3. Yihowa Farciꞌraasine Yesuusihu gedee baxille leellishshannohu hiittoonniiti?

Yesuusi rosaanosi lowo geeshsha baxanno daafira, insa isira maatesi gedeeti. (Maarqoosi 3:35 nabbawi.) Hatteente gede, alame woꞌmate noori Yihowa Farciꞌraasine baalanti mitte maateeti. Mimmito rodoo yine woshshineemmohu iseraati. (Filimoona 1, 2) Qoleno “Roduuwa [baalanka] baxxe” yine hajanjoonninke hajajo ayirrinseemmo. (1 Pheexiroosi 2:17) Yihowa Farciꞌraasine togoo baxille babbaxxitino doogonni leellishshanno; lawishshaho, alamete doyichora noori ammanate roduuwinke qarrantanno woyite kaaꞌlineemmo.

6. Cuuammeemmo woyite Yihowa maate wido ikkineemmo

Cuuammeemmo woyite, mittimma noote alamete doyicho maate wido ikkineemmo. Babbaxxino bayichinninna budinni gamba yinoommore ikkinummorono, ammanankenna galleemmo seeri mittoho. Faarso 25:14 nna 1 Pheexiroosi 2:17 nabbabbe; hakkiinni aante noo xaꞌmo hasaabbe:

• Mittu manchi cuuamihu gedensaanni, Yihowanna ammanate roduuwisi ledo hiittoo aante heedhannosi?

Ammanate roduuwinke ledo gamba yineemmo woyite, Moote Daawiti hagiidhi gede ninkeno hagiidhineemmo. Isi togo yiino: “Maganu manni rodiimmate baxillinni suumuu yee mitteenni heeꞌriro, lowo geeshsha danchahonna hagiirsiisannoho.” (Faarso 133:1) Hige mittimmanke mulla afiꞌnoommota diꞌꞌikkitino. Mittimmanke baꞌannokki gede, ninke mittu mittunku assa hasiissannonkeri no.

1. Maganu manni mereero noohu dhagge ikkanno coyi maati?

Wole gobba maroottowa songote gambooshshe haꞌrittoro, roduuwu coyidhanno qaali leella hoogahera dandaanno; ikkirono diborsatto. Mayira yiniro, alamete doyichora Qullaawa Maxaafa xiinxallate horoonsiꞌneemmo borro mittete. Qoleno mimmitoho baxille leellishate sharrammeemmo. Heeꞌneemmo gobba ikkitutano ikkituro, “baalunku mitteenni” Yihowara soqqammeemmo.—Soffooniyaasi 3:9.

2. Mittimmanke kaajjitanno gede ati maa assa dandaatto?

“Mimmitiꞌne ledo xalalu wodaninni seekkitine baxamme.” (1 Pheexiroosi 1:22) Tenne amaale harunsa dandaattohu hiittoonniiti? Wolu manni laanfe illachishantenni, dancha akatansa laꞌꞌate woꞌnaali. Ati baxattore baxxannoriwa calla aanantenni, atewiinni baxxitino roduuwi ledo egennamate sharrami. Qoleno miteekke manna allaggisate rosichi noonkeha ikkiro, togoo rosichono buqqinse hooꞌlate sharrama hasiissannonke.—1 Pheexiroosi 2:17 nabbawi.a

3. Ammanate rodiikki ledo coyi kawa kaꞌaa higiꞌnero maa assatto?

Mereeronke mittimma nooha ikkirono, baalunku guuntete xeꞌne noonkereeti. Mito woyite roduuwanke koffi assinammora, wole agurina lowo geeshsha xissiinsammora dandiineemmo. Maganu Qaali togo yee amaalannonkehu iseraati: “Mimmito mulla gatona yaaꞌne agurtinoonte. Yihowa mulla gatona yiinoꞌnente gede, kiꞌneno hatto asse.” (Qolasiyaasi Sokka 3:13, NW) Yihowa duucha hinge dadillinsoommosiha ikkirono, gatona yiinonke. Konnira ninkeno roduuwanke gatona yinammora hasiꞌranno. Mitto mancho xissiisoottoti leeltuhero, kalaqamino coye atinni tirate woꞌnaali.—Maatewoosi 5:23, 24 nabbawi.b

LEDDE XIINXALLI

4. Manna allaggissooti

Roduuwanke baalanka baxa hasiꞌneemmo. Kayi ninkewiinni baxxino manna baxa qarra ikkitankera dandiitanno. Hatto ikkiro mayi kaaꞌlankera dandaanno? Soqqamaasinete Looso 10:34, 35 nabbabbe; hakkiinni kuri xaꞌmuwa hasaabbe:

• Yihowa duuchunku gari manni minisira daye Farciꞌraasinesi ikkara hasiꞌranno. Atewiinni baxxino budi noonsare Yihowa laꞌꞌannonsa garinni laꞌꞌattota leellisha dandaattohu hiittoonniiti?

• Kiꞌne qooxeessira batinyu manni woloota allaggisannohu hiittoonniiti? Ati tenne giwa hasiissannohehu mayiraati?

Layinki Qorontoosi 6:11-13 nabbabbe; hakkiinni tenne xaꞌmo hasaabbe:

• Duuchunku gari roduuwa albinni roore baxa dandaattohu hiittoonniiti?

5. Mulla gatona yii hattono araarami

Yihowa ninke maaro horo hasiissannosikkiha ikkirono, mulla gatona yaannonke. Faarso 86:5 nabbabbe; hakkiinni tenne xaꞌmuwa hasaabbe:

• Yihowa maaro mageeshshi geeshsha jawate?

• Yihowa maaro naadattohu mayiraati?

• Wolootu ledo sumuu yee heeꞌra qarra ikkitannonke gede assara dandaannori maati?

Yihowa lawishsha harunsine roduuwinke ledo noonke mittimma baꞌannokki gede assiꞌra dandiineemmohu hiittoonniiti? Lawishsha 19:11 nabbabbe; hakkiinni tenne xaꞌmo hasaabbe:

• Mittu manchi hanqisihero woy koffi assihero, coye gaꞌlabbi assate maa assa dandaatto?

Mito woyite woloota koffi assineemmo. Togoo coyi kalaqamanno woyite ma assa hasiissannonke? VIIDIYO laꞌe; hakkiinni aante noo xaꞌmo hasaabbe.

VIIDIYO: Salaame Heedhanno Gede Assa Atoote Abbitanno (6:01)

• Viidiyote giddo, rodoonke keere kalaqate maa assitino?

6. Roduuwikkiha dancha akata lai

Roduuwinkewa shiqqi yinummo kiiro, jawaantensa calla ikkikkinni laanfensano anfeemmo. Jawaantensa illachisha dandiineemmohu hiittoonniiti? VIIDIYO laꞌe; hakkiinni aante noo xaꞌmo hasaabbe.

VIIDIYO: Roore Xuꞌma! (5:10)

• Roduuwikkita dancha akatta illachishatto gede kaaꞌlahera dandaannori maati?

Yihowa dancha akatanke illachishanno. Layinki Duduwo 16:9a nabbabbe; hakkiinni tenne xaꞌmo hasaabbe:

• Yihowa dancha akatakki illachishannota hedatto woyite mayi macciishshamannohe?

XAPHISHSHA

Gatona yaattohanna baalanka roduuwakki baxattoha ikkiro, songote giddo mittimma heedhanno gede kaaꞌlatto.

Kageeshsha Rosoottore

• Manna allaggisa agura dandaattohu hiittoonniiti?

• Ammanate rodiikki ledo coyi kawa kaꞌaa higiꞌnero maa assatto?

• Woloota gatona yite Yihowa lawishsha harunsa hasiꞌrattohu mayiraati?

EGENNO LEXXI

Yesuusi coyiꞌrino lawishshi giddo mittu, wolootaho yoo yineemmokki gede kaaꞌlannonkehu hiittoonniitiro rosi.

Illekki Giddo Noo Mokkollicho Fushshiꞌri (6:56)

Ninke soꞌnoommokkiha lawinkero nafa maaro xaꞌmiꞌra hasiissannonke?

“Araaramate Kaaꞌlannohu Qaru Coyi Maaro Xaꞌmiꞌrate” (Agarooshshu Shae, Bocaasa 1, 2002)

Mitootu mallaaddannokkire ikkitanno gede kaaꞌlinonsari maatiro wodanchi.

Manna Aana Laꞌine Yoo Yitinoonte (5:06)

Mittu rodiikki ledo coyi kawa kaꞌaa higihero, tini songote qarra kalaqqannokki gede maa assa dandaatto?

“Kawa Kaꞌaa Higinoꞌne Coye Baxillunni Tirre” (Agarooshshu Shae, Onkoleessa 2016)