Daawuloosinna Xagarrote Hayyosi Taqawwamme

1, 2. Mannu cuuamiro hagiidhitannori ayeooti?

YIHOWARA haammata diro soqqantanni keeshshoottoha ikkiro, awuraajjunna wolu jajjabbu gambooshshira batinynye cuuamate nigiggire macciishshoottoti dihuluullissanno. Togooha cuuamate siraata duuchchaagge laoottoha ikkirono, albiidi wombarera ofoltinori haaruuddu cuamaano ofoltinowiinni gotti yitanna laitto kiiro lowo geeshsha hagiidhattoti egennantinote. Togoo yannara gamba yiino roduuwi lowo geeshsha hagiidhe anga shooshshe gananno. Yihowara haꞌlannohu xaano wolu manni noota laꞌꞌatto wote hindiiddo daggahera dandiitanno. Addaho togoo wote lowonta tashshi yaannonke!

² Ninke qooxeessinkera mannu cuuamanna laꞌneemmohu diru giddo saꞌne saꞌne callaati; sokkaano kayinni duuchchaagge laꞌanno. Insa alamete deerrinni kumunni kiirranni manni saammintete kiiro Yihowa dirijjitera uullayidi kifilera lexxanna laꞌanno wote ‘iima mageeshshi hagiirri ikkannoro’ hanni hedi! (Luqaasi 15:7, 10) Sokkaano kageeshshi manni lexxanna laꞌanno wote lowonta tashshi yaannonsati dihuluullissanno!—Hage 2:7.

DAAWULOOSI ‘ITTANANNO DOOBBIICHCHI GEDE DOYANNO’

3. Sheexaanu “ittananno doobbi[i]chchi gede” doyannohu mayiraati? Isi ninke hiissara hasiꞌranno?

³ Wole widoonni laꞌniro kayinni, mannu cuuamanna laꞌuro lowonta giirantannori ayyaanu kalaqo no. Sheexaanunna agaaninte kumunni kiirranni manni tenne maaeela alamera badhe wodhanna laꞌuro biso itannonsa. Korkaatuno Sheexaanu, Yihowara addu baxillinni soqqamannohu woyi buutote qarri iillisiro ammanaminoha ikke heeꞌrannohu mittuno dino yee fokkorino. (Iyyoobi 2:4, 5) Ikkollana yannate kiiro insaneeto Yihowara sayise aanno manni heeꞌra Sheexaanu kaphphaancho ikkinota leellishshanno. Tinino saammintu kiiro Sheexaane baqqaallasi kume hinge qawaadate gedeeti. Konni daafira Sheexaanu “egemmannoha hasiꞌranni ittananno doobbi[i]chchi gede” doyasi xagge diꞌꞌikkitanno! (1 Pheexiroosi 5:8) Kuni “doobbi[i]chchi” Maganu ledo noonke fiixooma ciiggishe, hakkiinni saeno konne fiixoomanke woꞌmunni woꞌma tayise hune ayyaanaamittetenni egemmankera hasiꞌranno.—Faarso 7:1, 2; 2 Ximootewosi 3:12.

4, 5. (a) Yihowa Sheexaanu wolqara danqara worinohu hiittee lame qara doogganniiti? (b) Addu Kiristaani huluullamannokkiri maati?

⁴ Kaajjadu baarigaari noonkeha ikkirono, waajjine huxiꞌneemmo gede assannonkeri dino. Mayira? Korkaatuno Yihowa konni “ittananno doobbi[i]chchi” wolqara lame qara doogganni danqara worino. Hiitte doogganni? Umihunni Yihowa, ‘ayino kiire dandaannokkihu lowohu’ addu Kiristaani “bayira qarra” qeele saꞌꞌanno yee masaalino. (Ajuuja 7:9, 14) Maganu masaalo qolte woꞌmitukki horonta digattanno. Konni daafira, Maganu manna gudise woshshaadosi giddora eessiꞌra dandaannokkita Sheexaanu umisi afino.

⁵ Hunda Maganoho ammaname soqqamino manni giddo mittu coyiꞌrino qaalira noohu xinta ikkino halaali, layinki danqari maatiro kulannonke. Masaalaanchu Azaariyaasi Asa yinanni nugusa togo yiino: “Kiꞌne Yihowa ledo ikkitini geeshsha, isino kiꞌne ledo ikkanno.” (2 Zeena 15:2; 1 Qorontoosi 10:13) Albaanni borreessantinoti batinynye xagge, Magano cuꞌmidhe heedhannore Sheexaanu ayeewoteno egemma dandaannokkita leellishshanno. (Ibiraawuyaani 11:4-40) Xaa yannarano Magano cuꞌmire heeꞌranno Kiristaanchi Daawuloosi taqawwama, hattono qeela nafa dandaanno. Isinni Maganu Qaali, “Daawuloosi taqawwamme; kiꞌnewiinni xooqannona” yee jawaachchishannonke.—Yaaqoobi 4:7, NW.

“SHARRAMMEEMMOHU . . . IIMIIDI BASERA NOORI BUSHA AYYAANNA LEDOOTI”

6. Sheexaanu Kiristaana gillete deerrinni egemmate maa assanno?

⁶ Sheexaanu ayyaanaamittete olira gaamote deerrinni diqeelannonke; ikkeennano baqqi yinoommore ikka hoongummoro, gillete deerrinni egemmankera dandaanno. Isi Yihowa ledo noonke fiixooma ciiggisha dandiiro ninke egemma qarrissannosikkita afino. Sheexaanu konne fiixoomanke ciiggishate woꞌnaalannohu hiittoonniiti? Kabbaade gawajjo iillishatenni, gillete deerrinni gawajjatenninna xagarrotenniiti. Xa hanni Sheexaanunnita tenne sase qara hayyo laꞌno.

7. Sheexaanu Yihowa gosara buutote gawajjo iillishate qodhe kainohu mayiraati?

⁷ Kabbaade gawajjo. Hawaariya Yohaannisi, “Alame duuchcha Sheexaanu gashshooti woroonni ikkitino” yee borreessino. (1 Yohaannisi 5:19) Tini xiqise addu Kiristaana baalanka qorophphe yitanno sokka sayissanno. Sheexaanu wonanni tenne busha alame gudise egemme kaino daafira, xa roore illachchishannohunna roore mixire kainohu angasira saꞌinokkire Yihowa gosa egemmateeti. (Mikiyaasi 4:1; Yohaannisi 15:19; Ajuuja 12:12, 17) Gattinositi boode yanna ikkitinota afino daafira isi lowo geeshsha hanqino. Konni daafira ninke aana buutote gawajjo abbate qodhe kaino. Xaa yannara isi ninke hili mararro nookkiha egemmate murciꞌrino. Konnira ayee yannanni roore, xa “maa assa [hasiissannonkero] afate yanna wodancha” hasiissannonke.—1 Zeena 12:32.

8. Hawaariya Phaawuloosi ‘sharrammeemmohu’ busha ayyaanna ledooti yaasi mayyaate?

⁸ Gillete deerrinni sharrama. Hawaariya Phaawuloosi ammanate roduuwasi, “Sharrammeemmohu . . . iimiidi basera noori busha ayyaanna ledooti” yee qorowisiisinonsa. (Efesooni 6:12, NW) Phaawuloosi “sharrama” yaanno qaale horoonsiꞌrinohu mayiraati? Korkaatuno kuni qaali mimmito amandenna gamba yine mishshigama yitanno assaawe sayisannoha ikkino daafiraati. Phaawuloosi konne qaale horoonsiꞌrasi, mitti mittinke gillete deerrinni busha ayyaanna ledo sharrammeemmota leellishshanno. Busha ayyaanna lowonta waajjinanni gobbara heeꞌneemmoha ikko, ikka hoogo, ninkeneeto Yihowara sayinse uyinummo wote lawishshu yaattonni sharrammanni base saꞌnoommota horonta hawa dihasiissannonke. Mittu mittunku Kiristaanchi isonooto Maganoho sayise uyi barrinni jammare konni gaari giddora eino. Konni daafira Phaawuloosi Efesooni Kiristaana ‘kaajjenna qixxaawe uurranno’ gede marro marro hige amaalasi xagge diꞌꞌikkitanno!—Efesooni 6:11, 13, 14.

9. (a) Sheexaanunna agaaninte duuchchu danita “xagarrote hayyo” horoonsidhannohu mayiraati? (b) Sheexaanu surrenke daafate woꞌnaalannohu mayiraati? Tenne qeela dandiineemmohuna hiittoonniiti? (Qoola 220-222 noo saaxine lai.) (c) Xa hiittee xagarrote hayyore laꞌneemmo?

⁹ Xagarrote hayyo. Phaawuloosi Kiristaanu Sheexaanunnita “xagarrote hayyo” seekke gargadhanno gede kaajjishe amaalino. (Efesooni 6:11, NW) Tenne xiqise Phaawuloosi Girikinynyunni borreessi wote, “hayyo” yine tirroonni qaale haammata hayyo xawisanno garinni borreessino. Tini qolte Daawuloosinna agaaninte manna soꞌrisiisate duuchchu dani hayyo horoonsidhannota leellishshanno. Togo assitannohu baqete korkaati heeꞌreennansaati. Lowo diri xagge leellishshannonte gede, mitto fatana qeele sainohu mitu Kiristaani wolu fatani iillinsata qeelamino. Konni daafira Daawuloosinna agaaninte mayi laanfe noonkero afate mitti mittinke akata hixamanynyite laꞌanno. Hakkiinnino ayyaanaamittete laanfe noonketa affuro, hattee horoonsidhe gawajjitannonke. Ikkeennano, Daawuloosita batinynye hayyo Qullaawu Maxaafi xawise kulanno daafira bande afa dandiineemmo; tini lowonta hagiirsiissannote. (2 Qorontoosi 2:11) Jiro baxa, gawajjanno jaaloomanna foorre Sheexaanu woshshaado asse horoonsiꞌrannota albaanni konni maxaafira ronsoommo. Xa kayinni Sheexaanunnite xagarrote hayyo giddo agaanintete loosire laꞌneemmo.

AGAANINTETE LOOSIRA EA MAGANO KAADATE

10. (a) Agaanintete loosi maati? (b) Yihowa togoo assoote hiittoonni laꞌꞌanno? Atina laꞌꞌattohu hiittoonniiti?

¹⁰ Mittu manchi agaanintete looso loosannoha ikkiro, busha ayyaanna ledo xaadanno. Agaanintete loosi giddo gamu kiiloho, bitate, digintetenna reyitinore coyishiishate. Seekkine anfoommonte gede, Yihowa agaanintete looso “effire giwanno.” (Marro 18:10-12; Ajuuja 21:8) Ninkeno ‘busha coye giwa’ hasiissannonke daafira, busha ayyaanna ledo xaadate hedo nafa heedhankera horonta dihasiisanno. (Roomu Sokka 12:9) Insa ledo togoo jaalooma kalaqiꞌra iimi Annanke Yihowa kaadate!

11. Sheexaanu agaanintete loosira eꞌneemmo gede assinkero tini isira lowo qeelleeti yineemmohu mayiraati? Lawishshunni kuli.

¹¹ Agaanintete loosira ea Yihowa kaada ikkitino daafira, Sheexaanu togoore assineemmo gede assate lowonta hasiꞌranno. Sheexaanu Kiristaanu giddo mitto agaanintete loosira eanno gede assi kiiro lowo qeelle afiꞌri yaate. Mayira? Lawishshaho mittu wottaaddarchi garosi kaade diinu wottaaddari gaamo ledo karsamiro, diinu wottaaddari sooreessi lowonta hagiidhanno. Qoleno kuni sooreessi kaadaanchu wottaaddarchiha bashshoo sooreessa fooggashshate, konne wottaaddarcho qafade adhinohu gede albaa fushshe leellishara dandaanno. Hatteente gede, mittu Kiristaanchi agaanintete looso jammariro, afanni heeꞌrenni hattono umisinni Yihowa kaadinonna Sheexaanu silxaanera woroonni ikkino gedeeti. Sheexaanu konne kaadaancho mancho qafade adhinohu gede asse leellishanno wote mageeshshi geeshsha hagiidhannoro hanni hedi! Daawuloosi togoo qeelle afiꞌrara hasiꞌrannohu ninke giddo nooni? Horonta dino! Ninke kaadaasine diꞌꞌikkinoommo.

XAꞌMO HOROONSIꞌRE HULUULLO KALAQA

12. Agaanintete loosira noonke lao soorrate Sheexaanu hiittee hayyo horoonsiꞌranno?

¹² Agaanintete looso effiꞌne gimbummo geeshsha Sheexaanu togoo assooti giddora eessankera didandaanno. Konni daafira assaambeemmo gara soorrate woꞌnaalanno. Hiittoonni? Coye soorre gara hawisatenni Kiristaanu “dancha bushaho, busha kayinni danchaho” yee hedanno gede assanno doogga hasiꞌranno. (Isayyaasi 5:20) Sheexaanu tenne assate, lowo diro horoonsiꞌre dancha guma afiꞌrinota mitte hayyo horonsiꞌranno; hattino xaꞌmo horoonsiꞌre huluullo kalaqate.

13. Sheexaanu xaꞌmo horoonsiꞌre huluullo kalaqate hayyo horoonsiꞌrinohu hiittoonniiti?

¹³ Sheexaanu tenne hayyosi konni albaanni hiittoonni horoonsiꞌrinoro wodanchi. Heewani Edenete heedheenna togo yee xaꞌminose: “Addinta Maganu kaashshu basera noo haqqe baalante aaninni guma ittinoonte yiinoꞌneni?” Iyyoobi waro sokkaano iima gamba yitinowa Sheexaanu togo yee xaꞌmino: “Iyyoobi Magano waajjannohu mullaatini?” Qoleno Yesuusi uullate aana soqqanshosi jammari wote, Sheexaanu Kiristoosi togo yee hettisino: “Hanni ati Maganu Beettootiro, tini kinna buddeena ikkitanno gede hajaji!” Isi Yesuusa togo yaasi mitu lewu saamminti albaanni Yihowa umisi, “Isinni hagiidheemmohu baxeemmo Beettiꞌya konneeti” yee coyiꞌrino qaale arrassate!—Kalaqo 3:1; Iyyoobi 1:9; Maatewoosi 3:17; 4:3.

14. (a) Sheexaanu agaanintete looso lainohunni huluullo kalaqate hayyosi horoonsiꞌrannohu hiittoonniiti? (b) Xa aanchine maa laꞌneemmo?

¹⁴ Xaa yannarano, Daawuloosi agaanintete loosi busha ikkinota huluullammeemmo gede assate hattoo hayyo horoonsiꞌranno. Isi mitu Kiristaani surrera huluullo kalaqate assino sharro qiniitinosi; tini dadillissannote. Kuri Kiristaanooti, mitu mitu agaanintete loosi busha ikkasi huluullama jammartino. Isinni insa, ‘Kuni addinta bushareeti?’ yite hedate geeshsha iillitino. (2 Qorontoosi 11:3) Togoo hedo noonsare kaaꞌla dandiineemmohu hiittoonniiti? Qoleno, Sheexaanunniti xagarrote hayyo gawajjitannonkekki gede maa assa dandiineemmo? Tenne xaꞌmuwara dawaro afiꞌrate, Sheexaanu agaanintete looso horoonsiꞌre anfayikki garinni batteessinoha lame coye laꞌno. Hakkuno boohaarshahonna hikkiminnaho.

SHEEXAANU HASATTONKE HOROONSIꞌRANNO

15. (a) Galchimi gobba wido mannu agaanintete looso ma garinni laꞌꞌanno? (b) Mitu Kiristaanooti agaanintete looso alame laꞌanno garinni laꞌꞌa jammartinohu hiittoonniiti?

¹⁵ Yannankera roorenkanni Galchimi gobba wido mannu diginte, kiilonna wole agaanintete looso mittore goddaasannokkihu gede asse laꞌꞌanno. Addi addi filme, maxaaffa, televizhiinete pirogiraamenna addi additi kompiyuterete godoꞌle agaanintete looso mittore gawajjitannokki godoꞌlenna busullete gede assite shiqishshanno. Agaanintete loosi ledo xaado afidhino maxaaffanna filmuwa lowonta halaꞌlitanni hadhino. Konninni buuxa dandiineemmonte gede agaaninte, togoo assooti abbanno gawajjo mannu mulluri gede asse laꞌꞌanno gede assitino. Togooti agaanintete looso mulluri gede asse laꞌꞌate hedo Kiristaanunniwano saꞌinoni? Ee, mitootu hakko garinni heda jammartino. Hiitto? Lawishshaho, mittu Kiristaanchi agaanintete loosi ledo xaado afidhino filme lai gedensaanni, “Filmella laoommo ikkinnina agaanintete looso diloosoommo” yiino. Konni garinni heda goddaassannota ikkitinohu mayiraati?

16. Agaanintete loosi ledo xaado afiꞌrino boohaarsha laꞌꞌa gawajjitannota ikkitinohu mayiraati?

¹⁶ Agaanintete looso loosatenna laꞌꞌate mereero badooshshu nooha ikkirono, togoo coyi ledo xaado afiꞌrinore laꞌꞌa mittoreno digoddaassanno yaa diꞌꞌikkitino. Mayira? Maganu Qaali, Sheexaanuno ikko agaaninte wodaninkera noore afa dandiitannokkita kulanno.a Konni daafira, albaanni laꞌnummonte gede busha ayyaanna maa assaambeemmoronna mayi laanfe noonkero afate, assineemmo coye baala, lawishshaho doodhineemmo boohaarsha seekkite laꞌanno. Mittu Kiristaanchi agaanintete ledo xaadissanno mannootire, digintennire, agaaninte amaddino mannire woyi wolu agaanintete loosire kultanno filmuwanna maxaaffa hagiirsiissannosita assootisinni leellishannoha ikkiro, tini agaanintete kultannori no. Kuni manchi, ‘Laanfeꞌya tenneeti’ yee kuꞌlanni noohu gedeeti! Agaaninte tenne affuro, kulinonsa laanfe horoonsidhe hakkonne Kiristaancho angansara sayisidha geeshsha bashshonni roore sharro assitanno. Digintete ledo xaado afiꞌrino boohaarsha laꞌꞌatenni agaanintete looso baxate widira dooꞌinori mitootu mannooti isinni, insa uminsa agaaninte looso loosate geeshsha iillitino.—Galatiya 6:7.

17. Sheexaanu xiwantinore soꞌrisiisate horoonsiꞌrara dandaannoti hiittee xagarrote hayyooti?

¹⁷ Sheexaanu boohaarshaho noonke hasatto calla ikkikkinni fayyimmanke agadhate noonke hasattono horoonsiꞌrate woꞌnaalanno. Hiittoonni? Mittu Kiristaanchi xiwanisinni hurate lowo sharro assanni heeꞌrenni woyyimma hoogiro hexxo mudhara dandaanno. (Maarqoosi 5:25, 26) Togoo ikkito Sheexaanehonna agaanintete soꞌrisiissanno faro fantannonsa. Maganu Qaali “gawajjannore assitannoriwiinni kaaꞌlo” xaꞌmiꞌneemmokki gede qorowisiisannonketa agaaninte seekkite affino. (Isayyaasi 31:2) Agaaninte mittu Kiristaanchi konne qorowishsha lashshi assanno gede assate, hexxo mudhe “digintete wolqa” ledo woyi agaanintete ledo xaado afiꞌrino hikkiminna harunsanno gede xixxiibbanno; digintete wolqa qolte lowonta gawajjitannote. Agaaninte tenne xagarrote hayyonsa horoonsidhe xiwamino Kiristaancho soꞌrisiisa dandiituro, Maganu ledo noosi fiixoomi ajanni haꞌrara dandaanno. Hiitto ikke?

18. Mittu Kiristaanchi xeertiꞌra hasiissannosihu hiittoo hikkiminnaati? Mayira?

¹⁸ Yihowa “digintete wolqa” horoonsiꞌra roso assidhinore Isiraeelete gosa togo yiino: “Angaꞌne [huuccattote] iimira qoltine kayissiniro, ani illeꞌya kiꞌnewiinni maaxeemmo. Batissine huuccidhiniro nafa dimacciishsheemmoꞌne.” (Isayyaasi 1:13, 15) Huuccattonke macciishshantannokki gede assannorenna roorenka xiwammummoro hasiissannonketa Yihowa kaaꞌlo afiꞌneemmokki gede assannonkere ayee coyeno giwa hasiꞌneemmo. (Faarso 41:3) Konni daafira, mittu hikkiminni woyi mirmari agaanintete loosi ledo xaado afiꞌrinoha ikkiro, addu Kiristaanchi togooriwiinni xeertiꞌra hasiissannosi.b (Maatewoosi 6:13) Hatto assiro, Yihowa irko baxxitannosikki gede assiꞌranno.—Qoola 223 noota “Addinta Kuni Agaanintete Loosooti?” yitanno saaxine lai.

AGAANINTENNIRE BATISE HASAAWA

19. (a) Daawuloosi batinynye manna mageeshshi wolqa noosihu gede asse dogino? (b) Kiristaanu hiittoo xaggewiinni xeertiꞌra hasiissannonsa?

¹⁹ Galchimi gobba wido batinynyu manni Sheexaanu wolqa mulluri gede asse laꞌꞌanna wole gobba wido kayinni konninni baxxinori ikkanno. Daawuloosi mite gobbara mannootu isira danna saꞌino wolqa noosi yite ammantanno gede asse dogino. Mitu manni heeshshonsa woꞌmatenni busha ayyaanna waajjanni heeꞌranno. Agaaninte maalaꞌlinannire assitinota kultannoti batinynye xagge no. Togoore hasaawanno manni lowonta tashshi yeennansa hasaawanno; macciishshanno mannino togoore lowonta maalale assiꞌranno. Ninkeno togoo xagge tareessa hasiissannonke? Deeꞌni; halaalaanchu Magani soqqamaano togoore assitannokkihu lamu korkaati no.

20. Mittu manchi miteekke afikki Sheexaanu totao tareessara dandaannohu hiittoonniiti?

²⁰ Umihunni, mittu manchi agaaninte assitino xagge hasaawannoha ikkiro, Sheexaaneho kaaꞌlanni no. Hiitto? Maganu Qaali, Sheexaanu xagge ikkinore assa dandaannota kulanno; ikkollana, Sheexaanu ‘sorisiissanno malaatta’ horoonsiꞌrannotanna ‘dogannotano’ xawisanno. (2 Teselonqe 2:9, 10) Sheexaanu kaphphu halaqa ikkino daafira, agaanintete loosiwa higge dooꞌino mannooti surre hiitto asse wirri assannoronna kaphpho ammantanno gede hiisse assannoro afino. Togoo mannooti xagge ikkinore laꞌinotanna macciishshitinota mittore huluullantukki adda ikkino gede assite hasaabbara dandiitanno. Yanna saꞌu kiiro togoo xagge duuchchaange hasaambanni daafira nookki coyi lexxanni haꞌrara dandaanno. Mittu Kiristaanchi togoo hasaawa tareessannoha ikkiro, wole yaattonni ‘kaphphu annita’ yaano Daawuloosi fajjo wonshanni no yaate. Qoleno Sheexaanu totao tareessanni noo gedeeti.—Yohaannisi 8:44; 2 Ximootewosi 2:16.

21. Hasaawinke mayi aana illachchishinoha ikkara hasiꞌneemmo?

²¹ Layinkihunni, mittu Kiristaanchi konni albi heeshshosinni busha ayyaanna ledo addinta xaadinoha ikkiro nafa, togoo xagge ammanate roduuwisira yannate kiiro kula dihasiissannosi. Mayira? ‘Ammanankera Qara Riqiwaanchonna Guutisaancho ikkinoha Yesuusa illachchinshe laꞌneemmo’ gede amaalloonninke. (Ibiraawuyaani 12:2, NW) Addaho illachchisha hasiissannonkehu Sheexaane ikkikkinni Kiristoosiiti. Yesuusi Sheexaanu wolqare lowori afinori nooha ikkirono, rosaanosira busha ayyaannare kulanni maalaꞌlitanno gede assinokkita huwata hasiissanno. Isi roorenka illachchishinohu Maganu mangiste sokka aanaati. Konni daafira Yesuusinna hawaariyaatete lawishsha harunsine, ‘Maganunnihu xaggete loosi’ ledo xaado afiꞌrino coye hasaawa hasiꞌneemmo.—Soqqamaanote Looso 2:11; Luqaasi 8:1; Roomu Sokka 1:11, 12.

22. ‘Iima hagiirru ikkanno’ gede agurrummokki assa hasiissannonkeri maati?

²² Addaho, Sheexaanu Yihowa ledo noonke fiixooma hunate agaanintete loosonna wole addi addi danita xagarrote hayyo horoonsiꞌranno. Ikkeennano, busha ikkinore effiꞌne gimbeemmohanna dancha ikkinori ledo quraanynyammeemmoha ikkiro, agaanintete loosi baalunkunni xeertiꞌrate assineemmo sharro wolqa hunate Daawuloosi hili faro nafa diafiꞌranno. (Efesooni 4:27) Daawuloosi hegerera baꞌꞌa geeshsha, isita ‘xagarrote hayyo seekkine gargadhanke’ agurreemmokkiha ikkiro, ‘iima mageeshshi hagiirri’ ikkannoro hanni hedi!—Efesooni 6:11, NW.