Reyitinorira Noota Huluullissannokki Hexxo

MITTE 25 diri beetto togo yite borreessitino: “Lossitinoe amaꞌya 1981nni, kaanserete xibbinni reyitu. Ise reyo anenna ledoꞌya lophino qaaqqose lowo geeshsha xissiissinonke. Hatte yannara ani 17 dirite; isi kayinni 11 diriho. Reyose lowo geeshsha mikitaꞌya gantinoe. Iima dancha heeshsho heedhanni no yine rosiinsoonnie daafira, ledose heeꞌrate aneneeto shaa hasiꞌrumma. Ise lowo geeshsha baxeemmate.”

Reyo baxxinanni manna xoqolate wolqa afiˈrase, gariweelo coye labbaꞌnera dandiitanno. Konni daafira shiiro gantannoꞌne wote, reyinoꞌne manni ledo galagaltine hasaawa, osoꞌla hattono bisosi amammada dandiitinannikkita heddinanni wote coyi lowo geeshsha ayirrannoꞌne. Baxxinanni manni iima no yine kulloonniꞌnehura calla, xissiisiraꞌne gattanno yaa diꞌꞌikkino.

Qullaawu Maxaafi kayinni, tennenni horonta baxxitino hexxo amadino. Albaanni laꞌnummonte gede Qullaawa Borro, reyinoꞌne manni ledo iima ikkikkinni koye uullate aana, muli yanna giddo keerunna xalalle woꞌmiteenna layinkimeeshsho xaada dandiitinannita xawissanno. Hattee yannara mannu ooso, coꞌiima ordu keere afidhe hagiidhitanno; layinkitano horonta direyitanno. Mitu manni tenne hexxo, ‘Mulla haaqete halchooti!’ yaara dandaanno.

Tini huluullissannokki hexxo ikkitinota ammantinanni gede assannoꞌnehu maati? Mitte hexxo ammanate, hexxo uyinohu, hattee hexxo wonsha dandaannotanna hasatto noosita buuxa hasiissannoꞌne. Ikkina, reyitinori galagalte lubbote heedhanno yee qaale einohu ayeti?

Yesuusi Kiristoosi 31 M.D. badheessu woggara togo yee qaale eino: ‘Annu reyitinore kayise heeshsho aannonte gede beettuno hasiꞌrihura heeshsho aanno. Konnira, hanni maalaꞌle; waammate giddo noori qaalesi macciishshitanno yanna daggannona.’ (Yohaannisi 5:21, 28, 29) Konni daafira Yesuusi Kiristoosi, miliyoonetenni kiirrannihu reyino manni tenne uulla aana galagale heeꞌranno gedenna Gannate ikkitino uullara hegerera keerunni heeꞌrate kaayyo afiˈranno gede qaale eino. (Luqaasi 23:43; Yohaannisi 3:16; 17:3; Faarso 37:29 ledonna Maatewoosi 5:5 ledo heewisiisse.) Tenne hexxo uyinohu Yesuusi ikkino daafira, uyino hexxo wonshate hasatto noosi yaa dandiineemmo. Kayinni wonsha dandaannoyya?

Yesuusi konne qaale eihunni lame diro woꞌmikki, reyitinore kayisate hasatto noositanna dandaannota, reyitinore kayise leellishino.

“Alaazaari, Amo Kawa Fuli!”

Lowo geeshsha mararsitanno ikkitooti. Alaazaari buuto xiwamino. Roduuwisi Maariyaaminna Maarta, Yesuusi Yordaanosi lagira widoonni heeꞌreenna, ‘Mootichanke baxattohu jaalikki xiwamino’ yee xaansa soyisi. (Yohaannisi 11:3) Lamenti roduuwi, Yesuusi Alaazaari baxannosita afino. Yesuusi xiwaminoha jaalasi laꞌꞌara daa giwiyya? Mayiraatiro afa hoongirono, hakkawontenni Biitaaniya haꞌrikkkinni lame barra hosi.—Yohaannisi 11:5, 6.

Yesuusira xaansa sonkihunni shiima yanna gedensaanni Alaazaari reyi. Yesuusi Alaazaari reyinota afinohura mittore assa hasiꞌri. Yesuusi Biitaaniya iilli wote lubbote jaalisi reyinku shoole barra ikkino. (Yohaannisi 11:17, 39) Yesuusi shoole barra reye keeshshinoha kayisa dandaanno?

Qarooyye ikkitinoti Maarta, Yesuusi dayinota macciishshite gobbara fultu. (Luqaasi 10:38-42 ledo heewisiisse.) Yesuusi ise dadillitino gari mararseennasi togo yee qaale eise: “Rodiikki reyotenni kaꞌꞌanno.” Konni kaꞌaanni kao noota ammantannota kultusita, Yesuusi xawise togo yiise: ‘Kaonna heeshsho aneeti. Ane ammanannota loosunni leellishannohu reyiro nafa galagale heeshshote heeꞌranno.’—Yohaannisi 11:20-25.

Yesuusi waammanniwa iilliti, waammate afiira tuꞌnoonni kincho hoolanno gede manna hajaji. Hakkiinnino, qoonqosi gotti asse huucciꞌrihu gedensaanni, “Alaazaari, amo kawa fuli!” yee hajaji.—Yohaannisi 11:38-43.

Bayichoho noo manni duuchunku waamma xunse laꞌꞌanni no. Hakkiinnino, tunsote giddonni mannu gedeeri fuli. Lekkasinna angasi usurroonni, hattono albisi kafanu uddanonni diwamino gedeenni no. Yesuusino, “Tirtine agurre haꞌrona!” yee hajaji. Kafanu uddano mulqine uulla tungi. Kuni manchi, reyinkunni shoole barra ikkinoho Alaazaariiti!—Yohaannisi 11:44.

Addinta Kuni Ikkinoreenti?

Alaazaari reyotenni kainota kultanno xagge Yohaannisi Wongeelli giddo borreessantino. Tini xagge halaale ikkase taje seekkite buuxissanno. Tini xagge halaale ikkase huluullama, Qullaawu Maxaafi giddo noo maalale duuchanta ikko, Yesuusi Kiristoosi kao nafa huluullamate yaate. Yesuusi kao kaada qole, Kiristaanu ammaꞌno woꞌma kaadate.—1 Qorontoosi 15:13-15.

Noore coyiꞌnummoro, Maganu noota ammantinanniha ikkiro, kao noota ammana diqarrissannoꞌne. Lawishshaho: Mittu manchi reyara albaanni, xaansasi viidiyo kayise worara dandaanno; hakkiinnino isi reyihu gedensaanni fiixisinna jaallasi, woxesinna jajjasi hiissinanniro coyiꞌranna macciishshitaranna laꞌara dandiitanno. Xibbu diri albaanni, viidiyo kayisa dihendannireeti. Xaa yannarano ikkiro, katamu qooxeessinni fafe heeꞌranno mannira, viidiyo kayisate ogimma maalalete. Mannu ooso, Kalaqaanchu kalaqinota sayinsete higge horoonsidhe togoore macciishshinannirenna laꞌnannire kalaqa dandiituro, Kalaqaanchu hakkiinni roore assa didandaanno? Ikkina lubbo kalaqino Magani, reyitino lubbo layinkimeeshsho kalaqa dandaanno yaa gara diꞌꞌikkitino?

Alaazaari reyotenni kaꞌꞌasi, mannootaho Yesuusinna kaote aana noonsa ammana lexxitanno gede assitino. (Yohaannisi 11:41, 42; 12:9-11, 17-19) Qoleno, Yihowanna Beettisi reyitinore kayisate fajjaameeyyenna hasatto noonsare ikkitinota maalaꞌlisanno garinni leellishshanno.

‘Maganu Quqquxamanno’

Yesuusi Alaazaari reyi wote assinori Maganu Beetti lowo geeshsha mararannoha ikkinota leellishanno. Tenne yannara macciishshaminosiri, reyitinore kayisate noosi hasatto leellishanno. Togo yine borreessinoonni: ‘Maariyaami Yesuusi noowa marte affu woyite lekkasira ubbe, “Mootichaꞌya, ati konne heeꞌroottoha ikkoommero, rodiiꞌya reyannokkinka,” yitu. Yesuusi Maariyaaminna ledose dayino Yihudooti wiꞌlitanna lae dadillenna ayyaanisinni masillaawe, “Hiikko waantinoonni?” yee xaꞌmi. Insano, “Mootichanke, amo lai,” yitu. Yesuusino wiꞌli. Konnira Yihudootu, “Hiitto asse baxannosiro laꞌe!” yitu.’—Yohaannisi 11:32-36.

Konni qummeeshshi aana Yesuusi leellishino mararro sasu qaalinni xawinsoonni: “dadilli,” “ayyaanisinni masillaawi,” hattono “wiꞌli.” Tenne maalaꞌlissanno ikkito borreessini yannara horonsiꞌnoonni qaalla, Yesuusi muxxete jaalisi Alaazaari reyonni lowo geeshsha xissiisiꞌrinotanna Alaazaari rodoo wiꞌlitanna laita illesira hindiiddo woꞌmitinota leellishshanno.a

Lowo geeshsha maalaꞌlisannohu, albaanni Yesuusi lame woloota manna reyotenni kayisasiiti. Hattono Alaazaari kayisate mixo noosi. (Yohaannisi 11:11, 23, 25) Ikkeennano, ‘wilino.’ Konni daafira, Yesuusi reyitinore kayisasi iimi uullanni kae assannore diꞌꞌikkino. Tenne yannara leellinonte gede, mararrosinna godowinni xissiisirasi, reyo abbitanno gawajjo hoolate lowo hasatto noosita leellishshanno.

Yesuusi ‘Maganu Yihowa akatira halaalaancho lawishsha’ ikkinohura, iimi Anninkewiinni agadhineemmori isi assinoriwiinni ajinore diꞌꞌikkino. (Ibiraawuyaani 1:3) Yihowa umisi reyitinore kayisate noosi hasatto lainohunni, ammanamino manchi Iyyoobi togo yiino: ‘Manchu reyiro galagale heeꞌranno? Woshshattoe; ani umiꞌya qoleemmohe. Angakki loosono quqquxamatto.’ (Iyyoobi 14:14, 15) “Quqquxamatto” yine tirroonnihu hundihu Ibiraawootu afii qaali, Maganu sinsinnaawannotanna halchannota leellishanno. (Kalaqo 31:30; Faarso 84:2) Kageeshsha laꞌnummonte gede, Yihowa reyitinore kayisate halcho noosi.

Addinta kaote hexxo ammana dandiineemmo? Ee dandiineemmo; korkaatuno Yihowanna Beettisi reyitinore kayisate hasattonna dandoo noonsahuraati. Togo yaa mayyaate? Reyinoꞌnehu baxxinanni manni ledo tenne uulla aana xa nootenni lowo geeshsha woyyitino heeshsho giddo galagaltine xaada dandiitinanni yaate!

Hunda manchi beetto hagiirsiissanno basera kalaqino Magani Yihowa, tenne uulla galagale Gannate assate qaale eino. Tenne assannohuno, xa ayirrinyu basera noohu Yesuusi Kiristoosi anga noo Gashshootisi widoonniiti. (Kalaqo 2:7-9; Maatewoosi 6:10; Luuqaasi 23:42, 43) Hattee dagganno Gannatera mannu ooso, gawalo nookkita, xissonna xibbu nookki heeshsho ragidhe hagiidhitanno. (Ajuuja 21:1-4; Iyyoobi 33:25 ledo heewisiisse; Isaayaasi 35:5-7) Mimmito giwa, sircho babbada, gosa gosanniwa giwamanna miinju miico diheedhanno. Maganu Yihowa, Yesuusi Kiristoosi horoonsiꞌre reyitinore kayisannohu togo keeru woꞌmino uulla aanaati.

Konni gafira hanafote qummi assinoonnite Kiristaancho manchorano xa tini hexxo noose. Amase reyituhunni lowo diri gedensaanni, Yihowa Farciꞌraasine Qullaawa Maxaafa seekkite xiinxallitanno gede kaaꞌlitinose. Ise togo yitino: “Kaote hexxore rosummahu gedensaanni wiꞌlumma. Amaꞌya ledo galagale xaadeemmata afaꞌya lowo geeshsha tashshi assitue.”

Kiꞌneno reyinoꞌnehu baxxinanni manni ledo galagaltine xaadate halchitinanniha ikkiro, Yihowa Farciꞌraasine kiꞌnerano tini huluullissannokki hexxo heedhannoꞌne gede rosiissaꞌnera hasidhanno. Qooxeessiꞌnera noota Gambooshshu Addaraashe martine, woy qoola 32 aana noo teesso giddo mule ikkannoꞌnewa sokka borreessitiniro insa ledo xaada dandiitinanni.