Kuni qummeeshshi ammanate mitiinsannohe? Mitiinsannoheha ikkiro, konne coye wodanchi: Batinynye maatera hasiisannore shiqishannohu minaannaati, kuni manchi reyanno wote maatesi qarru aana ubbanno. Mito wote galtesinna oososi sagale hidhitanno woxe nafa hoogganno. Diinnasi maatesi gawajjitara dandiitanno. Hanni umokki togo yite xaꞌmi: ‘Kuni manchi ayyaanaame alamera heeꞌrannoha ikkiro, maatesira hasiisannore assa mayira disufanno? Maatesi bushuullu manni gawajjonni mayira diagarannno?ˈ Korkaatuno qummeeshshu yinoti halaale ikkitinohuraati. Kuni manchi heeshsho noosikkiho mittoreno diafannoho.—Faarso 115:17.

Togo yaa reyitinori galagalte heeshshote diheedhanno yaate? Deeꞌni. Kaonnire gedensaanni hasaambeemmo. Xa kayinni reyitino manni ati assitanni noottore diaffanno yaate. Laꞌahera, macciishshitahera woy coyishishshahera didandiitanno. Kaaꞌlitahera ikko gawajjitahera dandiitannnokkihura insa waajja dihasiissannohe.—Mekibibi 9:4; Isayyaasi 26:14.

Qullaawu Maxaafi batinynye ayyaanaame kalaqama noo gede xawisanno. Yihowa umisi ayyaanaho.—Yohaannisi 4:24; 2 Qorontoosi 3:17, 18.

Kalaqamu baalu heeꞌrara albaanni Yihowa callasi heeꞌrino. Hakkonni gedensaanni ayyaanaame kalaqama ikkitinore sokkaasine kalaqi. Insano wolqatenna qarummate mannu alidireeti. Yihowa batinynye sokkaano kalaqino; Maganu soqqaamanchi Danieeli, ajuujate, xibbe miliyoone ikkitanno sokkaano laino.—Daanieeli 7:10; Ibiraawuyaani 1:7.

Maganu uulla kalaqara albaanni sokkaasine kalaqino. (Iyyoobi 38:4-7) Insa giddonni mittu nafa uullate aana heeꞌri gedensaanni reyinohu dino.

Yihowa kalaqinori duuchchanti ayyaanu kalaqama danchuulleho. Mittu sokkaanchi kayinni yannate gedensaanni bunshete widira higi. Isino Sheexaane Daawuloosiiti. Sheexaanu uullate aana noo manni Yihowa magansiꞌrante iso magansiꞌrara hasiꞌri. Ikkinorichchino konni worroonni nooho:

Edenete gannatete giddo, coommanno guma laaltannoti batinynye haqqe no. Yihowa Addaamiranna galtesi Heewanira, tenne haqqe guma hasidhu gede ita dandiitannota kulinonsa. Ikkollana, Maganu gumase ittannokki gede kulinonsati mitte haqqichcho no. Tenne haqqichcho guma ittiniro reyitinanni yiinonsa.—Kalaqo 2:9, 16, 17.

Mitto barra Heewani callase heedheenna hamashshu coyishiishise. Addinta, coyiꞌranni noohu hamashsho ikkikkinni lawise coyiꞌranni noohu Sheexaane Daawuloosiiti. Sheexaanu Heewanira ittooti yinoonni guma itittaro Maganu gede xiinxalla ikkattanna direyatta yiise. Yinoseri kayinni kaphphoho. Ikkollana Heewani Sheexaane ammante hoolloonni guma ittu. Hakkonni gedensaanni keeshshite Addaamirano uyitu isino iti.—Kalaqo 3:1-6.

Tenne halaalaancho xaggenni Sheexaanu finqilanna kaphphaancho ikkasi ronseemmo. Heewanira Maganu hajajo diigittaro direyatta yee kulinose. Kulinoseri kayinni kaphphoho. Iseno ikkito Addaami reyino. Sheexaanu cubbo loosino daafira reyasi digattanno. Ikkollana