Kiristoosi Haruma Hadhe

1-2. Yesuusi haruma haꞌra dandiineemmohu hiittoonniiti? Lawishsha kuli.

HANNI jaallakki ledo waajjishanno qooxeessira sabbitino doogo hadhanni noottohu gede assite hedi. Albaꞌneenni haꞌranni noohu doogo seekke afino manchooti. Isi haꞌranno woyite sabbu aana harumisi leellanno. Gedensaanni kayinni harumisi ikkinnina isi dileellannoꞌne. Ikkirono waajjitine dijajjartinanni. Hatteentenni atinna jaallakki albaꞌneenni haꞌranni noo manchi haruma dandaamiꞌne deerrinni seekkitine harunsitinanni!

² Heeꞌnoommoti tini busha alameno addu Kiristaanira waajjishanno qooxeessi gedeete. Yihowa kayinni guuta Massagaancho Beettosi Yesuusi Kiristoosa uyinonke; ninke harumasi seekkine harunsa dandiineemmo. (1 Phe. 2:21) Pheexiroosi Yesuusa albaanni haꞌranni doogo leellishanno manchi ledo heewisiisino. Massaganno manchi harumi leellannonte gede, Yesuusino lawishsha ikkinonke. Hanni xa Yesuusi haruma haꞌrate yaa mayyaatero, isi haruma haꞌra hasiissannonkehu mayiraatironna hatto assa dandiineemmohu hiittoonniitiro laꞌno.

YESUUSI HARUMA HAꞌRATE YAA MAYYAATE?

3. Mittu manchi haruma haꞌrate yaa mayyaate?

³ Mittu manchi haruma haꞌrate yaa mayyaate? Qullaawu Maxaafi giddo “qaafa” woy “lekka” yaanno qaale mittu manchi assoote kulate horoonsiꞌnoonni woyiti no. (Kal. 6:9; Law. 6:18) Mittu manchi heeꞌranno heeshsho harumisi ledo heewisiisa dandiinanni. Hakko daafira mittu manchi haruma haꞌrate yaa isi lawishsha harunsate yaate.

4. Yesuusi haruma haꞌrate yaa mayyaate?

⁴ Ikkina Yesuusi haruma haꞌrate yaa mayyaate? Haranchunni isi lawishsha harunsate. Soqqamaasinchu Pheexiroosi cuꞌmote qummeeshshira, Yesuusi iillinosi qarra dandee sae dancha lawishsha ikkinonketa coyiꞌrino; ikkirono Yesuusi faale haꞌra dandiineemmoti wole batinye doogga no. (1 Phe. 2:18-25) Yesuusi heeꞌrino heeshsho woꞌmantenni yaano coyiꞌrinorinna assinori baalunkunni dancha lawishsha ikkinonke.

5. Guuntete xeꞌne noonkere ikkinummorono Yesuusi lawishsha harunsa dandiineemmo? Xawisi.

⁵ Guuntete xeꞌne noonkere ikkinummorono Yesuusi lawishsha harunsa dandiineemmo? Ee dandiineemmo. Guuntete xeꞌne noonkere ikkinoommo daafira Yesuusi lawishsha woꞌmunni woꞌma harunsa dandiineemmokkiti egennantinote. Ikkollana dandaaminke deerrinni isi faale haꞌrate woꞌnaalleemmoha ikkiro, soqqamaasinchu Yohaannisi “Kiristoosi heeꞌrino garinni [heedhe]” yee amaalinonke amaale harunsinanni heeꞌnoommo.—1 Yoh. 2:6.

YESUUSI HARUMA HAꞌRA HASIISSANNONKEHU MAYIRAATI?

6-7. Yesuusi haꞌruma haꞌra Yihowawa shinqeemmo gede assitannonke yineemmohu mayiraati?

⁶ Yesuusi haruma haꞌra Yihowawa shinqeemmo gede assitannonke. Hatto yineemmohu mayiraati? Umihunni, Yesuusi Magano hagiirsiisanno garinni heeꞌra dandiineemmo gede kaajja lawishsha ikkinonke. (Yoh. 8:29) Hakko daafira, Yesuusi haruma haꞌnummoro Yihowa hagiirsiinseemmo. Iimi Anninke isi jaala ikkate dandiiture baala assitannoriwa shiqannota addaxxa dandiineemmo.—Yai. 4:8.

⁷ Layinkihunni, Yesuusi guutu garinni Annisi lawishsha harunsino. Yesuusi, “Ane afinohu annaꞌyano afino” yiinohu iseraati. (Yoh. 14:9) Yesuusi dhiigu amadino mancho mararino, dhibbu waadannose mancho qarri leellinosi hattono shiidhe xissiisidhinore mararinonsa; ninkeno isi lawishsha harunsine mannaho togoo akatta leellinsheemmoha ikkiro Yihowa lawishsha harunsinanni heeꞌnoommo. (Maq. 1:40, 41; 5:25-34; Yoh. 11:33-35) Yihowa lawishsha harunsinummo kiiro albinni roore isiwa shinqeemmo.

8. Yesuusi haruma haꞌra tenne alame ‘qeelleemmo’ gede kaaꞌlitannonke yineemmohu mayiraatiro xawisi.

⁸ Yesuusi haruma haꞌra tini busha alame hedonke billaallissannokki gede kaaꞌlitannonke. Yesuusi uullate aana heeꞌrinohu jeefote hashsha “Ani tenne gobba [alame] qeeloommo” yiino. (Yoh. 16:33) Isi hatto yaasi tini alame hedosi huntara hattono mixosinna assootesi soorritara wodhinokkita leellishshanno. Yesuusi uullara dayinohu mayiraatiro horo dideino; isi dayinohu Yihowa suꞌmi qullaawanno gede assateeti. Ninkena? Tenne alamera hedonke billaallitanno gede assara dandaannohu lowo coyi no. Ikkirono Yesuusi gede Yihowa fajjo assate illachinshummoro ninkeno tenne alame ‘qeelleemmo.’—1 Yoh. 5:5.

9. Hegere heeshsho doogonni fullummokkinni heeꞌrate maa assa hasiissannonke?

⁹ Yesuusi haꞌruma haꞌra hegere heeshsho afiꞌnanni gede assitanno. Mittu dureessu wedellichi hegere heeshsho afiꞌrate maa assa hasiissannosiro Yesuusa xaꞌmita isi, “Hoodeꞌya amo!” yiinosi. (Mat. 19:16-21) Yesuusi isi Kiristoosa ikkinota ammanannokkihu mitu Yihudu mannira togo yiino: “Geꞌreewiꞌya . . . hoodeꞌyano haꞌranno. Ani insara hegere heeshsho eemmo.” (Yoh. 10:24-29) Sanihediriini shongo miila ikkinohu Niqoodimoosi Yesuusi rosiisannore afa hasiꞌrino; Yesuusi isira togo yiinosi: “[Ane] ammaꞌninohu baalu hegere heeshsho afiꞌranno.” (Yoh. 3:16) Yesuusa ammanneemmota leellisha dandiineemmohu isi coyiꞌrenna lawishsha ikke rosiisinonkere harunsineeti. Hatto assineemmoha ikkiro, hegere heeshsho doogonni fullummokkinni heeꞌneemmo.—Mat. 7:14.

YESUUSI HARUMA HAꞌRA DANDIINEEMMOHU HIITTOONNIITI?

10. Yesuusa seekkine afate maa assa hasiissannonke? (Yohaannisi 17:3)

¹⁰ Yesuusi haruma haꞌnammora albaanni balanxe iso afa hasiissannonke. (Yohaannisi 17:3 nabbawi.) Yesuusa “afa” mitte hinge calla assine agurrannire diꞌꞌikkino. Iso albinni roore egennate yaano akattasi, hedosinna heeshshosi daafira afate sharrama hasiissannonke. Halaalu mine keeshshinoommo diri ikki geeshshihano ikkiro Yihowanna Beettosi roore afate agurrummokkinni sharrama hasiissannonke.

11. Shoole Wongeelluwa maa amaddino?

¹¹ Yihowa Beettosi anfeemmo gede kaaꞌlate, Qaalisi giddo shoolu Wongeelli heeꞌranno gede assino. Kuni Wongeelli Yesuusi heeshshorenna soqqanshore kultanno xagge amadino. Tenne xaggenni Yesuusi coyiꞌrinore, assinorenna macciishshaminosiri maatiro ronseemmo. Kuni shoolunku maxaafi Yesuusi lawishsha seekkine hendeemmo gede kaaꞌlannonke. (Ibi. 12:3) Tini maxaaffa Yesuusi haruma leellishshanno yaa dandiinanni. Hakko daafira kuri Wongeelluwa xiinxalline Yesuusa albinni roore afa dandiineemmo. Togo assanke isi faale harunsate kaaꞌlitannonke.

12. Wongeelluwatenni woꞌma horo afiꞌra dandiineemmohu hiittoonniiti?

¹² Wongeelluwatenni woꞌma horo afiꞌrate nabbawatenni sainore assa hasiissannonke. Kuri Wongeelluwa seekkine xiinxallatenna hiincate yanna gaaꞌma hasiissannonke. (Iyyaasu 1:8te ledo heewisiisi.) Hanni Wongeelluwa hiincatenna nabbamboommore loosu aana hosiisate kaaꞌlitannonketa lame hedo laꞌno.

13. Wongeelluwate giddo noo xagge xabbe leeltannohe gede assiꞌra dandaattohu hiittoonniiti?

¹³ Umihunni, Wongeelluwate giddo noo xagge xabbe leeltannohe gede assiꞌri. Hedate dandookki horoonsidhe ikkanni noore laꞌꞌate, macciishshatenna xaggete giddo kulloonni mannira macciishshaminonsare wodanchate woꞌnaali. Togo assate Yihowa dirijjite qixxeessitinota xiinxallate kaaꞌlitanno borro horoonsiꞌri. Nabbabbanni nootto xaggera qooxeessaho noo hedo xiinxalli. Xaggete giddo kulloonni manninna bayichi daafira ledde afate woꞌnaali. Nabbabbanni nootto xagge wolu Wongeelli giddo kulloonnite ledo taashshite lai. Mito woyite mittu Wongeelli giddo xawinse kulloonnikki xagge wolu Wongeelli giddo xawinse kullanni.

14-15. Wongeellu giddonni ronsommore loosu aana hosiisate maa assa hasiissannonke?

¹⁴ Layinkihunni, Wongeellu giddonni rosoottore loosu aana hosiisi. (Yoh. 13:17) Wongeellu giddo noo xagge seekkite xiinxallittohu gedensaanni ateneeto togo yite xaꞌmi: ‘Tenne xagge giddo ani harunsa dandeemmo hedo no? Tenne xagge horoonsiꞌre woloota kaaꞌla dandeemmohu hiittoonniiti?’ Tenne xagge horoonsidhe kaaꞌla dandaatto mancho hedi; hakkiinni maltino yannara baxillunninna hayyotenni rosoottore kulisi.

¹⁵ Hanni tenne lamenta hedo harunsa dandiineemmo gara leellishanno lawishsha laꞌno. Yesuusi qullaawu mini giddo lainote buxicho gunnitte xagge xiinxallineemmo.

YESUUSI QULLAAWU MINI GIDDO LAINOTA BUXICHO GUNNITTE MANCHO

16. Maarqoosi 12:41 noo xagge giddo ikkara dandaannori maatiro xawisi.

¹⁶ Xagge xabbe leeltannohe gede assiꞌri. (Maarqoosi 12:41 nabbawi) Ikkanni noore hedi. Yanna Niisaani 11, 33 M.D.; Yesuusi reyara mitte lamala ikkitannokki yanna gatte no. Yesuusi hakko barra qullaawa mine rosiisanni hosino. Ikkirono gibbannosiri ammaꞌnote massagaano wotto wortinosi. Hakkuyira albaanni insa giddo mitu loososi loosannohu ayi uyinosi silxaanenniitiro xaꞌmitinosi. Mitootu qolte dawaro qole diafanno yite heddanno gedee xaꞌmo xaꞌmate woꞌnaaltino. (Maq. 11:27-33; 12:13-34) Hakkiinni Yesuusi qullaawu mini giddo noote wole basewa mari. Kuni bayichi Meentu Yoo Mine yine woshshinanniwa ikkikkinni digatino; isi hakko heeꞌre mannu woxe tuganno saaxine laꞌꞌa dandaanno. Isi mannu woxe fushshinanni saaxine giddo woxe woranna lai. Yesuusi lowohu dureeyye manni saantuwa saaxinete tuganna laino. Isi ofollinohu tunganni saantuwa qililli yitannohu macciishshamannowa ikkara dandaanno.

17. Maarqoosi 12:42 kulloonniti buxicho gunnitte maa assitino?

¹⁷ Maarqoosi 12:42 nabbawi. Hakkunni gedensaanni Yesuusi mitte mancho lai. Ise ‘buxicho gunnitteeti.’ (Luq. 21:2) Isera heeshsho lowo geeshsha qarraho; hattono heeꞌrate hasiisannosere nafa afiꞌra qarra ikkitinoseha ikkara dandaanno. Ikkirono ise woxe tunganni saaxinewa marte mannu afikkinni lame shiimaadda saante tuggu; tuggino saantuwa hakkeya qililli nafa yitinokkiha ikkara dandaanno. Yesuusi ise hatte yannara horoonsiꞌnannita lame lepiteni yinannita shiimaadda saantuwa tugginota afino. Tini saantuwa rakasunni hidhinannita mitte gurraicho hidhate nafa diꞌꞌikkitannote.

18. Maarqoosi 12:43, 44 kultanno garinni Yesuusi gunnitte mancho uyitino woxi daafira mayino?

¹⁸ Maarqoosi 12:43, 44 nabbawi. Yesuusi tini gunnitte assitinore lae lowo geeshsha dhagge assiꞌrino. Hakkiinni rosaanosi woshshe buxicho gunnitewa hige coyiꞌranni togo yiinsa: “Woxe tugi manni baalunkunni aleenni, tini gunnitte roorsite uyitino. Wolu manni baalu [roorenkanni dureeyye], ikke gatinosihu giddonni uyino. Ise kayinni buxxe heedhenni, mittoreno gatisidhukkinni noosere raabbe uyitino.” Tini gunnitte mancho nooseha tayisse uyitinohu Yihowa towaatannoseta addaxxitino daafiraati.—Far. 26:3.

19. Yesuusi buxicho gunnitte daafira coyiꞌrinorinni hiikkonne kaajja roso ronseemmo?

¹⁹ Tenne xaggenni rosoottore loosu aana hosiisi. Ateneeto togo yite xaꞌmi: ‘Yesuusi buxicho gunnitte daafira coyiꞌrinorinni maa roseemmo?’ Tenne gunnitte mancho daafira hedi. Ise anga assitoommesero Yihowara hakkiinni roorsite aa hasidhannoti dihuluullissannote. Ikkirono ise dandiiture baala assitino; Yihowara aate wolqase assitu geeshsha sharrantino. Yesuusi ise uyitinore Annisi lowori gede asse laꞌꞌannota afino. Tennenni maa ronseemmo? Yihowa woꞌmu wodaninkenninna woꞌma lubbonkenni soqqammeemmosiha ikkiro hagiidhanno. (Mat. 22:37; Qol. 3:23) Isira soqqamate dandiinummore baala assineemmota laꞌꞌanno woyite Yihowara tashshi yaannosi! Tini yannankenna wolqanke dandiinummo deerrinni Yihowa magansiꞌrate lawishshaho soqqansho fulatenna gambooshshe haꞌrate horoonsiꞌneemmo gede assitannonke.

20. Gunnitte manchore kultanno xaggenni rosoottore loosu aana hosiisa dandaattohu hiittoonniiti? Lawishsha kuli.

²⁰ Gunnitte mancho xaggenni rosoottore loosu aana hosiisa dandaattohu hiittoonniiti? Assitanni noori Yihowa hagiirsiisannota kulittonsaro jawaattara dandiitanno roduuwa hedi. Lawishshaho, wolqate anjenni woy fayyimmate hoongenni kainohunni Yihowara albi geeshsha soqqama hooggino daafira ‘Waagu dinoe’ yite heddannoti afoottoti jawa rodoo no? Woy darga assiꞌrino dhibbinni kainohunni Gambooshshu Addaraashe haꞌre gambooshshe ganye assiꞌra hoogino rodii no? ‘Dhaawanno’ coye coyidhe togoo roduuwa kaaꞌla dandaatto. (Efe. 4:29) Buxicho gunnittere kultanno xaggenni rosoottoha jawachishanno roso kulattonsara dandaatto. Ati kulattonsati jawaachishshanno hedo, woꞌma giddonkenni soqqammummosiro Yihowa hagiidhannota qaagganno gede assitannonsa. (Law. 15:23; 1 Tes. 5:11) Wolootu Yihowara uyidhannori shiimare lawiro nafa, isira wolqansa assitu geeshshire uyitanni noo daafira galatattonsaha ikkiro, Yesuusi lawishsha seekkite harunsitanni nootto.

21. Maa assate murciꞌrootto?

²¹ Yihowa Wongeelluwate giddo Yesuusi daafira lowore borreessiisino daafira galanteemmosi; mayira yiniro kuri Wongeelluwa Yesuusi haꞌruma haꞌneemmo gede yaano isi lawishsha seekkine harunsineemmo gede kaaꞌlitannonke. Hojju xiinxallo woy Maatete Magansiꞌra assidhinanni yannara kuri Wongeelluwa xiinxalla dandiitinanni. Xiinxallonkenni horo afiꞌrate, xagge xabbe leeltannonke gede assiꞌranna ronsoommore loosu aana hosiisa hasiissannonketa deꞌnoonke. Assineemmorinni Yesuusi faale haꞌra hasiissannonke; qoleno isi coyiꞌrinore macciishsha hasiissannonke. Aananno birxichira Yesuusi reyara albaanni coyiꞌrinorinni maa ronseemmoro laꞌneemmo.