3. Galatu noonketa leellishate maa assa dandiineemmo?

Hanni mittu manchi reyotenni gatisinohe yine hendo. Kuni manchi assinohere mulluri gede assite habbe agurattonso, assinoherira galatattosi doogo hasiꞌratto?

Hegere heeshsho hexxo afiꞌnoommohu Yihowa danchummanniiti. Umi Yohaannisi 4:8-10 nabbabbe; hakkiinni aante noo xaꞌmuwa hasaabbe:

• Yesuusi kakkalo baxxitino elto ikkitinohu mayiraati?

• Yihowanna Yesuusi assitinohere hedatto woyite mayi macciishshamannohe?

Yihowanna Yesuusi assitinonkerira galatu noonketa leellisha dandiineemmohu hiittoonniiti? Layinki Qorontoosi 5:15 nna 1 Yohaannisi 4:11; 5:3 nabbabbe. Mitto mittonka qummeeshsha nabbabbinihu gedensaanni, aante noo xaꞌmo hasaabbe:

• Kuni qummeeshshi kulanno garinni, galatu noonketa leellishate maa assa dandiineemmo?

1. Mittu manchi heeshshosi Maganoho sayise aanno gede kakkayisannosiri maati?

Heeshshonke Yihowara sayinse uyineemmohu banxeemmosi daafiraati. (1 Yohaannisi 4:10, 19) Qullaawu Maxaafi togo yee amaalannonke: “Maganokki Kaaliiqa woꞌmu wodanikkinni, woꞌma lubbokkinni, woꞌma hedokkinninna woꞌma wolqakkinni baxi!” (Maarqoosi 12:30) Coyiꞌneemmorinni calla ikkikkinni assineemmorinnino Yihowa banxeemmota leellinsheemmo. Mimmito godowinta baxanno beettinna beetto adhamannonte gede, Yihowara noonke baxillino heeshshonke isira sayinse uyine cuuammeemmo gede kakkayisannonke.