Mitte Beeddakko Manna Massaggu

KONNI manni giddo mittichchu angichchunni kulannota roorte xabbanno beeddakko laitto? Kuni manni Yerusaalametenni kai wote, tini beeddakko leeltunsa. Insa Soojjaatinni daggino; ayyaantote yinannireeti. Insa, tini haaro beeddakko mittu ayirradu manchiwa massitanni noonke yite heddino.

Kuri mannooti umo Yerusaalame martu wote, ‘Yihudootaho nugusa ikkanno qaaqqi hiikko no?’ yite xaꞌmitu. “Yihudootu” yaa wole Isiraeelete suꞌmaati. Mannootuno togo yitu: ‘Ninke Soojjaato heeꞌne qaaqqu beeddakko balanxe laꞌne, sagandammosira dangoommo.’

Yerusaalamete nugusa ikke noohu Heroodiisi tenne macciishshiti masi. Isi wolu nugusi bayichchosi adhannota dibaxino. Konni daafira kakkalaanote biilla woshshe, ‘Ilamanno yine qaale eꞌnoonni nugusi ilamannohu hiikkooti?’ yee xaꞌmi. Insano, ‘Qullaawu Maxaafi Beeteleemete ilamanno yaanno’ yite qoltusi.

Hakkiinnino Heroodiisi Soojjaatinni dayi manna woshshe togo yii: ‘Hadhine ilamino qaaqqo hasse. Anino mare isira sagada hasiꞌroommona, affiniha ikkiro kulleꞌꞌe.’ Ikkollana Heroodiisi qaaqqo hasiꞌrinohu shaara yoreeti!

Hakkiinnino beeddakko konne manna massagganni Beeteleeme hadhu; qaaqqu noo taaloote iillituti uurritu. Mannuno minira ei wote, Maariyaaminna qaaqqu Yesuusi hakko no. Insano abbitino elto Yesuusira uyitu. Gedensaanni kayinni Yihowa haaqetenni mannootaho, Heroodiisiwa higginoonte yee kulinsa. Konni daafira mannootu gobbansa wole doogo widoonni higgu.

Heroodiisi Soojjaatinni daggu mannooti gobbansa higginota afiti, lowo geeshsha hanqi. Konni daafira Beeteleemete lame diro woꞌminonsarenna lamu diri woroonni noore labballo qaaqquulle baala shine gundanni gede hajaji. Yihowa kayinni balaxe Yooseefira tenne haaqetenni kulinosi daafira, Yooseefi maatesi ledo Gibitse haꞌri. Yannate gedensaanni Yooseefi, Heroodiisi reyinota afiti, Maariyaaminna Yesuusa haare Naazireete higi. Yesuusi lophphinohu hakkooti.

Tenne haaro beeddakko leeltanno gede assinohu aye lawannohe? Mannootu tenne beeddakko laꞌuhu gedensaanni, Yerusaalame hadhinota qaagi. Sheexaanu Daawuloosi Maganu Beetto shaara hasiꞌrino; qoleno Yerusaalamete nugusi Heroodiisino shaara hasiꞌrannota afino. Konni daafira tenne beeddakko fultanno gede assinohu Sheexaaneho.