Pheexiroosi Qornelewoosi Minira Haꞌri

KUNI uurre noohu hawaariya Pheexiroosiiti; isira badheenni noori kayinni jaallasiiti. Kuni manchi Pheexiroosira sagadanni noohu mayiraatikka? Sagada hasiissannosi? Isi ayeetiro ati afootto?

Kuni manchi Qornelewoosiiti. Isi Roomu wottaaddarira roorrichchaho. Qornelewoosi Pheexiroosi diegennino; ikkollana iso minisira woshshanno gede kulloonnisi. Kuni hiitto ikke ikkinoro hanni laꞌno.

Umo Yesuusa harunsitinori Yihudu mannaati; Qornelewoosi kayinni Yihudu manni wido diꞌꞌikkino. Ikkollana isi Magano baxanno; huuccattono assiranno; qoleno mannaho danchare assanno. Mitto barra mittu sokkaanchi isiwa mare togo yiisi: ‘Ati assoottorinni Maganu hagiidhino; konni daafira huuccattokkira dawaro qolaraati. Manna sokke Pheexiroosi yinanni mancho woshshi. Isi Iyyoophphete baaru mule heeꞌrannohuwa Simiooni mine no.’

Qornelewoosi hakkawotenni Pheexiroosi woshshanno gede manna soyi. Soyino manni layinki barra Iyyoophphe iilla rahanno wote, Pheexiroosi Simiooni mine fooqete no. Hakkiichcho Maganu Pheexiroosira lowo uddano lawannorichchi iiminni daanna leellishisi. Uddanote aana duuchchu dani saada no. Maganu seeri garinni, tini saada itate keeraano diꞌꞌikkitino. Ikkollana mitte huuro Pheexiroosi, ‘Gotti yite gorrite iti’ yitusi.

Pheexiroosino, ‘Diꞌꞌiteemmo! Keeraaꞌminokkire horonta ite diegennoommo’ yee qoli. Huuro kayinni Pheexiroosi, ‘Maganu xa keeraanchoho yiinoha ati dikeeraanchoho yitooti’ yitusi. Huuro sase higge hatto yitusi. Pheexiroosi, kuni coyi maatikka yaanni huluullamanni heeꞌreenna, Qornelewoosi soyino manni iille Pheexiroosi nootanna teꞌee xaꞌmi.

Pheexiroosi fooqetenni dirre hakkonne manna, ‘Hassinanni manchi aneeti. Mayira dagginoonni?’ yiinsa. Insano Qornelewoosi iso minisira woshshanno gede sokkaanchu kulinosita kultusi; hakkiinnino Pheexiroosi ledonsa haꞌrara maahoyye yii. Layinki barra Pheexiroosinna jaallasi Qornelewoosiwa Qeesaariya hadhu.

Qornelewoosi fiixasinna jaallasi gamba assire agaranni no. Pheexiroosi marita, Qornelewoosi fule haarisi. Koye misilete aana laꞌꞌattonte gede, Qornelewoosi uulla uwe Pheexiroosira sagadi. Pheexiroosi kayinni, ‘Gotti yii; anino mannahollana’ yiisi. Addaho, Qullaawu Maxaafi mannaho sagadanna manna magansiꞌra gara ikkitinokkita kulanno. Konni daafira Yihowa calla magansiꞌra hasiissannonke.

Hakkiinnino Pheexiroosi gamba yiino mannira farciꞌra hanafi. Togo yii: ‘Maganu isira soqqama hasiꞌranno manna baala baxannota xa huwatummo.’ Pheexiroosi coyiꞌranni heeꞌreenna, Maganu qullaawa ayyaanasi dirrisi. Mannuno babbaxxino qaalinni coyiꞌri. Kuni coyi Pheexiroosi ledo daggurira Yihudoota ikkitino rosaanora xagge ikkinsa; korkaatuno insa Maganu Yihudoota calla baxanno yite heddino. Konni daafira tini rosaano, Maganu mitto sircho wolunni roorse laꞌꞌannokkita, qoleno mitto sircho roorse baxannokkita tenne ikkitonni affu. Ninke baalinke tenne afa dihasiissannonke?