‘Seekkitine Farcidhe’
1. Hawaariya Phaawuloosi soqqanshote dancha lawishsha ikkannonkehu hiittoonniiti?
1 “Soqqanshokki seekkite soqqami.” (2 Xim. 4:5) Kuni hawaariya Phaawuloosi umisi assinore ikkino daafira togo yee Ximootewosi amaali wote, tiiꞌꞌisi diwoqasinosi. Isinni 47 M.D. kayise 56 M.D. geeshsha misiyoone ikke soqqamanni sase hige gobbatenni gobba haꞌrino. Qullaawu Maxaafi giddo Hawaariyaatete Loosira, Phaawuloosi ‘seekke farciꞌrinota’ marro marro hinge kulloonni. (Looso 23:11; 28:23) Xaa yannara ninkeno hatto assa dandiineemmohu hiittoonniiti?
2. Minunni mine haꞌne soqqammeemmo wote, seekkine farciꞌra dandiineemmohu hiittoonniiti?
2 Minunni Mine Haꞌne Soqqama: Dancha duduwo macciishshite egentinokkire minu annuwa woyi amuwa xaande hasaawisate, barru giddo babbaxxitino yannara haꞌra hasiissannonkeha ikkara dandaanno. Minu anni qaera daannohu hawarro woyi Qidaamenna Sambata ikkara dandaanno. Konni daafira gallanni minnara duuchaange marre mine hoongoommo manna xaade hasaawisate sharrama hasiissannonke. Togoo manna xaade hasaawisate sharrantinanni heedhinenni mine hoogginiro ma assa dandiitinanni? Dabdaabbe borreessine woyi silke dowwolle dancha guma afiꞌra dandiinanni.
3. Faajjetenna tunceenyunni farciꞌrate mayi faro noohe?
3 Faajjetenna Tunceenyunni Farciꞌra: Xaa yannara Yihowa soqqamaano, macciishsha hasiꞌrannohu baalu “addu hayyo” afanno gede assitanni no. Togo assitannohu ‘doogote’ woyi ‘mannu batiꞌrannowaati.’ (Law. 1:20, 21) Barru dilgonke assiꞌneemmo wote, farciꞌrate faro hasiꞌneemmo? Soqqanshonke ‘sabbakate loosi amadinonketa’ leellishshannote? (Looso 18:5) Hatto ikkiro, ‘seekkine farciꞌrate’ halaafinatenke wonshinanni heeꞌnoommo yaate.—Looso 10:42; 17:17; 20:20, 21, 24.
4. Huuccattonna hiinca seekke farciꞌrate kaaꞌlitannonkehu hiittoonniiti?
4 Mito wote kayinni wolqa baꞌneemmoha woyi manna ille qanse laꞌꞌa waajjineemmoha ikkiro, farciꞌra waajjinammora dandiineemmo. Hatto ikkiro, Yihowa dhukanke afinota hawa dihasiissannonke. (Far. 103:14) Qoleno, hattoori macciishshamannonke wote, jawaante afiꞌrate huuccatto assiꞌra dandiineemmo. (Looso 4:29, 31) Hattono, Maganu Qaale gilletenni xiinxallineemmohanna hiincineemmoha ikkiro, danchu duduwi afiꞌrino waaga albinni roore huwata dandiineemmo. (Fil. 3:8) Hatto assineemmoha ikkiro, dancha duduwo diinaggaambe duduwa dandiineemmo!
5. Iyyueeli masaalo woꞌmitanno gede assa dandiineemmohu hiittoonniiti?
5 Iyyueeli, bayirunna waajjishannohu Yihowa barri daara albaanni, Maganu manni ‘haꞌra agurannokkitanna’ sabbakannota mitturino hoolannonsakkita masaalino. (Iyu. 2:2, 7-9) Baalinke, konne galagalle afiꞌnannikki looso loosate dandiineemmore baala assino!