techcho geeshsha heeshshote keeshshe mannu ooso sorisiisanni no. Xaa geeshsha kaphphosi agurikkinni mannu Maganu seera diiganno gede assate woꞌnaalanni no.—Yohaannisi 8:44.

Wole Sokkaanono Finqiltu

Yannate gedensaanni wole sokkaanono bunshete widira higgu. Kuriuu sokkaano uullate aana noo xumuulle meento laꞌe insa ledo siimu xaadooshshe assa hasidhu. Konni daafira uullara dagge mannu maala uddidhe meento uminsara adhitu. Tini ikkito Maganu hedo ledo sumuu yitannokkite.—Kalaqo 6:1, 2; Yihudi 6.

Tenne sokkaano ikkito mannu oosora buutote qarra iillishshino. Kuriuu sokkaano adhitu meenti ooso ilino, ikkollana tini ooso mannu ilanno gedeere diꞌꞌikkitino. Lophphitu gedensaanni finqilaasine, xagaraammanna jigeeyye ikkitu. Konni gedensaanni uulla finqillete woꞌmitinohura Yihowa jawaatu lolahinni bushuulle manna hunate muri. Konni lolahinni gattinori keeraanchu Nohinna maatesi callaati.—Kalaqo 6:4, 11; 7:23.

Bushuulle sokkaano kayinni ayyaanaame alame higgino ikkinnina, direyitino. Ikkollana qorichchishantino. Maganu maate ikkitino keeraano sokkaanowa higgaranna hattono mannu maala uddidhara difajjinooninsa. Hakkii saeno bayira yoo barra reyitanno.—2 Pheexiroosi 2:4; Yihudi 6.

Sheexaanu Iiminni Tugami

Kumunna honsu xibbi diri hanafo qooxeessira, iima olu kaino. Qullaawu Maxaafi kifile ikkinohu Ajuujate maxaafi ikkinore xawisanni: “Hakkunni gedensaanni gordoho iima olu kai; Mikaeeli [reyotenni kainohu Yesuusi Kristoosinna] isi sokkaano dhudhuufunna [Sheexaanu] sokkaanosi ledo olantu. Coyella kayinni dhudhuufunna sokkaanosi qeelantu. Hakkunni gedensaanni gordu iima bayichcho afidhara didandiitino. Lowo dhudhuufino woro hige tugami isino manna duuchcha soꞌrisiisannohu Durriisa woy Sheexaane yaamame woshshamannohu biꞌre hamashshooti. Isino iiminni uullate aanira tugami sokkaanosino isi ledo tugantu” yaanno.

Tini ikkito marichchi guma abbitu? Kuni maxaafi ikkinore lede: ‘Konnira gordunna giddosi heedhinanniri duuchchu hagiidhe!ˈ yaanno. Konni gedensaani bushuulle sokkaano iima heeꞌra dandiitinnokkihura danchuullu sokkaano hagiidhitino. Ikkollana uullate aana heeꞌranno mannina? Qullaawu Maxaafi: ‘Uullatenna baaraho kayinni bayisibao! Hakkuno mayiraati? Sheexaanu shiima yanna gattinota afe lowo hanqinni kiꞌnewa dirrinonaˈ yaanno.—Ajuuja 12:7-9, 12.

Addaho, Sheexaanunna bushuullu miillasi uullate aana noo manna sorisiissanninna buutote qarra iillishshanni no. Kuriuu bushuullu sokkaasine durriissate yaamantanno. Duuchchunku bushuullehonna Maganu diinnaati.

Sheexaanunna durriissa ayee woteno xagaraammahonna gawajjitannoreeti. Biꞌre Sheexaanu ammanamino manchi Iyyoobita saadanna soqqamaanosi shiino. Hakkonni gedensaanni “jawaata bubbe” kayise Iyyoobi ooso noo mine diige tonne oososi shiino. Qoleno Sheexaanu Iyyoobi “lekkate qubbichinni kayise umisi dananchi geeshsha buuto madiissisi.”—Iyyoobi 1:7-19; 2:7.

Yesuusi uulla noo yannara, durriissa mito mito manna duuddootanna balloota assitino. (Maatewoosi 9:32, 33; 12:22) Mittu manchi bisosi kinnatenni biciꞌranno gede assitino. (Maarqoosi 5:5) Hakkii saeno mitto beetto raaranno, uullate gaꞌne cancanamannonna ‘fittifatanno’ gede assitino.—Luqaasi 9:42.

Yannankerano, Sheexaanunna durriissa lubbo shaate badhe dihigganno. Isinni, iiminni tugantu yannanni kayise bunshete assootinsa lexxanni haꞌrino. Alamete doyichchonni shiqqanno rippoorte xagarronsa buxisiissanno. Mito mito manna xissote gawajjitanno. Woloota hashsha goxichcho hoolte qarrissanno woy waajjishshanno haaqenni bararraaqissanno. Woloota kayinni siimu xaadooshshinni batteessitanno. Ledeno woloota machcharaarsitanno, lubbo shitanno woy umonsa shitanno gede assitanno.

Surinaamete heedhannotera Lintina yinannitera, durriisu woy bushu ayyaani, 16 maatese miilla shiinonna iserano 18 diro woꞌma bisisenna surrese aana gawajjo illishinose. Illinoserichchinni kaꞌe durriissa “hasidhannore maahoyye yaannokki mancho shita geeshsha gawajja hagiirsiissannonsa” yitino.

Ikkollana Yihowa isira soqqantannore Sheexaanu gawajjonni agara dandaanno.—Lawishsha 18:10.