“Maganu Qaalinni Ronseemmo Roso” Yitanno Buukileete Hasaawa Jammarate Horoonsidhe
1. Saihu qoqqowu gambooshshira hiittee borro adhinoommo?
1 Saihu qoqqowu gambooshshira “Maganu Qaalinni Ronseemmo Roso” yitanno buukileete adhinoommo. Tenne haaro buukileete soqqanshote yannara horoonsiꞌneemmoha hasaawu bitima qixxaawate horoonsiꞌra dandiineemmohu hiittoonniiti? Tenne borrora Korkaata Xawisa yaanno maxaafi gede addi addi hajo daafira Qullaawu Maxaafi mayyee xawisannoro kultanno xiqisubba qummi assinoonni daafira hasaawa jammarate lowo geeshsha kaaꞌlitanno.
2. “Maganu Qaalinni Ronseemmo Roso” yitanno buukileete soqqanshote horoonsiꞌra dandiineemmohu hiittoonniiti?
2 Buukileetete noota 8ki xaꞌmo doorte togo yaa dandaatto: “Techo qachinke manni ledo mitte hajore kayinse hasaambanni heeꞌnoommo; korkaatuno lowo manni ‘Mannu oosora iillanno qarra abbannohu Maganoho?’ yee hedanno. [Mitu qooxeessira xaꞌmo qaete annira leellisha woyyitanno.] Tennera ati mayyaatto? [Dawaro qola geeshsha agari.] Qullaawu Maxaafi tenne xaꞌmora dawaro dancha gede asse qolanno.” Hakko qummi assinoonni xiqisubba giddonni mitte woy lame nabbabbe xawisi. Qaete anni hasatto noosiha ikkiro, buukileetete giddo 20 xaꞌmo noota leellishshesi tenne xaaddinanni wote hiittee xaꞌmo daafira hasaawa hasiꞌrannoro doodhanno gede assi. Woy hasaabbinoonni coye roore xawissannota manna xiinxallisate horoonsiꞌneemmo borruwa giddo mitte ela dandaatto.
3. Kiristinnu ammaꞌnonni baxxitino ammaꞌno noonsa manni heeꞌranno killilera sabbankeemmo wote, “Maganu Qaalinni Ronseemmo Roso” yitanno buukileete horoonsiꞌne hasaawa jammara dandiineemmohu hiittoonniiti?
3 Kiristinnu ammaꞌnonni baxxitino ammaꞌno noonsa manni heeꞌranno killilera sabbankeemmo wote 4kiti, hattono 13 kayise 17 geeshsha noo xaꞌmuwa roore kaaꞌlitara dandiitanno. Lawishshaho, 17ki xaꞌmo hunda worroonni assaawe horoonsidhe togo yaa dandaatto: “Techo mannaho maatensara kaaꞌlannore haransine kullanni heeꞌnoommo. Yannankera maatete addi addi qarri tuncu yaannonsa yiniro, ati tennera sumuu yaatto? [Dawaro qola geeshsha agari.] Batinye adhamino manna, “Minaama minaannase lubbora ayirrisa hasiissannose” yitanno amaale lowonta kaaꞌlitinonsa. [Tenne assaawe Efesooni 5:33 aaninni haaꞌnoonnita kula dihasiissannohe; hasaabbanni noottohu meyata ledo ikkiro, Efesooni 5:28 aana noo assaawe umikki yaattonni coyiꞌra dandaatto.] Tenne amaale harunsa maatete kaaꞌlitannoha lawannohe?”
4. Kiristinnu ammaꞌnonni baxxitino ammaꞌno noosi manchi ledo hasaabbe jeefisatto wote maa assa dandaatto?
4 Hasaawa jeefissinara albaanni wole wote xaaddine hasaawate dinye amadi. Wole wote xaaddinanni wote, umi barra hasaabbinoonni xaꞌmo hunda qummi assinoonnita wole xiqisubba horoonsiꞌra dandaatto. Tenne lowonta kaaꞌlitanno amaale Qullaawu Maxaafi giddonni haaroottota ikkitinota kula danchate yite hedatto yannara kula dandaatto. Konni albaanni qaete anni ledo hasaabbinanna laootto garinni woy Qullaawu Maxaafira noosi lao hedde, iso baxissara dandiitanno yite hedatto borro uyisi.—Sadaasa 2013nnite Maganu Mangiste Soqqanshonkera ledote qoolira noo assaawe lai.