QULLAAWU MAXAAFI XAꞌMONNA DAWARO
Tenne alame gashshe noohu ayeti?
Tenne alame gashshinohu Magano ikkoommero, qarru togo batiꞌrannoni?
Lowo manni tenne alame gashshinohu halaalaancho Maganooti yee ammananno. Kayinni hatto ikkoommero, uullate aana qarru togo batiꞌrannoni? (Marro 32:4, 5) Qullaawu Maxaafi tenne alame gashshinohu mittu bushu noota kulanno.—1 Yohaannisi 5:19 nabbawi.
Bushu gashshaanchi mannu ooso gashshate silxaane afiꞌrinohu hiittoonniiti? Mannu ooso xaggera hanafote, mittu sokkaanchi Maganoho finqile umi labbaahanna meyaatano finqiltanno gede kakkayisi. (Kalaqo 3:1-6) Kuri minaanninna minaama finqilu sokkaanchira yaano Sheexaaneho hajajamate doodhitu; konni garinni iso gashshaanchonsa assidhu. Gashshaancho ikkate qoosso noosihu Duuchanka Dandaanno Magano callaati; ikkollana, isi gashshootesi mannu iso baxe doodhara hasiꞌranno. (Marro 6:6; 30:16, 19) Roore mannu ooso, umi minaanninna minaama gede gariweelo doorsha doodhitino; tini dadillissannote.—Ajuuja 12:9 nabbawi.
Mannu ooso qarra tirannohu ayeti?
Maganu, Sheexaanunniha busha gashshoote tenne gedeenni wore agurannoni? Diaguranno! Maganu Yesuusi widoonni, Daawuloosi abbino gawajjo dhaawanno.—1 Yohaannisi 3:8 nabbawi.
Yesuusi, Maganu lowo wolqa uyinosi daafira Sheexaane cancananno. (Roomu Sokka 16:20) Hakkiinnino Maganu mannu ooso gashshanno; qoleno manchu beetti, hunda Maganu hedinota hagiirrunna salaame woꞌmitino heeshsho galagale afiꞌranno gede assanno.—Ajuuja 21:3-5 nabbawi.