmansa baꞌanno. (Efe. 4:31) Minaanninna minaama duucha wote mimmito arrassanninna coyinni kisanni galtensa daafa agure, jaaloomansa jawaachishiꞌrate shaqqillu, shooshanqenna mararro noo qaale coyiꞌra hasiissannonsa.—Efe. 4:32.

14. Maa assatewiinni xeertiꞌra hasiissannonke?

¹⁴ Qullaawu Maxaafi “sammi yaate yanna no” yaanno. (Mek. 3:7) Hatto yaa kayinni galtenke ledo hasaawa agurre sammi sammi yineemmo yaa diꞌꞌikkitino; korkaatuno hasaawu galtete lowonta hasiisanno coyeeti. Jarmanete heedhannoti mitte minaama togo yitino: “Togoo wote sammi yaa galteꞌne lowo geeshsha dadillissara dandiitanno.” Qolteno togo yitino: “Yaachishanno coyi heeꞌranno yannara gaꞌlabbi yaa duuchanka wote shota ikka hooggurono, hanqine boolaqiꞌrano gara diꞌꞌikkitino. Hakkawote galtenke xissiisannore garri-garimmo laꞌnummokki coyiꞌnammora woy assinammora dandiineemmo; tini qolte coye roore huntanno.” Minaanninna minaama hanqe coyiꞌransa woy mimmitu ledo qahaminohu gede sammi sammi yaansa qarransa ditirtanno. Hatteentenni, kawa kaꞌaa higinonsa coye rahe tidhatenna gibbote deerra martukki higate woꞌnaaltannoha ikkiro galtensa jawaata ikkitanno.

15. Danchu garinni hasaawa minaanninna minaamara mittimmansa jawaachishshannohu hiittoonniiti?

¹⁵ Minaanninna minaama yanna gaaꞌmite hedonsanna simmeetensa mimmitoho kultannoha ikkiro mittimmansa jawaata ikkitanno. Coyiꞌneemmo coyi daafira hendeemmonte gede, coyiꞌneemmo garano seekkine heda hasiissannonke. Hakko daafira, coyi kawa kaꞌaa higannoꞌne wote nafa, danchunna shaqqadu afiinni coyiꞌrate woꞌnaalle. Hatto assitiniro, yitinannire macciishsha galteꞌnera shota ikkitanno. (Qolasiyaasi 4:6 nabbawi.d) Minaanninna minaama ‘jawaachishannoha dancha qaalenna galtensara kaaꞌlara dandaannore’ coyidhe dancha gede hasaawansa mereeronsa noo mittimma jawaachishshara dandiitanno.—Efe. 4:29.

Minaanninna minaama yanna gaaˈme mimmitu ledo hasaawanni no — Minaanninna minaama dancha gede hasaabbannoha ikkiro, mittimmansa jawaattanno (Gufo 15 lai)

GALTEꞌNERA HASIISANNORE ASSE

16, 17. Adhantinori galtensata simmeetetenna siimu xaadi hasatto dea hasiissannonsakkihu mayiraati?

¹⁶ Adhantinori uminsa hasattonni roorsite galtensara kaaꞌlannore laꞌannoha ikkiro mittimmansa jawaata ikkitanno. (Fil. 2:3, 4) Minaanninna minaama galtensata simmeetetenna siimu xaadi hasatto dea dihasiissannonsa.—1 Qorontoosi 7:3 nabbawi;e 1 Qor. 7:4.

¹⁷ Adhaminohu mitu manni mimmitunniwa gamba diyaanno; mitu labballi isinni meyaatera shaqqado ikka labballimma diꞌꞌikkitino yee hedanno; tini dadillissannote. Qullaawu Maxaafi togo yaanno: “Minaannuwa, ledoꞌne heeꞌranno minaamuwi noo gara huwata hasiissannoꞌne.” (1 Phe. 3:7, Filipsi) Galtete hasiisannore yinihu siimu xaado calla ikkinokkita minaanni huwata hasiissannosi. Minaama minaannise siimu xaadi yannara calla ikkikkinni wole yannarano isera shaqqadonna baxillaancho ikkiro, siimu xaadinni roore hagiidhitara dandiitanno. Lamunku mimmitunniwa gamba yaannorenna baxillu noonsare ikkiro, kuꞌu kuꞌuyita simmeetetenna siimu xaadi hasatto wonsha diqarrissannonsa.

18. Minaanninna minaama galtensa jawaata ikkitanno gede assiꞌra dandaannohu hiittoonniiti?

¹⁸ Galtete ammanama hoonganni gede assannohu gara ikkino korkaati nookkiha ikkirono, adhantinori mimmitoho shaqqadda ikka hoogansa galtensa wolu manchi baxille hasidhanno gede assitara dandiitanno. (Law. 5:18; Mek. 9:9) Konni daafira, Qullaawu Maxaafi adhamino manna togo yaanno: “Mite yanna geeshsha lamunku sumuu yitine ikkiro ikkinnina mimmitoho [hasiisannore] assa agurtinoonte.” Mayira? “Kiꞌneneeto qeeꞌla hooggineenna, Sheexaanu fatanannoꞌnekki gedeeti.” (1 Qor. 7:5) Adhantinori ‘insaneeto qeeꞌla hoogge’ Sheexaanu fatani kareennansa lamunku giddo mittu soorriro lowo geeshsha dadillisanno coyeeti! Mittu mittunku “umisi xiqime ikkikkinni wolunnita [hasannoha]” ikkironna galtete hasiisannore assa halaafinatu gede ikkikkinni baxille leellinshanni doogo ikkitino gede asse laꞌꞌannoha ikkiro, lamunku mimmitunniwa gamba yitanno daafira galtensa jawaata ikkitanno.—1 Qor. 10:24.

GALTEꞌNE JAWAATA ASSIꞌRA AGURTINOONTE

19. Maa assate murciꞌne kaꞌꞌa hasiissannonke? Mayira?

¹⁹ Haaro alame eate marre gaxaho heeꞌnoommo. Konni daafira, maalu yorto qeeltankera wodha hunda Moaabi xawira noori 24,000 Isiraeele gede ninkerano lowo adaga abbitara dandiitanno. Qullaawu Maxaafi hakkawaro ikkinore kuli gedensaanni togo yee qorowisiisannonke: “Uurrinoha lawannosihu uwannokki gede qoropho.” (1 Qor. 10:12) Konni daafira, iimi Anninkeranna galtenkera ammanammoommore ikkine galtenke jawaata assiꞌranke lowonta hasiissinote. (Mat. 19:5, 6) “Gumulote isi albaanni xeꞌnenna mishsho noonkekkire [ikkine]” salaametenni leellineemmo gede wolu wotinni roore xa ‘dandaamannonkere baala assino.’—2 Phe. 3:13, 14.

a Faarso 127:1: “Yihowa mine mina hoogiro, mintannori beebba daafurtanno. Yihowa katama agara hoogiro, agaraanchu beebba goxikki galanno.”

b Ermiyaasi 17:9, 10: “Wodanu baalunkunni roore hantaalaamoho, qoleno bushaho. Afasira dandaannohu ayeti? Mittu mittunku manchira doogosi garinninna loosisi gumi garinni kaffaleemmo gede, ani Yihowa wodana laeemmo, giddiidi hedono fataneemmo.”

c Faarso 97:10⁠a: “Yihowa baxxinanniri, bushare gibbe.”

d Qolasiyaasi 4:6: “Mittu mittunku manchira dawaro qola hasiissannoꞌne gara affinanni gede, coyidhinanni coyi ayewoteno nyammo noohanna maxinetenni cuukkinoonniha ikko.”

e 1 Qorontoosi 7:3: “Minaanni minaamasira hasiisannosere asso; minaamano minaannisera hattonni hasiisannosire assito.”