Shiimu Beetti Yesuusi Maganu Mine

KONNI jajjabbu manni ledo hasaawanni nooha shiima beetto lai. Jajjabbu mannooti Yerusaalamete Maganu mine heedhanno rosiisaanooti. Shiimu beetti kayinni Yesuusaati. Isi lophphino. Xa isira 12 diro ikkinosi.

Yesuusi Maganunnirenna Qullaawu Maxaafi giddo borreessinoonnire seekke afino daafira, rosiisaano xaggeessidhu. Kayinni Yooseefinna Maariyaami koye nookkihu mayiraati? Insa hiikko no? Hanni laꞌno.

Yooseefi Faasikaho yinanniha mitto baxxino ayyaana ayirrisate maatesi diru dirunku Yerusaalame massanno. Naazireetetenni Yerusaalamete geeshsha noo doogo seedate. Hakkawaro kaameela afiꞌrinohu mittuno dino; qoleno kaameelu gede mannu gidde haꞌrannohu baaburu dino. Rooriidi manni lekkatenni haꞌranno; Yerusaalame sasu barri geeshsha haꞌre iillanno.

Xa Yooseefira maatesi halaꞌlado ikkitu. Konni daafira Yesuusi towaatannori labballunna seennu maaꞌnuullu roduuwi noosi. Konne diro Yooseefinna Maariyaami qaensa Naazireete higate oosonsa ledo seeda doogo hadhu. Insara Yesuusi wolu manni ledo daanni nooha lawinonsa. Hashsheenna mittowa fooliishshidhu wote, Yesuusi dino. Nookka yite fiixinsawanna jaallansawa laꞌanno wote, insa ledono dino! Konni daafira iso hassara galagalte Yerusaalame higgu.

Gedensaannino marte Yesuusi koye rosiisaanote ledo nooha affu. Martanno wote, isi rosiisaano yitannore macciishshanni no; qoleno insa xaꞌmo xaꞌmanni no. Yesuusi hayyichcha ikkasinni woꞌmunku manni xagge assiri. Maariyaami kayinni togo yitusi: ‘Beettoꞌya, togo mayira assittonke? Annikkinna ani ate hansanni lowo geeshsha mitiiꞌminoommo.’

Yesuusi qole togo yii: ‘Mayira hassinoonnie? Anniꞌya mine heeꞌra hasiissannoeta diaffinoonni?’

Addaho, Yesuusi Maganunnire rosiinsanniwa heeꞌra baxanno. Ninkeno hattoowa haꞌra dibaxisannonke? Yesuusi Naazireetete noo waro Magano magansiꞌrate saammintete kiiro gambooshshe haꞌranno. Isi duuchchanka wote hixamanynye harunsanno daafira, Qullaawu Maxaafinni lowo roso afiꞌrino. Ninkeno Yesuusi gede ikkino; hattono isi lawishsha harunsino.