Maganu Manni Baabiloonetenni Fuli

MEEDOONINNA Faarsi daga Baabiloonete gobba amaddunku lamu diri geeshshi saino. Xa kayinni mayi ikkanni nooro lai! Isiraeelete manni Baabiloonetenni fulanni no. Insa borojjimmatenni fultinohu hiittoonniiti? Fushshinonsahu ayeeti?

Fushshinonsahu Qiroosi yinanniho Faarsi nugusaati. Qiroosi ilamara lowo diri albaanni, Yihowa masaalaanchosi Isayyaasi isire borreessanno gede assino. Isayyaasino togo yee borreessino: ‘Ati ani hasiꞌroommore assatto. Katama amadatto gede xullichchu faꞌnamannohe.’ Konni garinni Baabiloonete katama amadate haꞌranno wottaaddara massaginohu Qiroosiiti. Meedooninna Faarsi wottaaddari hashsha fano agurroonni xullichchi widoonni hige katama ei.

Qoleno Yihowa masaalaanchi Isayyaasi, Qiroosi Yerusaalamenna hakko nooha Maganu mine layinkimeeshsho minnanni gede hajajannota coyiꞌrino. Qiroosi tenne hajajo fushshiyya? Ee, fushshino. Qiroosi Isiraeelete manna togo yii: ‘Xa Yerusaalame hadhine, Maganiꞌne Yihowa mine minne.’ Kuni Isiraeelete manni haꞌranni noohu konne mine minaraati.

Ikkollana Baabiloonete noohu Isiraeelete manni gudisire seeda doogo haꞌre Yerusaalame iille diafanno. Haꞌnanni doogo 800 kiilomeetire geeshsha ikkitanno; lowo geeshsha seedate. Qoleno haammatu Isiraeelete manni geedhinonna xiwamino daafira xeerto doogo haꞌre diafanno. Gama manna Yerusaalame haꞌrannokki gede assinori wolurino no. Qiroosi haꞌre afannokki manna togo yii: ‘Yerusaalamenna hakko nooha Maganu mine minara haꞌranno mannira birra, worqenna wole elto uyiyye.’

Konni daafira mannu Yerusaalame hadhanno Isiraeelera lowo elto uyi. Qoleno Qiroosi, Nugusu Nabukedenetsoori Yerusaalame giiri waro Yihowa mininni abbino saannanna xaassa konni mannira uyi. Mannu Yerusaalame haaꞌre haꞌrannohu lowo uduunni no.

Isiraeelete manni shoolu agani doogo haꞌri gedensaanni, Yerusaalamete katama yinoonni yannanni iilli. Katamu giiraminkunni 70 diri saino; gobbano mittu manchi nookkiha keeshshitino. Xa Isiraeele gobbansa higginoha ikkirono, dagginowa qarru iillansaraati; aanchine tenne hajore ronseemmo.