Demaasqo Haꞌnanni Doogora

KUNI uulla uwe noohu ayeetiro afootto? Saawuliiti. Isi Isxifaanoosi kinnatenni gantu mannooti uduunne agariha ikkinota qaagatto? Konne waraꞌa yiino xawaabba lai! Mayi ikkanni nookka?

Isxifaanoosi reyihu gedensaanni, Saawuli Yesuusi rosaano amade usurate qara ikki. Saawuli minunni mine eanni rosaano goshooshe fushshe, usuru minira eessanno. Duuchcha rosaano wole katamma xooqqe, martinowa mannaho “dancha duduwo” kultu. Saawuli kayinni insa hasanni wole katamma haꞌri. Xa isi Demaasqote katama haꞌranni no. Ikkollana haꞌranni heeꞌreenna, mittu xagge ikkanno coyi kalaqami.

Hedeweelcho iiminni xawaabbu bilicci yee, Saawuli doyissi. Misilete aana laꞌneemmonte gede, isi uulla uwi. Hakkiinnino mitte huuro, ‘Saawuli, Saawuli! Mayira qarrisattoe?’ yitusi. Saawuli ledo noori xawaabba laꞌino; qolteno huuro macciishshitino. Kayinni mayinanni heeꞌnoonniro diaffino.

Saawulino, ‘Mootichcha ati ayeeti?’ yee xaꞌmi.

Huuro qolte, ‘Ani ati qarrissanni noottoeho Yesuusaati’ yitu. Yesuusi hatto yiinohu mayiraati? Saawuli Yesuusi rosaano qarrisanno wote, Yesuusi iso umosi qarrinsoonnihu gede ikke macciishshamannosi daafiraati.

Saawuli qole, ‘Mootichcha xa ma assoyya?’ yee xaꞌmi.

Yesuusi togo yiisi: ‘Gotti yite Demaasqo haꞌri. Assa hasiissannohere hakkiichcho kullannihena.’ Saawuli gotti yee illesi faꞌnita, ille mittoreno laꞌꞌa gibbu. Isi ballichcha ikki! Konni daafira ledosi noo manni angasi amade massaganni Demaasqo massisi.

Hakkawote Yesuusi Demaasqote nooha mitto rosaanchosi togo yii: ‘Hanaaniya kai, Suwashshote yinanni doogo higge haꞌri. Yihuda mine marte, Saawuli yinanni manchi nooro xaꞌmi. Iso baxxino soqqamaanchoꞌya ikkara doodhoommona.’

Hanaaniya yinoonnisita hajajame haꞌri. Saawulinni xaaditi, angasi isi aana wore togo yiisi: ‘Mootichchu illekki galagalte laꞌanno gedenna qullaawu ayyaaninni woꞌmatto gede soyinoe.’ Hakkawotenni Saawuli ille aaninni omolcho lawannori uwi; illesino galagalte laꞌu.

Saawuli duuchcha gobbara heeꞌranno mannira dancha duduwo lowo geeshsha farciꞌrino. Qoleno isi hawaariya Phaawuloosi yinanniha ikkino; isire roorsine albaange ronseemmo. Balanxe kayinni, Maganu Pheexiroosi ma assara soyinosiro hanni laꞌno.