ROSO 48
Jaalla Hayyotenni Doodhi
Muli jaalla faffote yannara ledonke hagiidhitanno; qarru yannarano kaaꞌlitannonke. Ikkollana Qullaawu Maxaafi dancha jaala ikkannohu baalanka manna ikkinokkita kulanno. Ikkina dancha jaalla doodha dandaattohu hiittoonniiti? Hanni aante noo xaꞌmuwa laꞌno.
1. Doodhatto jaalla seekkitahera woy huntahera dandiitannohu hiittoonniiti?
Duucha woyite, ledo honseemmo manni gede ikka rakkannonke. Hakko daafira, mitteenni xaandeno ikko Interneetete widoonni ledo honseemmo manni seekkankera woy hunankera dandaanno. Qullaawu Maxaafi yaannonte gede, “Egennaamu ledo hosannohu egennaamo ikkanno; hawanyootu [Yihowa baxxannokkiri] jaali kayinni qarru aana uwanno.” (Lawishsha 13:20) Yihowa baxxannorenna iso magansidhannore jaalla assiꞌrittoro, isiwa gamba yite heeꞌratto gedenna gara ikkinore doodhatto gede kaaꞌlitannohe. Yihowa baxxannokkiri ledo muli jaalooma kalaqiꞌra kayinni isiwiinni xeertiꞌneemmo gede assitannonke. Qullaawu Maxaafi jaalla hayyotenni doodhineemmo gede amaalannonkehu iseraati. Magano baxxannore jaallanke assiꞌnummoro, kuni jaaloomi insarano ninkerano kaaꞌlannonke. Togoo jaaloomi ‘mimmito jawaachinsheemmonna dhaambeemmo’ gede kaaꞌlannonke.—1 Teselonqe 5:11.
2. Doodhatto jaaloomi Yihowa hagiirsiisara woy dadillisara dandaannohu hiittoonniiti?
Yihowa jaalla qorophe doodhanno. “Ayirrissannosirira baalaho Kaaliiqi [“Yihowa,” NW] jaalansaati.” (Faarso 25:14) Yihowa baxxannokkire jaallanke assiꞌnummoro, isira mayi macciishshamannosi? Lowo geeshsha dadillanno! (Yaiqoobi 4:4 nabbawi.) Busha jaalooma gimbeemmoha ikkironna isiwanna iso baxxannoriwa gamba yine heeꞌneemmoha ikkiro kayinni, Yihowa hagiidhanno.—Faarso 15:1-4.
LEDDE XIINXALLI
Jaalla hayyotenni doodha lowo geeshsha hasiissannota ikkitinohu mayiraatironna heeshshokkira kaaꞌlannohe jaalooma kalaqiꞌra dandaatto gara rosi.
3. Busha jaalooma qorophi
Maganonna seerasi baxxannokkiri busha jaallaati. VIIDIYO laꞌe; hakkiinni aante noo xaꞌmo hasaabbe.
Hendummokkinni bushu jaaloomi giddora eꞌnammora dandiineemmohu hiittoonniiti?
Umi Qorontoosi 15:33 nabbabbe; hakkiinni aante noo xaꞌmuwa hasaabbe:
Busha jaalaati yinannihu hiittoo mannaati? Mayira?
Faarso 119:63 nabbabbe; hakkiinni tenne xaꞌmo hasaabbe:
Dancha jaala ikkannohehu hiittoo mannaati?
Mitte sholtino laalo gattinota wole baalanta daaffanno. Mittu bushu jaali seekkahera woy hunahera dandaannohu hiittoonniiti?
4. Ninkewiinni baxxino manni dancha jaala ikkankera dandaanno
Qullaawu Maxaafi hunda Israeelete gobbara heedhinori Daawitinna Yoonaataani xagge kulanno. Yoonaataani Daawiti diro lowo geeshsha rooranno; qoleno isi mootete beettooti; hakko daafira lamunku lowo geeshsha babbaxxitinoreeti. Ikkollana lamunku dhagge ikkanno jaalooma kalaqidhino. Umi Saamueeli 18:1 nabbabbe; hakkiinni tenne xaꞌmo hasaabbe:
Darawonke calla woy ninkete gedee heeshsho heedhannore calla jaallanke assiꞌra hasiissannonkekkihu mayiraati?
Roomu Sokka 1:11, 12 nabbabbe; hakkiinni tenne xaꞌmo hasaabbe:
Yihowa baxxanno jaalla mimmito jawaachisha dandiitannohu hiittoonniiti?
Tenne viidiyora, mittu wedellichu rodii jaalla hedinokki bayicho afiꞌrinohu hiittoonniitiro wodanchi. VIIDIYO laꞌe; hakkiinni aante noo xaꞌmuwa hasaabbe.
Viidiyote giddo, Akiili annanna ama isi rosu mine kalaqiꞌrino jaaloomi yaachishinonsahu mayiraati?
Isi umi qara togoo jaalooma baxinohu mayiraati?
Isi callimma qeela dandiinohu hiittoonniiti?
5. Dancha jaalooma kalaqiꞌra dandiinanni gara
Addu jaalla afiꞌranna meessano dancha jaala ikka dandiinanni gara wodanchi. VIIDIYO laꞌe.
Lawishsha 18:24 nna 27:17 nabbabbe; hakkiinni aante noo xaꞌmuwa hasaabbe:
Addu jaalla mimmito kaaꞌlitannohu hiittoonniiti?
Atera hattooti dancha jaalla noohe? Noohekkiha ikkiro, hattoo jaalla afiꞌrate maa assa dandaatto?
Filiphisiyusi Sokka 2:4 nabbabbe; hakkiinni tenne xaꞌmo hasaabbe:
Dancha jaalla afiꞌrate, atino dancha jaala ikka hasiissannohe. Dancha jaala ikka dandaattohu hiittoonniiti?
Dancha jaalla afiꞌrate, ati umikki dancha jaala ikka hasiissannohe
MITU MANNI TOGO YAANNO: “Jaalu nookkiha heeꞌrantenni, anfihu ledo jaalooꞌma woyyitanno.”
Ati tennera mayyaatto?
XAPHISHSHA
Jaalla hayyotenni doodhanke, Yihowa hagiirsiissanno; ninkerano kaaꞌlitannonke.
Kageeshsha Rosoottore
Doodhineemmo jaaloomi Yihowa hagiirsiisara woy dadillisara dandaannohu mayiraati?
Hiitto jaalooma giwa hasiissannonke?
Yihowa baxxannori ledo muli jaalooma kalaqiꞌra dandaattohu hiittoonniiti?
EGENNO LEXXI
Addu jaalla qarru yannara kaaꞌlitannonkehu hiittoonniiti?
Dancha jaalla afiꞌrate assa dandaattoha mito coye hedi.
Interneetete widoonni jaalooma kalaqiꞌrate daafira maa afa hasiissannohe?
Dagoomittete Webisayite Horoonsiꞌratto Woyite Xiinxalla Ikki (4:12)
“Shaqqadu Anni Heeꞌraera Halchanni Keeshshoommo” yitannote heeshshote xagge giddo, mittu manchi albi jaallasi agure wole jaalla doodhinohu mayiraatiro wodanchi.
“Qullaawu Maxaafi Heeshsho Biddi Assanno” (Agarooshshu Shae, Dotteessa 1, 2012)