Uullate Aana Haaro Gannate

TENNE jajjabba haqqe, biifado daraaronna seeddaanna ilaalla lai. Tini dibiifado baseeti? Shiimu qaaqqi bullichchira itannore aannasi lai. Qoleno xawoho noore doobbiyonna farado lai. Ati togoo basera minnoonni minira heeꞌra dibaxatto?

Maganu, ati uullate aana gannatete hegerera heeꞌrattora hasiꞌranno. Qoleno xa manna qarrisanno xiwaninna xisso iillitahera dihasiꞌranno. Qullaawu Maxaafi konni kaꞌa haaro gannatera heeꞌranno mannira togo yee hexxo aanno: ‘Maganu insa ledo heeꞌranno. Reyo woyi wiꞌla woyi xibbu konni kaꞌa diheeꞌranno. Albi coyi sainona.’

Yesuusi tini hagiirsiissanno hexxo woꞌmitanno gede assanno. Mamoote assannoro afootto? Togo assannohu uullate aaninni bunshe baalantanna busha manna baala huni gedensaanniiti. Yesuusi uulla noo waro, babbaxxino xiwani amadino manna hursinotanna, reyitinore nafa kayisinota qaagi. Tenne assinohu, Maganu mangistera Nugusa ikkanno wote uullate aana assannore leellishateeti.

Uullate aana haaro gannatera heeꞌra mageeshsha hagiirsiissannoro hanni hedi! Yesuusi doodhino manni ledo iima heeꞌre gashshanno. Kuri gashshaano uullate aana heeꞌranno manna baala towaattanno; qolteno hagiidhanno gede assitanno. Maganu haaro gannatera hegere heeshsho aannonke gede maa assa hasiissannonkero hanni laꞌno.