XIINXALLOTE BIRXICHO 17
Yihowa Baxannohe!
“Kaaliiqi mannisinni hagiidhanno.”—FAR. 149:4.
FAARSO 108 Baꞌꞌannokkiha Maganu Baxille
GUULCHOa
Iimi Anninke ninke mittu mittunkunni ‘hagiidhanno’ (Gufo 1 lai)
1. Yihowa maanke laꞌꞌanno?
MAGANU YIHOWA “mannisinni hagiidhanno.” (Far. 149:4) Tini lowo geeshsha hagiirsiissanno hedooti! Yihowa dancha akattankenna dandoonke laꞌꞌanno; hattono isiwa shinqeemmo gede assannonke. Yihowara ammanamme heeꞌnummoro, hegerera jaallasi ikkineemmo.—Yoh. 6:44.
2. Mitootu Yihowa baxannonsata huluullantannohu mayiraati?
2 Mitootu ‘Yihowa mannasi gaamote deerrinni baxannota afoommo; kayi ane baxannoeta mayinni afeemmo?’ yite heddannoha ikkara dandaanno. Mittu manchi hatto yee hedanno gede assasira dandaannori maati? Oksaanab yinanniti anje heedhe baasa qarrantino rodoo togo yitino: “Cuuamummanna suwisaancho ikke soqqama hanafumma woyite lowo geeshsha hagiidhoomma. Tonaaontu diri gedensaanni kayi, qaaqqo heeꞌreenna iillinoere qaaganni baasa xissiisiꞌroomma. ‘Yihowa hagiirsiisa didandeemma, qoleno isi baxannoe gedeeta diꞌꞌikkoomma’ yee hedoomma.” Yuwa yinanniti anje heedhe qarrantinoti suwisaancho rodoono togo yitino: “Yihowa hagiirsiisa hasiꞌroomma daafira, heeshshoꞌya isira sayise oyomma. Ikkirono, ‘Yihowa horo dibaxannoe’ yee hedoomma.”
3. Konni birxichira maa ronseemmo?
3 Aleenni kullihu ammanamino Kiristaani gede, atino Yihowa lubbora baxattoha ikkirono, isi baxannoheta kayi huluullamattoha ikkara dandaanno. Isi ate daafira lowo geeshsha hedannota ammana hasiissannohehu mayiraati? Gara ikkitinokki hedo waaddannohe woyite tenne qeeꞌlate kaaꞌlahera dandaannori maati? Hanni xa kuri xaꞌmuwa xiinxallino.
YIHOWA BAXANNOHETA HULUULLAMA GAWAJJITANNOHE!
4. Yihowa baxannonketa huluullama gawajjitannonke yineemmohu mayiraati?
4 Baxillu loosoho kakkayisanno. Yihowa baxannonketanna irkisannonketa addaxxineemmoha ikkiro, qarru iillinkero nafa isira woꞌmu wodaninkenni soqqamate murciꞌneemmo. Maganu ninke daafira hedannota huluullammeemmoha ikkiro kayinni, ‘jawaante dianfeemmo.’ (Law. 24:10) Hexxo mudhineemmohanna Maganu baxannonketa huluullammemmoha ikkiro, Sheexaanu xagarro qeela qarra ikkitannonke.—Efe. 6:16.
5. Maganu baxannonketa huluullama gawajjitannohu hiittoonniiti?
5 Yannankera mitu Kiristaani Yihowa baxannonsatanna towaatannonsata huluullamino daafira, ayyaanaamittensa shoshshoggitino. Jeemsi yinanni cimeessi togo yiino: “Beeteeletenna wole gobba afiinni massanganni songora hagiirrunni soqqameemmoha ikkirono, ‘Isi Yihowa kakkaloꞌya adhanni no?’ yee huluullamoommo. Mitte yannara isinni, Yihowa huuccattoꞌya macciishshannota nafa huluullamoommo.” Iiva yinanniti Beeteelete soqqantanno rodoo togo yitino: “Yihowa baxannonketa huluullama lowo geeshsha gawajjitannota huwatoomma; korkaatuno tini Yihowara woꞌma giddonni soqqammeemmokki gede assitanno. Qoleno ayyaanaamittete coyira hasatto heedhannonkekki gedenna Yihowara soqqammeemmo soqqanshonni hagiirraamma ikkineemmokki gede assitanno.” Songote cimeessanna woꞌma yanna suwisaancho ikke soqqamannohu Mayikili yinanni rodii, “Maganu ninke daafira hedannota huluullammeemmoha ikkiro, isiwiinni xeertiꞌnammora dandiineemmo” yiino.
6. Maganu baxannonketa huluullama hananfummoro maa assa hasiissannonke?
6 Kuri woꞌnaalshuwa gara ikkitinokki hedo ayyaanaamittenke mageeshshi geeshsha gawajjitara dandiitannoro leellishshanno. Ikkina Maganu baxannonketa huluullama hananfummoro maa assa hasiissannonke? Tenne huluullo bayichonkonni hooꞌla hasiissannonke! Huluullama agurtinanni gedenna ‘wodanaꞌnenna hedoꞌne agarannoha Maganu keere’ aannoꞌne gede Yihowa huuccidhe. (Fil. 4:6, 7) Togoo hedo macciishshantannoꞌneri kiꞌne calla ikkitinoonnikkita qaagge. Woloota ammanantino roduuwano gara ikkitinokki hedo waaddannonsa. Hunda heedhinote Maganu soqqamaasinera nafa togoori iillinonsa. Hanni xa soqqamaasinchu Phaawuloosi lawishshinni maa rosa dandiineemmoro laꞌno.
PHAAWULOOSI LAWISHSHINNI MAA RONSEEMMO?
7. Phaawuloosira qarra ikkinosiri maati?
7 Loosu batiꞌreennahe ‘Konne baala looso xa hiitto asse looseemmo?’ yite yaadde egennootto? Hatto ikkiro, Phaawuloosi yaachishinosiri maatiro leellannohe. Isi mitte songora calla ikkikkinni “beetekiristaannate [“songuwa baalate,” NW] daafira” yaadino. (2 Qor. 11:23-28) Bayicho assiꞌrino dhibbi waadanni hagiirrikki baꞌꞌanno gede assinohe? Phaawuloosino ‘mannimmasi utu gede qasanno qarri’ qussanni waadinosi; kuni dhibba ikkara dandaanno; isi kuni qarri aanisinni hoꞌlara hasiꞌrino. (2 Qor. 12:7-10) Mito woyite ate umikki laanfe yaachishshannohe? Phaawuloosirano togoori macciishshaminosi woyiti no. Isira dancha ikkinore assa gooddo ikkitinosi daafira, “Ani horo tidhoommokki manchooti” yee coyiꞌrino.—Rom. 7:21-24, NW.
8. Phaawuloosi iillinosi qarra dandee saꞌꞌanno gede kaaꞌlinosiri maati?
8 Phaawuloosira lowo fonqolinna hexxo mudhanno gede assanno qarri iillisirono, Yihowara soqqama diagurino. Isi hatto assate jawaante afiꞌrinohu hiikkiinniiti? Phaawuloosi xeꞌne noosiha ikkinota seekke afinoha ikkirono, wodote kakkalora kaajja ammana noosi. Isi, “[Yesuusa] ammanannohu baalunku hegere heeshsho afiꞌranno” yee Yesuusi coyiꞌrino hedo seekke afino. (Yoh. 3:16; Rom. 6:23) Phaawuloosino wodote kakkalo ammanannoha ikkinoti dihuluullissannote. Isi, Yihowa jawa cubbo loosse maaro eꞌinore nafa gatona yaate qixxaawinoha ikkinota addaxxino.—Far. 86:5.
9. Phaawuloosi Galatiyu Sokka 2:20te coyiꞌrinorinni maa ronseemmo?
9 Phaawuloosi Maganu lowo geeshsha baxannosita dihuluullamino; korkaatuno Maganu Beettosi soyinohu isira yee ikkinota afino. (Galatiyu Sokka 2:20 nabbawi.) Phaawuloosi konni qummeeshshira jawaachishshanno hedo coyiꞌrino; isi ‘Maganu Beetti baxinoe’ hattono ‘Ane daafira yee isonooto sayise uyino’ yiino. Phaawuloosi, ‘Yihowa roduuwaꞌya baxannota afoommo. Ane kayi baxannoeha dilawannoe’ yee, Maganu baxillira dannu noohu gede asse dicoyiꞌrino. Isi Roomu Kiristaanira “Cubbaataamma ikkine heeꞌneennanni Kiristoosi ninke daafira [reyino]” yiino. (Rom. 5:8) Ee, Maganu baxillira dannu dino!
10. Roomu Sokka 8:38, 39 noo hedonni maa ronseemmo?
10 Roomu Sokka 8:38, 39 nabbawi. Phaawuloosi Maganu baxilli geedonniha ikkinota addaxxino. Isi “Maganu baxilliwiinni badankera dandaannori nookkita afoommo” yee borreessino. Phaawuloosi, Yihowa Israeelete daga cincino gara afino. Yihowa iso umosi maarinosi garano wodanchino. Konnira Phaawuloosi ‘Yihowa ane daafira reyanno gede Beettosi soyi geeshsha, Isi baxannoeta huluullameemmo gede assannoeri maati?’ yiinohu gedeeti.—Rom. 8:32.
Maganu xa assinanni heeꞌnoommorenna konni kaꞌa assineemmore illachishanno ikkinnina konni albaanni loonsoommo soꞌro diꞌꞌillachishanno (Gufo 11 lai)c
11. Phaawuloosi 1 Ximootewoosi 1:12-15te kulloonni gedee cubbo loosinoha ikkirono, Maganu baxannosita huluullaminokkihu mayiraati?
11 Umi Ximootewoosi 1:12-15 nabbawi. Phaawuloosi alba loosino soꞌro hedanno woyite lowo geeshsha xissiisiꞌrannoti dihuluullissannote. Isi “Cubbaataammu baalunni rooru cubbaataami aneeti” yee coyiꞌrasi dhagge diꞌꞌikkitannonke. Isi halaale rosara albaanni, addi addi katammara Kiristaana baasa waadino; mitu usurantanno gede assino; woloota kayinni shinanni gede mala malino. (Soq. 26:10, 11) Phaawuloosi annansanna amansa shiishiishino oosonni xaadanno woyite hiitto ikkannoha lawannohe? Isi loosino soꞌrora gaabbinoha ikkirono, sainore qola dandaannokkita afino. Kiristoosi reyinohu isira ikkinota ammanino daafira “Maganu eltonni xa noommo gedeeha ikkoommo” yee mitte giddonni coyiꞌrino. (1 Qor. 15:3, 10) Tennenni maa ronseemmo? Kiristoosi atera yee reyinotanna Yihowa ledo muli jaalooma kalaqiꞌratto gede doogo biddi assinoheta ammante adhi. (Soq. 3:19) Maganu, Yihowa Farciꞌraasine ikkinummo gedensaanni woy ikkinammora albaanni loonsoommota albi soꞌro ikkikkinni, xa assinanni heeꞌnoommorenna konni kaꞌa assineemmore illachishanno.—Isa. 1:18.
12. ‘Ditidhoommoho’ woy ‘Banxannie gedeeha diꞌꞌikkoommoho’ yine hendeemmoha ikkiro, 1 Yohaannisi 3:19, 20 kaaꞌlitannonkehu hiittoonniiti?
12 Yesuusi cubbokki hayishshe hoolate reyinota hedatto woyite, ‘Ani tennera diꞌꞌikkoommoho’ yaattoha ikkara dandaanno. Hatto yite hedattohu mayira ikkara dandaanno? Guuta ikkinokki wodaninke, ‘Ani ditidhoommoho’ woy ‘Banxannie gedeeha diꞌꞌikkoommoho’ yine hendeemmo gede asse soꞌrisiisankera dandaanno. (1 Yohaannisi 3:19, 20 nabbawi.) Togoo woyite ‘Maganu wodaninkera aliidiha’ ikkinota qaaga hasiissannonke. Yihowa dibaxannoe woy gatona diyaannoe yine hendummoro nafa, isi baxannonke, hattono gatona yaannonke. Yihowa baxannonketa ammanne adhate sharrama hasiissannonke. Hatto assate, Maganu Qaale xiinxalla, huuccatto jaante assiꞌranna Yihowa magansiꞌranno manni ledo ganyine gamba yaa hasiissannonke. Hatto assa lowo geeshsha hasiissannota ikkitinohu mayiraati?
QULLAAWA MAXAAFA XIINXALLA, HUUCCATTONNA MAGANU MANNI LEDO GAMBA YAA KAAꞌLITANNONKE GARA
13. Maganu Qaale xiinxalla kaaꞌlitannonkehu hiittoonniiti? (“Maganu Qaali Kaaꞌlinonsa Gara” yitanno saaxineno lai.)
13 Maganu Qaale barru baala xiinxalli; hatto assittoro Yihowara baxissanno akatta noosita albinni roore huwatatto. Qoleno isi lowo geeshsha baxannoheta wodanchatto. Maganu Qaale barru baala nabbawanna hiinca gara ikkitino lao heedhannohe gedenna wodanikkira noo coye suwisate kaaꞌlitannohe. (2 Xim. 3:16) Alba isiniitira gari ayirrinyi noosikkihu Keveni yinanni cimeessi togo yiino: “Faarso 103 nabbawaꞌyanna hiincaꞌya hedoꞌya biddi assiꞌreemmo gedenna Yihowa ane ma garinni laꞌꞌannoero huwateemmo gede kaaꞌlitinoe.” Aleenni kulliti Iiva togo yitino: “Barru baala hashsha hashsha Yihowa hedo daafira hiinceemma. Tini giddiidi keere afiꞌreemma gedenna ammanaꞌya kaajjitanno gede kaaꞌlitinoe.”
14. Huuccatto kaaꞌlitankera dandiitannohu hiittoonniiti?
14 Agurittokkinni huucciꞌri. (1 Tes. 5:17) Mittu manchi ledo noonke jaaloomi kaajjanno gede isi ledo ganyine hasaambeemmo, hattono giddonketa mimmitoho hasaaphineemmo. Yihowa ledo noonke jaaloomino hattooti. Huuccattotenni giddonketa isira hasaaphineemmohanna huluullinonkere kuꞌlineemmoha ikkiro, Yihowa addaxxineemmotanna isi baxannonketa ammanneemmota leellinsheemmo. (Far. 94:17-19; 1 Yoh. 5:14, 15) Aleenni kulliti Yuwa togo yitino: “Huuccatto assiꞌreemma woyite barra assanni hosoommare calla kule diagureemma. Hatteentenni giddoꞌyata Yihowara gudise hasaapheemma. Gale hosanni, Yihowa mitte dirijjite murrichi gede ikkikkinni oososi baxanno Anni gede asse laꞌꞌa hanafoomma.”—“Nabbawootto?” yitanno saaxine lai.
15. Yihowa ninke daafira hedannota leellishinohu hiittoonniiti?
15 Yihowa magansiꞌranno manni ledo gamba yii; insa Yihowa eltooti. (Yai. 1:17) Iimi Anninke Yihowa ‘aye woyiteno’ baxxannonketa ayyaanaamittete maate oye ninke daafira hedannota leellishino. (Law. 17:17) Phaawuloosi Qolasiyaasi Kiristaanira borreessino sokkara kaaꞌlinosiha mito Kiristaana qummi assi woyite, insa lowo geeshsha ‘jawaachishshinosita’ coyiꞌrino. (Qol. 4:10, 11) Yesuusi Kiristoosira nafa wolootu kaaꞌlo hasiissinosi woyiti no; iso sokkaasineno kaaꞌlitinosi; Yesuusi kaaꞌlitinosire galatinonsa.—Luq. 22:28, 43.
16. Ammanate roduuwinke Yihowawa shinqeemmo gede kaaꞌlitannonkehu hiittoonniiti?
16 Yihowa uyinoheri ammanate roduuwi kaaꞌlitannohe gede maahoyye yaatto? Yaachishinonkere gikki yiino rodiiri hasaapha saallannire diafidhino; isinni hatto assa agarooshshe ikkitankera dandiitanno. Aleenni kullihu Jeemsi togo yiino: “Gikki yiino Kiristaaniwa aanaꞌya lowo geeshsha kaaꞌlitinoe. Gara ikkitinokki hedo waaddannoe woyite, kuri muxxe roduuwiꞌya hasaaphanna cincite macciishshitannoe, hattono baxxannoeta kultannoe. Insa widoonni, Yihowa baxannoetanna ane daafira hedannota huwatoommo.” Konnira, ammanate roduuwinke ledo muli jaalooma kalaqiꞌne heeꞌra lowo geeshsha kaaꞌlitannonke!
YIHOWA BAXILLINNI HEEꞌRI!
17-18. Macciishsha hasiissannonkehu ayi yaannonkereeti? Mayira?
17 Sheexaanu hexxo mudhine gara ikkinore assa agurrammora hasiꞌranno. Isi ‘Yihowa dibaxannoe, hattono gato dihasiissannoeho’ yine hendeemmo gede assate woꞌnaalanno. Ikkollana, konni birxichira ronsummonte gede hatto yee heda gara diꞌꞌikkitino!
18 Yihowa baxannohe. Ati isi albaanni muxxete! Isira hajajamittoro Yesuusi gede hegerera ‘baxillisinni heeꞌratto.’ (Yoh. 15:10) Konnira Sheexaanu yaannore macciishshitooti; wodanikkino dogahera wodhitooti. Hatteentenni mittu mittunku manchita dancha akatta laꞌꞌannoha Yihowa macciishshi. Yihowa atennino ikko ‘mannisinni hagiidhannota’ huluullantooti!
FAARSO 141 Heeshsho Maalalete
a Mitu roduuwi Yihowa baxannonsata huluullantanno. Konni birxichira, Yihowa ninke mitto mittonka baxannonketa addaxxa dandiineemmohu mayiraatiro ronseemmo. Qoleno isi baxannonketa huluullammeemmoha ikkiro, tenne qeeꞌla dandiineemmo gara laꞌneemmo.
b Mite suꞌmuwa soorrinoonni.
c MISILETE XAWISHSHA: Phaawuloosi alba lowo Kiristaana usuru minira eessino. Yesuusi isira assinosire ammane adhihu gedensaanni kayinni raga hige ammanate roduuwasi jawaachishino; insa giddo mitu alba Phaawuloosi waadino Kiristaanira fiixa ikkitara dandiitanno.