Phaawuloosi Roomu Katamira

PHAAWULOOSI angara sansalate lai; iso agaranni nooha Roomu wottaaddarchono lai. Phaawuloosi Roomaho usurame no. Hakkiichcho usurame Roomu gashshaanchi Qeesaari iso assinannire kula geeshsha agadhanni no. Isi usurame noo wote, mannu laꞌꞌasira marannota dihoollanni.

Phaawuloosi Rooma marihunni sayikki barra, Yihudootu cimeeyye isiwa daggara woshshi. Konni garinni, Roomaho noori haammatu Yihudooti isiwa martu. Phaawuloosi insara Yesuusirenna Maganu mangistere kulinsa. Insa giddonni gamu ammante Kiristaana ikkituta, gamu kayinni diammantino.

Phaawuloosi iso agarannohura haammatu wottaaddarirano farciꞌrino. Kowiichcho usurame keeshshinoha lamenka diro, afi mannira baalaho farciꞌrino. Konni daafira, Qeesaari maate nafa Maganu Mangisteha dancha duduwo macciishshitino; maatesi giddo gamu Kiristaana ikkitino.

Kuni xaraphpheessu aana borreessanni noohu ayeeti? Ayeetiro hanni hedi. Ximootewosiiti. Ximootewosino Mangistennire farciꞌrino daafira usurame keeshshino; xa kayinni usurunni tidhamino. Xa kawiira dayinohu Phaawuloosi kaaꞌlaraati. Ximootewosi maa borreessanni nooro afootto? Hanni laꞌno.

Xagge 110 aana ronsummore Filiphphisiyusinna Efesooni katamma qaagatto? Phaawuloosi hatte katammara Kiristaanu songo kalaqantanno gede kaaꞌlino. Xa usurame heeꞌre hakko Kiristaanira sokka borreessanni no. Hatte sokka Qullaawu Maxaafi giddo no; suꞌmansa Efesooninna Filiphphisiyusi yinanni. Xa Phaawuloosi Filiphphisiyusi katamira heeꞌranno Kiristaanira Ximootewosi mayyee borreessannoro kulanni no.

Filiphphisiyusi Kiristaani konni albaanni Phaawuloosira danchare assitino. Koye usurame noowa elto sokkinosi; xa isi hatteera insa galatanni no. Phaawuloosira elto haare dayinohu Afiroodiixu yinanni manchooti. Ikkollana isi lowo geeshsha xiwame, reyara kai. Xa kayinni woyyeennasi qae haꞌrara qixxaawe no. Isi Filiphphisiyusi katama higanno wote, Phaawuloosinna Ximootewosiwiinni sokka haare haꞌraraati.

Phaawuloosi usurame heere Qullaawu Maxaafi giddo noota wole lame sokkano borreessino. Mitte Qolasiyaasi katamira heeꞌranno Kiristaanira borreessinote. Hatte sokka mayinanniro afootto? Qolasiyaasi yinanni. Wole kayinni Phaawuloosi lubbote jaalisira Filimoonira borreessinote; Filimoonino Qolasiyaasi katamira heeꞌranno. Tini sokka Filimooni soqqamaanchi Anaasimoosire coyidhannote.

Anaasimoosi Filimooniwiinni bae Rooma haꞌrino. Haꞌrinowano Phaawuloosi usurame noota macciishshi. Hakkiinnino Phaawuloosi laꞌꞌara mari; Phaawuloosino isira Maganu qaale kulisi. Hakkawotenni Anaasimoosi Kiristaana ikki. Bae haꞌrinoterano gaabbi. Konni daafira Phaawuloosi Filimoonira soyino sokka mayyee borreessinoro afootto?

Filimooni Anaasimoosi maarannosi gede borreessino. Togo yiino: ‘Anaasimoosi atewa soommo. Isi xa soqqamaanchokki calla diꞌꞌikkino. Dancha Kiristaancho rodookkiiti.’ Anaasimoosi Qolasiyaasi katama higi wote tenne lamenta sokka haare haꞌrino; mitte Qolasiyaasi Kiristaanira, mitte kayinni Filimoonira massino. Filimooni soqqamaanchisi Kiristaana ikkinota afiti, mageeshsha hagiidhinoro heda dandiineemmo.

Phaawuloosi Filiphphisiyusi Kiristaaniranna Filimoonira sokka borreessi wote, mitto hagiirsiisanno coyeno kulinonsa. Filiphphisiyusi Kiristaanira togo yiino: ‘Ximootewosi kiꞌnewa soyaammoraati. Muli yanna giddo anino dayeemmo.’ Filimoonira qole, ‘Dawummoro fooliishshiꞌreemmo base qixxeessie’ yee borreessi.

Phaawuloosi usuru mininni fuliti, duuchcha basera noore Kiristaana roduuwasi towaatino. Ikkollana gedensaanni, Roomaho galagale usurami. Hatte yannara shinasira kaꞌnoonnita afino. Konni daafira Ximootewosi isiwa rahe daanno gede sokka soyi. Togo yii: ‘Maganoho ammaname keeshshoommo; isino eltosi aannoe.’ Phaawuloosi shinihunni shiimu diri gedensaanni, Roomu gosa Yerusaalame huntu; Yerusaalame baꞌanna tini layinkite.

Qullaawu Maxaafinni ronsanniti wole xaggeno no. Maganu Yihowa, hawaariya Yohaannisi Qullaawu Maxaafi giddo noore goofimarchu maxaaffa borreessanno gede assino. Hatte maxaaffa giddo mittu Ajuujate maxaafaati. Kuni maxaafi konni kaꞌa ikkannore kulannoho. Albaage mayi ikkannoro hanni laꞌno.