Yerusaalame Baꞌu

NUGUSU Nabukedenetsoori egennaamma Isiraeelete manna xinqe Baabiloone adhe haꞌrinkunni 10 diri saino. Xa kayinni mayi ikkanni nooro lai! Yerusaalame giirantanni no. Shinikki gatinohu Isiraeelete manni kayinni qafadame Baabiloone haꞌranni no.

Mannootu bunshensa agura hoogguro, tini ikkito ikkitano yite Yihowa masaalaano balaxxe coyidhinota qaagi. Ikkollana Isiraeelete manni masaalaano yitinore dimacciishshino. Yihowa agure kaphphu maganna magansiꞌra diagurino. Konni daafira kuni manni qorichchishama hasiissinonsa. Togo yaa dandiineemmohu, Maganu masaalaanchi Hiziqeeli Isiraeele assitino bunshe kulinonkehuraati.

Hiziqeeli ayeetiro egennootto? Hiziqeeli Yerusaaleme togo ikkite giirantara 10 diri albaanni, Nugusu Nabukedenetsoori Baabiloone adhe haꞌri wedellooti ledo no. Daanieelinna sase jaallasi Sidiraaqi, Misaaqinna Abidinaago Baabiloone massinoonnihu hakkawarooti.

Yihowa, Hiziqeeli Baabiloonete heeꞌreennanni Yerusaalamete Maganu mine mannu assanno bunshe leellishisi. Yihowa tenne assinohu maalaletenniiti. Hiziqeeli hakkawote Baabiloonete no; Yihowa kayinni mannu minesi assanno bunshe baala laꞌꞌanno gede assisi. Hiziqeeli laino bunshe waajjishshannote!

Yihowa Hiziqeeli, ‘Mannu miniꞌya giddo assannoha busha coye lai’ yiisi. Qoleno togo yiisi: ‘Girgiddaho suntoonnita hamasunna wolu moyichchi misilla lai. Isiraeeleno hatte misilla magansidhanna lai!’ Hiziqeeli tenne bunshe baala lai; lainoreno borreessi.

Yihowa Hiziqeeli, ‘Isiraeelete murrooti maaxante assitannore laitto?’ yee xaꞌmisi. Hiziqeeli hakkonneno lai. Laꞌꞌanno wote 70 labballi no; baalunku kaphphu maganna magansidhanni no. Insano, ‘Yihowa dilainonke. Isi uulla agurino’ yitu.

Hakkiinnino Yihowa, minisira aliyye xullo widoonni noo meento Hiziqeelira leellishisi. Hakko meenti Temuuzi yinanniha kaphphu magano magansiꞌranni no. Xaano Yihowa Hiziqeeli, ‘Miniꞌyara eꞌnanni xullo widoonni noo labballo lai!’ yiisi. Kuni manni 25 ikkanno. Hiziqeeli insano lai. Insa soojjaati widira higge sagaddanni arrishsho magansidhanni no!

Yihowa qoleno togo yii: ‘Kuni manni ane mishino. Bunshe assa calla ikkikkinni, tenne bunshe mineꞌya daye assino!’ Konni daafira Yihowa togo yee xaari: ‘Insara hanqoꞌya dirriseemmo. Baꞌanno yannarano dimarareemmonsa.’

Yihowa Hiziqeelira konne coye baala leellishihunni sasu diri gedensaanni, Isiraeelete manni Nugusu Nabukedenetsoorira finqili. Konnira Nabukedenetsoori insa qasara dayi. Baabiloonete manni mitto dironna darate keeshshe Yerusaalamete huxxa diige ei; hakkiinnino katama giire buluushshi. Rooriidihu Isiraeelete manni reyino woyi qafadame Baabiloone haꞌrino.

Yihowa Isiraeelete mannira tini masissanno bao iillitansara agurinohu mayiraati? Insa Yihowa yiinore macciishshitinokkihuranna hajajosi ayirrissinokkihuraati. Tini xagge ayeewoteno Maganu yaannore assa lowo geeshsha hasiissannonketa leellishshanno.

Umi qara shiimu manni Isiraeelete gobbara gatanno gede agurroonni. Nugusu Nabukedenetsoori, Godooliyaasi yinanniha Yihudu mancho konni mannira murrichcha ikkanno gede doori. Hakkiinnino gamu Isiraeelete manni Godooliyaasi shii. Mannuno kuni bushuri kalaqamino daafira Baabiloonete mannooti dagge baalanke guddannonke yee waajji. Konni daafira Ermiyaasi ledonsa haꞌranno gede giddeessite, Gibitsete gobba xooqqu.

Konni garinni Isiraeelete gobba mannu nookkita ikkitu; 70 diro woꞌma mittu manchino hakko diheeꞌrino. Gobba gudisidhe fano ikkitino. Ikkollana Yihowa mannasi 70 diri gedensaanni gobbansa qolara qaale eino. Hakka geeshsha Maganu mannira massinoonninsawa Baabiloonete mayi iillinsa? Hanni laꞌno.