Masaalaanote Haꞌruma Hadhe—Hose
1. Ninkeneeto mayine xaꞌmineemmo woti no?
1 ‘Yihowara xa maa kakkalokka?’ Isi danchummanna maarosi batinye heeshshi gotti assitine heddine kiꞌneneeto tenne xaꞌmo xaꞌmitine egentinoonniha ikkara dandaanno. (Far. 103:2-4; 116:1) Hose, umisi xiqime aguranno gede assannosire ikkirono Yihowa hajajinosire maahoyye yee assino. Hose haꞌruma haꞌra dandiineemmohu hiittoonniiti?
2. Sabbakate loosonke lainohunni Hose lawishsha harunsa dandiineemmohu hiittoonniiti?
2 Qarrissanno Yannara Sabbakke: Hose sokka borreessinohu roorenka Isiraeelennite tonne-gaꞌre amadino gashshoote hunda noo manniraati; hatte yannara halaalu magansiꞌra raaphite baꞌꞌate no. Nugusu Iyyoorbiaami Layinkihu Yihowa albaanni bushare assino, hattono Iyyoorbiaami Umihu jammarsiisinoti siitu magansiꞌra halaꞌlitanno gede assino. (2 Neg. 14:23, 24) Insanni aante mookkino nugussa tonne-gaꞌre amadino gashshooti 740 K.A. uwa geeshsha ayyaanaamittetenni maaeele keeshshano gede assitino. Kaphu Magansiꞌra batidhinoha ikkirono, Hose ajayi ajeenna 59 diro ammaname masaalaancho ikke soqqamino. Ninkeno mannu kulleemmore ashshiishshiro woy taqaawwamiro nafa, diru baala ammanamme soqqamate murciꞌnoommo?—2 Xim. 4:2.
3. Hose heeshsho Yihowa maarannoha ikkinota leellishshannohu hiittoonniiti?
3 Yihowa Maaro Hedde: Yihowa, Hose “foortanno mancho” adhanno gede hajajinosi. (Hos. 1:2) Galtesi Gomeeri mitto qaaqqo iltinosiha ikkirono, gedensaanni higge lame anna anfoonnikki ooso iltinoha ikkikki digatino. Hose galtesi baddalo gatona yee saꞌꞌate maahoyye yaasi, yiinotenni hosannokkihu Isiraeelete manni maaro eanno wote Yihowa maarannota leellishshanno. (Hos. 3:1; Rom. 9:22-26) Yihowa maaro duuchunku gari mannira kulate uminke doorsha agurreemmo?—1 Qor. 9:19-23.
4. Yihowara shiqishiꞌra dandiineemmoti mite mite kakkalo hiitteeti?
4 Mite Yihowa soqqamaano soqqanshote roore yanna afiꞌrate yite lowo woxe afidhanno loosonsa agurtino. Wolootu kayinni Maganu Mangiste looso loosate yite adhantukki heeꞌrate, adhantinori kayinni ooso iltukkinni heeꞌrate wossaꞌnitino. Hose heeshshore hendeemmo wote, ‘Ane ikkoommoro isi assinore asseemmoha dilawannoe’ yineemmoha ikkara dandaanno. Ikkollana, Yihowa maarora noonke galati lexxanni haꞌri kiiro, hattono jawaante afiꞌrate qullaawa ayyaanasi addaxxineemmoha ikkiro, Hose gede ninkeno Isira dandiineemmo yine hendeemmokki garinni soqqama dandiineemmo.—Mat. 19:26; Fil. 2:13.